AMAGEZI AGASOBORA KUKONYERA EKA
Omulingo Osobora Kulema Ekiniga Kyawe
Ow’oli nauwe omu buswere abaza, rundi akora ekintu ekikuleetera kukwata ekiniga, baitu olengaho kwefoora nk’ow’atakwasirwe kiniga. Hanyuma akyetegereza ngu haroho ekisobere kandi akukaguza. Eki kikuleetera kweyongera kubiihirwa. N’osobora kukora ki kulema ekiniga kyawe?
Eky’osemeriire kumanya
Kakuba otalema ekiniga nikisobora kuba kyakabi ha bwomeezi bwawe. Okuseruliiriza nikwoleka ngu ekiniga eky’amaani nikisobora kuleetera omuntu kutunga puresa, kurwara oburwaire bw’omutima, okwenuuba, n’okurwara munda. Ekindi, ekiniga nikisobora kuleetera omuntu kuburwa oturo, kweralikirra muno, kurwara omubiri na stroke. Enu niyo ensonga habwaki Baibuli etutererra eti: “Leka okubihirwa, . . . , nukuleta obubi.”—Zabuli 37:8.
Kyakabi kwefoora ngu tokwasirwe ekiniga. Kwikara twine ekiniga nitusobora kukirengesaniza n’oburwaire obw’amaani. Ekyokurorraho, n’osobora kutandika kucwera abandi omusango n’okubatekerezaaho kubi. Eki nikisobora kuleetera abantu abandi kutagonza kwikara naiwe kandi nikitalibaniza obuswere bwanyu.
Eky’osobora kukora
Teeka omutima ha miringo enungi ey’ow’oli nauwe mu buswere. Handiika ebintu bisatu ebyorukugonza ha mugonzebwa waawe. Omurundi ogundi obwarabaza, rundi akakora ekintu kikakubiihiza otekerezeeho emiringo ye enungi. Eki nikisobora kukonyera kutakwatwa ekiniga bwangu.
Omusingi gwa Baibuli: “Musimege.”—Abakolosai 3:15.
Ba muntu arukuganyira. Lengaho kurora ebintu omu mulingo ow’oli nauwe omu buswere arukubiroramu. Kinu nikiija kukukonyera kumwoleka embabazi n’okugonza. (1 Petero 3:8) Hanyuma, wekaguze, ‘Ekimbihiize ky’amaani muno ngu tinsobora kukyeganyira?’
Omusingi gwa Baibuli: “[Omuntu] . . . kimuleetera kusemera obwatateeka omutima ha nsobi y’omuntu ondi.”—Enfumo 19:11, NWT.
Kozesa ebigambo eby’embabazi kandi omu mulingo ogw’amagezi. Webazeeho hatali kubazaaho mutaahi waawe. Ekyokurorraho, omu kiikaro ky’okugamba ngu, “Tofaayo habwokuba tonterra kummanyisa nambere oli,” n’osobora kugamba oti, “Obwire obububa bwizire, nyeralikirra obundukuba ntamanyire nambere oli.” Kubaza omu mulingo gw’embabazi nikisobora kukukonyera kulema ekiniga.
Omusingi gwa Baibuli: “Ebigambo banyu biikalege byembabazi ebiro byona nibirungibwamu ekisura.”—Abakolosai 4:6.
Huliiriza kurungi. Hanyuma y’okubazaaho omulingo orukwehurramu, leka n’ow’oli nauwe omu buswere ayebazeeho otarukumucwa ekirimi. Obwaramara kubaza, tekerezaaho ebyabalize kurora obworaaba ebyetegeriize kurungi. Kuhuliiriza kurungi nikisobora kukukonyera kulema ekiniga kyawe.
Omusingi gwa Baibuli: “Omuntu arahukege okuhurra, naikaraho okutagamba.”—Yakobo 1:19.