Abaana Bali Bugwetwa Kuruga Hali Yahwe

KIKI eki kwizira omu biteekerezo obu ohurra ekigambo “obugwetwa”? Noosobora kuteekerezaaho ebintu eby’obuguuda nka, amaju, itaka, ebiiruka hamu n’ebintu ebindi omuntu ebi akuha. Ka bube bugwetwa ba mulingo ki omuntu obu akuha, obutwara nk’obw’omuhendo kandi oburolerra kurungi.

Baibuli eyeta abaana ‘obugwetwa kuruga hali Yahwe.’ (Zab. 127:3) Nahabweki, abazaire Abakristaayo, barora abaana baabo nk’ebisembo eby’omuhendo kuruga hali Isiitwe ow’omu iguru, kandi bakora kyona ekibarukusobora kubalinda kutahikwaho akabi, n’okubarolerra omu by’omubiri, omu nyehurra, n’omu by’omwoyo.

Baitu eky’obusaasi kiri ngu, kasumi kanu abazaire abamu tibarora abaana baabo nk’ekisembo kuruga hali Ruhanga. (Is. 49:15; 2 Tim. 3:1-3) Abandi baba nibagonza kurolerra abaana baabo, baitu baine abaana baingi abu batasobora kurolerra. Biki ebireetera abazaire abamu kumalirra bazaire abaana baingi? Kiki Yahwe eki arukunihirramu abazaire? Kandi abazaire Abakristaayo nibasobora bata kuba abasinguzi obu nibakuza abaana baabo?

BIKI EBIREETERA ABAZAIRE KUMALIRRA BAZAIRE ABAANA BAINGI

Okusindikirizibwa kuruga omu banyabuzaale hamu n’abantu abandi. Omu biikaro ebimu eby’ensi, abantu batamu muno ekitiinisa abazaire abaine abaana baingi. Nahabweki, abaswerangaine, nibasobora kusindikirizibwa abanyabuzaale baabo, rundi abataahi kuzaara abaana baingi aba batarukusobora kurolerra.
Kweraliikirra ha biraabaho omu busumi obw’omumaiso. Omu biikaro ebimu nambere abaana bakira kufa bakyali bato habw’amalya mabi, oburwaire, rundi kuburwa obujanjabi, abaswerangaine abamu bacwamu kuzaara abaana baingi nukwo ngu abamu obu baaraafa, abandi basigaleho. Abandi bacwamu kuzaara abaana baingi nukwo ngu obu baraakura, abaana basobole kubarolerra. Kinu kikira kubaho omu mahanga nambere gavumenti zitaha obukoonyezi abakuzire omu myaka.
Kutangira oruzaaro. Omu biikaro ebimu, abaswerangaine abamu, kibagumira kutunga ebintu eby’okukozesa kutangira oruzaaro. Abamu batiina ebizibu ebiraarugamu habw’okukozesa ebintu eby’okutangira oruzaaro ebitali ha mutindo. Kandi abandi tibarukusobora kugura ebintu eby’okukozesa kutangira oruzaaro habwokuba bya sente nyingi.a

KIKI YAHWE EKI ARUKUNIHIRRAMU ABAZAIRE?

Ab’omuka nibeegondeza omu kumara hamu obwire omu kiikaro ekirungi. Taata naahuliiriza kurungi obu muhara wabo naamugambira omulingo arukwehurra, obu maama naazaana omupiira n’omwana wabo omwojo. — Mara obwire na buli omu h’abaana baawe

Kuhikyaho abaana baabo ebyetaago byabo. Yahwe ahaire abazaire obujunaanizibwa obw’okuhikyaho abaana baabo ebyetaago byabo eby’omubiri obu barukuba bakyali bato. Naanihirramu abazaire kukora n’amaani kuhikyaho abaana baabo ebyokulya, eby’okujwara, hamu n’oburaaro. Ekindi, Yahwe naanihirramu abazaire kusomesa abaana baabo. Nahabweki, abazaire Abakristaayo tibasindika abaana baabo omu masomero ga bbodingi. Oihireho bakigumya ngu abaana baabo baakurra omuka nukwo basobole kwegesebwa kurungi, kufiibwaho, ekiraabakoonyera kwehurra baine obulinzi kandi nibagonzebwa. Baitu nabwo, Yahwe ayoleka okwetegereza; tarukunihirramu abazaire kuba bali baguuda. Egi niyo ensonga habwaki Yahwe yakomeremu abazaire abakaba bali banaku baitu abeekambi, kukuza Omwana we omugonzebwa.—Mat. 13:55, 56; Luk. 2:24.

Omusingi gwa Baibuli: “Amananu gali, omuntu weena kakuba aba atarukurolerra abe, kukira muno abo ab’omu ka ye, aba ayehakaine okwikiriza, kandi aba ali mubi muno kukira omuntu ow’ataine okwikiriza.”—1 Tim. 5:8.

Yahwe akimanyire ngu abazaire obu baba nibakura omu myaka, nibasobora kwetaaga obukoonyezi. Amananu gali, gumu ha miringo abaana booleka ngu nibatamu abazaire baabo ekitiinisa nukwo kukora enteekaniza kurora ngu abazaire baabo baatunga obukoonyezi obu barukwetaaga obu baraakura omu myaka. (Kurug. 20:12; 1 Tim. 5:4) Baitu Yahwe asemererwa abazaire obu bateekerezaaho muno omulingo baararolerra abaana baabo, omu kiikaro ky’okuteekerezaaho omulingo abaana baraabarolerra.—2 Kol. 12:14.

Kufaaho abaana baabo omu by’omwoyo. Ekindi, abazaire Abakristaayo baine obujunaanizibwa obw’okutendeka abaana baabo kugonza Yahwe n’okumuramya. Kandi hali Yahwe kinu nikyo ekintu ekirukukirayo obukuru abazaire eki basobora kwegesa abaana baabo.—Bir. 6:6, 7.

Omusingi gwa Baibuli: “Mugumizeemu [nimworoora abaana banyu] omu kuhana n’omu kuteerererwa kwa Yahwe.”—Bef. 6:4.

YAHWE NAAGONZA MUBE BASINGUZI

Abaswerangaine bali omu ka yabo nibabaza hamu. Baibuli ey’esuukwirwe eri omu maiso gaabo ha meeza. — Mubazeeho kara abaana aba murukugonza kuzaara

Mweteekanirize obusumi obw’omumaiso. Obu muraaba nimuteekerezaaho kuzaara abaana, muteekerezeeho enyikara yaanyu n’obwegendereza. Ekyokurorraho, obu muraazaara abaana baingi, muraasobora kubakuza? Nikiija kubeetaagisa kutamu sente nyingi, obwire, hamu n’amaani kubaliisa, kubajweka, n’okubasomesa. Hataroho kugurukyagurukya, nikiija kubeetaagisa kufaaho buli mwana omu mulingo Yahwe arukugonza mumufeeho. Nahabweki, mubazeeho obwingi bw’abaana aba murukugonza kuzaara. Ky’amananu ngu Yahwe akimanyire ngu timusobora kweteekaniriza buli kimu kyona omu bwomeezi. (Mug. 9:11) Baitu naija kuha emigisa amaani aga muraatamu kusobora kuba abazaire abarungi.

Omusingi gwa Baibuli: “Ebitekerezo ebyomwekambi bireta omweru: baitu omuntu wena anyakwanguhiriza, ayanguha okusega.”—Nfu. 21:5.

“Nooha omuli inywe kakuba aba naagonza kwombeka omunaara, atasobora kubanza kwikarra hansi akabalirra kurora obu araaba aine sente ezirukumara kugumalirra?”—Luk. 14:28.

Mwebembeze Yahwe omu ka yaanyu. Mukigumye ngu kuheereza Yahwe nikyo ekintu ekirukukirayo obukuru omu ka yaanyu. Obu muraaba mumazire ira kutunga abaana, mucweremu kimu kwegesa buli mwana kugonza Yahwe. Mubakoonyere kutahoga omutima nukwo bagire eki baayega omu nsorrokano. Mukigumye ngu mwaba n’Okuramya okw’Eka buli wiiki. Mwegese abaana baanyu kutebeza. Obujunaanizibwa obw’okukuza abaana timusemeriire kubuha abaana baanyu abakuzire rundi abanyabuzaale. Kukuza abaana abarukugonza Yahwe kyetaagisa obwire n’amaani, baitu harugamu ebirungi bingi.

Omusingi gwa Baibuli: “Busaho okusemererwa oku nyine okurukukira kunu: Kuhurra ngu abaana bange nibagendera omu mananu.”—3 Yoh. 4.b

Mwesige Yahwe. Obu muraaba nimuteekerezaaho kuzaara abaana, rundi mumazire ira kubazaara, mukigumye ngu endengo za Yahwe nkuru muno kukira obuhangwa bw’ekiikaro rundi emigenzo.

Ebisisani: 1. Abazaire baikaliire na mutabani wabo omu rusorrokano. Mutabani wabo aimukya omukono kuhayo eky’okugarukamu. 2. Ab’eka emu nibatebeza hamu. Taata naakora na muhara wabo kandi maama naakora n’abaana baabo abato babiri. — Kurolerra abaana omu by’omwoyo kyetaagisa obwire n’amaani

Obu muraacwamu kuzaara abaana bake, nabwo mukigumye ngu Yahwe naija kubarolerra obu muraakura omu myaka. Timusemeriire kuzaara abaana n’ekigendererwa ngu nibaija kubarolerra obu muraakura omu myaka. Timusemeriire kweralikirra ngu busaho omuntu araabarolerra obu muraakura omu myaka. Yahwe araaganiize kubarolerra kandi naija kwikara naahikiiriza emirago ye.—Yos. 23:14.

Omusingi gwa Baibuli: “Yesiga [Yahwe] nomutima gwawe gwona, oleke kwigamira ha kwetegereza kwawe wenka: omu mihanda yawe yona omwatulege, kandi nuwe aliterekereza emihanda yawe.”—Nfu. 3:5, 6.

“Nkaba ndi muto, hati ngurusire; baitu tinkabonaga ahikiriire asigirwe, nobubakuba abaijukurube nibaleega.”—Zab. 37:25.

“Mubanzeege muserre Obukama n’okuhikirra kwe, kandi n’ebintu ebi byona biribongerwaho.”—Mat. 6:33.

Abaana bali bisembo eby’omuhendo Yahwe ebi ahaire abazaire. Mali kisemeza Yahwe obu arora abazaire Abakristaayo nibafaaho abaana baabo omu mulingo ogu arukugonza! Omu mulingo gw’okugonza bafaaho abaana baabo omu by’omubiri, omu nyehurra, n’omu by’omwoyo; bacwamu obwingi bw’abaana aba baraazaara, kandi beebembeza endengo za Ruhanga n’obwesigwa omu kiikaro ky’okwebembeza obuhangwa bw’ekiikaro n’emigenzo. Obu bakora ebintu binu, booleka ngu abaana bali bisembo eby’omuhendo rundi ‘obugwetwa kuruga hali Yahwe.’

Tibarukweyijukya

Abazaire babonabona obu bacwamu kuzaara abaana bake? Kinu kiri kikaguzo abazaire baingi beekaguza abarukwikara omu biikaro nambere hali ebizibu omu by’entaahya. Weetegereze bimu ha bintu banyineeka abarukwikara omu biikaro ebi baagambire ha nsonga egi.

Abantu bakakuhambiriza kuba n’eka enkooto?

“Ego, kandi n’abamu bakaba ab’omu kitebe. Haroho abaswerangaine abaatukagwize bati: ‘Habwaki mwine omwojo omu wenka? Hanu omu Afrika obu oba oine omwojo omu wenka, osisana nk’ow’ataine aboojo. Kandi obu oba oine aboojo babiri osisana nk’ow’aine omwojo omu wenka.’ Na hanyuma y’okuzaara omwana waitu owa kabiri ow’akaba ali mwisiki, bakagumizaamu nibatusindikiriza.”—Jeremias

Waakahikirweho okubonabona omu by’omubiri n’omu by’omwoyo habw’okuzaara abaana bake?

“Nangwa. Habwokuba tukacwamu kuzaara abaana bake, nyowe na mukazi wange tukasobora kubahikyaho ebyetaago byabo eby’omubiri kandi ekirukukira obukuru, tukabahikyaho ebyetaago eby’omwoyo. Nkakurra omu ka enkooto, nahabweki nkarora ebizibu bingi isiitwe na nyinaitwe ebi baarabiremu kuturolerra n’okutusomesa.”—Jeremias

Abaana baanyu nibeehurra bata habw’encwamu ei mwakozere?

“Abaana baitu nibeehurra basemeriirwe habwokuba batahikweho ebizibu ebihika h’abaana abaazairwe bali baingi kandi kyagumira abazaire baabo kubarolerra.”—Filipe

“Abaana baitu bakakura basemeriirwe habwokuba baayehurraga baine obulinzi kandi nibafiibwaho. Twakiraga kuraaliza ab’oruganda na banyaanya itwe abakuzire omu by’omwoyo, abaatwekambisaaga kweteeraho ebigendererwa eby’omwoyo. Kasumi kanu niturora abaana baitu nibahondera ekyokurorraho ekirungi eky’ab’oruganda na banyaanya itwe abo.”—Carlos

Mugasiirwe muta habw’okucwamu kuzaara abaana bake?

“Encwamu ei twakozere ekatusobozesa kuhikyaho eka yaitu ebyetaago eby’omubiri. Emyaka esatu enyuma nkafeerwa omulimo gwange ogukaba nigusasura sente nyingi. Kikatwanguhira kuraba omu nyikara egi habwokuba eka yaitu ekaba eri ntaito kandi tukaba tutarukwetaaga ebintu bingi kugirolerra.”—Jeremias

“Encwamu ei twakozere etusobozeseze kuhikyaho abaana baitu ebyetaago eby’omubiri n’eby’omwoyo. Tusoboire kuheereza omu biikaro ebindi nambere hali obwetaago. Kiikaire nikitwanguhira kuhikyaho buli mwana ebyetaago bye. Abaana baitu boona nibaheereza Yahwe kandi beeteeriireho ebigendererwa eby’omwoyo.”—Lenadi

Kiki eki waakugondeze kugambira abazaire?

“Nyeroliire amananu agarukusangwa omu Zabbuli 34:10b, aharukugamba ngu: ‘Abo abaserra [Yahwe], tibaliburwa ekisemiire kyona.’ Yahwe atuhaire buli kimu kyona eki turukwetaaga nk’eka.”—Rafael

a Nyineeka na nyinabwenge basemeriire kwecweramu obwingi bw’abaana aba baraazaara, ni di obu baraabazaara, noobu baraaba nibaija kukozesa emiringo ey’okutangira oruzaaro ey’etarukutwarramu kwihamu enda. Busaho n’omu asemeriire kubacwera omusango habw’encwamu ezi barukuba bakozere. (Bar. 14:4, 10-13) Ekindi, Abakristaayo abaswerangaine basemeriire kwikara nibaijuka obuhabuzi oburukusangwa omu 1 Abakolinso 7:3-5.

b Noobu kiraaba ngu abaana abarukubazibwaho omu rukarra runu nibamanyisa abeegeswa Abakristaayo, abazaire nibasobora kwehurra omu mulingo nugwo gumu Yohaana ogu yayehuliiremu.