APULI 27–MAAYI 3, 2026
EKIZINA 99 Enkumi n’Enkumi ez’Ab’oruganda
Oyeteekaniriize Ebizibu Ebisobora Kukuhikaho Hanyuma y’Okubatizibwa?
“Leka nyikalege ningendera omu mihanda yaawe.”—ZAB. 17:5, NWT.
EBI TURAAYEGA
Nitwija kurora omulingo Abakristaayo basobora kweteekaniriza ebizibu ebisobora kubahikaho hanyuma y’okubatizibwa.
1-2. Bintu ki ebi tusobora kukora kweteekaniriza ebizibu ebisobora kutuhikaho omu kitebe? Bazaaho ekyokurorraho.
NITUNIHIRA kuhikwaho ebizibu omu nsi enu erukulemwa Sitaani. Yesu akahabura abahondezi be ati: “Nihaija kubaho ebirukutabaijura.” (Mat. 18:7) Obu nituteekerezaaho okuhaburwa oku, tusemeriire kweteekaniriza ebizibu ebi tusobora kutangatangaana ebisobora kutwarramu n’obuteetegerezangana obusobora kubaho hagati yaitu n’Abakristaayo bagenzi baitu.
2 Teekerezaaho ekyokurorraho kinu. Nk’Abakaiso ba Yahwe twikaire nitwekambisibwa kweteekaniriza ebigwererezi. Eki tukikora tuta? Eky’okubanza, tumanyirra ebigwererezi ebisobora kubaho omu kiikaro kyaitu. Kandi eki kiba kikuru muno kukira muno obu tuba tuli bahyaka omu kiikaro. Hanyuma y’okumanyirra ebigwererezi ebisobora kubaho, tusemeriire kuteekerezaaho eki tusemeriire kukora bukyali kara nukwo tusobole kwikara tweteekaniize. (Nfu. 21:5) Omu mulingo nugwo gumu, nitusobora kumanyirra ebizibu ebisobora kutuhikaho omu kitebe kandi tukabyeteekaniriza hati nukwo kakuba bituhikaho tusangwe tubyeteekaniriize. Kakuba tukora tuti, ebizibu ebi tibirukwija kutumaramu muno amaani kandi bikasiisa enkoragana yaitu na Yahwe. (Zab. 17:5) Nahabweki omu kicweka kinu, nitwija kubazaaho ebizibu eby’emiringo esatu ebisobora kutuhikaho, n’omulingo tusobora kubyeteekaniriza.a
KAKUBA OW’ORUGANDA RUNDI MUNYAANYA ITWE AKUBIIHIZA
3. Kizibu ki ekisobora kutuhikaho omu kitebe?
3 Noijuka omulingo wayehuliire ha murundi gwawe ogw’okubanza kwija omu nsorrokano, kandi warora okugonza okukaba kuli hagati y’abantu ba Yahwe? Kikakuleetera kukigumya ngu okaba ozoire amananu? (Yoh. 13:35; Bak. 3:12) Ogu nugwo omulingo Blancab yayehuliire. Baitu akahikwaho ekintu eki akaba atarukunihira hanyuma y’okubatizibwa. Naagamba ati: “Haroho munyaanya itwe ayantwaize omu mulingo ogutali gw’embabazi. Ekindi nkakyetegereza ngu yabazaahoga kubi abandi. Eki, nkaba ntarukukinihira. Nkaba nyegere ngu Abakaiso ba Yahwe beekamba muno kuba bantu ab’obusinge kandi ab’okugonza.” Ky’amananu ngu ab’oruganda na banyaanya itwe beekamba muno kwikara nibasemezaamu emiringo yabo ey’Ekikristaayo baitu nabwo bali bantu abatahikiriire. (Bef. 4:23, 24; 1 Yoh. 1:8) Nahabweki, obwire obumu ow’oruganda rundi munyaanya itwe naasobora kubaza rundi kukora ekintu kikakusaaliza. (Yak. 3:8) Eky’obusaasi, ebizibu nk’ebi bireetiire abamu kuleka kuheereza Yahwe.
4. Kiki ekisobora kutukoonyera kwikara tweteekaniize kakuba ow’oruganda rundi munyaanya itwe atubiihiza? (Abefeeso 4:32)
4 Hati kiki eki osobora kukora kweteekaniza kara kakuba ow’oruganda rundi munyaanya itwe akubiihiza? Gifoole ngeso yaawe kwikara noota omu nkora obuhabuzi oburukusangwa omu Abefeeso 4:32. (Soma.) Obu oraakora kyona ekirukusoboka kwikara nooyoleka embabazi kandi noosaalirirwa abandi, noija kwetantara kutunga obuteetegerezangana n’abandi. Kifoole kigendererwa kyawe kwikara nooganyira abandi kuruga ha mutima habw’ensobi ezi barukuba bakozere. Kiki ekisobora kukukoonyera kukikora? Teekerezaaho emirundi ei waakasaba Yahwe kukuganyira habw’ensobi zaawe, n’omulingo aikaire naakuganyira kuruga ha mutima. (Mat. 6:12) Obu oraata omutima ha mirundi nyingi Yahwe aikare naakuganyira, nikiija kukwanguhira kuganyira abandi.
5. Musingi ki gwa Baibuli ogusobora kutukoonyera kakuba omuntu atubiihiza? (Enfumo 19:11) (Rora n’ebisisani.)
5 Soma Enfumo 19:11. Baibuli egamba ngu omuntu obu atubiihiza,c okwetegereza nikusobora kutukoonyera kukeehya ekiniga. Omusingi gunu gukoonyiire Rima ayabatiziibwe emyaka nke enyuma. Naagamba ati: “Obu ndora ab’oruganda rundi banyaanya itwe nibeetwaza omu mulingo ogusobora kumbiihiza, mbanza kwijuka omusingi oguli omu Enfumo 19:11. Nteekerezaaho enyikara ei barumu, n’ebi baarabiremu kandi ndengaho kumanya ensonga habwaki nibasobora kuba beetwaize omu mulingo ogu. Ekindi, ndengaho kukora na bo omu buheereza. Kinu kinkoonyera kweyongera kubamanya kurungi.” Ago magezi marungi. Kanu nuko akasumi ak’okweyongera kumanya kurungi ab’oruganda na banyaanya itwe. Obu oraayeyongera kubamanya kurungi, nikisobora kukwanguhira kubaganyira kakuba babaza rundi bakakora ekintu ekirukukusaaliza.
Obu oraaba oine obuteetegerezangana n’ow’oruganda rundi munyaanya itwe, lengaho kukora na uwe omu buheereza (Rora akacweka 5)
6. Kiki ekisobora kutukoonyera kuba n’enkoragana enungi n’abandi omu kitebe?
6 Kiki eki osobora kukora kusobora kwegondeza omu kuba n’enkoragana enungi n’ab’oruganda na banyaanya itwe omu kitebe? Obu oraaba oliyo nooyeyongera kumanya kurungi ab’oruganda na banyaanya itwe, kigumye ngu omutima waguta ha miringo yabo enungi. (Lengesaniza na Enfumo 10:12; Bar. 12:10; Baf. 2:2, 3) Weetegereze omulingo kinu kyakoonyiire ow’oruganda ow’akaba yaakaruga kubatizibwa arukwetwa Mark. Obu yatandikire kumara obwire bwingi n’ab’oruganda na banyaanya itwe omu kitebe kye, akatandika n’okumanya obutahikirra bwabo. Kiki ekyakoonyiire Mark kutatabaijuka habw’ensobi ezi yabarozeremu? Naagamba ati: “Nkakyetegereza ngu, ensobi ez’ab’oruganda na banyaanya itwe ntaito muno kakuba ozirengesaniza n’ebibi eby’amaani ebikorwa abantu ab’ensi. Kinu kikanyolekera kimu ngu tinsemeriire kuta omutima ha butahikirra bw’Abakristaayo bagenzi bange. Nahabweki nkatandika kuta omutima ha miringo yabo enungi.” Na iwe kakuba okora ekintu nikyo kimu, noija kwegondeza omu kuba n’enkoragana enungi n’abandi omu kitebe.
KAKUBA OTANDIKA KWEGOMBA EBI WALEKEREHO
7. Kiki ekisobora kutuleetera kutandika kwegomba ebintu ebi twalekereho?
7 Hataroho kugurukyagurukya, obu wayegere amananu, okasemererwa habw’okuruga omu nsi ya Sitaani. Noosobora kuteekereza ngu busaho muntu weena ow’asobora kwegomba kugarukayo. Baitu kakuba oba nooraba omu nyikara ezigumangaine, noosobora kutandika kwijuka rundi kwegomba bimu ha bintu ebi walekereho obu watandikire kuheereza Yahwe. (Lengesaniza na Okubara 11:4-6.) Ekyokurorraho, ab’oruganda abamu nibasobora kuba baacwiremu kulekaho emirimo yabo ey’amaani ey’esobora kuba yabatwarraga obwire bwingi muno. Abandi nibasobora kuba bakaba baine abanywani nfenanfe, abaabecwireho obu baatandikire kwega Baibuli. Kandi abandi nibasobora kuba baasingwire engeso ey’etasemiire noobu kiraaba ngu baagyegondezaamuga. Mali ka nikisaaliza muno kakuba Omukristaayo aikiriza ekintu kyona eki yayejumbiramuga kara kumuleetera kuleka kuheereza Yahwe! Kiki eki osobora kukora kurora ngu noobu haraabaho ki, tiwagaruka kukora rundi kwegomba ebintu ebi walekereho?
8. Kiki eki turukwegera ha kyokurorraho kya Ibburahimu na Saara?
8 Omu Baibuli harumu ebyokurorraho eby’abaheereza ba Yahwe abeesigwa abakaba nibasobora kwegomba ebintu ebi bakaba balekereho. Ekyokurorraho, Ibburahimu na Saara bakoorobera Yahwe obu baalekereho orubuga rwa Uru orukaba rwine obulinzi kandi baatandika kwikara omu heema. (Baheb. 11:8, 9) Hataroho kugurukyagurukya, obwire obumu nibasobora kuba baijukaga obwomeezi oburungi obu bakaba baine omu Uru. Baitu “kakuba baikaire nibaijuka” rundi kakuba baayegombere ebintu ebi bakaba balekereho baakwohiibwe kugarukayo omu bwomeezi obu oburungi. Baitu eki batakikole, oihireho bakata omutima h’akasumi ak’omumaiso.—Baheb. 11:15, 16.
9. Omukwenda Paulo akaba naarora ata ebintu ebi akaba alekereho? (Abafiripi 3:7, 8, 13)
9 Omukwenda Paulo aine ebi yalekereho kusobora kuheereza Yahwe. Obu akaba atakafookere Mukristaayo, akeega Ebiragiro by’Ekiyudaaya obu naayegesebwa omwegesa rurangaanwa ow’arukwetwa Gamalyeri. (Ebik. 22:3) Paulo akaba naija kufooka omuntu w’amaani omu diini ey’Ekiyudaaya. (Bag. 1:13, 14) Baitu obu yaikiriize amakuru amarungi, akalekaho ebintu ebi byona. Obwomeezi bukamwanguhira hanyuma y’okuhinduka? Nangwa. Akateerwa, yateekwa omu nkomo, kandi yanobwa abantu be bonyini. (2 Kol. 11:23-26) Kakuba yataire omutima ha birengo ebi akaba naarabamu, kandi akalengesaniza obwomeezi obu akaba arumu n’obwomeezi bwe obwa kara, akaba naasobora kuteekereza ngu akaba ali kurungi obu akaba atakafookere Mukristaayo. Oihireho Paulo akata omutima ha mugisa ogw’amaani ogu akaba atungire ogw’okufooka muhondezi wa Yesu Kristo hamu n’akasumi ak’omumaiso akarungi. Paulo akaba naakigumiza kimu ngu emigisa egi ekaba neekirra hara okwefeereza kwona oku akaba akozere.—Soma Abafiripi 3:7, 8, 13.
10. Kiki eki tusemeriire kwikara nituteekerezaaho? (Marako 10:29, 30) (Rora n’ebisisani.)
10 Isomo ki eri turukwega? Kakuba otandika kuteekerezaaho ebintu ebi walekereho kusobora kufooka Mukristaayo, kigumye ngu waijuka n’ensonga habwaki wabirekereho. (Mug. 7:10) Lengesaniza ebi olekereho n’emigisa ei otungire habw’okwija omu mananu. Oine enkoragana enungi n’Omulemi w’Iguru n’ensi. (Nfu. 3:32) Oyetooroirwe ab’oruganda na banyaanya itwe abarukukugonza. (Soma Marako 10:29, 30.) Kandi oine okunihira okw’akasumi ak’omumaiso akarungi! (Is. 65:21-23) Kakuba oikara nootekerezaaho emigisa ey’eruga omu kuheereza Yahwe, noija kuleka kwegomba ebintu ebi walekereho.
Omu kiikaro ky’okwegomba ebintu ebi walekereho, weegondeze omu buheereza obw’omuhendo Ruhanga obu akuhaire (Rora akacweka 10)e
11. Kiki eki orukwegera hali Rosemary?
11 Munyaanya itwe ow’arukwetwa Rosemary akabatizibwa ali omu myaka 50. Weetegereze eki yakozere kuleka kuteekerezaaho ebintu ebi yalekereho. Naagamba ati: “Ha kubanza, nayegombaga kujaguza Krismaasi habwokuba kaabaga kasumi aka nayegondezaamuga n’eka yange. Nayegondezaaga omu kuha abantu aba ndukugonza ebisembo. Nagonzaaga kurora abaana bange bali ha muti gwa Krismaasi basemeriirwe kandi nibasemburra ebisembo byabo.” Kiki ekyamukoonyiire? Naagamba ati: “Ntungire ebiro bindi eby’okwegonza ndi hamu n’eka yange omu kiikaro kya Krismaasi. Buli mwaka ntungamu ebiro ebirukwahukana kuba hamu n’ab’eka yange, kubaha ebisembo n’okubagambira nkooku ndukubagonza.” Rosemary akatunga ekizibu ekindi. Naagamba ati: “Obu nayegere amananu, banywani bange bakanyecwaho. Obwire obumu nayegombaga kuba na bo.”d Kiki ekyamukoonyiire? Akatandika kuraaliza banyaanya itwe abarukwahukana kukora na uwe omu buheereza. Naagamba ati: “Kuraba omu mulimo gw’okutebeza, nsoboire kutunga abanywani aba ndukugonza muno kandi ab’omuhendo.” Kiki eki orukumwegeraho? Noosobora kwegomba ekintu eki wayegondezaamuga otakeegere amananu, baitu ijuka ngu noosobora kutunga ebintu ebindi ebirungi muno ebi osobora kwegondezaamu hati. (Baf. 4:8, 9) Kandi ijuka ngu: Yahwe aikara naakuha bingi muno kukira ebi byona ebi oyefeeriize.
ABANDI OBU BALEKAHO YAHWE
12. Kiki ekisobora kubaho omu kitebe kikalenga okwikiriza kwawe?
12 Obu wafookere omu h’Abakaiso ba Yahwe, nikisobora kuba kyakusemiize kwecwaho ensi embi kandi okeeteeranizaaho abantu abarukwegesa amananu kandi abarukulengaho kukora ekihikire. (Is. 65:14) Baitu obwire obumu, omuntu omu kitebe naasobora kukora ekibi eky’amaani. Kandi omuntu ogu kakuba ateegarukamu naasobora n’okwihwa omu kitebe. (1 Kol. 5:13) Weetegereze omulingo enyikara nk’egi yakwasireho munyaanya itwe arukwetwa Samar. Naagamba ati: “Hanyuma y’obwire buke mmazire kubatizibwa, omugurusi omu kitebe akakora ekibi eky’amaani kandi yaihwa omu kitebe. Nkaba ndi haihi kutabaijuka habwokuba nkaba ntasobora kukiikiriza ngu omugurusi omu kitebe naasobora kusiisira Yahwe kandi naasaaliza n’abandi omu kitebe.” Ky’amananu ngu ab’oruganda na banyaanya itwe bagonza Yahwe kandi bagonza kwikara bali beesigwa hali uwe. (1 Kol. 13:4, 7) Baitu nabwo tusemeriire kuba n’enteekereza ey’ehikire. Buli mwaka abamu nibasobora kwihwa omu kitebe kandi nikisobora kukugumira kakuba munywani waawe, omunyabuzaale, rundi omuntu ou orukutamu ekitiinisa acwamu kuleka kuheereza Yahwe.
13. Nitusobora tuta kugumya okwikiriza kwaitu tukasigara tutatabaijukire kakuba omuntu ou turukugonza aleka kuheereza Yahwe?
13 Noosobora ota kweteekaniriza kara enyikara nk’ezi nukwo otatabaijuka kakuba omuntu aleka kuheereza Yahwe? Gumizaamu noogumya enkoragana yaawe na Yahwe. (Yak. 4:8) Otaikiriza enkoragana yaawe na Yahwe kusigikirra ha bwesigwa bw’omuntu ondi. Ekyokurorraho, noobu kiraaba ngu tukira kuramiza hamu n’ab’omu maka gaitu rundi n’ekitebe, buli omu hali itwe asemeriire kuba n’enteekaniza eye ey’okusaba n’okwesomesa Baibuli.—Zab. 1:2; 62:8.
14. Kiki eki turukwegera ha kyokurorraho ky’omukwenda Petero? (Yohaana 6:66-68)
14 Nitusobora n’okwegera ha mulingo Petero yayetwaizeemu abeegeswa abandi obu baalekere kuhondera Yesu. Na Petero weenyini naasobora kuba akaba abuzabuziibwe omu kasumi ako. Baitu weetegereze eki yagambire nkooku kirukwolekwa omu Yohaana 6:66-68. (Soma.) Omu kiikaro ky’okuta omutima ha bintu abandi bakaba nibakora, Petero akaguta ha nyegesa ez’amananu ezi akaba atungire kuruga hali Yesu. Ekyarugiremu, atatabaijuke. Omu mulingo nugwo gumu, ebikorwa eby’abandi tibihindura amananu ag’omuhendo ag’oyegere nookoonyerwa ekitebe kya Yahwe. Gumira h’amananu! Samar, ou tusangirwe tubalizeeho naagamba ati; “Nkira kwijuka ngu habwokuba omuntu omu akozere ekibi, tikirukumanyisa ngu n’abandi omu kitebe nibakora ebibi, rundi ngu ekitebe kya Yahwe ebi kirukwegesa tibihikire.”
15. Ekyahikire hali Emily nikikwegesa ki?
15 Teekerezaaho ekyokurorraho ekya munyaanya itwe arukwetwa Emily. Hanyuma ya wiiki emu amazire kubatizibwa, nyinabo akabalekaho kandi yaihwa n’omu kitebe. Emily naagamba ati: “Nkaba ntasobora kukiikiriza ngu nyinanyowe akaba naasobora kukora ekintu nk’eki. Kinu kiri kintu ekikyakizireyo kungumira omu bwomeezi bwange kandi nimpurra niinyegomba muno kuba na nyinanyowe.” Kiki ekikoonyiire Emily? Naagamba ati: “Tindi nyenka, nyine obusagiki kuruga hali isenyowe hamu n’abandi omu kitebe abafookere nk’eka hali nyowe. Buli omu aine ekizibu eki arukurabamu. Egi niyo ensonga habwaki kikuru kugonza ab’oruganda na banyaanya itwe n’okugarramungana amaani.” (1 Pet. 5:9) Tikirukwetaagisa kubanza kuhikwaho ebizibu nukwo ogumye enkoragana yaawe n’ab’oruganda na banyaanya itwe. Gumizaamu nookikora hati. Obu orakora eki, noobu harabaho ki torukwija kwehurra oli wenka.
16. Kiki eki tusemeriire kwijuka? (Rora n’ekisisani.)
16 Ijuka ngu Yahwe abaagonza nubo ahana. (Baheb. 12:6) Naagonza abo boona abaihirwe omu kitebe bagaruke. (2 Pet. 3:9) Nahabweki kakuba omuntu ou orukugonza aihwa omu kitebe, kigumye ngu abagurusi nibakora kyona ekirukusoboka kumukoonyera kugaruka hali Yahwe.—2 Tim. 2:24, 25.
Kakuba munywani waawe rundi omunyabuzaale aihwa omu kitebe, ijuka ngu abagurusi nibagonza kumukoonyera kugaruka hali Yahwe (Rora akacweka 16)f
17. Kiki eki tusemeriire kugumya?
17 Tubalizeeho bimu ha bizibu ebisobora kukuhikaho hanyuma y’okubatizibwa. Ky’amananu ngu ebizibu ebimu nibisobora kuzooka nk’eby’amaani, baitu tosemeriire kutiina. Haroho bingi ebi osobora kukora kubyeteekaniriza. Kandi oteebwa ngu Yahwe naija kukukoonyera kwikara oli mwesigwa hali uwe. Aikaire naakukoonyera kandi naagonza kwikara naakukoonyera ebiro n’ebiro! (1 Pet. 5:10) Naija kwikara naakuha amaani kandi naakukoonyera kugumiisiriza ekirengo kyona. Obu oraagumizaamu noikiriza obukoonyezi bwa Yahwe, busaho kizibu kyona ekiraakuhikaho ekiraakuleetera kumurugaho!—Zab. 119:165; Bar. 8:38, 39.
EKIZINA 154 Okugonza Okutahwaho
a Noobu kiraaba ngu ekicweka kinu kiteekaniriziibwe abo abaakaruga kubatizibwa, ebirumu nibisobora kutugasira itwena.
b Amabara gahindwirwe.
c Okwetegereza nikutwarramu kutata omutima ha kintu ekibi omuntu eki akukozere. Omulingo gunu nigusobora kutukoonyera kumanya ensonga habwaki omuntu ayetwaize rundi yabaza omu mulingo ogu.
d Itwena—hatali abo bonka abarukwegesa abeegi ba Baibuli—tusemeriire kukoonyera abeegi ba Baibuli hamu n’abo abaakaruga kubatizibwa kuhurra nibagonzebwa omu kitebe. Rora akacweka 15 na 16 omu kicweka ekiine omutwe “Omulingo Ekitebe Kyona Kisobora Kukonyera Abeegi ba Baibuli Kuhika ha Kubatizibwa” ekiri omu Munaara gw’Omulinzi ogwa Maaci 2021.
e KUSOBORRA EBISISANI Orupapura 23: Munyaanya itwe obu aba ali omu buheereza, arora abantu nibazaana omupiira, kandi aijuka akasumi obu yazaanaga omupiira. Hanyuma, munyaanya itwe ogu atunga omugisa ogw’okutebeza omukazi omuzaani w’omupiira, kandi naasobora kuba yazaanaga na uwe omu tiimu emu.
f KUSOBORRA EKISISANI: Abagurusi babiri babungiire omusaija ayaihirwe omu kitebe, nibamwekambisa kugaruka hali Yahwe.