Samueri Wokutanga
4 Uye soko ra Samueri rakabararika mu Israeri yese.
Hino Israeri yakabuda kuti iende koorhwa hondo no Afiristiya; Aisraeri akawaka musasa dhuze no Ebhenezeri, uye Afiristiya ainga ari ku musasa ku Afeki. 2 Afiristiya akabuda akagadzirira kurhwisana no Aisraeri. Asi kurhwisana ikona akuzi kuhambira zvakanaka Aisraeri, ngokuti akanyiswa no Afiristiya, zvekuti Afiristiya akauraya anhu anokwana 4000 ku mbuto yaairhwa. 3 Masurudado paakahwirira* ku musasa, akuru e Israeri akati: “Ngei Djehovha atendera kuti tinyiswe* no Afiristiya nyamasi? Ngatiende kootora Areka ye Citenderano ya Djehovha iri ku Siro, kuitira kuti iyona igare na isusu uye itiponese mu nyara dze azondi edu.” 4 Ngokudaro, akatuma anarume kuti aende ku Siro, uye akaunzisa Areka ye Citenderano ya Djehovha we anyahondo, uwo akagara pa cigaro ce umambo pamusoro pe* makerubhi. Uye Ofini na Fineya, ana airi a Eri, akaperekedzawo Areka ye Citenderano ya Mwari we zvirokwazvo.
5 Areka ye Citenderano ya Djehovha payakapinda mu musasa, Aisraeri ese akatanga kukhuwa, zvekuti nyika yakatekenyeka. 6 Afiristiya paakazwa kukhuwa uku, akati: “Ngei anhu ari mu musasa we Ahebheru ari kukhuwa kudaro?” Pakupedzesera akaziya kuti Areka ya Djehovha yainga yaguma mu musasa. 7 Afiristiya akathya uye akati: “Mwari aguma mu musasa!” Akatizve: “Tino nyathwa, ngokuti zviro zvakadai azvisati zvakamboitika! 8 Tino nyathwa! Ndiani ucatiponesa mu nyara dza Mwari uu ano simba? Uu ndiye Mwari akatsakatisa Aedjipitu no matambudziko akasiyana-siyana ku renje.* 9 Garai no ushingi, pangidzai kuti muri anarume imwimwi Afiristiya, kuti musaseenzere Ahebheru hinga kuseenzera kaakamuitai. Pangidzai kuti muri anarume uye rhwisai!” 10 Ngokudaro, Afiristiya akarhwisa uye akanyisa Aisraeri, zvekuti akatiza umwe na umwe wawo ecienda mu tenda rake. Anhu akauraiwa ainga akawanda maningi; masurudado* anokwana kuita 30 000 e Israeri akauraiwa. 11 Kusiya izvona, Areka ya Mwari yakatorhwa, uye Ofini na Fineya ana airi a Eri, akafa.
12 Mwanarume umweni we ka Bhenjamii wakabva ecigogoma ecibva ku mbuto yaiizirhwa hondo uye wakaguma zuwa irona ku Siro, ano macira akamweka uye no mavhu mu musoro. 13 Mwanarume uu paakaguma, Eri wainga akagara pa kadera pa muceto pe gwanza eciringira-ringira, ngokuti mwoyo wake waitetemera maningi nge ndaa ye Areka ya Mwari we zvirokwazvo. Mwanarumewo wakapinda mu thaundi kuti aziise zvainga zvaitika, zvekuti thaundi rese rakatanga kukhuwa. 14 Eri paakazwa kukhuwa uku, wakabvunzisa kuti: “Kukhuwa uku nge kei?” Hino mwanarume iyena wakagogoma ecienda kuna Eri kuti amupase ciziiso ici. 15 (Eri wainga ano makore 98, uye madziso ake ainga asikacaoni.) 16 Hino mwanarume iyena wakati kuna Eri: “Inini ndiri kubva ku mbuto iri kuizirhwa hondo! Ndatotiza ikona nyamasi.” Eri wakamubvunzisa kuti: “Cinyi caitika mwana wangu?” 17 Mwanarume wakaunzisa masoko wakati: “Israeri yatiza Afiristiya uye anyahondo* anyiswa; uye kusiya izvona, ana enyu airi Ofini na Fineya afa, uye Areka ya Mwari we zvirokwazvo yatorhwa.”
18 Pa nguwa yaakabhuya ngezve Areka ya Mwari we zvirokwazvo, Eri wakambwera pa kadera ngece sure padhuze no musuwo mukuru uye wakaguka mutsipa uye ofa, ngokuti iyena wainga wacembera uye wairema. Iyena wainga atonga Israeri ke makore 40. 19 Murora wake, mukadzi wa Fineya wainga ano pamwiri uye wainga aadhuze no kuda kubara. Paakazwa kuti Areka ya Mwari we zvirokwazvo yainga yatorhwa uye kuti cezani ake uye mwamuna wake ainga afa, iyena wakakotama uye ciriporipoco wakarhwadziwa nge kuda kubara uye wakabara. 20 Paainga aakufa, anakadzi ainga anaye akati: “Usathye, ngokuti iwewe wabara mwana we mwanarume.” Iyena aazi kudaira kana kuzvibhara.* 21 Asi iyena wakadudza mwanewo zina rokuti Ikabhodhi,* uye wakati: “Rukudzo rabuda pakati pe Israeri uye rataphwa.” Iyena wakareketa izvona ngokuti Areka ya Mwari we zvirokwazvo yainga yatorhwa uye ngokuti cezani ake no mwamuna wake ainga afa. 22 Iyena wakati: “Rukudzo rabuda pakati pe Israeri uye rataphwa, ngokuti Areka ya Mwari we zvirokwazvo yatorhwa.”