Samueri Wokutanga
30 Dhavhidhi no anarume ake paakaguma ku Zikragi pa zuwa recitatu, Aamareki ainga apinda nge katemaidumba* no ku Zikragi uye ainga arhwisa Zikragi oipisa no muriro. 2 Awona ainga atora anakadzi uye ese ainga ari mu thaundi, kubvira ku mwana mudoko dakara ku munhu mukuru. Akaenda nawo, uye aazi kuuraya munhu. 3 Dhavhidhi no anarume ake paakaguma mu thaundi, akaona kuti rainga rapiswa, uye akadzi awo no ana awo e anarume no e anakadzi ainga atorhwa hinga nhaphwa. 4 Hino Dhavhidhi no anarume ake akatanga kucema no izwi guru, dakara asisinazve simba re kucema. 5 Uyewo ainga atorhwa hinga nhaphwa akadzi airi a Dhavhidhi, Ainoamu we ku Jezreeri uye Abhigairi mufirhwakadzi wa Nabhari we ku Karmero. 6 Dhavhidhi wainga apererhwa, ngokuti anarume* ese ainga arhwadziwa maningi ngo kuruza ana awo e anarume no e anakadzi uye aibhuya ngezve kumufura no mapuwe. Asi Dhavhidhi wakadzibambisa muna Djehovha Mwari wake.
7 Hino Dhavhidhi wakati ku mupristi Abhiatari mwana wa Aimereki: “Ndapota, unzisa efodhi kuno.” Hino Abhiatari wakatora efodhi woenda nayo kuna Dhavhidhi. 8 Dhavhidhi wakabvunzisa Djehovha kuti: “Ndinodikana kuteera cikwata ici ce mambavha here? Ndicakwanisa kucibata here?” Iyena wakadaira kuti: “Ateere, ngokuti zvezvirokwazvo ucaabata, uye woatorera zvese zvaatora.”
9 Dhavhidhi no anarume 600 aainga anawo akaenda nokukasika. Paakaguma mu Bani* re Bhesori, anganani awo akasara ikona. 10 Dhavhidhi wakaenderera mberi no anarume 400, asi 200 akasara sure, ngokuti ainga akaremba maningi kuti abire Bani re Bhesori.
11 Akaona Muedjipitu mu munda uye akamutora oenda naye kuna Dhavhidhi. Akamupasa cokurhya no mvura, 12 no dimbu rimwe re bhoro re maonde no matimbu mairi e bhoro re uvha dzakaoma. Mumasure me kurhya, iyena wakagarazve no simba,* ngokuti iyena wainga apedza mazuwa matatu usiku no masikati asikazi kurhya no kumwa. 13 Dhavhidhi wakamubvunzisa kuti: “Iwewe uri muranda waani, uye unogara kupi?” Iyena wakadaira kuti: “Inini ndiri Muedjipitu, muranda we Muamareki, asi tenzi wangu akandisiya ngokuti ke mazuwa matatu adarika, ndairhwara. 14 Isusu takarhwisa katemaidumba* ke mutanha we Akereti, ku nharaunda ye Djudha uye katemaidumba* ke nharaunda ya Karebhe, uye takapisa Zikragi no muriro.” 15 Hino Dhavhidhi wakamubvunzisa kuti: “Iwewe ucandiperekedza dakara ku cikwata ce mambavha here?” Iyena wakadaira kuti: “Kana imwimwi mukapika muna Mwari kuti amundiurayi kana kunditora dakara kuna tenzi wangu, inini ndicamuperekedzai dakara ku cikwata ce mambavha.”
16 Ngokudaro, iyena wakaperekedza Dhavhidhi dakara kaainga ari. Aamareki ainga akabararika mu nharaunda yese ecirhya nokumwa, uye ecipemberera nge ndaa ye zviro zvakawanda zvaainga atora ku nyika yo Afiristiya uye ye Djudha. 17 Hino Dhavhidhi wakaauraya kubvira pakati pe usiku dakara koodoka;* apana kunyazi umwe wawo wakapona kusiya basi anarume anokwana kuita 400 akatiza akapakira makamero. 18 Dhavhidhi wakahwirinza zvese zvainga zvatorhwa no Aamareki, uye akanunura akadzi ake airi. 19 Apana ciro cakasara, kunyazi munhu wakasara, kubvira ku mwana mudoko dakara ku munhu mukuru. Awona akanunura ana awo e anarume, ana awo e anakadzi uye no zviro zvainga zvatorhwa; Dhavhidhi wakahwirinza zvese zvainga zvatorhwa. 20 Uye Dhavhidhi wakatora mabira ese, n’ombe dzese, uye anarume ake akazvikanda mberi ke zvipfuyo zvawo. Uye akati: “Izvi ndizvo zvipfuyo zvakapambwa zva Dhavhidhi.”
21 Hino Dhavhidhi wakahwirira ku anarume 200 ainga aremba kuti aende nawo uye ainga asara sure ku Bani re Bhesori, awona akabuda kuti aende koonana na Dhavhidhi uye anarume aainga anawo. Paakaguma dhuze nawo, Dhavhidhi wakaabvunzisa kuti ainga akadini. 22 Ngokudaro, anarume amweni akashata mwoyo ainga aenda na Dhavhidhi akabhuya kuti: “Ngokuti awona aazi kuenda na isusu, atiapasi ciro pa zviro zvatatora. Umwe na umwe wawo ngaatore basi mukadzi no ana ake uye oenda.” 23 Asi Dhavhidhi wakati: “Hama dzangu, musaite zvakadarozvo no zviro zvatapaswa na Djehovha. Iyena atidziirira uye akanda cikwata ce mambavha cauya katiri mu nyara dzedu. 24 Ndiani waizotenderana no zviro zvamuri kubhuya? Zviro zvicapaswa munhu waenda ku hondo, zvicaezana no zviro zvicapaswa munhu wasara. Munhu wese ucapaswa ciro pa zviro zvatatora.” 25 Kubvira zuwa irona kuenda mberi, Dhavhidhi wakaita kuti zvigare mutemo uye nhungamiriro ku Israeri, dakara nyamasi.
26 Dhavhidhi paakahwirira ku Zikragi, wakatumira akuru e Djudha ainga ari shamwari dzake zviro zvinganani zvaakatora, no masoko okuti: “Ici i cipo* kamuri, cabva pa zviro zvakatorhwa ku azondi a Djehovha.” 27 Iyena wakatumira cipo ku anhu ainga ari ku Bheteri, ku Ramoti yo Negebhe,* ku Jatiri, 28 ku Aroeri, ku Sifimoti, ku Esitemoa, 29 ku Rakari, ku mathaundi e Adjerameeri, ku mathaundi e Akeneti, 30 ku Orma, ku Bhorasani, ku Ataki, 31 ku Hebroni, uye no mbuto dzese dzekuti Dhavhidhi no anarume ake ainga akambogareyo.