Yegesa Abaana Baawe Kusiima

Okuseruliiriza nikwoleka ngu abantu abasiima baikara basemeriirwe, baine obwomeezi oburungi, bagumiisiriza obu batunga ebizibu, kandi baine enkoragana enungi n’abantu abandi. Omuseruliirizi arukwetwa Robert A. Emmons naagamba ngu kuba muntu arukusiima “kikoonyera omuntu kwetantara ebintu nk’ihali, kuhoora enzigu, omururu, n’ekiniga.”a

Abaana bagasirwa bata obu booleka okusiima? Omu kuseruliiriza okwamazire emyaka ena, bakakozesa abaana 700 abaali baine omutima ogw’okusiima. Abaakozere okuseruliiriza oku bakakizoora ngu abaana abo, baali batasobora kukopa ebirengeso, kukozesa ebitokooza bwongo, kunywa amaarwa, rundi kwejumbira omu ngeso ezindi embi.

• Abaana kuteekereza ngu basemeriire kubakorra buli kimu kibaleetera kuleka kusiima. Abaana baingi bateekereza ngu basemeriire kubaha ebintu. Tibarukwija kwoleka okusiima kakuba bateekereza ngu baikaire basemeriire kubibaha omu kiikaro ky’okubirora nk’ebisembo.

  Enteekereza egi niyo ekanyire kasumi kanu. Omuzaire arukwetwa Katherine naagamba ati: “Kasumi kanu abantu baingi bateekereza ngu basemeriire kutunga buli kimu kyona eki barukugonza. Omu makuru, magaziini, na ha mikura eya intaneeti, booleka ebisisani eby’ebintu tusemeriire ‘kutunga’ kandi ngu niitwe tusemeriire kubanza kubitunga.”

• Abaana nibasobora kwega kwoleka okusiima bakyali bato. Omuzaire arukwetwa Kaye naagamba ati: “Abaana bakwata bwangu. Kubeegesa engeso enungi bakyali bato, nikisisana nk’okukozesa obuti kutigika ekyakyo nukwo kikule kiterekeriire.”

Omulingo osobora kwegesa abaana kwoleka okusiima

• Beegese ebigambo eby’okukozesa. N’abaana abato nibasobora kwega kusiima omuntu obu abaha ekisembo rundi akabakorra ekintu ekirungi. Obu baraagenda nibakura, nibaija kweyongera kwoleka okusima habw’amakune abandi baboolekere.

  

  Omusingi gwa Baibuli: “Mwolekege ngu nimusiima.”—Abakolosai 3:15.

  Jeffrey naagamba ati: “Mutabani waitu owaine emyaka esatu, akira kugamba ngu ‘weebale’ kandi obu aba naasaba ekintu, agamba ngu ‘caali.’ Akeegera hali bazaire be. Ekyokurorraho kyabo n’ebigambo ebi bakozesa kusiima nibimwegesa na uwe kukora ekintu nikyo kimu.”

• Beegese eki basemeriire kukora. Beegese kuhandiika ha kapapura ebigambo eby’okusiima, omuntu obu abaha ekisembo. Ekindi, bahe emirimo ey’okukora. Eki nikiija kubakoonyera kwetegereza nkooku kyetaagisa kutamu amaani kuteekaniza eka.

  

  Omusingi gwa Baibuli: “Okugaba kuleeta okusemererwa kwingi kukira okuheebwa.”—Ebikorwa 20:35.

  Beverly naagamba ati: “Abaana baitu babiri bakoonyera omu kuteekaniza ebi turaalya, kucumba, n’okukora emirimo endi. Eki kibakoonyera kwetegereza emirimo ey’amaani ei tukora nk’abazaire, kandi nibaija kweyongera kwoleka okusiima.”

• Beegese kuba n’enteekereza enungi. Kusiima nikulengesanizibwa n’ekimera ekibyairwe ha itaka erirungi. Abantu abebundaazi bakyetegereza ngu nibetaaga obukoonyezi kusobora kukora kurungi ebintu, kandi eki kibaleetera kwoleka okusiima abandi obu babakoonyera.

  

  Omusingi gwa Baibuli: “N’obwebundaazi, murole abandi nk’abarukubakira, mutarukwebembeza ebi murukugonza byonka, baitu nimwebembeza n’eby’abandi.”—Abafiripi 2:3, 4.

  Tamara naagamba ati: “Twine omuzaano ogu tuzaana obu tuba nitulya ekyarwebagyo. Buli omu abazaaho ekintu eki arukusiima. Kyekambisa buli omu kuba n’enteekereza enungi hamu n’omutima ogw’okusiima, hatali enteekereza embi ey’okwefaaho.”

Amagezi Agasobora Kukukonyera: Teekaho ekyokurorraho ekirungi. Abaana nikiija kubanguhira kwoleka okusiima, kakuba oikara noobasiima kandi bakaikara nibahurra noosiima abandi.