Samueri Wokutanga

31 Afiristiya ainga ecirhwa no Aisraeri. Anarume e Israeri akatiza Afiristiya, uye akawanda awo akauraiwa ku Dunhu re Jiribhowa. 2 Afiristiya akanyasa kuteera nge padhuze Sauri no ana ake, uye Afiristiya akauraya Djonatani, Abhinadhabhi uye Marki-suwa, ana a Sauri. 3 Hondo yakakura kuna Sauri; anarume anoseenzesa uta akamuona, uye akamukuwadza maningi. 4 Hino Sauri wakati ku muthwari we zvekurhwa nazvo zvake: “Tora supada uye ndiuraye, kuti anhu aya asikazi kuizwa ucekeri asandibate nge mushobo wakashata uye ondiuraya.” Asi muthwari we zvekurhwa nazvo zvake aazi kuda kuita izvona, ngokuti wainga ecithya maningi. Hino Sauri wakatora supada uye wakambwerera pamusoro payo. 5 Paakaona kuti Sauri wainga afa, muthwari wake we zvekurhwa nazvo wakambwererawo pa supada yake uye wakafawo pamwepo naye. 6 Ngokudaro, Sauri, ana ake atatu, muthwari wake we zviro zve kurhwa nazvo, uye anarume ake ese akafawo pa zuwa irona. 7 Aisraeri ainga ari ku mutanha we bani uye ainga ari ku mutanha we Djorodhani paakaona kuti anyahondo e Israeri ainga atiza uye kuti Sauri no ana ake ainga afa, akasiya mathaundi uye otiza. Pedzepo, Afiristiya akauya uye ogaremo.

8 Pa zuwa rakazoteera, Afiristiya paaienda koounganidza zviro zve anhu ainga afa, akagumira Sauri no ana ake atatu akafa ku Dunhu re Jiribhowa. 9 Hino akagura musoro wa Sauri, akabvisa zve kurhwa nazvo zvake uye akatuma anhu no masoko ku nyika yese ye Afiristiya kuti aziise mu nyumba dze* anamwari awo uye ku anhu awo. 10 Hino akakanda zvekurhwa nazvo zvake mu nyumba ya Astoreti uye akaturika mutumbi wake pa muru we Bheti-sani. 11 Agari e Jabhesi-giriyadhi paakaziya zvainga zvaizwa no Afiristiya kuna Sauri, 12 arhwi ese akaita rhwendo ke usiku wese uye akabvisa mitumbi ya Sauri no ana ake pa muru we Bheti-sani; pedzepo akahwirira ku Jabhesi uye akaipisa ikona. 13 Hino akatora makodo awo uye akaakotsera pasi pe muti we mutamargi ku Jabhesi, uye akatsanya ke mazuwa manomwe.