Ba Mumanzi Kandi Omwesigwa nka Bbenaya

Bbenaya akaba ali murwani omumanzi ayarwaniriire Omukama Daudi n’Omukama Suleimaani. Noobu kiraaba ngu Bbenaya akaba ali mutabani wa nyakatagara kandi tiyakiraga kukozesa eby’okurwanisa akagira eki yakoraho omu bulemu bwa Yahwe. Akooleka obumanzi bw’amaani. Ekyokurorraho, akaita entale ey’ekaba eri omu kiina ky’amaizi, kandi yasingura omurwani ow’amaani. Daudi yayesigaga muno Bbenaya kuhika na ha rulengo rw’okumufoora mukuru w’abalinzi be.—2 Sam. 23:20-23.

Bbenaya akaikara ali mwesigwa hali Daudi, Abbusalomu hamu na Adoniya obu baajeemiire Daudi. (2 Sam. 8:18; 15:18; 1 Bakam. 1:8) Daudi obu akaba akuzire omu myaka, Bbenaya akaikara ali mwesigwa hali uwe obu naakoonyera Suleimaani kufooka omukama. (1 Bakam. 1:32-40) Mali, Bbenaya akaba ali mwesigwa hali Yahwe hamu n’abakama Yahwe abaakaba akomere, noobu kiraaba ngu abantu abandi bakaba batali beesigwa.

Na itwe nitwetaaga obumanzi kurwanisa omunyanzigwa waitu ow’amaani Sitaani hamu n’abo abamusagika. Kandi tusemeriire kucweramu kimu kwikara nituhondera endengo za Yahwe. (Bef. 6:11; 1 Pet. 5:8, 9) Noobu abandi bacwamu kulekaho Yahwe, tusemeriire kwikara tuli beesigwa hali uwe obu nitukigumya ngu naija kutuha emigisa.—2 Sam. 22:26.