Samueri Wokutanga
8 Samueri paainga acembera, wakagadza ana ake kuti agare atongi mu Israeri. 2 Mwana wake we dangwe waizwi Joeri, uye wecipiri waizwi Abhiya; awona ainga ari atongi ku Bheeri-sebha. 3 Asi ana ake ainga asikateedzeri muezaniso wake; aida maningi zve mageni, aitendera kudyekerhwa, uye ainga asikaiti zve unatsi.
4 Nokuhamba ke nguwa, akuru ese e Israeri akaungana uye akaenda kuna Samueri ku Rama. 5 Awona akati: “Onai! Imwimwi macembera, uye ana enyu aaripi kuhamba mu makwanza enyu. Zvino, gadzai mambo kuti atitonge, hingana zvakaita madzinza amweni ese.” 6 Asi paakabhuya kuti: “Gadzai mambo kuti atitonge,” izvona zvakatsukwarisa* Samueri. Hino Samueri wakaita munamato kuna Djehovha, 7 uye Djehovha akabvunza Samueri kuti: “Ita zvese zvauri kukumbirhwa no anhu; ngokuti aaripi kuramba iwewe, asi ndini waari kuramba hinga mambo. 8 Awona ari kuita zvaakagara eciita kubvira pa zuwa randakaabvisa mu nyika ye Edjipitu dakara na nyamasi; awona anogara ecindisiya uye eciseenzera anamwari amweni, uye ndizvo zvaari kuita na iwewe. 9 Parizvino, purutana zvaari kukubvunza. Asi, nyasa kuangwadza; apanganidzire zvese zvaacakumbirhwa na mambo ucaatonga uye zvaanodikana kumupasa.”
10 Hino, Samueri wakaziisa masoko ese a Djehovha ku anhu aimukumbira mambo. 11 Iyena wakati: “Mambo ucatonga pakati penyu ucagara no citenderhwa ce kukumbira zviro izvi: Iyena ucatora ana enyu kuti aseenze mu ngoro dzake dze hondo, ahambise makavharo ake, uye anganani awo acadikana kugogoma mberi ke ngoro dzake. 12 Uye iyena ucagadza anganani hinga atungamiriri e zvikwata zve 1000, amweni hinga atungamiriri e zvikwata zve 50, amweni acadikana kurima minda dzake uye kukorora zvirimwa zvake, kugadzira zviro zvokurhwa nazvo ku hondo uyewo zviro zvicaseenzeswa mu ngoro dzake. 13 Iyena ucatora ana enyu e anakadzi kuti aseenze pa kugadzira maperfume,* kubika zvekurhya, uye kubika pau. 14 Iyena ucatora minda yenyu yakanakisisa, miuvha yenyu, miorivhi yenyu, uye acazvipasa ku aseenzi ake. 15 Ucatora cegumi ce zvirimwa zve minda yenyu uye miuvha yenyu, uye ucazvipasa ku atungamiriri e nyumba ya mambo uye ku aseenzi ake. 16 Uye ucatora aseenzi enyu e anakadzi no e anarume, n’ombe dzenyu dzakanakisisa, no madhongi enyu, uye ucazviseenzesa pa mabasa ake. 17 Ucatorawo cegumi ce mabira enyu, uye imwimwi mucagara aseenzi ake. 18 Ricaguma zuwa ramucacema mecikumbira rubetso nge daa ya mambo wamadzisanangurira, asi Djehovha aazomudairii.”
19 Asi anhu aazi kuda kuzwa zvakabhuiwa na Samueri, uye akati: “Azvina ndaa, catasanangura i kugara na mambo kuti atitonge. 20 Ngokudaro ticaezana no madzinza amweni ese. Mambo wedu ucatitonga, ucatitungamirira uye ucatirhwira mu hondo.” 21 Mumasure me kuzwa zvese zvakabhuiwa no anhu, Samueri wakazviphinda kuna Djehovha. 22 Djehovha akabvunza Samueri kuti: “Purutana zviri kubhuya anhu, uye gadza mambo kuti aatungamirire.” Hino Samueri wakabvunza anarume e Israeri kuti: “Umwe na umwe wenyu ngaahwirire ku thaundi rake.”