Julaayi

Abamu h’abaheereza ba Yahwe tibakyasobora kukora ebintu ebibaakoraga kara habw’okukura omu myaka, habw’oburwaire rundi baine obulema. Eki nikisobora kubaleetera kwehurra nk’abataine mugaso omu maiso ga Yahwe. Nibasobora kwekaguza, ‘Mali nkyali w’omugaso hali Yahwe?’ Omuhandiiki wa Zabuli 71 akaba aine enyehurra niyo emu. Akasaba Yahwe ati: “Otalindeka amani gange obugalihwerra.” (Zab. 71:​9, 18) Baitu nabwo, omuhandiiki wa zabuli akaikara naakigumya ngu kakuba agumiizaamu naaheereza Yahwe n’obwesigwa, Yahwe yakumwebembiire kandi amusagika. Omuhandiiki wa zabuli akeega ngu Yahwe asemererwa habw’abo abeehayo kumuheereza kusigikirra ha nyikara yabo. (Zab. 37:​23-25) Obu oraaba okuzire omu myaka, tekerezaaho omulingo Yahwe akuroramu. Naasobora kukukonyera kugumizaamu n’omuheereza noobu kiraaba ngu oine obuceke omu mubiri. (Zab. 92:​12-15) Omu kiikaro ky’okuta omutima ha bintu ebi otakyasobora kukora, ta omutima hali ebi ebi osobora kukora. w24.10 28 ¶14-16

Kikira kugumira Abakristaayo abakyali bato omu by’omwoyo kukora encwamu nibasigikirra ha Baibuli. Obu haba hataroho kiragiro kya Baibuli ekirukubazaaho eki basemeriire kukora, abamu bateekereza ngu nibasobora kukora kyona eki barukugonza. Abamu nibasobora kusaba ngu habeho ekiragiro n’omu nyikara nambere kitarukwetaagisa. Ekyokurorraho, nikisisana ngu Abakristaayo ab’omu Kolinso bakasaba omukwenda Paulo ateho ekiragiro ekirukubaikiriza kulya ebyokulya ebihongiirwe ebisisani rundi kutabirya. Omu kiikaro ky’okubagambira eky’okukora, Paulo akabooleka ngu buli omu aine obugabe obw’okwecweramu eky’okukora naasigikirra ha muntu we ow’omunda. Akabagambira emisingi ya Baibuli eyaakubakoonyiire kukora encwamu bakasigara baine omuntu ow’omunda ow’atarukubarumiiriza kandi batatabaijwire abandi. (1 Kol. 8:​7-9) Paulo akaba naakoonyera Abakolinso kukura omu by’omwoyo nukwo bakozese obusobozi bwabo obw’okwetegereza omu kiikaro kyokuleka omuntu ondi kubakorra encwamu rundi kubateeraho ekiragiro. w24.04 5 ¶14

Omu kasumi ka Yona, abantu ba Nineve bakatunga omugisa ogw’okwegarukamu. Ijuka Yesu eki yabalize ha ‘kuhumbuka okw’omusango.’ Okuhumbuuka kunu nikwija kutwarramu abantu “abaakozere ebintu ebibi.” (Yoh. 5:29) Nahabweki, nikizooka ngu bamu h’abantu aba Sodomu na Gomora nibaija kuhumbuurwa. Kandi nitusobora kutunga omugisa ogw’okubeegesa hali Yahwe na Yesu Kristo. Yahwe nuwe ‘aserra omutima, naalenga ebiri omunda.’ Obukirukuhika ha kuhumbuuka okw’akasumi ak’omumaiso, naija “okuhera omuntu wena nkemihandaye okweri.” Naija kucwa omusango omu mulingo ogusemeriire kandi ayoleke embabazi nambere kisemeriire. Nahabweki titusemeriire kugamba ngu omuntu ogu talihumbuuka oihireho kakuba tuba nitukigumya ngu nukwo kiri. w24.05 5-6 ¶15-16

Kurugira kimu omu kasumi aka kara obutumwa obuli omu Kigambo kya Ruhanga busoboire kugumya abaheereza be obu batunga obujunaanizibwa obw’amaani. Teekerezaaho ekyokurorraho kya nabbi Yeremiya. Akahurra atiinire Yahwe obu yamuhaire obujunaanizibwa obw’okutebeza. Akagamba ati: “Timanyire okugamba: baitu ndi mwana omuto.” (Yer. 1:6) Kiki ekyamukoonyiire kutunga obumanzi obw’okutebeza? Akateekerezaaho ebigambo Yahwe ebi yamugambiire. Yeremiya akagamba ati: “Nubwo haroho omu mutima gwange omurro ogurukwokya, gubohirwe omu magufa gange, njwahire okugugumisiriza.” (Yer. 20:​8, 9) Noobu kiraaba ngu abantu Yeremiya akaba naatebeza tibaakuhuliiriize, obutumwa obu yahairwe bukamwekambisa kutebeza. Abakristaayo batunga amaani kuruga omu bigambo bya Yahwe ebirukusangwa omu Baibuli. Omukwenda Paulo akagamba ngu kakuba beeyongera kwega hali Yahwe, kyakubakoonyiire kugenda “nkooku kisemeriire omu maiso ga Yahwe” kandi bagumizeemu kwana “ebyana omu mulimo gwona omurungi.”—Bak. 1:​9, 10. w24.04 14-15 ¶2-4

Zadoki akaikara ali mwesigwa hali Yahwe noobu kiraaba ngu Nyakatagara Omukuru Abyasara akacwamu kusagika Adoniya mutabani wa Daudi ow’akaba naateekaniza kutwaraho ise obukama. Daudi atagurukyagurukye obwesigwa bwa Zadoki. Orukwe rwa Adoniya obu rwamanyirwe, Daudi akeesiga Zadoki, Nasani, na Benaya kuseesaho Suleimani amagita nk’omukama. (1 Bakam. 1:​32-34) Kuba n’abaheereza ba Yahwe abeesigwa nka Nasani, hamu n’abasagiki abandi ab’Omukama Daudi, kiine kuba kyagarwiremu Zadoki amaani. Suleimani obu yafookere omukama, akafoora Zadoki nyakatagara omukuru omu kiikaro kya Abyasara. (1 Bakam. 2:35) Noosobora ota kwegera hali Zadoki? Kakuba omuntu ou orukugonza acwamu kuleka kuheereza Yahwe, yooleka ngu oli mwesigwa hali Yahwe. (Yos. 24:15) Naija kukuha amaani n’obumanzi ebi orukwetaaga. Mwesige kuraba omu kusaba kandi oikale oli haihi n’abaheereza be abandi abeesigwa. Yahwe naakusiima habw’okwikara oli mwesigwa kandi naija kukuha empeera.—2 Sam. 22:26. w24.07 6 ¶16-17

Omu Zabuli 15:​2, munywani wa Ruhanga abazibwaho ‘nk’anyakwekenga, naakora eby’okuhikirra.’ Ebigambo “anyakwekenga” na “nakora” nibimanyisa ekintu eki tusemeriire kwikara nitukora. Baitu mali nikisoboka kugenda nitwekenga rundi tutaine kamogo? Ego. Noobu kiraaba ngu busaho muntu ahikiriire, Yahwe naija kuturora nk’abataine kamogo kakuba tukora kyona eki turukusobora kumworobera. Obu tuhayo obwomeezi bwaitu kandi tukabatizibwa, tuba tutandikire orugendo rwaitu na Ruhanga. Ijuka ngu omu busumi bwa Baibuli, omuntu kuba omu ihanga lya Isaleeri kyonka tikyamuleeteraga kufooka mugenyi wa Yahwe. Abamu baamukungaga hatali “omu mazima nobuhokuba omu kuhikirra.” (Is. 48:1) Kusobora kwoleka ngu mali baali nibagonza kuba bagenyi ba Yahwe, Abaisaleeri bakaba baine kwega ebintu Ruhanga arukubeetaagisa, kandi bakabihondera. Nikyo kimu n’omu kasumi kanu, kusobora kuba n’enkoragana enungi na Yahwe, titusemeriire kugarukira ha kubatizibwa n’okwetwa omu h’Abakaiso ba Yahwe. Tusemeriire kwikara ‘nitukora eby’okuhikirra.’ w24.06 9 ¶4; 10 ¶6

Miringo ki emu Yahwe ei ayolekamu ngu ali muntu omugabi? Teekerezaaho ebyokurorraho binu. Yahwe atuha ebintu ebi turukwetaaga. Nitusobora kuba tutaine byona ebi turukwetaaga kusobora kuba n’obwomeezi oburungi muno, baitu nitusiima Yahwe habwokuba baingi omuli itwe twine ebi turukwetaaga. Ekyokurorraho, atusobozesa kutunga ebyokulya, ebyokujwara n’oburaaro. (Zab. 4:8; Mat. 6:​31-33; 1 Tim. 6:​6-8) Hati tugambe ngu Yahwe atuhikyaho ebyetaago byaitu ngu habwokuba aine kukikora? Nangwa! Teekerezaaho ebigambo bya Yesu ebirukusangwa omu Matayo 6:​25, 26. Obu akaba naabazaaho ebinyonyi akagamba ati: “Tibisiga embibo, tibigesa, noobu kwakuba okuhunika omu nguli.” Baitu wetegereze ebigambo ebi yayongiireho: “Isiinywe ow’omu iguru abiriisa.” Hanyuma akakaguza ati: “Inywe timuli b’omugaso muno okubikira?” Isomo ki eri turukwega? Yahwe obu araaba afaaho ebisoro, nitusobora kukigumya ngu na itwe naija kutuha ebi turukwetaaga habwokuba tuli b’omuhendo muno hali uwe kukira ebisoro. Kusisanaho na taata ow’arukufaayo, Yahwe ahikyaho ab’eka ye ebyetaago byabo habwokuba naabagonza.—Zab. 145:16; Mat. 6:32. w24.09 26-27 ¶4-6

Omuheereza ali w’oruganda ow’abatiziibwe ow’akomwa omwoyo ogurukwera kukoonyera abagurusi omu mirimo ey’erukwahukana omu kitebe. Ekirukukira obukuru, abaheereza baba basaija b’eby’omwoyo; abarukugonza Yahwe, kandi abarukworobera endengo ze ez’okuhikirra. Ekindi, bagonza muno ab’oruganda na banyaanya itwe. (Mat. 22:​37-39) Ow’oruganda ow’abatiziibwe naasobora ata kukurakurana akafooka omuheereza? Baibuli ebazaaho ebintu ab’oruganda basemeriire kuhikiiriza kusobora kukomwa nk’abaheereza. (1 Tim. 3:​8-10, 12) Noosobora kukurakurana okatunga obujunaanizibwa bunu kuraba omu kwesomesaaho ebintu binu ebirukusigikirra ha Byahandiikirwe kandi okatamu amaani kubihikiiriza. Baitu eky’okubanza, osemeriire kuteekerezaaho ensonga habwaki noogonza kufooka omuheereza omu kitebe. w24.11 15 ¶4-5

Abantu abamu bagamba ngu basomere Baibuli emirundi nyingi. Baitu mali nibaikiririza omu Baibuli? Bataire omu nkora ebibarukusoma kandi baagiikiriza kukwataho obwomeezi bwabo? Eky’obusaasi, emirundi erukukira obwingi eky’okugarukamu kiri ngu nangwa. Mali eki ka nikyahukanira kimu hali abantu ba Yahwe! Tukora kyona ekirukusoboka kuta omu nkora obuhabuzi bwa Baibuli omu bwomeezi bwaitu. Baitu nabwo tikyanguhire kusoma n’okuta omu nkora ebi turukuba tusomere omu Kigambo kya Ruhanga. Nikisobora kutatwanguhira kutunga obwire obw’okusoma. Rundi nitusobora kusoma Baibuli nitwanguhiriza kandi nitulemwa kuteekerezaaho ebi turukusoma. Rundi nitusobora kuhwamu amaani habw’empindahinduka nyingi ezi tusemeriire kukora. Ka kibe kizibu kya mulingo ki, noosobora kukisingura habw’obukoonyezi bwa Yahwe. Leka itwena tucweremu kimu kuba abakozi b’Ekigambo kya Ruhanga. Hataroho kugurukyagurukya, obu turaayeyongera kusoma Ekigambo kya Ruhanga kandi tukata omu nkora ebi turukusoma omu bwomeezi bwaitu, nitwija kutunga okusemererwa.—Yak. 1:25. w24.09 7 ¶15-16

Yahwe atuhuumuza obu tuhikwaho ekizibu eky’amaani naakozesa omwoyo gwe ogurukwera. Obu oraaba nooraba omu kirengo eky’amaani noosobora kuseesera Yahwe omutima gwawe kuraba omu kusaba obwire bwona obw’orukugonza. (Zab. 86:3; 88:1) Ikara noosaba Yahwe omwoyo gwe ogurukwera. Naija kwikara naakukonyera. Ohikirweho ekirengo eky’amaani kandi kyakuleetera kuhwamu amaani? Omwoyo ogurukwera nigusobora kukuha amaani agorukwetaaga kugumizaamu noheereza Yahwe n’obwesigwa. (Bef. 3:16) Kiki eki osemeriire kukora hanyuma y’okusaba Yahwe kukuha omwoyo ogurukwera? Kora ebintu ebirakukonyera kutunga omwoyo gwa Ruhanga. Binu nibitwarramu kugenda omu nsorrokano n’okutebeza. Soma Ekigambo kya Ruhanga buli kiro, eki nikiija kukukonyera kukyecumiitirizaaho. (Baf. 4:​8, 9) Obu oraaba n’osoma, wetegereze abantu abaahikirweho ebirengo abarukubazibwaho omu Baibuli, kandi oyecumiitirizeeho omulingo Yahwe yabakonyiire kubigumira. w24.10 9 ¶12-14

Kusisanaho Yahwe n’Omwana we, na itwe nitugonza abantu. (Nfu. 8:31) Tukwatirwa embabazi abo ‘abataine Ruhanga’ kandi ‘abataine okunihira.’ (Bef. 2:12) Habw’ebizibu ebi barukurabamu nibasobora kwehurra nk’abali omu kiina ekihamire. Baitu itwe twine omuguha ogutusobora kukozesa kubasikayo kandi omuguha ogu nugo amakuru amarungi ag’Obukama bwa Ruhanga. Okugonza n’embabazi ebi tubainiire bitwekambisa kutamu amaani kubahikyaho amakuru amarungi. Obutumwa obu obw’omuhendo nibusobora kubaleetera okunihira, nibubakoonyera kuba n’obwomeezi oburungi hati, kandi bubaha okunihira okw’okutunga obwomeezi mali kandi obu nubwo obwomeezi obutahwaho omu nsi ya Ruhanga empyaka. (1 Tim. 6:19) Okugonza oku twiniire abantu kutuleetera kubahabura ha kuhwerekerra kw’ensi enu embi okuliyo nikwija. (Ez. 33:​7, 8) Nitugonza bamanye ekirukwija kubaho omu kasumi ak’omuhito omwingi, kandi eki nikyo ngu amadiini goona ag’ebisuba galiihwaho kandi hanyuma ensi enu embi erihwerekerezebwa omu bulemu obwa Amagedoni.—Kus. 16:​14, 16; 17:​16, 17; 19:​11, 19, 20. w24.05 16-17 ¶8-9

Omukwenda Paulo obu yatereriire Abakristaayo “kuhigiza ekiniga,” kiniga ky’oha eki akaba naamanyisa? Kusigikirra ha bigambi eby’etoroire orukarra runu, kiri kiniga kya Yahwe. Tuhigiza ekiniga kya Yahwe obu tumuleka aleeteho obwinganiza omu kasumi akahikire kandi omu mulingo gwe. Hanyuma y’ow’oruganda arukwetwa John kutwazibwa kubi akagamba ati: “Nkaba nyine kurwanisa ekyohyo eky’okulengaho kuterekereza ensongo omu mulingo gwange. Abarooma 12:19 rukankonyera kulindirra Yahwe.” Tugasirwa obu tulindirra Yahwe kuterekereza ensonga. Obu tukikora, twetantara okwetuntura hamu n’okuhwamu amaani ebiruga omu kulengaho kugonjoora ekizibu omu mulingo gwaitu. Yahwe ayehaireyo kutukonyera. Naasisana nk’ow’arukutugambira ati, ‘Obutali bwinganiza mubundekere, nyowe ninyija kubumaraho.’ Kakuba twikiriza omurago gwa Yahwe ogurukugamba ngu, “Nyowe ndigarurra,” ensonga nitwija kuzimulekera obu nitukigumya ngu naija kuzigonjoora omu mulingo ogurukukirrayo kimu oburungi. w24.11 6 ¶14-15

Tusemeriire kwegendereza kurora ngu ebyetaago eby’omubiri, tibyafooka ekintu ekirukukirayo obukuru omu bwomeezi bwaitu. Kinu nitusobora kukyegera ha bintu omukwenda Paulo yahandiikiire Abakristaayo. Akabazaaho ebyokurorraho ebibi eby’Abaisaleeri obu bakaba bali omu irungi otwaliiremu n’ekintu eki baakozere ha Rusozi Sinai. Akateererra Abakristaayo ‘kuleka okwegomba ebintu ebibi, nk’Abaisaleeri oku baayegombere.’ (1 Kol. 10:​6, 7, 11) Abaisaleeri bakaleka okwegomba kwabo okw’ebyokulya kubaleetera kurora ebyamahano bya Yahwe ‘nk’ebintu ebibi.’ (Kubar. 11:​4-6, 31-34) Abaisaleeri obu baaramize akanyana ak’ezaabbu, bakooleka ngu nibafaaho muno okulya, okunywa, n’okwesemeza okukira Yahwe. (Kurug. 32:​4-6) Paulo akabazaaho ebyokurorraho binu kuhabura Abakristaayo abakaba nibaikara omu kasumi nambere Yerusalemu hamu na yekaru yayo bikaba biri haihi kuhwerekerezebwa omu mwaka gwa 70 Y.A.K. Na itwe nitwikara omu kasumi nambere ensi enu eri haihi kuhwaho, nahabweki, kikuru muno kuta omutima ha kuteererra kwa Paulo nukwo tutakora ensobi Abaisaleeri ei baakozere. w24.12 6 ¶13

Yahwe ali ‘Ruhanga anyakusemeriirwe,’ kandi naagonza na itwe tusemererwe. (1 Tim. 1:11) Atuhaire ebisembo bingi ebitukoonyera kwegondeza omu bwomeezi. (Yak. 1:17) Kimu ha bisembo binu nubwo obuswere. Omusaija n’omukazi obu bataaha obuswere, barahira kugonzangana n’okutamungana ekitiinisa. Obu baikaza enkoragana hagati yabo egumire, kibaleetera okusemererwa. Ekyobusaasi, kasumi kanu abaswerangaine abaingi omu nsi beebwa ebirahiro ebi baakozere ha kiro kyabo eky’okugaitwa. Ekirugamu, baburwa okusemererwa. Yahwe naanihirramu nyineeka kutwaza ata mukazi we? Yahwe naaragira ba nyineeka kutamu bakazi baabo ekitiinisa. Nyineeka ow’atamu mukazi we ekitiinisa amutwaza omu mulingo gw’embabazi kandi ogw’okugonza.—1 Pet. 3:7. w25.01 8 ¶1-2; 9 ¶4-5

Hataroho kugurukyagurukya, ebbaruha y’omukwenda Paulo ekakoonyera Abaheburaniya kweteekaniriza omuhito ogukaba nigugenda kubahikaho. Paulo akateererra Abakristaayo bagenzi be kwesomesa Ekigambo kya Ruhanga n’obwegendereza kandi n’okukyeteegereza kurungi. Obu baakukozere eki, kyakubakoonyiire kumanya n’okwangirra enyegesa ezaakuleetiire okwikiriza kwabo kuceka. Akabeekambisa kwikaza okwikiriza kwabo kugumire nukwo basobole kwanguha kuhondera oburagirizi bwa Yesu hamu n’obw’abo abarukwebembera ekitebe. Ekindi, akakoonyera Abakristaayo kugumya okugumiisiriza kwabo kuraba omu kuba n’enteekereza ey’ehikire ha birengo, n’okubirora nk’omugisa ogw’okutendekwa Isebo ow’okugonza. Na itwe leka tute omu nkora obuhabuzi bunu kuruga omu Baibuli. Eki nikiija kutukoonyera kugumiisiriza n’obwesigwa kuhikira kimu ha mpero.—Baheb. 3:14. w24.09 13 ¶17, 19

Kusigikirra ha Baibuli, ekicunguro nugwo omuhendo oguheebwayo kuleetaho okulihirra rundi okuteeranizibwa. Ekicunguro nikyo Yahwe asigikirraho kutugarurra eki twafeeriirwe. Omu mulingo ki? Ijuka ngu Adamu na Hawa bakafeerwa obwomeezi bwabo obuhikiriire hamu n’okunihira okw’okwomeera ebiro n’ebiro. Nahabweki ekicunguro kikaba kiine kuba n’omuhendo ogurukwinganainganira kimu n’ekintu eki twafeeriirwe. (1 Tim. 2:6) Kikaba kiine kusasurwa omuntu wenka (1) ow’akaba ahikiriire; (2) aine obusobozi obw’okwomeera omu nsi ebiro n’ebiro; kandi (3) ow’akaba ayehaireyo kuhayo obwomeezi obu habwaitu. Teekerezaaho ensonga isatu habwaki Yesu yasoboire kuhayo obwomeezi bwe nk’ekicunguro. (1) Akaba ahikiriire—‘atakole ekibi.’ (1 Pet. 2:22) (2) Habw’ensonga enu, akaba aine obusobozi obw’okwomeera ebiro n’ebiro. (3) Akaba ayehaireyo kufa n’okuhayo obwomeezi bwe habwaitu.—Baheb. 10:9. w25.02 4-5 ¶11-12

Kigumye ngu Yahwe naakugonza kandi naagonza ofooke kicweka ky’eka ye. Ago gali mananu noobu oraaba oine enyikara ezi orukurabamu ezisobora kuzooka nk’eziraakulemesa kubatizibwa. Yesu akagambira guruupu ey’abeegeswa be ab’omu kyasa eky’okubanza ati: “Kakuba muba mwine okwikiriza okurukwingana nk’akajuma aka karadaali, nimusobora kugambira orusozi runu ngu, ‘Ruga hanu ogende hali,’ kandi rulirugaho kandi busaho kintu kyona ekiribalema.” (Mat. 17:20) Abo abakaba nibahuliiriza Yesu bakaba bamazire na uwe emyaka nke, nahabweki okwikiriza kwabo kukaba nikukyakura. Baitu Yesu akabagumya ngu kakuba bakurakuraniza okwikiriza okugumire, Yahwe akaba naija kubakoonyera kusingura ebizibu ebikaba biri nk’ensozi. Kandi Yahwe naija kukukorra ekintu nikyo kimu! Obu oraamanyirra ebintu ebisobora kukulemesa kubatizibwa, gira eki wakoraho kubyeihaho omu bwangu. Weheyo hali Yahwe kandi obatizibwe. Kandi mali egi eri ncwamu ey’erukukirrayo kimu oburungi ei osobora kukora! w25.03 7 ¶18-20

Nitusobora kugumira ebirengo kakuba tukiijuka ngu Ruhanga omwomeezi ayeteekaniize kutukoonyera. Nitusobora kukurakuraniza obwesige bwaitu omuli Yahwe ngu naija kutukoonyera kuraba omu kuteekerezaaho omulingo yatukoonyiiremu omu busumi obwa kara. (Is. 37:​17, 33-37) Ekindi, soma rundi orole ripooti kuruga ha mukura gwaitu ogwa jw.org ezirukwoleka omulingo Yahwe akoonyiiremu ab’oruganda na banyaanya itwe kasumi kanu. Ekindi, ijuka obusumi Yahwe obu yakukoonyiire. Otahwamu amaani obu oraaba otasobora kwijuka ekiro na kimu Yahwe obu yakukoonyiire kurwanisa ekizibu ky’amaani. Habwaki? Amananu gali ngu Yahwe akukoliire ebintu bingi omu bwomeezi bwawe! Akuraaliize kuba munywani we. (Yoh. 6:44) Nahabweki, musabe akukoonyere kwijuka akasumi obu yagarukiremu esaara zaawe, yakuha eki orukwetaaga omu kaire akahikire rundi obu yakukoonyiire kuraba omu nyikara ey’egumire. Kuteekerezaaho ebintu binu nikiija kugumya obwesige bwawe omuli Yahwe ngu naija kwikara naakukoonyera. w24.06 21 ¶8

Nitusobora kuba tucweriiremu kimu kutakora ekintu kyona ekisobora kutwiha hali Yahwe. Baitu nabwo, tituhikiriire kandi nitusobora kwohebwa kukora ekitahikire. (Bar. 7:​21-23) Kakuba tuteegendereza nitusobora kwesanga omu nyikara ezisobora kutuleetera kukora ekitahikire. Kusobora kwikara tuli beesigwa hali Yahwe n’Omwana we, tusemeriire kuhondera obuhabuzi bwa Yesu obw’okwikara nitwangirra ekyohyo eky’okukora ekibi. Itwena tuhikwaho ekyohyo eky’okukora ekibi. Baitu buli omu hali itwe aine obuceke obusobora kuba bw’okukora ekibi eky’amaani, kwejumbira omu ngeso ezitasemiire, rundi kutwalirizibwa enteekereza ey’ensi. Ekyokurorraho, omuntu omu naasobora kuba naarwanisa ekyohyo eky’okusiihana. Ondi naasobora kuba naarwanisa ekyohyo eky’okwejumbira omu ngeso ezitasemiire nk’okuzaanisa ebicweka by’ensoni, rundi kurora ebisisani eby’orwanju. Kandi ondi naasobora kuba naarwanisa kutiina abantu, emyehembo, ekiniga ekya bwangu rundi ekintu ekindi. w24.07 14 ¶3; 15 ¶5

Teekerezaaho ekyakubaireho kakuba abagurusi baayangire kwikiriza omusaija ogu ow’akaba ayegarukiremu kugaruka omu kitebe rundi hanyuma y’okugaruka, ekitebe kikanga kumwoleka okugonza. Paulo akagamba ngu nukwo “aleke kwetuntura ekihinguraine habw’obusaasi.” Kyakumwanguhiire kuteekereza ngu akaba atasobora kwongera kuba kicweka ky’ekitebe. Akaba naasobora kuleka kutamu amaani kwongera kuba n’enkoragana enungi na Ruhanga. Kandi ekirukukirayo obubi, kakuba ab’oruganda na banyaanya itwe baayangire kuganyira omusiisi ow’akaba ayegarukiremu, bakaba nibasobora kufeerwa enkoragana yabo na Yahwe. Habwaki? Omu kiikaro ky’okwoleka okuganyira nka Yahwe, baakwolekere ngu nibeegera hali Sitaani ow’atagira mbabazi. Baakwikiriize Sitaani kubakozesa kumaramu omusaija ow’akaba naagonza kuheereza Yahwe amaani.—2 Kol. 2:​10, 11; Bef. 4:27. w24.08 17 ¶7, 10-11

Yesu Kristo akaha ekitebe ab’oruganda abali ‘nk’ebisembo omu bantu’ abaheereza omu miringo endi. Hansi y’obwebembezi bwa Yesu, abagurusi omu Yerusalemu bakatuma Paulo, Baranaba n’abandi kubungira ebitebe. (Ebik. 11:22) Habwaki? Habw’ensonga niyo emu abaheereza n’abagurusi omu kitebe baakomwaga kandi egi niyo kugumya ebitebe. (Ebik. 15:​40, 41) Abaroleerezi b’ebicweka baikara nibagenda. Abamu bagenda kilomita nyingi kubungira ebitebe. Buli wiiki, omuroleerezi w’ekicweka aha embazo, abungira ab’oruganda kubagarramu amaani, ayebembera orusorrokano rwa bapayoniya, orw’abagurusi hamu n’ensorrokano ez’obuheereza. Ateekaniza embazo n’ensorrokano enkooto. Ayegesa omu masomero ga bapayoniya, ateekaniza orusorrokano orw’embaganiza orwa bapayoniya ab’omu kicweka eki abungira kandi akonyera n’omu nsonga ezimu enkuru eziba nizetaagisa kugonjoorwa omu bwangu ezimuheebwa ofiisi y’itaagi. w24.10 21 ¶12-13

Nabbi Yeremiya ajuliza Yahwe naabaza ebigambo ebiri omu kyahandiikirwe ekya kiro kinu. Omukwenda Paulo obu akaba naabazaaho ebigambo binu akakozesa ebigambo ebirukusisana nabyo naagamba ati: “Tindyongera kwijuka ebibi byabo.” (Baheb. 8:12) Kinu nikitugasira kita? Omu Baibuli, amakuru g’ekigambo “kwijuka” tigarukugarukira ha muntu kwijuka ekintu rundi kukiteekerezaaho kyonka, baitu nikitwarramu n’omuntu kugira eki yakoraho. Omusaija enkozi y’ebibi ow’akaba ahanikirwe ha muti haihi na Yesu akagamba ati: “Yesu onyijuke obu olitaaha omu Bukama bwawe.” (Luk. 23:​42, 43) Akaba atarukugambira Yesu kumuteekerezaaho kasumi ako. Eky’okugarukamu kya Yesu kikooleka ngu naija kugira eki yakoraho kuhumbuura omusaija ogu. Nahabweki Yahwe obu agamba ngu takyaijuka ebibi byaitu, aba naamanyisa ngu taine kintu kyona eki arukwija kutukora. Tarukwija kutufubira omu kasumi ak’omumaiso habw’ebibi ebi atuganyiire. w25.02 10-11 ¶14-15

Okwetegereza okuhikire kuruga omu kumanya emiringo ya Yahwe, ekigendererwa kye, hamu n’ebintu ebi agonza rundi ebi anoba. Weekaguze, ‘Kusigikirra ha bindukumanya hali Yahwe, ncwamu ki ei nsemeriire kukora, ekamusemeza?’ (Bef. 5:17) Kusobora kusemeza Yahwe, obwire obumu nikitwetaagisa kukora ekintu ekiraabiihiza abo abaturukugonza. Ekyokurorraho, abazaire abarukugondeza muhara wabo ebirungi, nibasobora kumuhambiriza kuswerwa omusaija owaine sente—rundi ow’araahayo omukaaga mwingi noobu araaba atagumire omu by’omwoyo. Kyamananu ngu nibagonza muhara wabo afiibweho, baitu nooha arukwija kumukoonyera kukurakurana omu by’omwoyo? Yahwe arora ata ensonga? Eky’okugarukamu nitukisanga omu Matayo 6:33. Ekyahandiikirwe eki kiteererra Abakristaayo kiti: “Mubanzeege muserre Obukama.” Noobu kiraaba ngu nitutamu bazaire baitu hamu n’abantu ab’omu kiikaro kyaitu ekitiinisa, ekigendererwa kyaitu ekikuru kisemeriire kuba kusemeza Yahwe. w25.01 17 ¶9-10

Kasumi kanu, nitwetaaga obukoonyezi bwa Yahwe kusobora kwikara nitutebeza n’obwekambi noobu turukuba nituhiiganizibwa. (Kus. 12:17) Habwaki noosobora kukigumya ngu Yahwe naija kukusagika? Teekerezaaho esaara ya Yesu erukusangwa omu Yohana esuura 17. Yesu akasaba Yahwe kulinda abakwenda be, kandi Yahwe akagarukamu esaara ye. Ekitabu ky’Ebikorwa by’Abakwenda kyoleka omulingo Yahwe yakoonyiiremu abakwenda kutebeza n’obwekambi noobu kiraaba ngu bakaba nibahiiganizibwa. Ekindi, omu saara ye, Yesu akasaba Yahwe kulinda abo abaakwikiririize omu butumwa bw’abakwenda kandi bakafooka abeegeswa be omu kasumi ak’omumaiso otwaliiremu na iwe. Yahwe takalekere kugarukamu esaara Yesu ei yasabire; naija kukukoonyera nkooku yakoonyiire abakwenda. (Yoh. 17:​11, 15, 20) Nkooku empero eriyo nirra haihi, nikisobora kweyongera kuguma kutebeza amakuru amarungi n’obwekambi, baitu nabwo nitwija kutunga obusagiki obu turukwetaaga.—Luk. 21:​12-15. w25.03 18 ¶13-14

Abantu ba Ruhanga baine okusemererwa habwokuba emitima yabo ijwire okusiima. Amananu agagumya okwikiriza kwaitu, n’emirago ya Ruhanga erukuhuumuza erukusangwa omu Kigambo kye, n’okunihira kwaitu okurukusigikirra ha kicunguro kya Yesu, bituleetera ‘okusemererwa okw’omu mutima.’ Obu tubazaaho ebintu binu kituleetera okusemererwa. (Zab. 34:8; 133:​1-3) Okugonza n’obumu obuli hagati y’abantu ba Yahwe biri bimu ha bintu ebi twegondezaamu omu rugonjo orw’eby’omwoyo. Okugonza oku kutukoonyera kuteekerezaaho omulingo obwomeezi buliba omu nsi empyaka nambere abantu ba Yahwe balyongera kugonzangana, n’okuba omu bumu kukira na hati. (Bak. 3:14)) Munyaanya itwe omu abazaaho ekintu eki yabandize kurora omu Bakaiso ba Yahwe omurundi gw’okubanza. Naagamba ati: “Nkaba ntaine kusemererwa omu bwomeezi bwange n’omu ka yaitu. Omurundi gw’okubanza kurora abantu niboolekangana okugonza, nkakirorra omu Bakaiso ba Yahwe.” Omuntu weena ow’arukugonza kuba n’okusemererwa n’okumarwa asemeriire kutweteeranizaaho omu rugonjo orw’eby’omwoyo. Omu nsi yoona abantu ba Yahwe bamanyirwe nk’abaine engeso enungi kandi abarukutamungana ekitiinisa.—Is. 65:15. w24.04 21 ¶7-8

Itwena nitusobora tuta kusagika Abakristaayo abatali omu buswere abarukugonza kubutaaha? Omulingo gumu ogu tusobora kukikoramu nukwo kwegendereza ebiturukubaza. (Bef. 4:29) Nitusobora kwekaguza: ‘Mbaza ebigambo ebirukusaaliza rundi ebirukusindikiriza abatali omu buswere kubutaaha? Obu ndora ow’oruganda na munyaanya itwe abatali omu buswere nibabaza, nkira kuteekereza ngu nibagonzangana omu mulingo ogw’embaganiza?’ (1 Tim. 5:13) Ekindi, titusemeriire kuleetera Abakristaayo abatali omu buswere kwehurra oti rundi baine ekibarukuburwaho habw’okutaba omu buswere. Mali kirungi kuserra emigisa ey’okusiima Abakristaayo abatali omu buswere! Kiki eki tusemeriire kukora kakuba turora ngu ow’oruganda na munyaanya itwe basemeriirengana? Baibuli etuteererra kuteekerezaaho enyehurra z’abandi. (Bar. 15:2) Baingi abatali omu buswere tibagonza omuntu ondi kubaserurra ou barataaha na uwe obuswere kandi tusemeriire kutamu encwamu zaabo ekitiinisa. (2 Bas. 3:11) Baitu abandi nibasobora kugonza tubakoonyere, baitu titusemeriire kukikora batatusabire obukoonyezi.—Nfu. 3:27. w24.05 24-25 ¶14-15

Twikara omu nsi nambere tusobora kuhikwaho ebizibu eby’ahonaaho kandi ebisobora kuhindurra kimu obwomeezi bwaitu. Kituhuumuza muno ngu nitusobora kwirukira hali Yahwe Ruhanga kutukoonyera. Obu tutunga obusagiki bwe kitugumya ngu “[Yahwe] ayomiire.” (Zab. 18:46) Baitu, hanyuma ya Daudi kubaza ebigambo ebi, akongera yayeta Ruhanga “Omwandara gwange.” Habwaki Daudi yalengesaniize Yahwe n’omwandara, ekintu ekitaine bwomeezi? Baibuli ekozesa ekigambo “omwandara” kutukoonyera kumanya emu ha miringo ya Yahwe. Kikira kukozesebwa omu bigambo ebiba nibimukugiza nka Ruhanga ow’atarukwingana ondi weena. Yahwe abanza kubazibwaho ‘nk’Omwandara’ omu Ekyebiragiro 32:4. Anna obu akaba naasaba akagamba ngu “busaho mwandara ogundi okusisana na Ruhanga waitu.” (1 Sam. 2:2) Habakuki akeeta Yahwe “Mwandara” gwange. (Hab. 1:12) Omuhandiiki wa Zabuli 73 akeeta Ruhanga “mwandara gw’omutima gwange.” (Zab. 73:​26, NWT) Na Yahwe wenyini akeebazaaho nk’omwandara.—Is. 44:8. w24.06 26 ¶1, 3

Abakama ba Isaleeri abaasemiize Yahwe baamuramyaga n’omutima gwabo gwona. Baibuli ebazaaho Yosiya eti: “Busaho mukama okumusisana ayamubandize ayahindukiire [Yahwe] nomutimagwe gwona.” (2 Bakam. 23:25) Kandi Suleimaani ayakozere ebibi omu myaka ye ey’obukuru? ‘Omutima gwe gukaba gutahikiriire.’ (1 Bakam. 11:4) Kandi obu kirukuhika hali Abiyamu, omukama ondi ow’akaba atali mwesigwa, Baibuli emubazaaho eti: “Omutimagwe gutahikiirre ahali Yahwe.” (1 Bakam. 15:3) Hati nikimanyisa ki kuheereza Yahwe n’omutima gwawe gwona? Omuntu ow’agonza Yahwe n’omutima gwe gwona, tagarukira ha kuramya Ruhanga ngu habw’okuba nikyo asemeriire kukora. Oihireho aheereza Yahwe habw’okuba amugonza muno kandi amutamu ekitiinisa obwomeezi bwe bwona. w24.07 21 ¶4-5

Yahwe akozesa ekyokurorraho kwoleka omulingo asiimuuraho ebibi byaitu. Naagamba ati: ‘Ndagalizeho eby’okusiisa byawe, nk’ekicu ekikwasire, n’ebibi byawe nk’ekicu.’ (Is. 44:22) Yahwe obu atuganyira ebibi byaitu asisana nk’ow’akozeseze ekicu ekikwasire kubisereka nukwo tutabirora kandi na uwe atabirora. Ebyokurorraho ebi nibitwegesa ki? Yahwe obu atuganyira ebibi byaitu, titusemeriire kwikara nitwejunaana obwomeezi bwaitu bwona. Habw’ekihongwa kya Yesu Kristo, Yahwe asalizaamu kimu ebibi byaitu. Obu atuganyira kisisana oti rundi titukakoraga ekibi kyona. Kinu kyoleka okuganyira kwonyini okuruga hali Yahwe obu twegarukamu. Embabazi za Yahwe zitusobozesa kutunga enkoragana enungi na uwe. Kandi kutukoonyera kurwanisa enyehurra ey’okwecwera omusango. w25.02 10 ¶11-14

Yahwe ahaire abagurusi obujunaanizibwa obw’okwikaza ekitebe kye nikyera. (1 Kol. 5:7) Baitu ekindi, bakora kyona eki barukusobora kukoonyera omuntu kwegarukamu obu kirukuba kisobokere. Habw’ensonga egi, abagurusi baikara baine enteekereza enungi kandi baine okunihira. Habwaki? Habwokuba nibagonza kwegera hali Yahwe, “aine okugonza kwingi muno kandi w’okuganyira.” (Yak. 5:11) Weetegereze omulingo omukwenda Yohana ow’akaba akuzire omu myaka yayolekere omutima ogu. Akahandiika ati: “Abaana bange abato, nimbahandiikira ebintu binu nukwo mutakora ekibi, baitu kakuba omuntu weena akora ekibi, twine omukonyezi ow’ali na Isiitwe, kandi ogu nuwe, Yesu Kristo [ow’ahikiriire].” (1 Yoh. 2:1) Eky’obusaasi, haroho obwire obumu Omukristaayo obu ayanga kwegarukamu. Eki obu kibaho, asemeriire kwihwa omu kitebe. w24.08 25 ¶19-20

Noosobora kulengaho kulengesaniza ebi osobora kukora n’eby’abandi basobora kukora. Baitu eki otakikora! Habwaki? Habwokuba Yahwe takulengesaniza n’abandi. (Bag. 6:4) Ekyokurorraho, Malyamu akaha Yesu ekisembo eky’amagita ag’omuhendo kandi agarukuboya kurungi. (Yoh. 12:​3-5) Kwahukanaho, omufakati akahayo obunusu obutaito muno kandi obw’omuhendo muke muno. (Luk. 21:​1-4) Baitu, ebisembo binu bibiri Yesu akabirora nk’ebirukwoleka ngu buli omu hali bo akaba aine okwikiriza. Mali na Ise, Yahwe, na uwe arora ekintu kyona eki okora kandi ekikwekambisa kumuheereza n’okumugonza, nk’eky’omuhendo noobu oraaba nookirora nk’ekitaito. Obwire obumu, itwena tugurukyagurukya. Baitu Ekigambo kya Ruhanga eky’okwesiga kandi eky’amananu Baibuli, nikisobora kutukonyera kukusingura. Noija kwehurra ogumire omu kiikaro ky’okweralikirra. Yahwe akumanyire kurungi. Naasiima habw’encwamu zoona ezi okozere kumwebembeza omu bwomeezi bwawe kandi naija kuhikiiriza omurago gwe ogw’okukuha empeera. Yahwe agonza abaheereza be boona abeesigwa, abarora nk’ab’omugaso, kandi abafaaho. w24.10 25 ¶3; 29 ¶17-18