Samueri Wokutanga

5 Afiristiya paakatora Areka ya Mwari we zvirokwazvo, akabva nayo ku Ebhenezeri oenda nayo ku Ashidhodhi. 2 Afiristiya akatora Areka ya Mwari we zvirokwazvo uye akaenda nayo mu nyumba* ma mwari wawo Dhagoni uye akaikanda pa muceto pa Dhagoni. 3 Aashidhodhi paakamuka comacibesi-besi pa zuwa rakazoteera, mwari wawo Dhagoni wainga akambwera akaringira pasi pamberi pe Areka ya Djehovha. Ngokudaro, akatora mwari wawo Dhagoni omuhwirinza pa mbuto yake. 4 Pa zuwa rakazoteera paakamuka comacibesi-besi, mwari wawo Dhagoni wainga akambwerazve akaringira pasi pamberi pe Areka ya Djehovha. Musoro no nyara dza Dhagoni zvainga zvagurhwa-gurhwa uye zvainga zviri padhuze no musuwo. Rainga rasara basi dii rakaita hinga howe.* 5 Ndiyo ndaa dakara nyamasi, apristi a Dhagoni uye ese anopinda mu nyumba ya Dhagoni ku Ashidhodhi aatsiki pa mbuto yakambwerera Dhagoni pa musuwo.

6 Nyara ya Djehovha yakatambudza Aashidhodhi, uye iyena akaatsakatisa eciita kuti anhu e ku Ashidhodhi uye e mu nharaunda yaro abude mapundu* kunobuda psvina. 7 Anarume e ku Ashidhodhi paakaona zvaiitika, akati: “Areka ya Mwari we Israeri aidikani kugara na isusu, ngokuti nyara yake iri kurhwisa isusu na mwari wedu Dhagoni.” 8 Hino akadainzisa atungamiriri ese e Afiristiya uye akaabvunzisa kuti: “Tinodikana kuitei no Areka ya Mwari we Israeri?” Awona akadaira kuti: “Areka ya Mwari we Israeri inodikana kutorhwa yoendeswa ku Gati.” Ngokudaro, akatora Areka ya Mwari we Israeri oiendesa ikona.

9 Mumasure me kuenda nayo ikona, nyara ya Djehovha yakarhwisa thaundiro, yeciita kuti anhu athye. Iyena wakarhwisa anhu e mu thaundi, kubvira ku mwana mudoko dakara ku mukuru, uye akaita kuti abude mapundu* kunobuda psvina. 10 Hino akaendesa Areka ya Mwari we zvirokwazvo ku Ekroni, asi Areka ya Mwari we zvirokwazvo payakaguma ku Ekroni, agari e ku Ekroni akakhuwa eciti: “Awona aunzisa Areka ya Mwari we Israeri kuno kuti auraye isusu no anhu edu!” 11 Ngokudaro, akatuma atumwa uye akaunganidza Afiristiya ese uye akati: “Budisai Areka ya Mwari we Israeri; iyona ngaihwirire kayabva, kuti isusu uye anhu edu tisauraiwe.” Ngokuti kuthya kufa kainga kabararika mu thaundi rese; nyara ya Mwari we zvirokwazvo yainga yaatambudza maningi, 12 uye anhu ainga asikazi kufa, ainga abuda mapundu* kunobuda psvina. Uye kudeketera ke anhu e mu thaundi kainga kecikwidza ku denga.