Samueri Wokutanga
3 Pa nguwa iyona, murumbwana uu Samueri waiseenzera Djehovha pamberi pa Eri. Asi mu mazuwa awona, soko ra Djehovha rainga risikacanyanyi kuzika; zviono zvainga zvisikacanyanyi kuoneka maningi.
2 Zuwa rimweni, Eri wainga akawata pa mbuto yaaiwatira mazuwa ese, uye madziso ake ainga aakuremba; iyena wainga asikacanyasi kuona zvakanaka. 3 Cibani ca Mwari cainga cisati cadzimiswa, uye Samueri wainga akawata mu tempro* ya Djehovha, umo mainga muno Areka ya Mwari. 4 Hino Djehovha akadainza Samueri. Iyena wakadaira kuti: “Ndiri pano.” 5 Iyena wakagogoma dakara kuna Eri uye wakati: “Ndiri pano; mandidainza here?” Iyena wakadaira kuti: “Haiwa, andizi kukudainza. Hwirira hako koowata.” Ngokudaro, iyena wakahwirira uye wakawata. 6 Djehovha akamudainzazve eciti: “Samueri!” Hino Samueri wakamuka, woenda kainga kuna Eri uye wakati kaari: “Ndiri pano, ngokuti imwimwi mandidainza.” Asi iyena wakati: “Andizi kukudainza mwana wangu, hwirira hako koowata.” 7 (Samueri wainga asati aakuziya Djehovha, uye soko ra Djehovha rainga risati rakambouya kaari.) 8 Uye Djehovha akamudainzazve kecitatu eciti: “Samueri!” Ngokudaro, iyena wakamuka, woenda kuna Eri uye wakati: “Ndiri pano, ngokuti mandidainza.”
Hino Eri wakaziya kuti wainga ari Djehovha ainga ecimudainza. 9 Ndiyo ndaa, Eri wakati kuna Samueri: “Enda koowata; kana iyena akakudainzazve, daira kuti: ‘Reketai Djehovha, ngokuti museenzi wenyu uri kupurutana.’” Uye Samueri wakaenda koowata pa mbuto yake.
10 Mumasure mazvo, Djehovha akamudainzazve hinga zvaaiita mu nguwa dzimweni eciti: “Samueri, Samueri!” Uye Samueri wakadaira kuti: “Reketai henyu, ngokuti museenzi wenyu uri kupurutana.” 11 Djehovha akati kuna Samueri: “Ndicaita ciito mu Israeri cekuti uya ucazwa nge zvazvo ucatsukwara. 12 Pa zuwa irona, ndicaunzisira Eri zvese zvakashata zvandakabhuya ngezve nyumba yake, kubvira pano cokutanga dakara cokupedzesera. 13 Mubvunze kuti ndicatonga nyumba yake nge cishaishi caanonyasa kuziya kamare, ngokuti ana ake ari kutuka Mwari, asi iyena aaripi kuasumurura. 14 Ndiyo ndaa, ndakapikira nyumba ya Eri kuti cishaishi ce pa nyumba ya Eri acizofudzwi peciseenzeswa cibairo kana mipiro.”
15 Samueri wakawata dakara comacibesi; hino wakafungura misuwo ye pa nyumba ya Djehovha. Samueri wainga ecithya kubvunza Eri ciono caainga apangidzwa. 16 Asi Eri wakadainza Samueri eciti: “Samueri mwana wangu!” Iyena wakadaira kuti: “Ndiri pano.” 17 Eri wakabvunzisa kuti: “Zvinyi zvaakubvunza? Ndapota, usandifisire ciro. Mwari ngaakuphanice uye ngaazviite nge mushobo unorhwadza kana ukandifisira soko rimwe basi pa zvese zvaakubvunza.” 18 Ngokudaro, Samueri wakamubvunza zvese uye aazi kumufisira ciro. Eri wakati: “Ndi Djehovha. Ngaaite zvakamunakira.”
19 Samueri wakarumbwa ecikura, uye Djehovha wene ainga anaye uye aazi kuita kuti soko ripi haro pa masoko ese aakabhuya ritame kudzadzika.* 20 Aisraeri ese, kubva ku Dhani dakara ku Bhersebha, akaziya kuti Samueri ndiye wainga asanangurhwa kuti agare muphorofita wa Djehovha. 21 Uye Djehovha akarumbwa ecidzipangidza ku Siro, ngokuti Djehovha akadzipangidza kuna Samueri ku Siro eciseenzesa soko ra Djehovha.