Omulingo Osobora Kusingura Ebintu Ebisobora Kukuhugura

1-2. Ekintu eky’omugaso nikisobora kita kufooka ekirukuhugura?

NI DI obu wamaliriire kuhikwaho ekintu ekirukuhugura? Obundi haroho ekyakuhugwire obu okaba oine ekintu eki okaba nookora kandi kyakwetaagisa kucwamu nikiha ekirukukirayo obukuru. Ekyokurorraho, teeramu akasisani baakuterra esimu oliyo noovuga. Esimu egi neesobora kuba eri y’omugaso, baitu okyetegereza ngu neekuhugura. Omu kasumi ako, kuta omutima ha kuvuga nikiba nikikira obukuru kukwata esimu.

² Obwomeezi bwaitu bwijwiremu ebintu bingi ebikuru eby’okukora. Tukimanyire ngu kwejumbira omu bintu eby’omwoyoa hamu n’enteekaniza yaitu ey’eby’omwoyo nikyo kirukukirayo obukuru. (Mat. 6:33) Kusisanaho n’abavugi abarukwegendereza, abantu ba Yahwe balengaho kumanyirra ebintu ebisobora kubalemesa kuta omutima ha bintu ebirukukirayo obukuru.—Nfu. 4:25; Mat. 6:22.

3. Ekicweka kinu nikiija kutukoonyera kita?

³ Busaho n’omu hali itwe ow’aba naagonza kuhuguka kuruga ha bintu eby’omwoyo. Baitu itwena tuhikwaho enyikara ezisobora kwanguha kutuhugura. (Luk. 21:34-36) Kurora ngu twaikara tutaire omutima ha buheereza bwaitu hali Yahwe, leka tubazeeho (1) ebintu ebisobora kutuhugura, (2) omulingo Yesu yasingwire ebintu ebikaba nibisobora kumuhugura, (3) n’omulingo tusobora kurwanisa ebintu ebituhugura kasumi kanu.

BINTU KI EBISOBORA KUTUHUGURA?

4-6. Bintu ki ebisobora kwanguha kutuhugura?

⁴ Itwena tuba n’ebintu bingi ebi twine kutaho omutima. Ekyokurorraho, nitusobora kuba twine oburwaire, rundi haroho ebintu ebi turukugonza kwekorra rundi kukorra eka yaitu. Amananu gali, ebintu binu by’omugaso kandi tusemeriire kubitaho omutima. Baitu nibisobora kutuhugura? Ego. Nikisoboka kakuba twikara nitubiteekerezaaho kandi tukabimarraho obwire bwaitu oburukukira obwingi, tukaburwa n’obwire rundi amaani ag’okukora ekintu ekindi.

⁵ Ekindi, baingi omuli itwe tukwasirweho obutabanguko omu by’obulemi, ebizibu omu by’entaahya, kucwekaho kw’endwaire, hamu n’obutabanguko obundi oburukuleetwaho ensi enu embi eya Sitaani. (2 Tim. 3:1) Obu tuhikwaho ebintu nk’ebi, nitusobora kwetuntura muno, kandi tukeesanga nibyo nituteekerezaaho obwire bwona.

⁶ Obundi tumanyire abantu abaahikirweho ebintu ebibi kandi byahindurra kimu obwomeezi bwabo. Nahabweki, nikyetegerezebwa ngu beetuntwire habw’ebintu ebibi ebyabahikireho. Yahwe atahange abantu kubonabona rundi kwikara beetuntwire. Egi niyo ensonga habwaki abantu abamu nibasobora kwehurra ngu tibakyasobora kuba n’obwomeezi oburungi habw’enyikara ezigumangaine ezi barukurabamu. Ekirugiremu, abamu balengaho kweyihaho okwetuntura oku, kuraba omu kumara obwire bwingi nibeejumbira omu by’okwesemeza. Kiki eki tusobora kukora kakuba twesanga tuli omu nyikara nk’ezi? Leka tubazeeho eki tusobora kwegera hali Yesu kandi kikatukoonyera kwetantara ebintu ebisobora kutulemesa kwebembeza kuheereza Yahwe.

YESU AKASINGURA ATA EBINTU EBIKABA NIBISOBORA KUMUHUGURA?

7. Bintu ki ebikaba nibisobora kuhugura Yesu?

⁷ Yesu akaba naasobora kuhugurwa ebintu bingi, nk’ebizibu abantu bakaba nibarabamu hamu n’eby’obulemi. Omu kasumi ke, abantu baingi bakaba bali banaku kandi barwaire. (Mat. 14:14; Mar. 14:7) Baahikwahoga obutalibwinganiza kuruga hali Abarooma hamu n’Abayudaaya bataahi baabo. Abantu obu baarozere ngu Yesu akaba aine amaani n’obusobozi obw’okukora ebyamahano, bakagonza kumufoora omukama. (Yoh. 6:14, 15) Kwongerraho, Sitaani na uwe akoohya Yesu naagonza kumuha obukama obw’ensi, kandi Yesu akaba naasobora kutandika kuteekereza ngu kirungi kakuba afooka mulemi w’ensi kasumi ako. (Mat. 4:8, 9) Kandi haroho omukwenda Petero, omu h’abanywani ba Yesu nfenanfe obu yamwekambisize kwetantara kuhikwaho okubonabona, obu naamugambira ati: “Weegirre embabazi Mukama wange.”—Mat. 16:21, 22.

8. Yesu akasingura ata ebintu ebikaba nibisobora kumuhugura?

⁸ Yesu akasingura ata ebintu ebikaba nibisobora kumuhugura? Akakikora omu miringo esatu. Eky’okubanza, akeegera ha nteekereza ya Yahwe. (Yoh. 8:28; 14:9) Ekya kabiri, akaikara aine bingi eby’okukora omu bintu eby’omwoyo. (Mat. 9:35) Kandi ekya kasatu, akaba amanyire kurungi ekintu ekikaba nikikirayo obukuru. (Yoh. 4:34) N’obumanzi, akangirra ebyohyo bya Sitaani, kandi akaba akimanyire ngu Petero akaba naalengaho kumukoonyera, baitu ekintu eki yabalize tikiri nikyo Yahwe akaba naagonza. (Mat. 4:10; 16:23) Yesu akanga kwikiriza ebintu abantu baamuteekerezaahoga, ebi baamubazaahoga, rundi ebi baakoraga kumulemesa kuhikiiriza ekigendererwa kya Ruhanga. Ky’amananu ngu nitusobora kuhikwaho ebintu ebirukwahukana ha byahikire hali Yesu. Baitu kakuba tukora ebintu bisatu Yesu ebi yakozere, nitusobora kusingura ebintu ebisobora kutuhugura omu bwomeezi bwaitu.

NITUSOBORA TUTA KUSINGURA EBINTU EBISOBORA KUTUHUGURA?

9. Ekyahandiikirwe ekiri omu Abefeeso 5:17 nikitugambira kukora ki?

⁹ Yegera ha mulingo Yahwe ateekerezaamu. Obu oraakikora, nikiija kukukoonyera ‘kwikara nooyetegereza Yahwe eki agonza.’ (Soma Abefeeso 5:17.) Nitusobora kumanya ebintu ebisemeza Yahwe kuraba omu kusoma Ekigambo kye n’okukyecumiitirizaaho. Kinu nitusobora kukikora, Baibuli noobu erukuba etarukubazaaho enyikara yonyini ei turukurabamu. Omu mulingo ki? Kuraba omu kwesomesa Baibuli n’ekigendererwa eky’okumanya kurungi enteekereza ya Yahwe ha nsonga, n’okwikara tweteekaniize kuta omu nkora ebi turukwega.

10. Nitusobora tuta kumanya enteekereza ya Yahwe?

¹⁰ Nitusobora kumanya enteekereza ya Yahwe kuraba omu kwesomesa Baibuli, nookuteekerezaaho omulingo atwazaamu abantu. (Yer. 45:5) Obu turaaba nitusomaho ebyokurorraho by’abantu kuruga omu Baibuli, nitusobora kwekaguza ebikaguzo nka binu: ‘Ekyokurorraho kinu nikiinyegesa ki hali Yahwe? Ninsobora nta kukikozesa kuteerekereza enteekereza yange?’ Ky’amananu ngu enteekereza ya Yahwe n’ekirra hara eyaitu. (Is. 55:9) Egi niyo ensonga habwaki tusemeriire kumusaba kutukoonyera kukora ebi agonza. (Zab. 143:10) Kandi tumusabe kutukoonyera kuteekereza nkooku uwe ateekereza.—1 Yoh. 5:14.

11. Kiki Yahwe eki arukugonza tukole?

¹¹ Obu turaaba nitwega kuteekereza nka Yahwe, nitwija kukyetegereza ngu naagonza twetantale kuhuguka, nukwo tusangwe tweteekaniize, ensi enu embi eya Sitaani obu eraaba neehwerekerra. (Mat. 24:44) Tarukugonza tuhwemu amaani habw’okwetuntura. (Mat. 6:31, 32) Egi niyo ensonga habwaki atuha obuhabuzi oburungi, nukwo tumanye eky’okukora obu tutandika kweralikirra habw’obwomeezi bwaitu, omulimo gwaitu, eka yaitu, rundi abanyabuzaale baitu. Naagonza tumusabe kutuha amaani n’amagezi aga turukwetaaga kusobora kugumira ebizibu byaitu.—Zab. 55:22; Nfu. 3:5-7.

12. Kiki ekisobora kutukoonyera kwikara twine okusemererwa noobu haakubaho ebintu ebibi omu nsi? (Matayo 5:3)

¹² Ikara oine bingi eby’okukora omu bintu eby’omwoyo. Itwena twetuntura habw’ebintu ebibi ebirukubaho omu nsi, baitu titwine eki tusobora kukora kubitanga kubaho. Nahabweki, kusobora kwetantara kuhugurwa ebintu ebi tutaineho busobozi, tusemeriire kuta omutima ha bintu eby’omwoyo. Kakuba twikara nitukora kyona ekirukusoboka kufaaho ekyetaago kyaitu eky’eby’omwoyo, nitwija kutunga okusemererwa, habwokuba kinu nikyo Yahwe yatuhangiire. (Soma Matayo 5:3.) Nitusobora kufaaho ekyetaago kinu kuraba omu kwesomesa Baibuli, nookukora kyona eki turukusobora omu buheereza bwaitu hali Yahwe. Obu turaakikora, nitwija kusemeza Yahwe habwokuba nitwija kuba nitukozesa kurungi obwire bwaitu.—Nfu. 23:15.

13. Nitusobora tuta ‘kukozesa kurungi obwire bwaitu’?

¹³ Nk’Abakristaayo, leka tucweremu kimu ‘kukozesa kurungi obwire bwaitu.’ (Bef. 5:15, 16; rora study note “making the best use of your time.”) Enkarra zinu tizirukubazaaho omulingo tukozesaamu obwire bwaitu kukora emirimo yaitu eya buli kiro. Oihireho, nizitwekambisa kuteekerezaaho n’obwegendereza omulingo turaakozesaamu obwire bwaitu empero etakahikire. Nitusobora tuta kukozesa kurungi obwire bwaitu? Tusemeriire kwetantara kumara obwire bwingi niturora rundi nitusoma amakuru agarukukwata ha bintu ebibi ebirukubaho, habwokuba nikisobora kutuhugura, kitumalemu amaani, kandi kituleetere kuleka kuba beekambi omu buheereza bwaitu hali Yahwe. Mali ka kirungi kweteeraho obugarukiro ha bwire obu tumara niturora amakuru rundi nitugasoma! Obu turaakikora, nitwija kuba n’obwire oburukumara hamu n’amaani aga turukwetaaga kwejumbira omu bintu eby’omwoyo. Nitusobora n’okuteekerezaaho kwongera ha buheereza bwaitu obu kirukuba nikisoboka, nk’okweyongera kugarukira abantu aba turukuba tutebiize. Tukimanyire ngu kikuru muno kukozesa buli mugisa gwona ogu tutunga kukoonyera abantu “kujunwa kandi batunge okumanya okuhikire okw’amananu.”—1 Tim. 2:4.

14. Kuba na bingi eby’okukora omu bintu eby’omwoyo, kitukoonyera kita? (Rora n’ekisisani.)

¹⁴ Obu twikara twine bingi eby’okukora omu bintu eby’omwoyo, twikara twine enteekereza ey’ehikire ha busumi obu turumu. Obu turora nihabaho obutabanguko omu by’obulemi, ebizibu omu by’entaahya hamu n’okujanjaara okw’endwaire, titutiina. Ebintu ebi tubirora nk’obwakaiso oburukwoleka ngu obunabbi bwa Baibuli buliyo nibuhikirra. Omu kiikaro ky’okutiina ekihinguraine, twikara tugumire habw’okukimanya ngu Yahwe ali haihi kumaraho ebintu binu kandi aleete ensi empyaka. Nitusobora kwikara tuteekaine, nitugumizaamu kwesiga Yahwe kutukoonyera kugumiisiriza.—Zab. 16:8; 112:1, 6-8.

15. ‘Kuba n’enteekereza enungi’ nikiija kutusobozesa kukora ki? (1 Petero 4:7)

¹⁵ Ikara noijuka ebintu ebirukukirayo obukuru. Kasumi kanu, abantu baingi bata omutima ha by’okwesemeza omu kiikaro ky’okuteekerezaaho okuhwerekerezebwa okw’ensi ya Sitaani enu embi okuliyo nikwija. Noobu kiraaba ngu tikiri kibi kutunga obwire obw’okwesemeza, tusemeriire kuba “n’enteekereza enungi” kusobora kwetantara kuba n’enteekereza nk’ey’abantu ab’ensi. (Soma 1 Petero 4:7.) Kinu nikimanyisa ki? Nikitwarramu bingi. Baitu kimu hali byo nikyo ngu nikiija kutukoonyera kutamarra obwire bwingi omu by’okwesemeza kandi kitukoonyere kukora encwamu ez’amagezi. Encwamu nk’ezi niziija kwoleka ngu twine enteekereza nk’eya Yahwe, kandi ngu mali twetegeriize ekirukukirayo obukuru.—2 Tim. 1:7.

16. Kiki Yesu eki yataireho omutima obu akaba ali haihi kufa?

¹⁶ Yesu akaikara naijuka ekintu ekirukukirayo obukuru omu bwomeezi bwe. Obu akaba ali haihi kufa, akaraba omu nyikara ezigumangaine muno. Baitu nabwo akaikara ataire omutima ha kwikara ali mwesigwa hali Yahwe, nookuhikiiriza ekigendererwa kya Ruhanga. Egi niyo ensonga habwaki yasabire muno. Kwahukanaho na Yesu ayaikaire ali bulindaara, abeegeswa be bakalemwa kwikara bali bulindaara kandi baagwijagira. Bakaba “bajwahire habw’obujune.”—Luk. 22:39-46; Yoh. 19:30.

17. Habwaki abantu baingi bakozesa emikura ey’okubalizaaho, baitu neesobora eta kubaleetera kuhuguka? (Rora n’ekisisani.)

¹⁷ Kusisanaho n’abeegeswa ba Yesu, obwire obumu na itwe nitusobora kwehurra tujwahire kandi twine obujune. Ebintu ebirukubaho omu kasumi kanu aka ha mpero, nibisobora kutuleetera kweraliikirra. Abantu baingi kasumi kanu obu baba nibagonza kwebwa ebizibu byabo, bamara obwire bwingi ha mikura y’okubalizaaho, obu nibasindikira banywani baabo n’abanyabuzaale baabo ebisisani, n’okubagambira ebi barukurabamu omu bwomeezi. Ekindi, bagikozesa kurora fiilimu hamu n’okuzaana emizaano. Baitu ha mikura y’okubalizaaho haroho ebintu bingi muno ebihyaka eby’okusoma n’okurora, ekireetera abantu kumaraho obwire bwingi buli kiro n’okujwaha muno. Kusobora kwetantara kugwa omu mutego gunu, nitusobora kwekaguza tuti: ‘Ebintu ebi ndora n’ebi nkora ha mikura y’okubalizaaho, bindeetera kuhurra mpuumuziibwe rundi bindeetera kuhuguka kuruga ha kintu ekirukukirayo obukuru?’

18. Habwaki tusemeriire kukora encwamu ez’amagezi obu turukuba nitukomamu eby’okwesemeza?

¹⁸ Obwire obumu, kirungi kutunga obwire obw’okwesemezaamu n’okuhuumuraho. Baitu tusemeriire kukigumya ngu twakomamu n’obwegendereza ebi turukurora, n’emizaano ei tuzaana ha tiivi rundi ha intaneeti. Abarukuturukya vidiyo, bakira kuturukya ebintu ebihyaka ebisobora kuleetera abantu abarukubirora kwohebwa kwejumbira omu bikorwa eby’okurwana n’obusiihani. Kinu nikyo kyahikire hali ow’oruganda ow’arukwikara omu Asia. Akatandika naarora obuvidiyo obugufu ha gumu ha mikura ey’okubalizaaho. Obu yagumiizeemu naarora obuvidiyo obu baamusindikiraga, akeesanga atandikire kurora vidiyo ezirumu ebintu eby’obusiihani. Akamalirra naarorra kimu ebisisani eby’orwanju. Baitu akanguha kuserra obukoonyezi kuruga hali abagurusi n’abanywani be nfenanfe abaamukoonyiire kugira eki yakoraho. Akasiimuramu apu ezi, kandi yayeteeraho obugarukiro obukirukuhika ha kukozesa esimu ye. Ekyokurorraho kinu nikyoleka ensonga habwaki tusemeriire kukora encwamu ez’amagezi obu turukuba nitukomamu eby’okwesemeza.

19. Kiki ekisobora kubaho kakuba tuta muno omutima ha kugenda omu biikaro ebindi kuhuumuraho n’okwesemezaamu?

¹⁹ Ekindi, nitwetaaga kukora encwamu ez’amagezi obukirukuhika ha kugenda omu biikaro ebindi kuhuumuraho, n’okwesemezaamu. Itwena nitwetaaga kuhuumuraho emirimo ei tukora buli kiro habwokuba kitukoonyera kwikara twine obwomeezi oburungi. Baitu kakuba tuta muno omutima ha bintu binu, nitusobora kwesanga tutakyaine obwire obw’okukora ebintu ebirukukirayo obukuru. (Baf. 1:10) Itwena tusemeriire kucwamu ebintu ebi turaakora, n’obwire obu turaamara nitubikora. Obu turukuba nitukora encwamu nk’ezi, tusemeriire kwekaguza: ‘Obwire obu mmara obu mba ngenzere omu biikaro ebindi kuhuumuraho n’okwesemezaamu bwoleka ngu nkozere encwamu ey’amagezi? Mbanza kukigumya ngu nayebembeza ebintu ebirukukirayo obukuru? Nyeteekaniriize “empero ey’ebintu byona”?’ (1 Pet. 4:7).

20. Tugasirwa tuta obu tukora kyona ekirukusoboka kwetantara kuhuguka?

²⁰ Tugasirwa obu tukora kyona ekirukusoboka kutahuguka kuruga ha bintu eby’omwoyo, hamu n’enteekaniza yaitu ey’eby’omwoyo. (Is. 48:17) Habw’obukoonyezi bwa Yahwe, nitwija kusobora kugumira ebizibu byona ebi tutangatangana omu bwomeezi. Ebintu ebirukubaho omu nsi tibirukwija kutuleetera kwetuntura muno. Kandi nitwija kwetantara kumara obwire bwingi ha by’okwesemeza. Nahabweki leka tucweremu kimu kuba n’enteekereza nk’eya Yahwe, twikale twine bingi eby’okukora omu bintu eby’omwoyo, kandi tutaire omutima ha kintu ekirukukirayo obukuru. Obu turaakikora, nitwija kwetantara ebirukutuhugura kandi nitwija “kukwatira kimu obwomeezi bwonyini.”—1 Tim. 6:19.