“Ruhanga Owamananu” Ahikiiriza Byona Ebi Aba Araganiize

1. Habwaki nitusobora kwesigira kimu Yahwe? (Zabbuli 31:​2-5)

TULI omu nsi ey’erukulemwa Sitaani. Abantu baingi muno nibabaza ebisuba kandi nibagobezangana. Nikisobora kuguma kumanya omuntu ou tusemeriire kwesiga. Ab’eby’obusuubuzi baingi muno tibabaza amananu. Abarukuteera oburango babaza ebisuba ha bintu ebi barukutunda nukwo baleetere abantu kubibaguraho. Kandi abantu abamu tibakyayesiga banywani baabo nfenanfe obukirukuhika ha nsita zaabo. Mali, ka nikihuumuza kukimanya ngu nitusobora kwesiga Yahwe! Ali “Ruhanga owamananu.” (Soma Zabbuli 31:​2-5.) Yahwe tasobora kubiiha ebisuba. Buli kintu kyona eki abaza gaba mananu. Nitusobora kukigumya ngu naija kuhikiiriza buli kimu kyona eki aba araganiize.

2. Kiki eki turukwija kubazaaho omu kicweka kinu?

² Omu kicweka kinu nitwija kubanza kubazaaho zimu ha nsonga habwaki nitusobora kwesiga Yahwe n’omutima gwaitu gwona. Kandi hanyuma nitwija kubazaaho omulingo Ruhanga ow’amananu alihwerekereza ensi ya Sitaani hamu n’ekintu eki aliyo naakora hati kusobora kuhikiiriza ekigendererwa kye. Ekicweka kinu nikiija kutwekambisa kugambira abandi h’amananu agarukukwata hali Yahwe tutarukutiina.

ENSONGA HABWAKI TUSEMERIIRE KWESIGA RUHANGA OW’AMANANU

3. Habwaki nitusobora kwesigira kimu Yahwe?

³ Nitusobora kwesiga Yahwe habwokuba nuwe Omuhangi. Nuwe Omuhangi w’iguru n’ensi kandi nuwe Ndugirro y’ebintu byona ebyomeezi. (Kub. 1:1; Zab. 36:9; Kus. 4:11) Akakora ensi omu mulingo ngu, buli kimu kyona eki turukwetaaga kusobora kwikara tuli boomeezi nikikora kurungi. Ekyokurorraho, orwoya orutwikya hamu n’amaizi aga tunywa. Nuwe arukulema ebintu byona omu nsi n’omu iguru kandi aliikara naabirema. Habwokuba Yahwe nuwe yatuhangire, naamanya buli kimu kyona kandi aine amaani agataine obugarukiro, nitusobora kumwesigira kimu kwebembera obwomeezi bwaitu kandi nitusobora n’okukigumya ngu naija kutuha akasumi ak’omumaiso akarungi.

4. Nitukimanya tuta ngu Yahwe atugonza?

⁴ Nitusobora kwesiga Yahwe habwokuba atugonza. Yahwe akahanga abantu habwokuba akaba naagonza boomeere ebiro n’ebiro kandi beegondeze omu bwomeezi nkooku na uwe abwegondezaamu. Yahwe akabazaaho ekigendererwa kye naagamba ati: “Tukole [omuntu] okuba nkaitwe, omu kusisana kwaitu” (Kub. 1:26) Akatuha obugabe obw’okwecweramu. Akahanga ensi enungi muno kuba eka yaitu. (Zab. 115:16) Kandi akaha abazaire baitu ab’okubanza obujunaanizibwa oburungi muno obw’okufoora ensi orugonjo orurungi. (Kub. 1:28; 2:15) Akabaha ebyokulya bingi ebirungi, ebimera, ebisoro hamu n’ebindi bingi. Kinu akakikora habwokuba akaba naagonza batunge okusemererwa, kandi beegondeze omu bwomeezi. Hataroho kugurukyagurukya, ebikorwa binu nibyolekera kimu ngu “okugonza kwa Yahwe okutalekera kwikaraho ebiro n’ebiro.”—Zab. 103:​17, NWT.

5. (a) Kiki Yahwe eki yakozere hanyuma ya Adamu na Haawa kumujeemera? (b) Mirago ki emu Ruhanga ei ahikiriize? (Rora akasanduuko “Ruhanga Aikara Naabaza Amananu.”)

⁵ Nitusobora kwesiga Yahwe habwokuba ahikiiriza ebi aba araganiize. Yahwe atahangire busa ensi, baitu akagikora okwikarwamuga. (Is. 45:​18, 19) Adamu na Haawa obu baajeemere, bakaba baine kufa. Nahabweki kikaba nikisobora kuzooka ngu Sitaani akaba alemeseze Yahwe kuhikiiriza ekigendererwa kye hali ensi, hamu n’abantu. Baitu Yahwe ali Ruhanga ow’ahikiiriza byona ebi aba araganiize. (Is. 46:​10, 11) Ekigendererwa kye eky’okwijuza ensi n’abantu abahikiriire kitahinduke. Egi niyo ensonga habwaki Yahwe yaikiriize Adamu na Haawa kuzaara abaana. Kandi akahayo Omwana we omu wenka kuhayo obwomeezi bwe nk’ekicunguro nukwo asobole kujuna abaijukuru ba Adamu n’okubaha okunihira okurungi muno okw’okwomeera ebiro n’ebiro.—Yoh. 3:16.

RUHANGA OW’AMANANU AHIKIIRIZA EKIGENDERERWA KYE

6. Kiki Yahwe eki yarangire hanyuma ya Adamu na Haawa kumujeemera?

⁶ Omuntu ayayoheze Adamu na Haawa kujeemera Ruhanga nuwe “enjoka eya ira erukwetwa Diabolo kandi Sitaani.”a (Kus. 12:9; Kub. 3:​4, 5; Yoh. 8:44) Yahwe akamucwera omusango kandi ogu nugwo ngu akaba naija kuhwerekerra omu kasumi ak’omumaiso. (Kub. 3:15) Baitu eki, kitakabaireho abantu baingi bakaba nibaija kumuhondera kandi beetwaze nka uwe. Baitu abandi bakaba nibaija kwikara bali beesigwa hali Yahwe.

7. Nibaha abahondera Sitaani, kandi kiki ekirukwija kubahikaho?

⁷ Abo abarukuhondera Sitaani Diabolo nubo bamalaika abajeemu hamu n’abantu. Habwokuba bahakaniza Yahwe kinu kibafoora kicweka ky’oruzaaro rwa Sitaani. Baitu Ruhanga ataireho akasumi nambere Sitaani hamu n’abo boona abamuhondera balihwerekerezebwa.—Dan. 2:44; Bar. 16:20.

8. Kiki Yesu eki yakozere omu 1914? (Rora n’ebisisani.)

⁸ Bwakaiso ki oburukutugumya ngu Ruhanga naija kuhikiiriza ekigendererwa kye eky’okuhwerekereza Sitaani, hamu n’abantu ababi abamuhondera? Omu 1914, Yesu akatandika kurwanisa Sitaani Diabolo hamu na badaimooni be kandi yabanaga omu nsi. (Kus. 12:​7-9) Noobu kiraaba ngu obulemu bunu bukaba omu iguru, ab’omu nsi na bo bakakwatwaho habw’ebintu ebyarugiremu. Baibuli ebazaaho ekintu kinu eti, “Ziboine ensi n’enyanja, habwokuba Diabolo asirimukire yaija nambere muli, aine ekiniga kingi, habwokuba akimanyire ngu asigaizeeyo akasumi kake.” (Kus. 12:12) Kuruga omu mwaka ogwa 1914, Sitaani akata omutima hali ensi kandi ekirugiremu enyikara omu nsi z’eyongeriire kimu kuba mbi. Mali, “ziboine ensi”! Baitu omu kasumi akatali ka hara, Yesu naija ‘kusingura’ kandi abohe Sitaani kumara emyaka 1000, kandi abo abamusagika naija kubahwerekerereza kimu. (Kus. 6:2) Yesu naija kwolekera kimu buli muntu weena ngu Sitaani muntu mubi, kandi ngu aikaire naabazaaho Yahwe ebisuba. (Zab. 45:​4-6) Buli omu weena naija kumanya ngu Yahwe ali Ruhanga ow’amananu!—Ez. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

RUHANGA OW’AMANANU ASOROOZA ABO BOONA ABAGONZA AMANANU

9. Nibaha Yahwe abaarukusorooza kasumi kanu?

⁹ Kasumi kanu, Yahwe aliyo naasorooza hamu “ebintu byona omu Kristo, ebintu eby’omu iguru n’ebintu eby’omu nsi. Ego, birisoroolezebwa omuli uwe.” (Bef. 1:10) “Ebintu eby’omu iguru” nibikiikirra abaseeserweho amagita, Yahwe ab’akomere kulema na Kristo omu iguru. “[Ebintu] eby’omu nsi” nibikiikirra abo abalyomeera ebiro n’ebiro omu Rugonjo Orurungi hanu omu nsi. Abaheereza ba Yahwe banu boona baliyo nibakoonyera abantu kukimanya nkooku Sitaani mubiihi w’ebisuba kandi nibabakoonyera n’okumanya amananu agarukukwata hali Yahwe.

10. Yahwe aliyo naakoonyera ata abantu kumanya amananu? (Okusuukururwa 14:​6, 7)

¹⁰ Yahwe aliyo naasorooza abantu abarukugonza amananu, kuraba omu mulimo gw’okutebeza omu nsi yoona ogukyakizireyo kuba gw’amaani omu byafaayo. (Soma Okusuukururwa 14:​6, 7.) Noobu kiraaba ngu Yahwe akozesa abantu kutebeza abandi amakuru amarungi, bamalaika na bo nibeejumbira omu mulimo gunu obu nibasorooza hamu abantu ab’emitima enungi kubaleeta omu kitebe Ekikristaayo. Omulimo gunu gukoonyiire abantu kumanya ebisuba ebiikaire nibyegesebwa Bbabburooni Orukooto, orurukukikirra amadiini goona ag’ebisuba omu nsi yoona, Sitaani ag’aikaire naakozesa kumara emyaka nyingi, kubazaaho Yahwe ebisuba. (Kus. 18:​2, 4) Omu kasumi akatali ka hara, amadiini ag’ebisuba goona nigaija kuhwerekerezebwa, kandi Ruhanga ow’amananu naija kutunga ekitiinisa ekimusemeriire.—Kus. 17:16.

11. Nitusobora tuta kumanyirra abaheereza ba Yahwe ab’amananu?

¹¹ Yahwe asorooza hamu abantu aba buli mulingo kuruga omu nsi yoona kwija omu kitebe kye. (Kus. 7:​9, 10) Obu bahurra “amakuru amarungi,” bagamanyirra ngu ganu mananu kandi n’okusemererwa beeteeranizaaho abantu ba Yahwe. (Mar. 13:10) Kasumi kanu buli omu naasobora kumanya abantu abarukuheereza Yahwe omu mulingo oguhikire. Nabbi Maraki akaranga naagamba ati: “Nubwo muligaruka mulibaganizaamu abahikiriire nababi, ogu arukukorra Ruhanga nogu atarukumukorra.” (Mara. 3:18) Abaheereza ba Yahwe bakyolekera kimu ngu nibaramya Ruhanga ow’amananu kuraba omu bikorwa byabo n’omu mulimo gwabo ogw’okutebeza.

12. Omulimo ogw’okutebeza nigukoonyera guta omu kuhikiiriza ekigendererwa kya Yahwe?

¹² Obu tutebeza “amakuru amarungi ag’Obukama,” tuba nitworobera ekiragiro kya Yesu kandi ha murundi nugwo gumu nituhikiiriza obunabbi. (Mat. 24:14; 28:​18-20) Kandi habw’omulimo gunu, abantu omu nsi yoona baliyo nibafooka bahondezi ba Kristo kandi balindiriire n’ekihika akasumi obu baliramya Ruhanga ow’amananu ebiro n’ebiro. Mali ka mugisa gw’amaani kurora ngu Yahwe naatukozesa kuhikiiriza ekigendererwa kye!

NITUKIGUMIZA KIMU NGU YAHWE NAIJA KUHIKIIRIZA EKI ARAGANIIZE

13. Nibaha Sitaani abaarukukira muno kuhiiganiza, kandi habwaki?

¹³ Sitaani Diabolo aine ekiniga ky’amaani habwokuba akimanyire ngu “asigaizeeyo akasumi kake” ahwerekerezebwe hamu n’ensi enu embi. (Kus. 12:​12, 13) Ataire muno omutima ha kuhiiganiza abaseeserweho amagita Yahwe ab’akomere kufooka balemi omu Bukama bwe, kandi nubo “abarukworobera ebiragiro bya Ruhanga, kandi abaine omulimo ogw’okuha obwakaiso oburukukwata hali Yesu.” (Kus. 12:17; 14:12) Ekindi, Sitaani ahiiganiza abo boona ababakoonyera omu mulimo gw’okutebeza.

14. Kiki ekiribaho abo abarukusagika Sitaani obu balitaahirra abantu ba Yahwe? (Rora n’ekisisani ekya ha kyesweko.)

¹⁴ Hanyuma ya Bbabburooni Orukooto kuhwerekerezebwa, abo abarukusagika Sitaani nibaija kulengaho kuhwerekereza n’abantu ba Yahwe. Okutaahirra oku nikwija kuleetera obulemu bw’Amagedoni kutandika. (Kus. 16:​13, 14, 16) Yesu hamu n’ihe ly’omu iguru nibaija kujuna abaheereza ba Yahwe, kandi bahwerekereze ebintu byona ebya Sitaani ebiriba bisigaireho omu nsi. (Kus. 19:​19-21) Nihaija kuba hatakyaroho abantu ababi hamu n’ababiihi b’ebisuba. (Kus. 21:8) Buli omu naija kukimanya ngu Yahwe aikara naakora ekihikire kandi naabaza amananu.

15. Habwaki nitukigumiza kimu ngu ebintu byona Yahwe ebi araganiize omu kasumi ak’omumaiso nibiija kuhikirra? (Isaaya 65:​16, 17) (Rora n’ekisisani.)

¹⁵ Kasumi kanu, abantu boona omu nsi baikara nibarwanisangana kandi nibabiihabiihangana kukira na kara. Baitu Yahwe aikara naakoonyera abaheereza be kwikara bali omu bumu. Aliyo naasorooza abo boona abagonza amananu kwija omu kitebe kye. Busaho ekisobora kulemesa Yahwe kuha abantu be emigisa hamu n’omulimo ogu barukukora. (Soma Isaaya 65:​16, 17.) Nitukigumiza kimu ngu byona Yahwe ebi araganiize omu kasumi ak’omumaiso nibiija kuhikirra. Ebigambo by’omukwenda Paulo ebirukusangwa omu Abarooma 8:​38, 39 nibitugumiiza kimu ngu: “Noobu kwakuba okufa, noobu bwakuba obwomeezi, noobu baakuba bamalaika, noobu baakuba ab’obusobozi, noobu byakuba ebintu ebiroho hati, noobu byakuba ebintu ebirukugenda okwija, noobu gaakuba amaani, noobu kwakuba okuraiha, noobu kwakuba okuhama, noobu kyakuba ekyahangirwe ekindi kyona, busaho ekirisobora kutubaganiza hali okugonza kwa Ruhanga okuli omu Kristo Yesu Mukama waitu.”

16. Habwaki nooyesigira kimu Yahwe n’omutima gwawe gwona?

¹⁶ Mali haroho ensonga nyingi muno ezirukutuleetera kwesiga Yahwe, Ruhanga ow’amananu. Nuwe Omuhangi waitu. Atugonza muno. Aliyo naasorooza hamu abantu baingi kuruga omu nsi yoona nukwo bamuheereze omu mulingo oguhikire. (Is. 60:22; Zak. 8:23) Tukimanyire ngu aikara naahikiiriza ebi aba araaganize kandi ngu omu kasumi akatali ka hara naija kwihaho Sitaani nukwo ensi ebe etakyarumu ebisuba byona ebi arukukuraakuraniza. Na itwe nitusaba nkooku Daudi yasabire obu yagambire ati: “Ayebazibwe [Yahwe] Ruhanga, . . . Anyakukora wenka ebyamahano: Kandi nibaralye eryekitinisa likugizibwege ebiro byona; nensi zona ziijulege ekitinisakye.”—Zab. 72:​18, 19.