MAAYI 11-17, 2026
EKIZINA 7 Yahwe, Nuwe Maani Gaitu
Weesige Yahwe, Omulemi wa Byona
“Yahwe, Oli haiguru muno nolema ensi zona.”—ZAB. 83:18.
EBI TURAAYEGA
Nitwija kurora omulingo tusobora kugumya obwesige bwaitu omuli Yahwe nk’Omulemi wa Byona, kandi tukigumye ngu naija kwikara naatukoonyera kusingura ebirengo ebi turukurabamu hati n’omu kasumi ak’omumaiso.
1. Bintu ki ebibi ebyahikire hali Yobbu?
YOBBU, omusaija owa kara ow’okwikiriza, akafeerwa haihi ebintu bye byona, otwaliiremu abaana be, eby’obuguuda bye, kandi yarwara n’oburwaire obw’amaani. Ekindi, abantu bakaleka kumutamu ekitiinisa, kandi baatandika kumwetantara, habw’ebintu binu byona ebyamuhikireho. Kandi ebintu ebirukukira obwingi banywani be ebi baabalize, bikaba nibimaramu amaani. Na mukazi we weenyini, akeetuntura muno kandi yamugambira ngu ‘ayehakane Ruhanga afe.’ (Yob. 2:9; 15:4, 5; 19:1-3) Ebintu binu byona, bikaba nibisobora kuleetera Yobbu kuleka kwesiga Yahwe, Ruhanga ow’amananu n’okugurukyagurukya obu araaba naasobora kulinda abo abamugonza kandi bakamuheereza.
2-3. Obu tuhikwaho ebizibu, kiki eki tusobora kutandika kuteekereza, kandi biki ebi turaayega kuruga omu kitabu kya Yobbu?
2 Obwire obumu, na itwe tuhikwaho enyikara ezisobora kulenga obwesige bwaitu omuli Yahwe. Nitwikara omu “obusumi obw’akabi kaingi kandi obugumangaine.” (2 Tim. 3:1) Nitusobora kuhikwaho ebirengo ebihonderaine bikatuhinguranaho kandi tukalemwa kugumiisiriza. Ebintu nk’ebi bireetiire abantu abamu kwekaguza mali Yahwe obu araaba naabafaaho.
3 Na iwe obu oraaba waakehurrahoga omu mulingo ogu, otahwamu amaani. Yobbu akeega ngu Yahwe ajuna abo abaikara bali beesigwa hali Uwe. Na itwe nitusobora kwega kwesigira kimu Yahwe, Isiitwe ow’omu iguru. Kutukoonyera kukora eki, leka tubazeeho bimu ha bintu ebiri omu kitabu kya Yobbu, turole omulingo birukugumya ensonga zinu ibiri: Ey’okubanza, Yahwe wenka nuwe Omulemi wa byona. Eya kabiri, Yahwe aine obusobozi obw’okuhikiiriza ebi aba araganiize, kandi alinda abantu be kutahikwaho akabi ak’ebiro n’ebiro omu by’omwoyo n’omu by’omubiri.
SITAANI AKAIJA HALI YAHWE HAMU NA BAMALAIKA ABEESIGWA
4. Kiki ekyabaireho bamalaika obu baayesoroize omu maiso ga Yahwe?
4 Kiro kimu, “abana ba Ruhanga” bakaija hali Yahwe omu iguru. Hanyuma Baibuli egamba eti: “Satani nauwe akaija hamu nabo.” (Yob. 1:6) Gunu nugwo omurundi gw’okubanza Baibuli kukozesa ibara “Sitaani.” Naayetwa Sitaani habwokuba ahakaniza Yahwe. Omu kasumi ako, Sitaani akaba atakyali mwesigwa hali Ruhanga. Akaba afookere munyanzigwa wa Yahwe, bamalaika abeesigwa, hamu n’abantu boona abeesigwa omu nsi. Yahwe akooleka ngu Sitaani akaba atakyali kicweka ky’eka ye ey’omu iguru, obu yagambire ebigambo ebirukusangwa omu Okubanza 3:15. Nahabweki Sitaani tali kicweka ‘ky’omukazi’—kandi egi niyo eka ya Yahwe ey’ebihangirwe eby’omwoyo eyaakurugirwemu ‘oruzaaro.’
5. Kiki eki turukwegera ha kintu Sitaani yabalize, n’omulingo Yahwe yamugarukiremu omu rukurato orwabaire omu iguru?
5 Yahwe akakigumya ngu ebintu ebyabaziibwe omu rukurato oru byahandiikwa omu Baibuli. Ebigambo Sitaani yabalize, nibyolekera kimu ngu ali muntu omubi muno kandi mubiihi w’ebisuba. (Yob. 1:9; lengesaniza na Okusuukururwa 12:10.) Yahwe kuhandiikisa ebintu binu omu Baibuli, nikitugumya ngu akozesa obusobozi bwe obwingi muno omu mulingo oguhikiriire kandi ogw’obwinganiza. Ekindi, nitwega ngu Ruhanga Ow’obusobozi bwona nuwe acwamu ebintu omuntu ebi asobora kukora n’ebi atasobora kukora.
YAHWE ATEERAHO ABANTU OBUGARUKIRO
6. Yahwe akooleka ata ngu akaba aine obusobozi bw’amaani omu rukurato orwabaire omu iguru? (Yobbu 1:7, 8)
6 Soma Yobbu 1:7, 8. Yahwe nuwe akaba aine obusobozi bw’okucwamu ekiraakorwa ha rukurato oru. Akakaguza Sitaani ati: ‘Oyetegeriize omwiru wange Yobbu?’ Yahwe akaba akimanyire kurungi ngu Sitaani akaba naagonza kutaahirra Yobbu. Leka turole omulingo Yahwe yakozeseze obusobozi bwe obwingi kukoonyera Yobbu.
7. Kusigikirra hali Yobbu 1:10, 11, kiki Sitaani eki yabalize hali abantu abarukuheereza Ruhanga?
7 Soma Yobbu 1:10, 11. Yahwe nuwe Mulemi wa byona, kandi akozesa obusobozi bwe n’amaani ge omu mulingo ogusemeriire. (Yer. 32:17; Dan. 4:35) Baitu Sitaani akagamba ngu Yahwe akaba atarukukozesa obusobozi bwe omu mulingo oguhikire. Ekyarugiremu, akagamba ngu Ruhanga aha enguzi abantu, nka Yobbu, nukwo bamuheereze. Ekindi, Sitaani akagamba ngu abo abaheereza Yahwe bakikora habw’ebintu ebi arukubaha. Yahwe akacwamu kukora ki?
8-9. Yahwe akateeraho Sitaani bugarukiro ki, kandi habwaki? (Yobbu 1:12) (Rora n’ekisisani.)
8 Soma Yobbu 1:12. Yahwe akaikiriza Sitaani kulenga Yobbu—baitu yamuteeraho obugarukiro. Ruhanga akagambira Sitaani ati: ‘Otamukwataho [Yobbu].’ Bamalaika boona abakaba bali omu rukurato oru bakahurra Yahwe naaha Sitaani ekiragiro kinu. Sitaani akaba ataine obusobozi obw’okucwa ekiragiro eki. Nahabweki akaba aine kukyorobera. Na kasumi kanu, Sitaani agarukira ha kukora ebintu byonka Yahwe ebi arukumwikiriza kukora. Nahabweki, Yahwe akakozesa obusobozi bwe n’amaani ge kulinda Yobbu, n’okwoleka ngu ali Ruhanga ow’obwinganiza kandi ow’okugonza.
9 Sitaani atatunge obusinguzi omu kulenga Yobbu. Yobbu akagumizaamu ali mwesigwa hali Ise ow’omu iguru. (Yob. 1:22) Baitu nabwo, Sitaani akaba naija kwongera kulenga Yobbu.
Yahwe akaleka Sitaani kukora eki akaba naateekereza ngu kihikire, kandi bamalaika bakaba nibarora (Rora akacweka 8-9)
10. Habwaki Yahwe yaikiriize Sitaani kwongera kulenga Yobbu? (Yobbu 2:2-6)
10 Soma Yobbu 2:2-6. Ha murundi gunu, Sitaani akaba naagonza kukora Yobbu ekintu ekibi muno nukwo amuleetere kuleka kuheereza Yahwe. Sitaani akagamba ngu Yobbu akaba naija kwehakana Ruhanga habw’okugonza kujuna obwomeezi bwe. Kusobora kwoleka ngu Sitaani akaba atahikire, Yahwe akamwikiriza kurwaza Yobbu. Baitu na ha murundi gunu, Yahwe akamuteeraho obugarukiro, naagamba ati: ‘Otamwita!’ Sitaani akaba ataine eky’okukora, oihireho kuhondera ekiragiro eki. Na ha murundi gunu, niturora ngu Omuhangi w’ebintu byona, akaba aine obusobozi hali Sitaani obu akaba naalenga Yobbu, habwokuba Sitaani akaba atasobora kuhingura ha bugarukiro Yahwe obu akaba amuteeriireho.
YAHWE AMARAHO OKUBONABONA KWA YOBBU
11. Hanyuma ya Yahwe kumaraho okubonabona kwa Yobbu, akamuha migisa ki? (Yobbu 42:10-13)
11 Soma Yobbu 42:10-13. Yobbu obu yayolekere ngu akaba naija kwikara ali mwesigwa, Yahwe akalekera aho kwikiriza Sitaani kulenga Yobbu. Yahwe akagira eki yakoraho kumaraho okubonabona kw’omuheereza onu omwesigwa. Na ha murundi gunu, Sitaani akaba ataine obusobozi obw’okulemesa encwamu ya Yahwe. Sitaani akaba atakyaine amaani ag’okulemesa Yahwe kulinda n’okuha Yobbu emigisa.
12. Bazaaho ekyokurorraho ekirukwoleka Yahwe eki akorra abo abeesiga obusobozi bwe obw’okubajuna.
12 Omu kasumi kanu aka ha mpero, baingi barozere Yahwe naakozesa amaani ge kubajuna. Ekyokurorraho, omu 1945 abaserikale bakahambiriza Abakaiso ba Yahwe 230 kurubata orugendo oruraihire kandi orw’akabi kuruga omu nkambi omu Germany kugenda ha nyanja nukwo babaite, baitu boona bakakira. Obu baali nibahandiika ebyababaireho, bakagamba ngu Yahwe akaba abajunire nkooku yajunire Abahebburaniya basatu kuruga omu murro batarukununka omwika gwona. Omu mulingo nugwo gumu, Abakaiso ba Yahwe banu bakaraba omu kirengo eky’amaani, baitu okwikiriza kwabo kukaba kweyongiire kuguma kukira na kara. Yahwe akaba abahaire amaani ge. Ekindi, bakeehurra bajunirwe nka Danieri oku yajunirwe kuruga omu kiina ky’entale. Kurugira kimu omu kasumi ako, bakacweramu kimu kwikara nibaheereza Yahwe ebiro n’ebiro. Kandi bakagamba ngu kuheereza Yahwe eri mpeera ey’erukukirayo oburungi ei baatungire.—Lengesaniza na Danieri 3:27; 6:22.
13. Kiki eki osemeriire kugumya obu oraaba noohikwaho ebirengo? (Rora n’ebisisani.)
13 Na itwe nitusobora kuhikwaho enyikara ezigumangaine omu bwomeezi tukasisana nk’abanagirwe omu kiina ky’entale. (1 Pet. 5:8-10) Nitusobora obwire obumu kwehurra nk’abataine okunihira nitwekaguza ekirengo kyaitu obu kiraaba nikiija kuhwaho. Omu nyikara nk’ezi, ekyokurorraho kya Yobbu nikisobora kutukoonyera. Nitusobora kukigumiza kimu ngu Yahwe aine amaani ag’okumaraho okubonabona kwaitu, kandi eki naasobora kukikora omu kasumi kanu rundi omu nsi empyaka. Tarukwija kwikiriza ensi enu embi eya Sitaani kuhingura ha bwire obu ataireho kugihwerekereza!
Yahwe naija kumaraho okubonabona kwona abaheereza be abeesigwa oku barukurabamu (Rora akacweka 13)
YAHWE AGONZA ABAHEEREZA BE ABEESIGWA
14-15. Kiki Yahwe eki arukugonza kukorra abaheereza be abeesigwa, kandi habwaki? (Yobbu 14:15) (Rora n’ekisisani ekya ha kyesweko.)
14 Soma Yobbu 14:15. Isiitwe ow’omu iguru agonza muno abantu abanyakuli beesigwa hali uwe. Abagonza muno kuhika na ha rulengo ngu noobu baakufa, aine ekihika eky’okubahumbuura. Kandi naija kuba amaliireeho kimu obusaasi bwona obuleetwa okufa.—Is. 65:17.
15 Noobu kiraaba ngu Yobbu akagumizaamu naayomeera omu nsi enu erukulemwa Sitaani, obwakaiso kuruga omu Baibuli nibwoleka ngu Yahwe akamugarurra obwomeezi oburungi, kandi yamuha n’emigisa nyingi kukira n’egi ei akaba aine atakalengerwe. Emigisa egi ekaba eri ndozo y’ebintu Yahwe alimukorra omu kasumi ak’omumaiso. Yahwe akoolekera kimu ngu naagonza abaheereza be abeesigwa batunge okusemererwa kwingi muno kandi beegondeze omu bwomeezi. Amananu gali, Yahwe naija kuha abo boona abooleka ngu bali beesigwa hali uwe, omugisa ogw’okwegondeza omu bwomeezi obuhikiriire omu rugonjo orurungi omu nsi. (Kus. 21:3, 4) Nk’Omulemi wa byona, aine ekihika eky’okukikora. Mali, ekintu eki kituhuumuza obu tuba nitugumira ebirengo!
Hanyuma y’ebirengo kuhwaho, Yobbu na mukazi we bakeegondeza omu migisa nyingi muno kuruga hali Yahwe (Rora akacweka 14-15)
16. Nsonga ki endi ey’esemeriire kutuleetera kwesiga Yahwe nk’Omulemi wa byona?
16 Noobu kiraaba ngu Yahwe akaha Yobbu emyaka nyingi ey’okwomeera, akahika yafa. Baitu Yahwe aine amaani ag’okumuhumbuura, habwokuba nuwe Ruhanga Ow’obusobozi bwona kandi Omulemi wa byona. (Bir. 32:39) Nahabweki, busaho omuntu weena ow’asobora kumulemesa kuhumbuura abo ab’agonza. Kandi kinu naija kukikora omu kasumi ak’ataireho.—Bar. 8:38, 39.
WEESIGIRE KIMU YAHWE
17. Kiki ekirukwoleka ngu Sitaani alemerwe kuhwerekereza abantu ba Ruhanga?
17 Ebyahandiikirwe omu Baibuli ebirukukwata hali Yobbu, nibituha ensonga nyingi ezituleetera kwesigira kimu Yahwe. Mali ka nitusiima muno Yahwe habwokuba taikiriize Sitaani kuhwerekereza abantu ba Ruhanga! Tukimanyire ngu Yahwe nuwe Mulemi wa byona, habwokuba kasumi kanu abantu haihi obukaikuru mwenda nibamuheereza n’obwesigwa. Emirundi nyingi, twikaire nitukirora ngu eby’okurwanisa byona ebirukukorwa kurwanisa abaheereza ba Yahwe, tibisoboire kusingura. (Is. 54:17) Gavumenti nyingi ez’amaani hamu n’abebembezi b’amadiini, tibasoboire kumaraho abantu ba Yahwe abarukuzooka nk’abataine bulinzi. Kandi busaho ekintu kyona ekisobora kulemesa abaheereza ba Yahwe kutebeza amakuru amarungi agarukumukwataho hamu n’okwoleka ngu Sitaani mubiihi w’ebisuba kandi mwisi. Noobu kwakuba okufa tikusobora kutulemesa habwokuba Yahwe naija kuhumbuura abo boona abafa bali beesigwa hali uwe.—Hos. 13:14.
18. Habwaki tutasemeriire kutiina ebiraabaho omu kasumi ak’omumaiso?
18 Obu twecumiitirizaaho ekyokurorraho kya Yobbu, kigumya okwikiriza kwaitu ngu Yahwe naija kutukoonyera noobu twakuhikwaho ebirengo bya mulingo ki omu kasumi ak’omumaiso. Omu kasumi ak’omuhito omwingi, abantu ba Yahwe nibaija kuzooka nk’abataine obulinzi, kandi Sitaani n’abahondezi be nibaija kuzooka nk’abarukutukira amaani. Baitu nkooku kyabaire omu kasumi ka Yobbu, Yahwe tarukwija kwikiriza Sitaani kuhikyaho abantu be akabi ak’ebiro n’ebiro. Omu kasumi akatali ka hara, Yahwe naija kumarraho kimu okubonabona Sitaani oku ahikizeeho abantu be. Sitaani na badaimooni be nibaija kunagwa omu kiina ekitaine bugarukiro kumara emyaka 1,000. (Luk. 8:31; Kus. 20:1-3) Ha kumalirra, Sitaani n’abo abamusagika, nibaija kuhwerekerezebwa. (Kus. 20:10) Nkooku Yahwe yarangire, omutwe gwa Sitaani gulihutaazibwa. Alihwerekerezebwa habw’ebiro n’ebiro.—Kub. 3:15; Bar. 16:20.
19. Migisa ki ey’erindiriire abo abeesigira kimu Yahwe? (Rora n’ekisisani.)
19 Tulindiriire n’ekihika ensi empyaka ey’eri haihi kwija nambere tuliba n’obwomeezi obuhikiriire kandi oburumu okusemererwa kwonyini. Obwomeezi nibwija kuba burungi muno kukira nkooku turukunihira. Yahwe naaraganiza ati: “Dora! Ebintu byona nimbifoora bihyaka.” (Kus. 21:5) Eki nikimanyisa ki? Habw’omurundi gw’okubanza hanyuma y’enkumi n’enkumi y’emyaka, Sitaani na badaimooni be, nibaija kuba batakyasobora kuhikyaho abantu ba Yahwe akabi, rundi kubaleetera kukora ebintu ebibi. Mali ka nitwija kwehurra kurungi muno omu kasumi ako! Titulyongera kuburwa oturo habw’okwetuntura okw’ensi enu embi. Abo abalikiraho obulemu obwa Amagedoni, nibaija kurora ebyamahano bingi. Nibaija kurora abarwaire nibatunga obwomeezi oburungi. Ekindi, abantu baitu abaafiire, nibaija kutandika kuhumbuuka. Nitwija kwegondeza omu bwomeezi nkooku Isiitwe ow’omu iguru akaba abuteekaniize kuruga kara!
Abaheereza ba Yahwe abeesigwa abaagumiire ebirengo, nibaija kwegondeza omu migisa nyingi Yahwe ei alibaha (Rora akacweka 19)
20. Kiki eki ocweriiremu kimu kukora?
20 Omu biro binu ebya ha mpero, nitusobora kuhikwaho ebirengo bingi kandi nitwetaaga obumanzi kusobora kwikara tuli beesigwa. Nahabweki, nitugonza kugumizaamu nitwesigira kimu Yahwe kandi nitumworobera nk’Omulemi waitu. Leka tweyongere kugonza Isiitwe ow’omu iguru, kandi twoleke ngu Sitaani mubiihi w’ebisuba. Leka tukigumize kimu ngu kakuba twikara tuli beesigwa hali Yahwe Omulemi wa byona, nitwija kutunga obusumi obw’omumaiso oburungi, habwokuba Yahwe naagonza kuha emigisa abaheereza be abeesigwa, kandi mali naija kukikora!
EKIZINA 153 Ninsaba Obumanzi