AMAGEZI AGASOBORA KUKONYERA EKA
Omulingo Osobora Kukonyera Abaana Baawe Kukora Kurungi ha Isomero
Omwana waawe n’asobora kuba atarukugonza kusoma kandi takora ebimuhairwe ha isomero. Ekirugamu? Takora kurungi ha isomero kandi n’eby’okusoma bitandika kumutama. N’osobora ota kukonyera omwana waawe kweyongera kukora kurungi?
Eky’osemeriire kumanya
Kusindikirizibwa kuleetera ekizibu kweyongera. Kusindikiriza omwana waawe kukora kurungi, nikisobora kumuleetera kwetuntura ha isomero n’omu ka! Kandi eki nikisobora kumuleetera kubiiha ebisuba, kusereka ebyakozere hali abazaire, rundi kwikara nayosa. Ekizibu nikiija kweyongera.
Kuha abaana ebisembo nikisobora kuba ky’akabi. Omuzaire arukwetwa Andrew n’agamba ati: “Kusobora kwekambisa muhara waitu, tukalengaho kumuha ebisembo obuyakoraga kurungi ha isomero. Baitu eki kikamuleetera kuteeka omutima ha bisembo. Obuyalemerwe kukora kurungi ha isomero, akahwamu amaani habwokuba akakimanya ngu tarukwija kutunga ekisembo.”
Kujunaana abegesa tikirukwija kugasira omwana waawe. Omwana waawe n’asobora kutekereza ngu kusobora kukora kurungi ha isomero tikirukwetaagisa kuteekamu amaani. N’asobora kutandika kujunaana abandi habw’ensobi ze n’okubanihirramu kumaraho ebizibu bye. Omwana waawe n’asobora kulemwa kwega isomo erikuru muno, n’okwikiriza ngu najunanizibwa habw’ebikorwa bye.
Eky’osemeriire kukora
Lema enyehurra zaawe. Kakuba oba oine ekiniga, lindaho kubaza n’omwana waawe ha mulingo arukukora ha isomero. Omuzaire arukwetwa Brett n’agamba ati: “Harugamu ebirungi nyowe na mukazi wange obutwoleka embabazi kandi tukabaza omu mulingo ogutekaine.”
Omusingi gwa Baibuli: “Omuntu wena arahukege okuhurra, naikaraho okutagamba, naikaraho okutabihirwa.”—Yakobo 1:19.
Manya ekizibu kyonyini. Ensonga ezireteera abaana kukora kubi ha isomero nizitwarramu abeegi bataahi baabo kubendereza, kuhindura amasomero, kweralikirra omu kasumi ak’ebirengeso, ebizibu eby’omu ka, kuburwa oturo, kutaba n’entekaniza enungi, n’okutateekaho omutima omu kilaasi. Otatekereza ngu omwana waawe tarukuteekamu amaani.
Omusingi gwa Baibuli: “Ata omutima ha kigambo alibona ebirungi.”—Enfumo 16:20.
Kora ebintu ebiraleetera omwana waawe kugonza kwega. Mutereho obwire obw’okukora ebintu ebimuhairwe ha isomero n’okusoma ebitabu. Mutungire ekiikaro ekiculiire nambere asobora kukorra ebintu ebimuhairwe ekitarumu ebintu ebisobora kumuhugura (binu nibitwarramu rediyo, tiivi hamu n’esimu). Otalinda obwire kuhwayo nukwo okamuragira kukora ebintu ebimuhairwe ha isomero nukwo kimukonyere kutaho omutima. Omuzaire arukweta Hector kuruga Germany, n’agamba ati: “Obwire bw’ebirengeso butakahikire, turabamu kara nauwe ebiyayegere omu kiikaro ky’okukikora obwire buhwereyo.”
Omusingi gwa Baibuli: “Buli kintu kyona kiine akasumi kakyo.” —Omugambizi 3:1, NWT.
Mwekambise kusoma. Omwana waawe obwarayeyongera kwetegereza habwaki kikuru kugenda ha isomero, nikiija kumwekambisa kuteekamu amaani. Ekyokurorraho, okubara nukusobora kumukonyera kwega kubalirra kurungi sente ez’okulya ha isomero.
Omusingi gwa Baibuli: “Tunga amagezi, tunga okwetegereza . . . Ganyumize.”—Enfumo 4:5, 8.
Amagezi agasobora kukukonyera: Konyera omwana waawe obwarukuba nakora ebimuhairwe ha isomero, baitu otabimukorra. Andrew n’agamba ati: “Muhara waitu niitwe twamukorraga ebimuhairwe ha isomero kandi eki kyamuleetera kutateekamu amaani.” Yegesa omwana waawe kwekorra ebimuhairwe ha isomero habwe wenka.