Ebikaguzo Kuruga omu Basomi Baitu

Ni di amahanga obu galirangirra ngu “businge n’okuteekaana!”?

Nkooku twarozere omu kicweka “Ebikaguzo Kuruga omu Basomi Baitu” ekyaturukiire omu Omunaara gw’Omulinzia enyumaho, omu kasumi akatali ka hara, Yahwe naija kuta omu mitima ‘y’amahembe ikumi’ (gavumenti zoona) “ekiteekerezo kye,” ekirukumanyisa ngu nibaija kuha obusobozi bwabo “ekisoro”—kandi eki nikyo Ekitongole eky’Amahanga Ageteraine. Ekisoro kinu obwire obumu kyetwa “ekisisani eky’ekisoro.” (Kus. 13:14, 15; 17:3, 16, 17) Hanyuma “amahembe ikumi” hamu n’ekisoro ekiriba kihairwe amaani nibiija kuhwerekereza amadiini g’ebisuba omu nsi yoona. Hati, amahanga nigaija kurangirra “businge n’okuteekaana,”b amadiini g’ebisuba gatakahwerekereziibwe, rundi hanyuma y’okuhwerekerezebwa?—1 Bas. 5:3.

Eky’okugarukamu ekyanguhire kiri ngu, titumanyire akasumi koonyini amahanga obu galirangirra “businge n’okuteekaana.” Kakuba tuba tumanyire ebintu byona, nikiba kitakyatwetaagisa kwikara tuli bulindaara. Baitu, emirundi nyingi Yesu akahabura abahondezi be ‘kwikara bali bulindaara.’ (Mat. 24:42; 25:13; 26:41) Leka twetegereze kurungi obunabbi obwaterekereziibwe omwoyo ogurukwera omukwenda Paulo obu yahandiikire omu bbaruha ye hali Abasesalonika.

Paulo akahandiika ati: “Obu baliba nibagamba ngu: “Businge n’okuteekaana!” obu nubwo okuhwerekerra okw’ahonaaho kulibaizira.” (1 Bas. 5:2, 3) Ebitabu byaitu biikaire nibisoborra ebigambo bya Paulo biti: Kurangirra “businge n’okuteekaana” kulibaho nihaburayo akaire kake omuhito omwingi gutandike, kandi gulitandika n’okuhwerekerezebwa kwa Bbabburooni Orukooto—kandi ago nugo amadiini ag’ebisuba. Twikaire nitumanya ngu okurangirra kunu kaliba akokurorraho ak’okumalirra akalyoleka ngu omuhito omwingi guli haihi kutandika.

Baitu hanyuma y’okuteekerezaaho muno obunabbi bunu, nikizooka ngu haroho omulingo ogundi ogu tusemeriire kubwetegerezaamu. Obundi okurangirra “businge n’okuteekaana” kulibaho hanyuma y’okuhwerekerezebwa kw’amadiini g’ebisuba. Habwaki nitugamba tuti? Teekerezaaho ebikaguzo binu.

Kiki amadiini ag’ebisuba eki gaikaire nigakora obukirukuhika ha bulemu bw’amahanga? Baibuli neegamba eti: “Omuli rwo [“malaaya omukuru,” Bbabburooni Orukooto] hakasangwamu esagama ya . . . boona abaisirwe omu nsi.” (Kus. 17:1, 5; 18:24) Ebyafaayo nibyoleka ngu malaaya omukuru aikaire naasagika obulemu obw’amahanga hamu n’ebikorwa eby’obwankagunaga. Nahabweki aikaire naaleetaho obulemu hamu n’ebikorwa by’obukaali, hatali businge n’okuteekaana. Kinu nikituleetera kwekaguza: Amahanga galirangirra “businge n’okuteekaana” hanyuma y’okuhwerekereza Bbabburooni Orukooto? Eki nikisoboka, baitu titurukukigumya.

Kiki ekiraahonderaho hanyuma y’amahanga kurangirra “businge n’okuteekaana”? Paulo naagamba ati: “Nubwo okuhwerekerra okw’ahonaaho kulibaizira.” (1 Bas. 5:3) Kakuba amahanga garangirra “businge n’okuteekaana” amadiini ag’ebisuba gatakahwerekereziibwe, nikiija kuba nikyetaagisa obwire kurabaho amadiini ag’ebisuba kuhwerekerezebwa kandi hanyuma n’amahanga gonyini nago gahwerekerezebwe. Baitu habwokuba Paulo akagamba ngu okuhwerekerezebwa kw’amahanga nikwija kubaho ‘ahonaaho,’ nikizooka ngu amahanga nigaija kurangirra “businge n’okuteekaana” hanyuma y’okuhwerekerezebwa okw’amadiini ag’ebisuba.

Abantu ba Yahwe nibaija kwetwaza bata hanyuma y’okurora obunabbi bunu nibuhikirra? Paulo akagamba ati: “Baitu inywe ab’oruganda, timuli omu mwirima, nahabweki ekiro eki tikirukwija kubahikaho mutakimanyire nkooku obwire bukya abasuma batakimanyire.” (1 Bas. 5:4) Teekerezaaho kinu: Kakuba okurangirra ngu “businge n’okuteekaana” kubaho hanyuma y’okuhwerekerezebwa kw’amadiini ag’ebisuba, abantu ba Yahwe nibaija kukimanya ngu okuhwerekerezebwa kw’amahanga nakwo kuli haihi muno. Baitu, habwokuba amahanga galiba gaakamara kurangirra ngu “businge n’okuteekaana” nigaija kuteekereza ngu enyikara hati yateekaana, nahabweki okuhwerekerezebwa kwago kuligahikaho nk’omusuma gatarukukinihira.

Haroho ekintu ekiturukugumiza kimu. Kandi eki nikyo ngu omu kasumi akatali ka hara, “amahembe ikumi” hamu n’ekisoro ekiriba kihairwe obusobozi omu kasumi ako, nibiija kuhwerekereza amadiini ag’ebisuba. Kandi hanu nuho omuhito omwingi gulitandikira. Ekindi, tumanyire ngu nihaija kubaho akasumi, amahanga garangirre “businge n’okuteekaana.” Kinu kiribaho di? Turozere ebintu bibiri nambere kusobora kubeeraho. Eky’okubanza: Okurangirra oku nikusobora kubaho amadiini g’ebisuba gatakahwerekereziibwe. Ekya kabiri: Okurangirra oku nikusobora kubaho hanyuma y’amahanga kuhwerekereza amadiini g’ebisuba. Nikiija kutwetaagisa kulinda kurora kiki kyonyini ekiraabaho. Obunabbi bwa Baibuli bukira kwetegerezebwa kurungi obu buba nibuhikirra rundi hanyuma y’okuhikirra.—Lengesaniza na Yohaana 12:16.

Baitu ekintu ekikuru hali itwe tikiri ni di amahanga obu galirangirra “businge n’okuteekaana,” baitu nikyo kwikara tuli beesigwa hali Ruhanga. Tusemeriire ‘kwikara niturora kandi nitwetegereza kurungi,’ nukwo twikale tweteekaniize kurungi ebintu noobu byakubaho omu mulingo ki.—1 Bas. 5:6.