Semezaamu Omulingo Oyegesaamu omu Buheereza

1. Kiki itwena eki tusemeriire kwega, kandi habwaki? (2 Timoseo 4:2) (Rora n’ekisisani.)

YESU akagambira abahondezi be ati: “Mufoole abantu ab’omu mahanga goona abeegeswa . . . , nimubeegesa kworobera byona ebi nabaragiire.” (Mat. 28:19, 20) Oburagirizi bunu nibwoleka ngu Abakristaayo boona basemeriire kuba abeegesa. Ky’amananu ngu Yahwe nuwe acunda abo abaine “omutima omurungi,” kandi na bamalaika bakora omulimo gw’amaani omu kuturagirra hali abantu nk’abo. (Ebik. 13:48; Yoh. 6:44; Kus. 14:6) Baitu nabwo, tusemeriire kwega omulingo omurungi ogw’okwegesa abantu hali Yahwe. Teekeerezaaho ekyokurorraho omukwenda Paulo na Bbaranabba eki baatuteeriireho. Baibuli egamba ngu obu baatebiize omu isorrokaniro omu Ikoniyo, “[bakabaza] omu mulingo omurungi, kyaleetera Abayudaaya n’Abayonaani baingi kuhinduka baafooka baikiriza.” (Ebik. 14:1) Kinu nikyoleka kurungi ngu Paulo na Bbaranabba bakaba beegere ‘kwegesa omu mulingo omurungi.’ (Soma 2 Timoseo 4:2.) Abakristaayo boona basemeriire kwega kwegesa omu mulingo nk’ogu.

2. Habwaki Abakristaayo abamu beehurra ngu tibarukusobora kusemezaamu omulingo beegesa?

² Abamu nibasobora kwehurra ngu tibasobora kusemezaamu omulingo beegesaamu, habwokuba batasome kuhika hara rundi ngu tibamanyire kusoborra kurungi abantu. Haroho n’abasaija abamu abarukubazibwaho omu Baibuli abaayehuliire omu mulingo ogu. (Kurug. 4:10; Yer. 1:6) Abandi nibasobora kwehurra bahoirwemu amaani ha mulingo beegesaamu, habwokuba tibarukurora ebirungi ebirukurugamu obu beerengesaniza n’abandi. Amananu gali, tali buli omu ou turaabaza na uwe rundi ou turaatangatangana ngu naija kwikiriza amakuru amarungi. Kandi n’ebiruga omu kwegesa kwaitu tibisigikirra h’amaani aga tuba tutairemu gonka. Nkooku tusangirwe turozere, Yahwe na bamalaika nubo bakigumya ngu twatunga abantu abaine emitima enungi. Baitu nabwo nitugonza kukora kyona ekirukusoboka kurora ngu twagambiraho abantu obutumwa bwaitu omu mulingo ogurukusikiiriza. Ekicweka kinu nikiija kubazaaho emiringo esatu ey’esobora kutukoonyera kusemezaamu omulingo twegesa omu buheereza.

FAAHO ABARUKUKUHULIIRIZA

3. Habwaki Yesu yasoboire kuhika ha mitima y’abantu abaamuhuliirizaaga?

³ Baibuli egamba ngu Yesu “akaba amanyire ebiri omu mutima gw’omuntu.” (Yoh. 2:25) Ebigambo ebi nibyoleka ngu Yesu akaba amanyire ebiteekerezo by’abantu hamu n’ebigendererwa byabo. Akasobora kuhika ha mitima y’abantu abakaba nibamuhuliiriza habwokuba akaba naayetegereza kurungi ebyetaago byabo. Akaba naakirorra kimu ngu abantu baine enjara ey’eby’omwoyo kandi batuntuziibwe emigenzo n’ebiragiro ebyatairweho abantu. (Mat. 9:36; 23:4) Yesu akabazaaho ebintu ebi byonyini omu Kwegesa kwe Okwa ha Rusozi. Abantu baingi baagonzaaga kumuhuliiriza habwokuba yabazaahoga ebintu ebirukubakwataho.

4. Nitusobora tuta kwoleka ngu nitufaaho abantu? (Rora n’ekisisani.)

⁴ Nitusobora kwoleka ngu nitufaaho abantu aba tutangatangana, kuraba omu kulengaho kwetegereza ebintu ebirukubaleetera kwetuntura. Buli muntu weena ou tutebeza, aba aine omulingo akwasirweho habw’ebintu ebirukubaho omu nsi enu embi eya Sitaani. Obu twijuka eki, kitukoonyera kusaalirirwa abantu ab’omu kiikaro eki tutebezaamu. Ekyokurorraho, haroho ebintu byona ebi baire omu makuru ebisobora kuba nibyeraliikiriza abantu ab’omu kiikaro eki mutebezaamu? Abazaire beeraliikiriire habw’ebintu ebibi ebisobora kuhikaho abaana baabo ha isomero? Abantu baingi kibagumira kutunga emirimo omu kiikaro kyanyu? Lengaho kuteekerezaaho omulingo obwomeezi bw’abantu buli, obu barukuba nibagumira “obusumi obw’akabi kaingi” bataine kunihira Baibuli oku eha.—2 Tim. 3:1; Is. 65:13, 14.

5. Yesu akaba naayahukana ata hali Abafalisaayo? (Matayo 11:28-30)

⁵ Yesu yafaahoga abo abaamuhuliirizaaga, kandi kinu baakirorraga ha mulingo yabatwazaamuga. Mali, Yesu akaba naayahukanira kimu hali Abafalisaayo abaaroraga abantu abaabulikiro nk’aba hansi, kandi babatwaza omu mulingo omubi! (Mat. 23:13; Yoh. 7:49) Baitu Yesu yatwazaaga abantu omu mulingo ogw’embabazi kandi ogw’ekitiinisa. Akaba ali “muculeezi kandi . . . mwebundaazi omu mutima.” Kinu kikamukoonyera kuba omwegesa omurungi. (Soma Matayo 11:28-30.) Na itwe tusemeriire kutwaza abo abarukutuhuliiriza omu mulingo ogw’embabazi kandi ogw’ekitiinisa.

6. Nitusobora tuta kwoleka embabazi n’okutamu ekitiinisa abo abanga rundi abahakaniza obutumwa bwaitu?

⁶ Abantu abamu banga obutumwa bwaitu rundi babuhakaniza. Eki obu kibaho, tusemeriire kwetwaza tuta? Yesu akatuteererra kutatwaza kubi abo abatuhakaniza. Baitu akagamba ati: “Mukorre ebirungi abo abarukubanoba, muhe omugisa abo abarukubakyena,” kandi “musabire abo abarukubajuma.” (Luk. 6:27, 28) Kinu nikisobora kutwanguhira kukikora kakuba twijuka ngu abo abanga obutumwa bwaitu, baine ensonga ey’esobora kuba neebaleetera kwetwaza omu mulingo ogu. Ky’amananu ngu abamu nibaba nibagonza kutulemesa kutebeza. Baitu abandi nibasobora kuba beetuntwire habw’ebizibu ebi barukurabamu omu ka, rundi haroho enyikara ey’ebaleetiire kwetuntura, ey’etaine kakwate n’obutumwa bwaitu. Obundi nitusobora kuba tugenzere omu ka yabo omu kasumi nambere babaire babiihiirwe. K’ebe nsonga ki, tusemeriire kuhondera obuhabuzi oburukugamba buti: “Leka ebigambo [byaitu] biikalege eby’embabazi obwire bwona, birungirwemu ekisura, nukwo [tumanye] omulingo [tusemeriire] kugarukamu buli muntu weena.” (Bak. 4:6) Kakuba tusaalirirwa abandi kandi tukalengaho kwetegereza ebyetaago byabo, nikiija kutukoonyera kutanguha kubiihirwa, kandi kitukoonyere kufooka abeegesa abarungi.

KOZESA EKIGAMBO KYA RUHANGA KWEGESA

7. Yesu akooleka ata ngu akaba naayesiga Ekigambo kya Ruhanga obu yabaga naayegesa? (Yohaana 7:14-16)

⁷ Yesu ateegese abantu enteekereza ye. Enyegesa ze zaasigikirraga ha Kigambo kya Ruhanga, eki yakozeseze omu mulingo ogwayanguhiraga abarukumuhuliiriza kwetegereza ebi akaba naabeegesa n’okubiijuka. Baibuli egamba ngu Yesu yayegesaaga “nk’omuntu anyakwine obusobozi hatali nk’abahandiiki.” Kandi kinu kikahuniiriza abantu. (Mar. 1:22; rora study note on “not as the scribes.”) Kusobora kusagika enyegesa zaabo abahandiiki ab’omu kasumi ka Yesu, baajulizaaga ebigambo by’abeegesa b’amadiini ruranganwa. Kwahukanaho na bo, Yesu yajulizaaga Ebyahandiikirwe. Nk’Omwana wa Ruhanga ow’akaba aikaireho omu iguru, akaba naasobora kukozesa amagezi ge amaingi kuleetera abarukumuhuliiriza kumutaho omutima, rundi kwehurra nk’abataine eki bamanyire. Baitu eki atakikole. Oihireho akakozesa Ekigambo kya Ruhanga kubeegesa ebintu Ruhanga ebi akaba naagonza bakole. (Soma Yohaana 7:14-16.) Yesu akateeraho abahondezi be boona ekyokurorraho ekirungi muno.

8. Omukwenda Petero akahondera ata ekyokurorraho kya Yesu?

⁸ Abeegeswa ba Yesu na bo baakozesaaga Ekigambo kya Ruhanga obu baabaga nibeegesa. Ekyokurorraho, teekerezaaho orubazo rw’omukwenda Petero oru yahaire ha kiro kya Pentekooti 33 Y.A.K. Petero akaba ali musaija ow’akaba atasomere muno. Baitu akasobora kuhika ha mitima y’abantu abakaba nibamuhuliiriza, habwokuba akakozesa Ebyahandiikirwe kusoborra obunabbi Yesu obu yahikiiriize. (Ebik. 2:14-37) Kiki ekyarugiremu? “Abo boona abaikiriize ekigambo kye n’okusemererwa baabatizibwa, kandi ha kiro eki, abantu nka 3,000 baabeeteeranizaaho.”—Ebik. 2:41.

9. Obu turukuba nitwegesa, habwaki tusemeriire kukozesa Ekigambo kya Ruhanga?

⁹ Baibuli niyo yonka enyakwine amaani ag’okukoonyera abantu kukora empindahinduka nukwo basobole kusemeza Ruhanga. (Baheb. 4:12) Nahabweki, tusemeriire kukozesa Baibuli obu turukuba nitwegesa. Nitugonza ‘kutebeza ekigambo,’ hatali enteekereza zaitu. (2 Tim. 4:2) Enfumo 2:6 hagamba ngu: “[Yahwe] aha amagezi; omu kanwake nuho haruga okumanya nokwetegereza.” Obu twegesa nitukozesa Ebyahandiikirwe, tuba nitusisana nk’abarukuleka Yahwe kubaza. (Mara. 2:7) Nitugonza abantu bakimanye ngu Baibuli erumu ekintu ekirukukirra hara amagezi g’abantu. Ekatereekerezebwa omwoyo gwa Ruhanga, kandi eha abantu okumanya oku barukwetaaga kusobora kusemeza Omuhangi wabo, n’okuba n’obwomeezi oburumu okusemererwa.—2 Tim. 3:16, 17.

10. Kiki eki tusobora kukora kukoonyera omwegi kukimanya ngu ebi arukwega nibiruga omu Baibuli?

¹⁰ Obu oraaba nooteekaniza kwegesa omwegi waawe, teekerezaaho Ebyahandiikirwe ebi oraakozesa kumukoonyera kumanya Baibuli eki eyegesa. Omwegi waawe asemeriire kukyetegereza ngu noobu kiraaba ngu ebisisani rundi vidiyo nibisobora kumukoonyera kwetegereza ensonga, Baibuli niyo erukukirrayo kimu kumukoonyera. Nahabweki, serra Ebyahandiikirwe ebikuru kandi omukoonyere kubyecumiitirizaaho. Obu oraaba noobazaaho ebisisani rundi vidiyo, kigumye ngu omwegi waawe yayetegereza emisingi ya Baibuli enkuru enyakurumu. Tikirukukwetaagisa kubaza muno rundi kusoma ebyahandiikirwe byona ebiri omu isomo kusobora kumukoonyera kwetegereza. Oihireho, muhe obwire obw’okwecumiitirizaaho buli kyahandiikirwe eki muraasoma, kandi kakuba kiba kyetaagisize mwongere mukisome. Obu turaakora tuti, titurukwija kuba nitumwegesa ekitabu, ekisisani, rundi vidiyo, baitu nitwija kuba nitumwegesa Baibuli.—1 Kol. 2:13.

11-12. (a) Nitusobora tuta kugumiisiriza abeegi baitu aba Baibuli? (Ebikorwa 17:1-4) (Rora n’ekisisani.) (b) Kiki abantu abamu eki basobora kuba batamanyire, kandi nitusobora kubakoonyera tuta?

¹¹ Kakuba kigumira omwegi waawe kwikiriza ensonga, ijuka ngu osemeriire ‘kutebeza ekigambo . . . n’okugumiisiriza kwona.’ Abeegi boona tibakurakurana ha rulengo rumu. Abamu nikisobora kubatwarra obwire kwetegereza amananu aga turora nk’aganguhire. Abayudaaya ab’omu Sesalonika, Paulo aba yatebiize, bateetegereze ensonga ahonaaho. Kikamwetaagisa kwikara naagendayo kubasoborra Ebyahandiikirwe, kandi hanyuma bamu hali bo bakeetegereza ensonga.—Soma Ebikorwa 17:1-4.

¹² Omulingo ogundi ogu tusobora kwoleka okugumiisiriza, nukwo kukaguza abeegi ebikaguzo n’okwetantara kubaza muno. Lengaho kubahuliiriza kurungi kandi weetegereze enteekereza yabo. Hanyuma, soma ebyahandiikirwe ebimu kandi obibazeeho kubakoonyera kwetegereza enteekereza ya Yahwe ha nsonga. Ekindi, teekerezaaho kinu: Abantu abamu tibakaroraga Baibuli kandi tibamanyire n’ebintu ebirumu. Nikisobora kuba ky’omugaso kakuba obooleka Baibuli ey’etiirwe ha mpapura. Noosobora kubooleka ekicweka, “Bimu ha Bintu Ebi Turukwega omu Kigambo kya Ruhanga,” ekiri ha mpapura ez’okubanza eza Baibuli ey’Empindura ey’Ensi Empyaka. Hanyuma noosobora kubakoonyera kukyetegereza ngu Baibuli neesobora kubakoonyera omu bwomeezi bwabo, kuraba omu kubasomera ekyahandiikirwe kimu rundi bibiri ebiri hansi y’ekikaguzo ekya 15, kusoborra omulingo Baibuli esobora kutukoonyera kutunga okusemererwa. Obu oraakoonyera abeegi baawe kurora omugaso gwa Baibuli, nibaija kuta omu nkora ebi orukubeegesa kandi nibaija kugonza kumanya ebirukukiraho.

OMUTIMA GUTE HALI YAHWE

13. Obu tuba nitwegesa, omutima tusemeriire kuguta hali oha? Bazaaho ekyokurorraho.

¹³ Ekigendererwa kyaitu kiri ky’okukoonyera abarukutuhuliiriza kumanya Yahwe n’okumwirra haihi. (Yak. 4:8) Habw’ensonga enu, omulimo gwaitu nigusobora kulengesanizibwa n’omuntu ow’akwasire toci naamulikira mutaahi we nukwo asobole kurora ekintu omu bwire bw’ekiro. Omu bwire obu, omuntu ogu tata omutima ha kwemulika, baitu aguta ha kumulika ekintu nukwo mugenzi we akirole. Omu mulingo nugwo gumu, na itwe obu tuba nitwegesa, omutima tusemeriire kuguta hali Yahwe hatali kugwetaho.

14. Nitusobora tuta kukoonyera omwegi waitu kuta omutima hali Yahwe?

¹⁴ Obu oraaba nooyegesa omwegi wa Baibuli, mukoonyere kuba n’ekihika eky’okugonza kusemeza Yahwe. (Nfu. 27:11) Titurukugonza kwegesa abeegi baitu kukora ekihikire n’okwetantara kukora ekibi ngu habwokuba nitugonza bafooke Bakaiso ba Yahwe, baitu nitugonza bakole empindahinduka omu bwomeezi bwabo habwokuba nibagonza kusemeza Yahwe. Ekyokurorraho, omwegi waawe obu kiraaba nikigumira kusingura engeso embi, mukaguze ebikaguzo nka binu: “Habwaki Yahwe anoba engeso egi? Habwaki Yahwe naagonza oleke kukora ekintu eki orukwegondezaamu? Yahwe kukugambira kuleka kukora ekintu kinu, nikyoleka kita ngu naakugonza?” Obu oraayeyongera kwekambisa omwegi waawe kuteekerezaaho Yahwe, naija kweyongera kumurora nka Ise omurungi muno. Kandi kinu nikiija kumuleetera kugonza kusemeza Yahwe.

IKARA NOOSEMEZAAMU OMULINGO OYEGESAAMU

15. Kiki eki osobora kukora kurora ngu waikara noosemezaamu omulingo oyegesa?

¹⁵ Noosobora kusaba Yahwe kukukoonyera kurora ninkaha nambere osemeriire kusemezaamu omu kwegesa kwawe. (1 Yoh. 5:14) Noosobora kukorra ha saara zaawe, kuraba omu kuta omu nkora okutendekwa oku tutunga omu nsorrokano. Ekindi, noosobora kusaba ow’oruganda rundi munyaanya itwe ow’amanyire kwegesa kurungi, kukweteeranizaaho obu orukuba nooyegesa omwegi waawe. Hanyuma noosobora kumukaguza ninkaha nambere osemeriire kusemezaamu. Ijuka ngu noobu kiraaba ngu omanyire kurungi ebintu ebi orukugenda kwegesa, omwegi waawe tabimanyire kurungi. Nahabweki lengaho kweteeka omu bigere bye. Hanyuma obu muraaba nimwega, mukoonyere kwetegereza ngu obutumwa bwaitu, mali gali makuru amarungi. Eki nikisobora kumuleetera kutunga enkoragana enungi na Yahwe, n’okutunga okusemererwa kwonyini.—Zab. 1:1-3.

16. Nitwija kugasirwa tuta obu turaikara nitusemezaamu omulingo twegesa?

¹⁶ Kwegesa abandi hali Yahwe kiri kimu ha bintu ebikyakizireyo kutuleetera okusemererwa. Omu nsi empyaka, nitwija kuba twine abantu baingi muno ab’okwegesa. Nahabweki, leka tugumizeemu nitufaaho abarukutuhuliiriza, nitukozesa Ekigambo kya Ruhanga, kandi nituta omutima hali Yahwe, obu turaaba nitutebeza amakuru amarungi. Obu turaakikora, nitwija kusemezaamu omulingo twegesa omu buheereza.