Agusto

Nitunihira ngu abantu baingi nibaija kuhuliiriza ebi tukubagambira kandi batweteeranizeeho omu kuheereza Yahwe kasumi kanu. Baitu kiki ekiraahika hali abo abarukwanga kuhuliiriza ebi tukubagambira kasumi kanu, otwaliiremu n’abanyabuzaale baitu abaturukugonza? Nikisobora kuba ngu kiri kigendererwa kya Yahwe kujuna abantu abalitandika kumwikiririzaamu obu balirora okuhwerekerezebwa kwa Baburoni Orukuru. Obu kiraaba nukwo kiri, kikuru muno kukira na kara kwikara nituhabura abantu. Ebi turukubagambira kasumi kanu nibasobora kubiijuka kasumi ako. (Lengesaniza na Ezekyeri 33:33.) Obundi baliijuka obutumwa obutwabatebiize kandi kibeekambise kutweteeranizaaho omu kuramya okw’amananu obwire butakahoireyo. Nk’omulinzi w’enkomo ow’akaba ali omu Firipi ayahindukire hanyuma ‘y’omusisa omwingi,’ obundi n’abantu abatarukuhuliiriza kasumi kanu balihinduka hanyuma y’okuhwerekerezebwa kwa Baburoni Orukuru.—Ebik. 16:​25-34. w24.05 17 ¶9-10

Omukwenda Paulo ebiyahandikiire Abakristaayo Abaheburaniya na byo nibitwegesa isomo erikuru. Abamu batagumizeemu kukura omu by’omwoyo; bakaba bafookere ‘abo abarukwetaaga amata, hatali ebyokulya ebigumire.’ (Baheb. 5:12) Bakalemwa kwega n’okwikiriza enyegesa empyaka, Yahwe ezi akaba naabeegesa kuraba omu kitebe. (Nfu. 4:18) Ekyokurorraho, Abayudaaya baingi Abakristaayo baali nibakyakurakuraniza Ebiragiro bya Musa noobu kiraaba ngu bikaba bihoireho emyaka nka 30 enyuma Yesu obu yahaireyo obwomeezi bwe nk’ekihongwa. (Tit. 1:10) Omuntu weena arukusoma ebbaruha ya Paulo hali Abaheburaniya naasobora kukirora ngu ekaba erumu ebyokulya eby’omwoyo ebigumire. Nahabweki, kusobora kugumya okwikiriza kwabo, Abakristaayo banu bakaba baine kukirora ngu omulingo omuhyaka ogw’okuramya Yahwe ogw’akaba ataireho kuraba omu Yesu Kristo, nugwo gwali nigukirayo kandi kikabakoonyera kutunga obumanzi obw’okutebeza.—Baheb. 10:​19-23. w24.04 6 ¶15

Kuruga Adamu na Hawa obu baayeteeranizeeho Sitaani kandi baajeemera Yahwe, abantu baingi bafiire. Kiki ekirihika hali abantu abo boona? Guruupu entaito ey’abantu 144,000, abahondezi ba Kristo abeesigwa, obu bafa, bahumbuuka kandi batunga obwomeezi obutahwaho omu iguru. (Kus. 14:1) Kandi abasaija n’abakazi baingi abaagonzaaga Yahwe nibaija kuhumbuuka omu “okuhumbuuka okw’abahikiriire,” kandi nibaija kwomeera ebiro n’ebiro omu nsi kakuba baikara bali beesigwa omu Myaka Rukumi ey’Obulemi bwa Yesu hamu n’omu kirengo eky’okumalirra. (Dan. 12:13; Baheb. 12:1) Ekindi, omu kasumi ak’Emyaka Rukumi ‘abatahikiriire’; otwaliiremu n’abo abataraheeriize Yahwe rundi abo “abaakozere ebintu ebibi”—nibaija kuheebwa omugisa ogw’okuhindura engeso zaabo kandi bafooke abaheereza ba Yahwe abeesigwa. (Yoh. 5:29; Luk. 23:​42, 43) Baitu abantu abandi bakaba bali babi muno, abo, Yahwe acwiremu ngu tibarukwija kuhumbuuka.—Luk. 12:​4, 5. w24.05 2 ¶3; 5 ¶15; 6 ¶17

Omuntu ow’arukugonza kusiimwa Yahwe, asemeriire kuba “nagamba ebyamananu omu mutimagwe.” (Zab. 15:2) Kinu tikirukugarukira ha kutabaza ebisuba kyonka. Yahwe naagonza tube beesigwa omu byona ebi tubaza n’ebi tukora. (Baheb. 13:18) Kinu kikuru habwokuba “owobutigi muziro hali [Yahwe]: baitu ensitaze ziri nabamazima.” (Nfu. 3:32) Abo ababaza amananu omu mitima yabo, tibeebiihabiiha ngu niboorobera Yahwe omu rwijwire kandi ha murundi nugwo gumu bakacwa ebiragiro bye obu baba bali bonka. Basemeriire kwetantara kuba b’orugezigezi. Omuntu ow’orugezigezi naasobora kutandika kuteekereza ngu ebiragiro bya Yahwe ebimu tibiri by’amagezi. (Yak. 1:​5-8) Naasobora kutandika kujeemera Yahwe omu bintu ebi arukuteekereza ngu tibiri bikuru hali uwe. Hanyuma, kakuba arora ngu busaho ekibi ekirugire omu bujeemu bwe, naasobora kusikiirizibwa kweyongera kucwa ebiragiro bya Ruhanga kandi aho okuramya kwe nikuba kufookere okw’obugobya. (Mug. 8:11) Baitu itwe nitugonza kuba beesigwa omu byona. w24.06 10 ¶7-8

Abantu ba Yahwe bagonza muno amananu agarukusangwa omu Kigambo kya Ruhanga. Twombekere okwikiriza kwaitu nitusigikirra ha Kigambo kya Ruhanga. (Bar. 10:17) Tusoboire kukigumya ngu Yahwe ataireho ekitebe Ekikristaayo ‘nk’enyomyo n’omusingi ogw’amananu.’ (1 Tim. 3:15) Sitaani yaakugondeze tuleke kwesiga Baibuli rundi oburagirizi obu tutunga kuruga omu kitebe kya Ruhanga. (Bef. 4:14) Omu kasumi akatali ka hara, Sitaani naija kukozesa ebisuba kuhabisa amahanga goona, nukwo gahakanize Yahwe. (Kus. 16:​13, 14) Ekindi, tukimanyire ngu Sitaani naija kutamu amaani maingi kurora ngu yahabisa abantu ba Yahwe. (Kus. 12:9) Egi niyo ensonga habwaki kikuru kwetendeka nukwo turole embaganiza hagati y’amananu n’ebisuba kandi tworobere amananu. (Bar. 6:17; 1 Pet. 1:22) Okukiraho kwaitu omu kasumi ak’omuhito omwingi nikwija kusigikirra h’amananu. w24.07 8 ¶1-3

Yahwe obu yahaire Abaisaleeri ebiragiro bye, bakamuraganiza kubyorobera. Kandi na uwe akabaraganiza ngu obu baakworobiire ebiragiro ebi, yaakubalinzire kandi abahe n’emigisa. Obu baakumujeemiire nibacwamu kuramya baruhanga abandi, yaakubaihireho emigisa ye kandi babonebone. Baitu nabwo, eki kitamanyise ngu akaba abalekiireho kimu. Baakusoboire ‘kugarukira Yahwe Ruhanga wabo kandi bahurre iraka lye.’ (Bir. 30:​1-3, 17-20) Ekirukumanyisa ngu baakwegarukiremu. Kandi obu baakukozere eki, Yahwe yaakubairiize haihi na uwe, kandi ayongere abahe emigisa. Abantu Yahwe abaakaba akomeremu, baikaraga nibamujeemera. Ekyarugiremu, bakabonabona. Baitu Yahwe akaikara naalengaho kukoonyera abantu be. Emirundi nyingi akasindika ba nabbi kuteererra abantu be kwegarukamu n’okwongera kumuheereza.—2 Bakam. 17:​13, 14. w24.08 9 ¶4-5

Abakristaayo Abahebburaniya abakaba nibaikara omu Yerusalemu na Buyudaaya bakahikwaho enyikara ezigumangaine emyaka eyahondiireho hanyuma y’okufa kwa Yesu. Omu kasumi ako, ekitebe Ekikristaayo kikatandikwaho kandi Abakristaayo bakahikwaho okuhiiganizibwa okw’amaani muno. Hanyuma y’emyaka 20 kurabaho, abahondezi ba Kristo bakahikwaho ebizibu omu byentahya ebisobora kuba byaleeserweho enjara ey’ekaba eri omu kicweka kyabo. (Ebik. 11:​27-30) Baitu nk’omu mwaka gwa 61 Y.A.K., Abakristaayo bakaba batarukuhiiganizibwa nkooku kikaba nikiija kubahikaho omu kasumi ak’omumaiso. Omu kasumi ako, Yahwe akakozesa omwoyo gwe ogurukwera kutereekereza omukwenda Paulo kubahandiikira ebbaruha. Obuhabuzi obukaba buli omu bbaruha egi, nubwo bwonyini obu bakaba nibeetaaga kweteekaniriza ekikaba kiri haihi kubahikaho. Ebbaruha eyahandiikirwe Abahebburaniya ekaizira omu bwire bwonyini habwokuba obusinge Abakristaayo bakaba nibeegondezaamu omu kasumi ako, bukaba butarukwija kwikaraho. Paulo akabaha amagezi agaakubakoonyiire kugumiisiriza omuhito ogu bakaba bali haihi kuhikwaho. w24.09 8 ¶1-2

Obu tuba nitubonabona, Yahwe ayoleka ngu naatugonza kuraba omu b’oruganda na banyaanya itwe. Nibasobora kutuhuumuza kuraba omu kutuhuliiriza n’embabazi rundi nibatusagika kuraba omu kubaho obutuba nitubetaaga. Nibasobora kutusomera ekyahandiikirwe ekirukugarramu amaani rundi nibasaba hamu na itwe. (Bar. 15:4) Obwire obumu ow’oruganda rundi munyaanya itwe naasobora kutwijukya omulingo Yahwe aroramu ensonga kandi eki nikitukonyera kugumizaamu nitugumiisiriza. Ekindi, ab’oruganda na banyaanya itwe nibasobora kutukonyera omu miringo endi nk’okutuleetera ebyokulya. Kusobora kutunga obukonyezi kuruga hali abandi tusemeriire kububasaba. Nfu. 17:17) Nibasobora kutamanya omulingo turukwehurra rundi kumanya ebiturukwetaaga. (Nfu. 14:10) Nahabweki, noosobora kugambiraho banywani baawe abakuzire omu by’omwoyo omulingo orukwehurra. Bagambire ekyorukutekereza ngu nikisobora kukukonyera. Nosobora okugambiraho omu rundi babiri h’abagurusi abarukukwanguhira. Banyaanya itwe bakizoire ngu kibakonyera muno obu babazaaho na munyaanya itwe ondi ow’akuzire omu by’omwoyo. w24.10 10 ¶15-16

Abantu baingi balengaho kulya ebyokulya ebirungi, bakora ebisasaizi kusobora kwikara baine obwomeezi oburungi. Baitu nabwo tibanihira ngu nibaija kwomeera ebiro n’ebiro. Nibateekereza ngu tikirukusoboka kwomeera ebiro n’ebiro habw’okwetuntura okuleetwa okukura omu myaka. Baitu, Yesu akagamba ngu nikisoboka omuntu kutunga “obwomeezi obutahwaho,” nkooku kirukwolekwa omu Yohana 3:16 na 5:24. Kiro kimu, omu mulingo gw’ekyamahano, Yesu akaliisa abantu baingi naakozesa omugaati hamu n’encu. Eki kikaba nikihuniiriza, baitu ekiyabalize ha kiro ekyahondiireho kikaba nikihuniiriza n’okukiraho. Ekitebe ky’abantu kikaba kimuhondiire kugenda Kaperenaumu, haihi n’omusa gw’Enyanja ya Galiraaya kandi oku nuho yabagambiriire ngu nikisoboka abantu kuhuumbuka kandi beegondeze omu bwomeezi ebiro n’ebiro. (Yoh. 6:​39, 40) Ebigambo bya Yesu nibyoleka ngu abantu baingi abaafiire nibasobora kuhumbuuka kandi beegondeze omu bwomeezi obutahwaho. w24.12 8 ¶1-2

Ripooti emu kuruga omu Kitongole eky’Obwomeezi eky’Ensi Yoona (World Health Organization) eyoleka ngu abasaija abaingi bateera abakazi baabo, babajuma kandi babasaaliza n’omu nyehurra. Omusaija ow’atwaza mukazi we omu mulingo ogu naasobora kutamu mukazi we ekitiinisa obu barukuba bali n’abantu baitu naamutwaza kubi obu barukuba bali omuka. Kiki ekisobora kuleetera abasaija kutwaza kubi abakazi baabo? Nibasobora kuba baakuzire nibarora baisebo nibateera bakazi baabo, nahabweki nibasobora kuteekereza ngu tikiri kibi, kandi ngu kutwaza kubi bakazi baabo kiri kintu kya buli kiro. Abamu batwalirizibwa obuhangwa nambere baakuliire ekisobora kubaleetera kukurakuraniza enteekereza ey’etahikire ey’erukugamba ngu omusaija wenyini asemeriire kukozesa ekifuba kwoleka mukazi we ngu amwineho obusobozi. Abasaija abamu bateegesebwe kulinda enyehurra zaabo, otwaliremu n’okulema ekiniga kyabo. Abasaija abamu baikara nibarora ebisisani by’orwanju, ekibaleetiire kuteekereza ngu abakazi baroho nk’ebintu ebibakoonyera kwigusa enyehurra zaabo ez’okuteerana. Ekindi, ripooti enyingi nizooleka ngu omu busumi bwa Korona, abasaija bakeeyongera kutwaza kubi bakazi baabo. Baitu nabwo omusaija tasemeriire kutwaza kubi mukazi we naasigikirra ha nsonga zinu. w25.01 8 ¶2-3

“Ogonzege Yahwe Ruhanga waawe n’omutima gwawe gwona, n’obwomeezi bwawe bwona, n’ebiteekerezo byawe byona, n’amaani gaawe goona.” (Mar. 12:30) Yesu akakyoleka kurungi ngu kinu nikyo ekiragiro ekikaba nikikirayo obukuru omu Biragiro bya Musa. Wetegereze ngu okugonza oku twiniire Yahwe nikutwarramu omutima gwaitu, ekirukutwarramu ebintu ebi twegomba hamu n’enyehurra zaitu. Ekindi, nikitwarramu obwomeezi bwaitu bwona, n’amaani gaitu goona. Baitu ekindi, kugonza Yahwe nikitwarramu ebiteekerezo byaitu, ekirukutwarramu omulingo tuteekerezaaho ensonga. Amananu gali titusobora kwetegerereza kimu enteekereza ya Yahwe. Baitu nitusobora kwetegereza kurungi enteekereza ya Ruhanga kuraba omu kwesomesaaho “enteekereza ya Kristo” habwokuba Yesu ayolekera kimu enteekereza ya Ise.—1 Kol. 2:16. w25.03 8 ¶1

Nk’omusaija ow’ahikiriire, Yesu akaba nainganaingana n’omusaija ow’okubanza, Adamu obu akaba atakasiisire. (1 Kol. 15:45) Kuraba omu kufa, Yesu akasobora kulihirra ekibi kya Adamu, kandi eki nikyo kugarraho Adamu eki akaba atufeeriize. (Bar. 5:19) Habw’esonga enu Yesu akafooka “Adamu ow’okumalirra.” Tikikyayetaagisa omuntu ondi ow’ahikiriire kusasurra Adamu eki yafeeriirwe. Habwokuba Yesu akafa “omurundi gumu yamara.” (Baheb. 7:27; 10:12) Hati, mbaganiza ki enyakuli hagati y’enteekaniza ey’okulihirra n’ekicunguro? Enteekaniza ey’okulihirra nikyo ekintu Ruhanga eki akora kugarraho enkoragana enungi hagati ye n’abantu. Ekicunguro nugwo omuhendo oguheebwayo kulihirra abantu abasiisi. Omuhendo ogu niyo esagama ya Yesu ey’omuhendo eyaseeserwe habwaitu.—Baheb. 9:14. w25.02 5 ¶12-13

Kurora Yahwe nk’Omuntu omwomeezi nikiija kutukoonyera kuba n’enteekereza ey’ehikire obukirukuhika ha birengo byaitu. Omu mulingo ki? Sitaani agamba ngu obu turaahikwaho ebizibu nitwija kulekaho Yahwe. Nahabweki, omulingo twetwazaamu obutuhikwaho ebirengo kikwataho omulingo Yahwe ayehurramu. (Yob. 1:​10, 11; Nfu. 27:11) Baitu obu twikara tuli beesigwa hali Yahwe noobu tuba nituraba omu birengo twoleka ngu nitumugonza kandi ngu Sitaani abaza ebisuba. Nambere orukwikara, gavumenti ehakaniza omulimo gwaitu, oine ebizibu omu by’entaahya, abantu tibarukuhuliiriza obu obatebeza, rundi oine ebizibu ebindi? Obu kiraaba nukwo kiri, ijuka ngu enyikara ei orumu neekuha omugisa ogw’okusemeza omutima gwa Yahwe. Ekindi, ijuka ngu Yahwe talikuleka okoohebwa kukira eki osobora kugumira. Naija kukuha amaani kugumiisiriza. w24.06 22 ¶9

Noomanya ebintu ebikira kukuleetera kwohebwa? Kyakabi kwitira eriiso obuceke bwaitu, rundi kuteekereza ngu tuli b’amaani muno titusobora kukora ekibi. (1 Yoh. 1:8) Ijuka ngu Paulo ayoleka ngu n’abo “abaine ebirukwetaagisa omu by’omwoyo” nibasobora kwohebwa kakuba bateerinda. (Bag. 6:1) Titusemeriire kwebiihabiiha, baitu twikirize obuceke bwaitu. (2 Kol. 13:5) Hanyuma y’okumanyirra ebintu ebikira kutuleetera kwohebwa, kiki eki tusemeriire kukora? Twekambe kurwanisa ebyohyo. Ekyokurorraho, omu busumi bwa Baibuli, ebiikaro by’embuga ebyakirayoga kutahirirwa yabaga miryango. Egi niyo ensonga habwaki emiryango niyo yakirayoga kulindwa. Omu mulingo nugwo gumu, tusemeriire kumanya kurungi obuceke bwaitu nukwo tusobole kwangirra ebyohyo.—1 Kol. 9:27. w24.07 15 ¶5-7

Omulimo omurungi ogurukubazibwaho omu kyahandiikirwe kya kiro kinu, nigutwarramu kutebeza amakuru amarungi. Nahabweki, obu tusoma Ekigambo kya Ruhanga, tukeecumiitirizaaho ebi tusomere, kigumya okwikiriza kwaitu kandi tweyongera kwetegereza ensonga habwaki kikuru kutebeza ha Bukama bwe. Kusobora kugasirwa omu Kigambo kya Ruhanga, osemeriire kwetantara kukisoma n’okukyecumiitirizaaho nooyanguhiriza. Osemeriire kutunga obwire oburukumara obu orukuba nooyesomesa. Obu oraaba noosoma kandi okatangaana ekyahandiikirwe baitu okalemwa kukyetegereza otakirabaho. Oihireho noosobora kukozesa Watch Tower Publications Index rundi Ekitabu Ekikonyera Abakaiso ba Yahwe Kuseruliiriza kulengaho kukyetegereza kurungi. Kukozesa obwire oburukumara obu orukuba nooyesomesa nikiija kukukoonyera kweyongera kwesiga Ekigambo kya Ruhanga. (1 Bas. 5:21) Obu oraayeyongera kukigumya ngu kihikire, noija kwegondeza omu kugambiraho abandi ebi oyegere. w24.04 15 ¶4-5

Daudi akagamba ati “Oli murungi, orahuka okuganyira.” (Zab. 86:5) Mika akahandiika ati: “Noha Ruhanga nkaiwe arukuganyira okutahikirra nahinguraho ha kusisa?” (Mik. 7:18) Kandi Isaya akagamba ati: ‘Omubi aleke omuhanda gwe, n’omuntu atahikiriire aleke ebiteekerezo bye: agaruke hali Yahwe, na uwe alimuganyira; agaruke hali Ruhanga waitu, alimuganyirra kimu.’ (Is. 55:7) Kusobora kwegera hali Yahwe, ekitebe ky’omu Kolinso kikagambirwa kutangirra omusaija ogu ow’akaba ayegarukiremu kandi kimugumye ngu nikimugonza. Kuraba omu kuhondera oburagirizi obu, Abakristaayo abo bakooleka ngu ‘bahulizi omu bintu byona.’ Kyamananu ngu hakaba harabireho emyezi nke omusaija ogu aihirwe omu kitebe, baitu okuhana kukaba kumuleetiire kwegarukamu. Nahabweki, hakaba hataroho ensonga habwaki abagurusi baakukeereriirwe kumugarra omu kitebe. w24.08 17-18 ¶12-13

Tuli omu kasumi nambere empindahinduka ez’amaani zirukwija kubaho. Omu kasumi akatali ka hara, Yesu naija kucwera buli muntu weena omwomeezi omusango. Yesu akabazaaho ebintu ebyakubaireho kuhika omu kasumi ak’okucwa omusango obu naaha abeegeswa be ‘akokurorraho’ omu mulingo ogw’obunabbi ak’okwija kwe “n’empero ey’obusinge bunu.” (Mat. 24:3) Obunabbi bunu, nibusangwa omu Matayo esuura 24 na 25 hamu n’omu byahandiikirwe ebindi ebiri omu Marako esuura 13 na Luka esuura 21. Yesu akahabura abahondezi be naakozesa ebyokurorraho bisatu. Ebyokurorraho Yesu yakozeseze nibyo, eky’entaama n’embuzi, eky’abaisiki ab’amagezi n’abadomadoma, hamu n’eky’etaranta. Buli kyokurorraho nikitukoonyera kwetegereza omulingo engeso z’omuntu zirikwataho omulingo alicwerwamu omusango. w24.09 20 ¶1-2

Yesu Kristo ayatuteriireho ekyokurorraho ekirukukirayo akeekambisibwa okugonza oku akaba ainiire Ise hamu n’abantu. Okugonza oku kukamuleetera kukora n’amaani emirimo eyarorwaga nk’eya hansi. (Mat. 20:28; Yoh. 13:​5, 14, 15) Ab’oruganda, obu muraaba nimwekambisibwa okugonza, Yahwe naija kubaha emigisa kandi naija kubakoonyera kuhika ha bigendererwa byanyu eby’omwoyo nk’okufooka abaheereza. (1 Pet. 5:5) Abantu omu nsi beegomba abo abekurakuraniza bonka. Baitu eki tinukwo kiri omu kitebe kya Yahwe. Ow’oruganda ow’arukugonza abandi nk’oku Yesu yakozere tagonza kulema abandi rundi kugonza abandi bamurole nk’owa haiguru. Kakuba omuntu ow’aine enteekereza nk’egi akomwa omu kitebe, naasobora kwanga kukora emirimo eya hansi ey’erukwetaagisibwa kusobora kurolerra entaama za Yahwe ez’omuhendo. Naasobora kwerora nk’owa haiguru muno kukora emirimo nk’egi.—Yoh. 10:12. w24.11 15 ¶6-7

Omu nsi yoona nitwetaaga ab’oruganda kuheereza ‘nk’ebisembo omu bantu.’ (Bef. 4:8) Obu oraaba oli w’oruganda ow’abatiziibwe, oine ‘obusobozi’ bwokukonyera? (Nfu. 3:27) Noogonza kwekamba kuhika ha kigendererwa eky’okuheereza nk’omuheereza? Obu oraaba oli muheereza, noosobora kwehayo kukonyera ab’oruganda, okaheereza nk’omugurusi? Noosobora kukora empindahinduka omu bwomeezi bwawe nukwo osobole kusaba kugenda omu Isomero ery’Abatebezi b’Omukama? Isomero linu niriija kukutendeka nukwo Yesu asobole kukukozesa omu bwijwire. Obu oraaba nooyehurra ngu tosobora kukora ebintu binu, saba Yahwe. Musabe akukonyere n’omwoyo gwe ogurukwera kusobora kuhikiiriza obujunanizibwa oburaakuheebwa. (Luk. 11:13) Ab’oruganda Yesu abaakomere ‘nk’ebisembo omu bantu,’ buli bwakaiso oburukwoleka ngu aikaire naatwebembera omu biro binu ebya ha mpero. (Mat. 28:20) Mali nitusiima muno ngu twine Omukama omurungi, ow’okugonza, ow’arukutufaaho kandi ow’arukuhikyaho ab’oruganda ebyetaago byabo! w24.10 23 ¶16-17

Kiki ekirihika ha bintu ebireetiire abantu ba Ruhanga kubonabona? Ebintu ebi biriba ‘byebere kandi biriba biserekerwe hali amaiso’ ga Ruhanga. (Is. 65:16) Yahwe alimaraho ebizibu byaitu byona kandi akasumi nikaija kuhika obusaasi bwaitu bwona tubweberwe kimu. N’omu kasumi kanu ensorrokano zaitu zitukoonyera kwehurra tuteekaine kandi tutarukuta omutima ha bizibu n’okwetuntura okuli omu nsi. Ekindi, tukoonyera ab’oruganda na banyaanya itwe kwikara bateekaine obu twoleka emiringo ey’ereetwa omwoyo ogurukwera nk’okugonza, okusemererwa, obusinge, embabazi, n’obuculeezi. (Bag. 5:​22, 23) Mali ka mugisa gw’amaani kuba omu rugonjo runu orw’eby’omwoyo! Abo abarwikaramu nibaija kurora omurago gwa Ruhanga ogw’okuleetaho “iguru erihyaka nensi empyaka,” niguhikirra omu bwijwire. w24.04 22 ¶9-10

Noobu kiraaba ngu abantu abamu nibasobora kwegondeza omu kujumbirangana, kiri kintu ekikuru ekisobora kubakoonyera kutaaha obuswere. Ha kiro ky’okugaitwa abarukutaaha obuswere barahira omu maiso ga Yahwe ngu nibaija kugonzangana kandi batemungana ekitiinisa obwomeezi bwabo bwona. Omu nyikara eza buli kiro, otakakozere ekirahiro kyona, osemeriire kubanza kukiteekerezaaho muno. Eki nukwo kiri obukirukuhika ha kirahiro eky’okutaaha obuswere. Kujumbira kukoonyera abarukugonza kutaaha obuswere kumanyangana kurungi n’okukora encwamu enungi. Obwire obumu encwamu egi enungi eba y’okutaaha obuswere; kandi obwire obundi encwamu egi eba y’okuleka kujumbirangana. Obu bacwamu kuleka kujumbirangana tikimanyisa ngu eki bakozere kibi. Oihireho, kujumbira kuba kubakoonyiire kumanya obu baraaba nibasobora kutaaha hamu obuswere rundi nangwa. Habwaki kikuru kuba n’enteekereza ey’ehikire obukirukuhika ha kujumbira? Abakristaayo abatali omu buswere obu baba n’enteekereza ey’ehikire ha kujumbira, kibakoonyera kwetantara kujumbira omuntu ou batarukugonza kutaaha na uwe obuswere. w24.05 26-27 ¶3-4

Obwire obumu, Abakristaayo abato nibasobora kulemwa kurwanirra enyikiriza zaabo. Nibasobora kuhurra batiinire kubazaaho enyegesa ey’erukugamba ngu ebintu bitahangwe obu barukuba bali ha isomero. Habwaki? Habwokuba abeegesa baabo nibasobora kugamba ngu enyegesa egi ehikire. Obu oraaba oli muzaire, noosobora ota kukoonyera omwana waawe kutunga obumanzi obw’okurwanirra enyikiriza ze? Mukoonyere kukimanya ngu tasemeriire kuhurra aswaire habw’okwikiriza ngu ebintu bikahangwa. Habwaki? Habwokuba n’abanyasayansi baingi muno bakyetegeriize ngu ebintu bitabehobubaho. Nibarora obwakaiso oburukwoleka ngu omuntu ow’aine amagezi maingi muno nuwe asobora kuba yahangire ebyahangirwe ebiine obwomeezi kandi ebirukuhuniiriza. Ekirugamu, tibaikiririza omu nyegesa ey’erukugamba ngu ebintu bikabaho byonka. Omwana waawe naasobora kugumya ebi arukwikiririzaamu kuraba omu kwecumiitirizaaho ensonga ezireetiire ab’oruganda na banyaanya itwe abandi kwikiriza ngu obwomeezi bukahangwa. w24.12 18 ¶14-15

Yesu akaikara aine enteekereza enungi ha mulimo ogw’okutebeza. Eki kikamukoonyera kwikara aine obutagasi omu buheereza bwe. Ekyokurorraho, ha kumalirra kw’omwaka gwa 30 Y.A.K., Yesu, akakirora ngu abantu baingi bakaba beeteekaniize kuhuliiriza amakuru amarungi kandi akabalengesaniza n’omusiri oguhikire kugeswa. (Yoh. 4:35) Hanyuma y’omwaka nka gumu, akagambira abeegeswa be ati: “Eby’okugesa bingi.” (Mat. 9:​37, 38) Kandi hanyuma akongera yabateererra ati: “Eby’okugesa bingi . . . Musabe Mukama w’okugesa asindike abakozi omu mulimo gw’okugesa.” (Luk. 10:2) Yesu ataleke kunihira ngu abantu nibasobora kuhuliiriza amakuru amarungi, kandi yasemererwaga obu baakikoraga. Yesu akeegesa abeegeswa be kwikara baine enteekereza enungi ha butumwa bwabo, ekyakubakoonyiire kwikara baine obwekambi. w25.03 18-19 ¶15-16

Yahwe ali rukomero. Nkooku omwandara omukooto gusobora kukora nk’ekiikaro eky’okweserekamu hali ihunga ery’amaani, omu mulingo nugwo gumu, Yahwe atulinda obu tuhikwaho enyikara ezigumire omu bwomeezi bwaitu. Alinda enkoragana yaitu na uwe kandi atugumya ngu busaho kizibu kyona ekiturukurabamu ekiraatuhikyaho akabi ak’ebiro n’ebiro. Kandi naaturaganiza n’ekirukukiraho; naija kwihiraho kimu ekintu kyona ekitabangura obusinge bwaitu n’obulinzi. (Ez. 34:​25, 26) Gumu ha miringo tufoora Yahwe rukomero rwaitu oruli nk’omwandara, nukwo kumusaba. Obu tumusaba, atuha ‘obusinge bwa Ruhanga’ obulinda emitima yaitu n’ebiteekerezo byaitu. (Baf. 4:​6, 7) Yahwe aikara ayeteekaniize kutukoonyera. Nitusobora kumwesiga habwokuba ali ‘Mwandara ogutahwaho.’ (Is. 26:​3, 4) Naija kwikara ali mwomeezi nukwo ahikiirize emirago ye, ahurre esaara zaitu kandi atuhe obusagiki obu turukwetaaga. Ekindi, nitusobora kwesiga Yahwe habwokuba ali mwesigwa hali abo abamuheereza. (2 Sam. 22:26) Talyebwa ebi tukora, kandi naija kwikara naatuha emigisa.—Baheb. 6:10; 11:6. w24.06 27 ¶4-6

Eby’okwesemeza ebibi nibisobora kubaganizaamu omutima gwaitu. Abanywani ababi hamu n’okuteekerezaaho muno itungo nabyo nibisobora kubaganizaamu omutima gwaitu. Kakuba tukizoora ngu haroho ekintu ekitandikire kucekya okugonza kwaitu hali Yahwe, twine kugira eki twakoraho omu bwangu. (Mat. 5:​29, 30) Titusemeriire kuleka omutima gwaitu kubaganizibwamu. Nitusobora kwebiihabiiha ngu kakuba twejumbira muno omu bintu eby’omwoyo, nituba tutasobora kutwalirizibwa ebintu ebibi. Ekyokurorraho, teeramu akasisani oli aheeru omu bufuki obw’amaani. Hanyuma obu ohika omu ka ohemba omurro. Baitu kiki ekisobora kubaho kakuba oleka orwigi rukingwirwe? Embeho kuruga eheeru neesobora kwijura omu nju yaawe. Isomo ki eri turukwega? Titusemeriire kugarukira ha kulya eby’okulya eby’omwoyo ebitagasa enkoragana yaitu na Yahwe. Tusemeriire n’okukinga orwigi hali ebintu ebibi, nukwo orwoya orw’ensi enu orurukufuka, rundi engeso ezitali z’obwa Ruhanga zitataaha omu mutima gwaitu kandi zikagubaganizaamu.—Bef. 2:2. w24.07 21 ¶6-7

Nitusobora n’okuteekerezaaho obusaasi Yesu obu yahuliire otwaliremu n’okuswazibwa hamu n’obutali bwinganiza obu yarabiremu. Baitu nabwo, akaikara naagonza Yahwe kandi ali mwesigwa hali uwe noobu kiraaba ngu akabonabonesebwa muno. Omu kiikaro ky’okusaba ngu abaserikale abamuhanikire ha muti bafubirwe, akasaba ati: “Taata baganyire, habwokuba tibarukumanya eki barukukora.” (Luk. 23:34) Obu tusabira abo abatutwaza kubi, nikisobora kukeehya enyehurra zaitu ez’okwahura enzigu n’ekiniga kandi nikihindura n’omulingo turoramu abo abatubiihiza. Obu turaaba tukyali omu nsi enu embi nitwija kutwazibwa omu mulingo ogutali gw’obwinganiza. Baitu ka tube nitugumira bintu ki, leka tugumiizeemu nitusaba Yahwe kutukonyera. Ekindi, leka twegere ha mulingo Yesu yayetwaizeemu obu akaba naatwazibwa kubi kandi tugumizeemu nituteeka omu nkora emisingi ya Baibuli. Obu turaakikora nitwija kukigumya ngu Yahwe naija kutuha emigisa.—1 Pet. 3:​8, 9. w24.11 6 ¶16; 7 ¶17, 19

Yahwe taikiriza engeso eza buli mulingo; kandi anoba ekibi. (Zab. 5:​4-6) Naagonza tuhondere endengo ze ez’okuhikirra ezirukusangwa omu Kigambo kye Baibuli. Baitu Yahwe akimanyire ngu tuli bantu abatahikiriire kandi tasobora kutunihirramu kumworobera kikumi ha kikumi. (Zab. 130:​3, 4) Ha murundi nugwo gumu tarukugonza “abantu abatarukutina Ruhanga, nibafoora embabazi ze eky’okwekwasizaaho kukora engeso ezijunzire.” (Yud. 4) Egi niyo ensonga habwaki Baibuli ebazaaho ‘okuhwerekerezebwa okw’abantu abatarukutiina Ruhanga’ ha bulemu bwa Ruhanga obw’Amagedoni. (2 Pet. 3:7; Kus. 16:16) Baitu nabwo, Yahwe tarukugonza omuntu weena kuhwerekerra. Nkooku twarozere omu bicweke ebyahwaire, Baibuli neeyoleka kurungi ngu “naagonza boona beegarukemu.” (2 Pet. 3:9) Abagurusi beegera hali Yahwe kuraba omu kwoleka okugumiisiriza obu nibalengaho kukoonyera abantu abakozere ebibi kukora empindahinduka n’okugarraho enkoragana yabo na Yahwe. w24.08 26 ¶1-2

Kusisanaho na Yahwe, na itwe nitusobora kugabira abandi ebi barukwetaaga habwokuba nitubagonza. Ekyokurorraho, haroho ow’oruganda rundi munyaanya itwe ou omanyire arukwetaaga ebyokulya rundi ekyokujwara? Yahwe naasobora kukukozesa kumuhikyaho ebyetaago ebi. Abantu ba Yahwe bamanyirwe nk’abantu abanguha kukoonyera obu habaho ekigwererezi. Ekyokurorraho, omu kasumi ak’oburwaire bwa Korona, ab’oruganda na banyaanya itwe bakagabira abantu abakaba bali omu bwetaago ebyokulya, ebyokujwara hamu n’ebindi. Kandi baingi bakahayo beegondiize kusagika omulimo ogw’ensi yoona. Kinu kikakoonyera kusagika ab’oruganda omu nsi yoona abakaba bali omu bwetaago habw’ekigwererezi. Bakata omu nkora ebigambo ebirukusangwa omu Abaheburaniya 13:16 ebirukugamba ngu: “Kandi muteebwa kukorra abandi ebirungi n’okubagana ebi mwine n’abandi, habwokuba ebihongwa nk’ebi bisemeza muno Ruhanga.” w24.09 27 ¶6-7

Teekerezaaho enyikara enu. Oliyo nooserra omulimo oguraakukoonyera kusagika eka yaawe. Hanyuma hazooka emirimo ebiri. Oteekerezaaho ebirukukwata ha mulimo nka; mulimo gwa mulingo ki, nigunyetaagisa kukora ebiro bingaha, ndaamaraga esaaha zingaha omu muhanda, hamu n’ebindi. Emirimo enu yoona ebiri, nungi kusigikirra ha misingi ya Baibuli. Obundi haroho gumu ogu orukukira kugonza habw’omulingo gurukukorwamu rundi habw’okuba omusaara gwa haiguru. Baitu haroho ebintu ebindi ebi osemeriire kuteekerezaaho otakakozere encwamu. Ekyokurorraho, gumu ha mirimo egi nigwija kutahirra enteekaniza yaawe ey’okugenda omu nsorrokano? Haroho omulimo ogurukwija kukwetaagisa kukeehya ha bwire obu omara noofaaho eka yaawe omu nyehurra n’omu by’omwoyo? Kwekaguza ebikaguzo nk’ebi nikiija kukukoonyera kwebembeza “ebintu ebirukukira obukuru”—kandi ebi nibyo, okuramya kwawe n’ebyetaago by’eka yaawe omu kiikaro ky’okwebembeza itungo. Kandi hanyuma noija kukora encwamu Yahwe ei araaha omugisa. w25.01 17 ¶11-13

Noobu kiraaba ngu abandi bakutwaize kubi, noosobora kukigumya ngu Yahwe naakugonza kandi naakurora nk’ow’omuhendo. Kakuba oyehurra ‘ocwekere omutima,’ ijuka ngu Yahwe akarora ebirungi omu mutima gwawe kandi yakwiriza haihi na uwe. (Yoh. 6:44) Aikara ayeteekaniize kukukonyera habwokuba naakugonza muno. Nitusobora kumanya omulingo Yahwe ayehurra kuraba omu kwetegereza ekyokurorraho kya Yesu. Yesu obu akaba ali omu buheereza bwe omu nsi, akarora abo abaatwazibwaga nk’abataine mugaso kandi yabatwaza omu mulingo ogw’embabazi. (Mat. 9:​9-12) Omukazi ow’akaba arwaire oburwaire obw’amaani obu yakwasire ha kijwaro kye obu naanihira kukira, Yesu akamuhuumuza kandi yamusiima habw’okwikiriza kwe. (Mar. 5:​25-34) Yesu ahondera ekyokurorraho kya Ise kikumi ha kikumi. (Yoh. 14:9) Nahabweki noosobora kukigumya ngu Yahwe akurora nk’ow’omuhendo kandi arora emiringo yaawe enungi otwaliiremu okwikiriza kwawe n’okugonza oku omwiniire. w24.10 7 ¶4-5

Omu bwomeezi bwe bwona, Daudi akagumira enyikara nyingi ezirukutuntuza kandi ezamuleeteraga kurra amaziga. Abantu abandi bakamutwaza kubi kandi n’abantu abaayayesigaga muno bakamugobeza. (1 Sam. 19:​10, 11; 2 Sam. 15:​10-14, 30) Kiro kimu obu akaba ali omu nyikara ey’egumire muno, akahandiika ati: “Njwahire obwokusinda kwange; ebiro byona ngeza ekyokubyamiraho kyange; nekitabu kyange nkijubya amaizi omu maiso gange.” (Zab. 6:6) Noobu kiraaba ngu Daudi akahikwaho enyikara ezirukutuntuza muno, akaba naakigumya ngu Yahwe naamugonza. Akahandiika ati: “[Yahwe] ahuliire iraka eryokurra kwange.” (Zab. 6:8) Ebigambo ebiri omu kyahandiikirwe kyaitu kiro kinu nibyoleka kurungi ngu Yahwe naatugonza muno kandi afaayo ha mulingo turukwehurra. Daudi akeehurra oti rundi Yahwe akaba naasorooza amaziga ge omu cupa rundi naagahandiika omu kitabu. Daudi akaba naakigumiza kimu ngu Yahwe akaba naarora kandi naijuka obusaasi bwe. Ekindi, Daudi akaba naakigumiza kimu ngu, Ise ow’omu iguru ow’okugonza akaba atarukugarukira ha kumanya ebi arukurabamu kyonka, baitu akaba naamanya n’omulingo birukumukwataho. w24.12 22 ¶11-12