Samueri Wokutanga
29 Afiristiya akaunganidza masurudado ese ku Afeki, pa nguwa yekuti Aisraeri akawaka musasa padhuze no manyuku e mvura ku Jezreeri. 2 Atungamiriri e Afiristiya aienda no zvikwata zvawo zve 100 uye zve 1000, uye Dhavhidhi no anarume ake aiteera sure na Akishi. 3 Asi macinda e Afiristiya akati kaari: “Ngei Ahebheru aya ari pano?” Akishi wakati: “Uu ndi Dhavhidhi museenzi wa Sauri, mambo we Israeri. Raakutodarika gore aneni uye andizi kuona cakashata kaari, kubvira pa zuwa raakauya kandiri dakara nyamasi.” 4 Asi macinda e Afiristiya akamunyangadzwira maningi uye akati kaari: “Itai kuti mwanarume uu ahwirire ku mbuto yamakamugadza. Musaite kuti iyena aende na isusu koorhwa, kuti iyena asatipandukire pa nguwa yatinonga tecirhwa. Ngokuti cinyi cimweni caangaita kuti atenderhwe na tenzi wake cinodarika kupasa misoro ye anarume edu? 5 Kodi uu andiepi here Dhavhidhi waakaemba nge zvake ecitamba, eciti:
‘Sauri wakauraya zviuru,
Uye Dhavhidhi gumi re zviuru’?”
6 Hino Akishi wakadainza Dhavhidhi uye wakati kaari: “Na Djehovha mupenyu, iwewe uri munhu we unatsi, uye ndiri kupfara maningi nge kuuya kawaita no masurudado angu ku hondo, ngokuti andizi kuona cakashata kauri kubvira pa zuwa rawakaguma dakara nyamasi. Asi atungamiriri aakugondi. 7 Ndiyo ndaa, hwirira mu runyararo, uye usaite ciro cipi haco cisikapfadzi atungamiriri e Afiristiya.” 8 Asi Dhavhidhi wakabvunzisa Akishi kuti: “Ngei, cinyi candaita? Cinyi camakaona cakashata ku museenzi wenyu kubvira pa zuwa randakadzipangidza kamuri dakara nyamasi? Ngei azviiti kuti ndiende koorhwisa azondi a tenzi wangu mambo?” 9 Akishi wakadaira kuti: “Mu maonero angu, iwewe wakanaka hingana ngirozi ya Mwari. Asi macinda e Afiristiya abhuya kuti: ‘Usamutore kuti aende na isusu koorhwa.’ 10 Hino muka mangwana cemacibesi-besi, iwewe no aseenzi a tenzi wako awauya nawo, uye hwirirai kana kukaedza.”
11 Hino Dhavhidhi no anarume ake akamuka cemacibesi-besi uye akahwirira ku nyika ye Afiristiya, uye Afiristiya akaenda ku Jezreeri.