JUUNI 1-7, 2026
EKIZINA 111 Ebituletera Okusemererwa
Ensonga Habwaki Osemeriire Kusemererwa Noobu Baraakunoba
“Mwine okusemererwa, abantu obu baraabanobaga.”—LUK. 6:22.
EBI TURAAYEGA
Nitwija kurora ensonga habwaki tusemeriire kusemererwa abantu obu baraatunoba habw’okuheereza Yahwe.
1. Kiki Yesu eki yagambire, kandi habwaki nikihuniiriza?
OMU Kwegesa kwe Okwa ha Rusozi, Yesu akagamba ati: “Mwine okusemererwa, abantu obu baraabanobaga.” (Luk. 6:22) Ebigambo ebi biine kuba byahuniriize abantu abakaba nibamuhuliiriza. Habwaki? Habwokuba busaho muntu n’omu ow’agonza kunobwa. Hati, habwaki Yesu yabalize ebigambo ebi? Kinu kiri kikaguzo ekirungi eky’okuteekerezaaho habwokuba abahondezi ba Yesu kasumi kanu banobwa abantu baingi. Nitwija kubazaaho ensonga habwaki tunobwa, n’ensonga habwaki tusemeriire kusemererwa abantu obu batunoba.
ENSONGA HABWAKI TUNOBWA
2-3. Nsonga ki emu ey’eretera Abakristaayo kuhiiganizibwa, kandi kinu nikisobora kukwataho kita omulingo turoramu abo abatuhakaniza? (Yohaana 16:2, 3)
2 Abantu batunoba habwokuba turamya Yahwe. Yesu akabazaaho abo abaakuhiiganiize kandi bakaita abahondezi be ati: “Tibamanyire Isenyowe noobwakuba nyowe.” (Soma Yohaana 16:2, 3.) Nooha aleetera abantu kuhakaniza abantu ba Ruhanga? Ni Sitaani. Nuwe “ruhanga ow’enteekaniza ey’ebintu enu.” (2 Kol. 4:3, 4) Asweka abantu amaiso nukwo baleke kumanya amananu agarukukwata hali Yahwe, kandi abaleetera kuhakaniza abo abarukumanya Ruhanga kandi abamugonza. (Yoh. 8:42-44) Kumanya ekintu kinu, nikisobora kukwataho kita omulingo turoramu abo abatuhakaniza? Obu tukimanya ngu babiihabiihirwe, kitukoonyera kwetantara kubanoba.
3 Teekerezaaho ekyokurorraho kya Pavel,a ow’arukwikara omu ihanga nambere omulimo gwaitu gutangirwe. Habwokuba akagumizaamu naaheereza Yahwe n’obwesigwa, bakamukwata, baamuteera muno, kandi baamusibira omu kasiika ak’enkomo akataito muno ali wenka kumara emyezi. Naagamba ati: “Hati ninkirorra kimu ngu okuhakanizibwa, kuleetwaho Sitaani na badaimooni be ababa nibagonza kulemesa okuramya okw’amananu. Nikizooka ngu abantu abarukukira obwingi abakora omu nkomo, tibatunobere. Oihireho, baba nibakora omulimo gwabo.” Ow’oruganda kuruga omu Croatia ayagumiire okuhiiganizibwa okw’amaani kuruga hali abazaire be abatali omu mananu naagamba ati: “Hati nkyetegeriize ngu Sitaani nuwe munyanzigwa wange hatali bazaire bange.”—Bef. 6:12.
4. Kiki eki turukwegera ha kyokurorraho kya Yesu n’eky’omwegeswa Sitefano? Rora n’ekisisani.)
4 Titunoba abo abatuhakaniza. Amananu gali, nitusobora n’okubasabira. (Mat. 5:44) Nitusobora kwegera hali Yesu hamu n’omwegeswa Sitefano. Abaserikale Abarooma obu baatiire Yesu emisumaali ha muti, akasaba naagamba ati: “Taata baganyire.” (Luk. 23:34) Yesu akaba naasaba Yahwe kuganyira abaserikale banu abakaba baragiirwe kumwita. Naasobora kuba akaba naateekerezaaho n’abo abakaba bali omu kitebe ky’abantu abaatokiire haiguru nibagamba ngu aitwe, habwokuba bakaba batwaliriziibwe enteekereza y’abanyanzigwa be. Yesu akakyetegereza ngu abantu banu bakaba batarukumanya eki bakaba nibakora. Omu mulingo nugwo gumu, omwegeswa Sitefano, akasaba Ruhanga kuganyira abo abakaba nibagenda kumwita. (Ebik. 7:58-60) Yahwe akagarukamu esaara ya Yesu n’eya Sitefano? Ego. Abantu baingi abakaba nibagonza ngu Yesu aitwe, bakahika baayegarukamu, baamwikiririzaamu, kandi baabatizibwa. (Ebik. 2:36-41) Kandi Saulo owa Taruso ayasagikire abo abakaba nibaita Sitefano, akahika yafooka Mukristaayo, kandi yayeijukya habw’ebintu ebibi ebi akaba akozere atamanyire.—1 Tim. 1:13.
Nkooku Yesu n’omwegeswa Sitefano baasabiire abo abakaba nibabahiiganiza, na itwe nitusobora kusabira abo abatuhiiganiza (Rora akacweka 4)
5. Kiki eki orukwegera ha kyokurorraho kya César?
5 Na kasumi kanu, Yahwe naakyagumizaamu kugarukamu esaara ezi tusabira abo abarukutuhakaniza. Teekerezaaho ekyokurorraho kya César, ow’arukwikara omu Venezuela. Ise yamuhakanizaaga muno habw’okuba omu h’Abakaiso ba Yahwe. César naagamba ati: “Nyinanyowe akaba ali nyinabwenge kandi maama omurungi muno. Noobu kiraaba ngu yaikaraga naayebembeza Obukama, atanagiirize isenyowe n’omurundi na gumu. Nyowe na bagenzi bange, akatwegesa kutamuga isiitwe ekitiinisa. Akatwegesa kworobera isiitwe, rundi buli atugambiire kukora ekintu ekitarukuhikaana na Ruhanga ebi agonza.” Hanyuma y’emyaka, ise akatandika kuhinduka. César naagamba ati: “Kiro kimu, hanyuma y’okusaba kuruga ha mutima, nkakaguza isenyowe obu ndaaba ninsobora kutandika kumwegesa Baibuli. Kigumire kusoborra omulingo nayehuliiremu obu yaikiriize.” Hanyuma, ise César akabatizibwa. Tikiri ngu abantu boona abatuhakaniza bakora empindahinduka nk’ezi. Baitu abamu bahinduramu enteekereza yabo hanyuma y’okurora omulingo ogw’ekitiinisa ogu tubazaamu hamu n’engeso zaitu enungi. Mali ka kitusemeza muno obu turora bakozere empindahinduka! Tulindiriire n’ekihika kurora omulingo Yahwe, “Omucwi wemisango yensi zona” ow’embabazi, araakoonyeramu abantu nk’abo kumwegaho.—Kub. 18:25.
6. Kusigikirra hali Marako 13:13, nsonga ki endi ey’ereetera abantu kutunoba?
6 Abantu batunoba habwokuba tusagika Yesu. Yesu akagamba ngu Abakristaayo ab’amananu bakaba nibaija kunobwa abantu boona “habw’ibara [lye].” (Soma Marako 13:13.) ‘Ibara’ lya Yesu nirikikirra ki? Nirikikirra emiringo ye hamu n’obusobozi bwe obw’okulema nk’Omukama w’Obukama bwa Ruhanga. Tunobwa abantu abataire obwesige bwabo omu beebembezi ab’ensi hatali omuli ogu Yahwe ow’akomere kulema iguru n’ensi, Yesu Kristo. Yesu aikaire naalema nk’Omukama w’Obukama bwa Ruhanga kurugira kimu omu 1914. Omu kasumi akatali ka hara naija kwihaho gavumenti zoona ezirukuhakaniza obusobozi bwe.
7-8. Nsonga ki endi ey’ereetera abantu kunoba abaheereza ba Yahwe? (Yohaana 15:18-20) (Rora n’ebisisani.)
7 Abantu batunoba habwokuba twanga kwetwaza nka bo. Yesu akasoborra ngu abahondezi be bakaba nibaija kunobwa habwokuba “[tibali] kicweka ky’ensi.” (Soma Yohaana 15:18-20.) Kusisanaho n’Abakristaayo ab’omu kyasa eky’okubanza, na itwe twanga kuba n’enteekereza, engeso hamu n’embaza nk’ey’abantu ab’omu nsi ya Sitaani. Habw’ensonga enu, ab’oruganda na banyaanya itwe baingi batwazibwa kubi ha mulimo rundi ha isomero. (1 Pet. 4:3, 4) Baitu kitusemeza kukimanya ngu bamu h’abantu abatuhakaniza, bamalirra bahindwire enteekereza yabo kandi batandika kututamu ekitiinisa habw’okugumira ha nyikiriza zaitu.
8 Teekerezaaho ekyokurorraho kya Ignacio, kuruga omu Central America. Akasomera omu isomero nambere omwegesa yaikaraga naamusekeereza habw’okuhondera endengo za Baibuli ezirukukwata ha ngeso. Baitu obu akaba ali haihi kumalirra kusoma, omwegesa ogu akamukaguza omulingo akaba asoboire kuhondera emisingi ya Baibuli, omu kiikaro nambere abantu baingi baamusekerezaaga habw’okwetwaza omu mulingo ogu. Ignacio akamusoborra ngu ebiragiro bya Ruhanga bimuha obulinzi. Hanyuma akamuraaliza kwija omu rusorrokano. Ekyamuhuniriize, omwegesa akaija! Omwegesa akakwatwaho muno habw’okugonza oku yasangire omu kitebe, kandi yagumizaamu naija omu nsorrokano. Hanyuma, omwegesa na uwe akahikwaho okuhakanizibwa habw’okwega Baibuli. Baitu akagumizaamu naakurakurana omu by’omwoyo kandi yahika yabatizibwa.
Nitusobora kurwanirra okwikiriza kwaitu n’obumanzi, ka tube tuli bato rundi bakuru (Rora akacweka 8)b
9-10. (a) Nsonga ki endi ey’ereetera Abakristaayo kuba b’embaganiza hali abantu ab’omu nsi ya Sitaani? (b) Kiki eki tusobora kwegera ha kyokurorraho ky’omukwenda Paulo?
9 Ekindi, tuba b’embaganiza hali abantu abarukwebemberwa Sitaani, habwokuba titugwera rubaju omu by’obulemi kandi titwejumbira omu bulemu. (Yoh. 18:36) Kusigikirra ha kiragiro ekirukusangwa omu Abarooma 13:1, tukora kyona ekirukusoboka kworobera ebiragiro bya gavumenti. Baitu nk’Abakristaayo, twikara tutarukugwera rubaju omu by’obulemi. Nahabweki titwesimbaho rundi kukoma abeesimbire. Habwaki? Habwokuba tuli beesigwa hali Yahwe hamu n’Obukama bwe oburukwebemberwa Yesu Kristo. Baingi h’Abakaiso ba Yahwe batairwe omu nkomo habw’okwikiriza kwabo. Baitu noobu kiraaba ngu bali omu nkomo, bagumizaamu nibatebeza. Omu kukora eki baba nibeegera ha kyokurorraho ky’omukwenda Paulo ayamazire emyaka nyingi asibiirwe omu nju ye n’omu nkomo. (Ebik. 24:27; 28:16, 30) Akagumizaamu naatebeza amakuru amarungi hali abo boona abaamuhuliirizaaga otwaliiremu n’abalinzi b’enkomo, abakuru b’enkomo, abalemi, abakama, kandi obundi n’abakuru abaakorraga Omulemi Omukuru ow’Abarooma ow’arukwetwa Nero.—Ebik. 9:15.
10 Omu mulingo nugwo gumu, ab’oruganda na banyaanya itwe abatairwe omu nkomo batebeza abo boona ababahuliiriza otwaliiremu abacwi b’emisango, abakuru omu gavumenti, hamu n’abalinzi. Ow’oruganda omu ayamazire emyaka erukuhingura omu mukaaga omu nkomo habw’okutagwera rubaju omu by’obulemi akagamba ngu akarora akasumi aka yamazire omu nkomo hatali nk’ekifubiro, baitu nk’obujunaanizibwa kuruga hali Yahwe obw’okuserra abo abaine emitima enungi. Mali ka nikisobora kutusemeza muno kakuba Yahwe atukozesa kutebeza abantu nk’abo amakuru amarungi! (Bak. 4:3) Leka turole ensonga endi ey’etuleetera okusemererwa abantu noobu batunoba habw’okuheereza Yahwe.
ENSONGA HABWAKI TUSEMERERWA ABANTU OBU BATUNOBA
11. Kuhikwaho okuhiiganizibwa nikisobora kita kugumya okwikiriza kwaitu? Bazaaho ekyokurorraho.
11 Tukimanyire ngu ensi kutunoba nikihikiriza obunabbi bwa Baibuli. Yahwe akaranga omu bunabbi obwabandize kuhandiikwa omu Baibuli ngu Sitaani hamu n’oruzaaro rwe orw’akokurorraho, kandi abo nubo boona abamuhondera, baakunobere abo boona abagonza Yahwe kandi abamuheereza. (Kub. 3:15) Emirundi nyingi, Yesu akagumya ebigambo ebi eby’obunabbi nkooku abahandiiki boona bbana ab’ebitabu eby’Enjiri baahandiikire. (Mat. 10:22; Mar. 13:9-12; Luk. 6:22, 23; Yoh. 15:20) N’abahandiiki abandi abaahandiikire Baibuli bakabazaaho ekintu nikyo kimu. (2 Tim. 3:12; Yak. 1:2; 1 Pet. 4:12-14; Yud. 3, 17-19) Nahabweki tikituhuniiriza obu tuhiiganizibwa. Oihireho tusemererwa habwokuba obunabbi bwa Baibuli buba nibuhikirizibwa. Kinu kitugumya ngu nituheereza Ruhanga ow’amananu. Munyaanya itwe ow’arukwikara omu ihanga nambere omulimo gwaitu gutangirwe naagamba ati: “Obu nahaireyo obwomeezi bwange hali Yahwe, nkaba nkimanyire ngu niinyija kuhiiganizibwa. Nahabweki ebirengo bitantiinise noobu kwakuba okumpuniiriza.” Iba akaba ali omu hali abo abakaba nibamuhakaniza. Yamutwazaaga kubi kandi akookya Baibuli ye hamu n’ebitabu bye. Baitu omu kiikaro ky’okugarukirra habw’okutiina, okwikiriza kwe kukeeyongerra kimu kuguma. (Baheb. 10:39) Naagamba ati: “Okuhiiganizibwa kukarangwa, nahabweki nkaba nkimanyire ngu kukaba kwine kubaho. Obu kwampikireho, kikandeetera kukigumya ngu enu niyo diini ey’amananu.”
12. Kiki ekyakoonyiire ow’oruganda omu kugumira okuhiiganizibwa?
12 Noobu kiraaba ngu nitunihira kuhikwaho okuhiiganizibwa, nikisobora kutugumira kukugumiisiriza. Ow’oruganda omu akahandiikaho akaire aka yamazire omu nkomo naagamba ati: “Obwire obumu nayenuubaga, ninyeraliikirra, kandi ntandika kurra.” Kiki ekyamukoonyiire kuguma? Akagamba ati: “Naikaraga ninsaba. Nasabaga buli nyenkyakara, kandi omu kiro kyona obu nahikwahoga enyikara ezigumangaine, nabwo nasabaga. Noobu nakwatwaga ekiniga habw’okutwazibwa kubi, nayekingiraga omu lyogero, ninsaba.” Ekindi, ow’oruganda yayecumiitirizaahoga ebyokurorraho ebya kara hamu n’ebya kasumi kanu eby’abantu abaikaire bali beesigwa. Eki kikamukoonyera kugumira okuhiiganizibwa, n’okutunga obusinge Yesu obu yaraganiize abahondezi be.—Yoh. 14:27; 16:33.
13. Kiki ekisobora kutukoonyera kusingura enobi?
13 Okugonza oku twiniirengana n’oku twiniire Yahwe kutukoonyera kugumiisiriza. Yesu akaba naagonza Ise n’omutima gwe gwona kuhikira kimu ha kufa. Ekindi, Yesu yagonzaaga banywani be. (Yoh. 13:1; 15:13) Na itwe obu turaakurakuraniza okugonza oku twiniire Yahwe hamu n’ab’oruganda na banyaanya itwe, nitwija kusingura enobi. Omu mulingo ki? Kusobora kutunga eky’okugarukamu, leka tubazeeho ekyokurorraho ky’omukwenda Paulo.
14. Kiki ekyakoonyiire Paulo kwikara ali mwesigwa hali Yahwe kuhikira kimu ha kufa?
14 Obu hakaba nihaburayo akaire kake Paulo aitwe, akahandiikira munywani we omugonzebwa Timoseo naagamba ati: “Ruhanga atatuhe omwoyo ogw’obutiini, baitu akatuha omwoyo ogw’amaani, ogw’okugonza.” (2 Tim. 1:7) Paulo akaba naamanyisa ki? Akaba naagamba ngu okugonza okw’amaani Omukristaayo oku ainiire Yahwe, nikusobora kumukooyera kugumira ebirengo eby’amaani. (2 Tim. 1:8) Noobu kiraaba ngu Paulo akaba akimanyire ngu akaba naasobora kwitwa habw’okuheereza Yahwe, okugonza okw’amaani oku akaba ainiire Yahwe kukamukoonyera kutunga obumanzi obw’okwikara ali mwesigwa hali Yahwe kuhikira kimu ha kufa.—Ebik. 20:22-24.
15. Ab’oruganda na banyaanya itwe kasumi kanu niboolekangana bata okugonza okw’okwefeereza? (Rora n’ebisisani.)
15 Hataroho kugurukyagurukya, tugonza muno Abakristaayo bagenzi baitu abaikara bali beesigwa noobu baba nibahikwaho okuhiiganizibwa. Baingi kasumi kanu bata obwomeezi bwabo omu kabi habw’okugonza oku bainiire ab’oruganda na byanyaanya itwe, nkooku Akura and na Purisika baakozere obu bataire obwomeezi bwabo omu kabi kukoonyera Paulo. (Bar. 16:3, 4) Ekyokurorraho, omu Russia, ab’oruganda na byanyaanya itwe baingi basoboire kugenda omu kooti kugarramu amaani ab’oruganda na banyaanya itwe abatairwe omu nkomo. Munyaanya itwe omu ow’akaba atairwe omu nkomo obu yarozere ab’oruganda na banyaanya itwe baingi baizire omu kooti, akakwatwaho muno yaburwa n’ebigambo by’okubaza kumara akaire. Okugonza okw’okwefeereza ab’oruganda na banyaanya itwe oku baamwolekere, kukamugumya omu kasumi konyini ak’akaba naakwetaagiramu. Mali nikitusemeza muno habwokuba okugonza oku twiniire Yahwe hamu n’aboruganda na banyaanya itwe nikutukoonyera kugumiisiriza.
Ab’oruganda na banyaanya itwe booleka Abakristaayo bagenzi baabo okugonza okw’okwefeereza n’omu biikaro nambere omulimo gwaitu kutangirwe (Rora akacweka 15)c
16. Habwaki omukwenda Petero yagambire ngu abo abatwazibwa kubi habw’okuheereza Ruhanga baine okusemererwa? (1 Petero 4:14)
16 Tukimanyire ngu Ruhanga asemererwa obu tugumira enobi. (Soma 1 Petero 4:14.) Omukwenda Petero akagamba ngu abo abagumira okutwazibwa kubi habw’okuheereza Ruhanga, baine okusemererwa. Habwaki? Okutwazibwa kubi nkooku buli bwakaiso oburukwoleka ngu omwoyo gwa Ruhanga “guli hali” itwe. Petero akaba amanyire kurungi eki kirukumanyisa kusiimwa omu maiso ga Ruhanga n’okugumira okuhiiganizibwa. Hanyuma y’okurabaho obwire buke ekiro kya Pentekooti kimazire kubaho, abaserikale abaakoraga ha yekaru y’Abayudaaya bakatumwa kukwata Petero hamu n’abakwenda abandi habw’okutebeza. Baitu n’obumanzi, Petero akarwanirra okwikiriza kwe. (Ebik. 5:24-29) Na hanyuma y’okuteerwa, uwe n’abakwenda abandi bataleke kutebeza. Oihireho bakasemererwa habwokuba bakaba bahairwe “omugisa ogw’okuswazibwa habw’ibara lya Yesu.” Na itwe nitusobora kusemererwa obu turukuba nitugumira ebirengo.—Ebik. 5:40-42.
17. Kiki Yesu eki yagambiire abeegeswa be obu akaba atakafiire?
17 Yesu obu akaba atakafiire, akagambira abeegeswa be ati: “Weena ow’angonza, Isenyowe alimugonza, kandi na nyowe ndimugonza.” (Yoh. 14:21) Mali ka tulindiriire akasumi nambere tuliba nitugonzebwa hatali kunobwa habw’okuheereza Yahwe! (2 Bas. 1:6-8) Baitu akasumi ako katakahikire leka tucweremu kimu kwikara nitwijuka ensonga nyingi ezituleetera okusemererwa abantu obu batunoba.
EKIZINA 149 Ekizina eky’Obusinguzi
a Amabara agamu gahindwirwe.
b KUSOBORRA EBISISANI Orupapura 28: Ekisisani ekirukwoleka ebintu ebyabaireho kara, Ignacio naatebeza omwegesa we.
c KUSOBORRA EKISISANI: Ekisisani ekirukwoleka ebintu ebyabaireho kara, ab’oruganda na banyaanya itwe nibooleka okugonza Omukristaayo mugenzi wabo ow’aliyo naatwarwa omu nkomo habw’okwikiriza kwe.