Juuni

Na kasumi kanu, nitugasirwa omu kicunguro kya Yesu Kristo. Ekyokurorraho, Yahwe atuganyira ebibi byaitu naasigikirra ha kicunguro. Tikiri kiragiro ngu asemeriire kutuganyira. Baitu atuganyira habwokuba naagonza kukikora. (Zab. 103:​3, 10-13) Abantu abamu nibasobora kwehurra ngu okuganyira kwa Yahwe tikubasemeriire. Amananu gali, itwena okuganyira kwa Yahwe tikutusemeriire. Omukwenda Paulo akakyetegereza ngu akaba ‘atasemeriire okwetwa omukwenda,’ habwokuba ‘akahiiganiza ekitebe kya Ruhanga.’ Baitu kandi akongera yagamba ati: “Habw’embabazi za Ruhanga enyingi muno, ndi eki ndi.” (1 Kol. 15:​9, 10) Obu twegarukamu ebibi byaitu, Yahwe atuganyira. Habwaki? Tatuganyira ngu habwokuba kitusemeriire, baitu atuganyira habwokuba naatugonza. Obu oraaba nooyehurra ngu tosemeriire okuganyira kwa Yahwe, ijuka ngu Yahwe ataheyo ekicunguro habw’abantu abataine ekibi, baitu akakihayo habw’abasiisi abeegarukamu.—Luk. 5:32; 1 Tim. 1:15. w25.01 26-27 ¶3-4

Titusobora kulema ebintu abandi batukora rundi batubazaaho, baitu nitusobora kulengaho kulema omulingo twetwazaamu. Kandi emirundi erukukira obwingi, ekintu ekirukukirayo oburungi nikyo kuganyira. Habwaki? Habwokuba tugonza Yahwe kandi naagonza tube bantu abarukuganyira. Kakuba twikara tukwasirwe ekiniga kandi tukalemwa kuganyira, nitusobora kwetwaza omu mulingo ogutali gw’amagezi kandi twehikyeho akabi. (Nfu. 14:​17, 29, 30) Obu tuleka kwahura enzigu, tuba nitutangira obusaasi obu twine kukwataho omulingo tutwazaamu abantu abandi. Ekindi, na itwe tuba twehaire ekisembo—ekirukumanyisa tuba tutakyateeka omutima ha nsonga egi, kandi eki kituleetera kwongera kwegondeza omu bwomeezi. Kiki ekisobora kukukoonyera kuleka kukwatwa bwangu ekiniga n’okwehurra kubi? Kimu ha bintu ebisobora kukukoonyera nukwo kuleka obwire kurabaho. Hanyuma y’okutunga obujanjabi, omuntu ow’atungire ebihuta eby’amaani aba naayetaaga obwire kurora yakira. Omu mulingo nugwo gumu, nitusobora kwetaaga obwire kweihamu enyehurra embi nukwo tukeeteekaniza kuganyira omuntu kuruga ha mutima. (Mug. 3:3; 1 Pet. 1:22) Saba Yahwe akukoonyere kuba muntu arukuganyira. w25.02 16-17 ¶8-11

Enyegesa ez’okubandizaaho nizitwarramu okwegarukamu, okwikiriza, okubatizibwa hamu n’okuhumbuuka. (Baheb. 6:​1, 2) Zinu ziri zimu ha nyegesa ezi tubanza kwega tutakafokere Bakristaayo. Enu niyo nsonga habwaki omukwenda Petero yabalizeeho enyegesa zinu obu akaba naatebeza ekitebe ky’abantu ha kiro kya Pentekooti. (Ebik. 2:​32-35, 38) Tusemeriire kubanza kwikiriza enyegesa zinu tutakafookere bahondezi ba Kristo. Ekyokurorraho, Paulo akagamba ngu omuntu weena ow’ahakaniza enyegesa ey’okuhumbuuka tasobora kugamba ngu Mukristaayo. (1 Kol. 15:​12-14) Baitu titusemeriire kugarukira ha kumanya enyegesa ez’okubandizaaho zonka. Kwahukanaho n’enyegesa ez’okubandizaaho, ebyokulya eby’omwoyo ebigumire nibitwarramu kumanya ebiragiro hamu n’emisingi ya Yahwe ebitukoonyera kwetegereza enteekereza ye. Kusobora kugasirwa omu byokulya ebi, tusemeriire kwesomesa Baibuli, twecumiitirizeeho ebi tusomere kandi tubite omu nkora. Obu turaakora eki, nitwija kukora encwamu ezirukusemeza Yahwe. w24.04 5 ¶12-13

Ruhanga akaijukya Yona ngu abantu ba Nineve “bakaba batasobora okubaganizamu emikono yabu, ogwobulyo nogwemoso.” (Yon. 1:​1, 2; 3:10; 4:​9-11) Hanyuma, Yesu akakozesa ekyokurorraho kinu kwegesa abantu ha mbabazi n’obwinganiza bwa Yahwe. Abantu ba Nineve “balyemerra omu musango” ki? Yesu akagamba ngu halibaho “okuhumbuka okwomusango” omu kasumi ak’omumaiso. (Yoh. 5:29) Akaba naabazaaho akasumi ak’Emyaka Rukumi ey’Obulemi bwe, nambere ‘abahikiriire n’abatahikiriire’ balihumbuurwa. (Ebik. 24:15) Hali abatahikiriire, kunu kuliba ‘kuhumbuka okw’omusango.’ Kinu nikimanyisa ngu hanyuma y’abantu banu kuhumbuurwa, Yahwe na Yesu nibaija kurora obu baraaba niboorobera kandi nibata omu nkora ebintu ebi beegere. Kakuba omu h’abantu ba Nineve ahumbuurwa kandi akanga kuheereza Yahwe, Yahwe tarukwija kumwikiriza kwikara ayomiire. (Is. 65:20) Baitu abo boona abacwamu kuheereza Yahwe n’obwesigwa nibaija kutunga omugisa gw’okwomeera ebiro n’ebiro.—Dan. 12:2. w24.05 5 ¶13-14

Yesu akaba ali muntu w’embabazi nka Ise. (Yoh. 14:9)Akooleka ngu Ise ow’embabazi naagonza abantu kandi naagonza kukoonyera buli omu hali bo kusingura ekibi. Yesu akakoonyera abantu abasiisi kugonza kuhinduramu engeso zaabo kandi bamuhondere. (Luk. 5:​27, 28) Yesu akaba amanyire ekirukwija kumuhikaho omu kasumi ak’omumaiso. Emirundi nyingi, Yesu akagambira abahondezi be ngu naija kugobezebwa kandi aitirwe ha muti. (Mat. 17:22; 20:​18, 19) Akaba amanyire ngu ekihongwa kye, kyakwihireho ekibi ky’ensi, nkooku Yohana n’abanabbi abandi bakaba barangire. Ekindi, Yesu akeegesa ngu hanyuma y’okuhayo obwomeezi bwe, “[alicunda] abantu aba buli mulingo” abairize nambere ali. (Yoh. 12:32) Abantu abasiisi baakusoboire kusemeza Yahwe kuraba omu kumwikiriza nk’Omukama wabo n’okurubatira omu bigere bye. Obu baakukozere eki, “[baakulekiirwe] okuruga omu kibi.” (Bar. 6:​14, 18, 22; Yoh. 8:32) Nahabweki, n’obumanzi Yesu akaba ayehaireyo kwitwa omu mulingo ogw’obusaasi kusobora kutujuna.—Yoh. 10:​17, 18. w24.08 5 ¶11-12

Teekerezaaho omulingo wayehuliire obu wayegere amananu kuruga omu Kigambo kya Ruhanga habw’omurundi ogw’okubanza. Okeega ngu So ow’omu iguru naakugonza, kandi naagonza obe omu h’abaheereza be. Ekindi, okeega ngu araganiize kumaraho obusaasi n’okubonabona, naija kuhumbuura abantu baawe abaafiire hamu n’ebindi bingi. (Mar. 10:​29, 30; Yoh. 5:​28, 29; Bar. 8:​38, 39; Kus. 21:​3, 4) Ebiwayegere bikakukwataho muno. (Luk. 24:2) Okabigonza muno, kandi okahurra noogonza kubigambiraho abandi! (Lengesaniza na Yeremiya 20:9.) Obu tugonza amananu agatwegere kuruga omu Baibuli, twehurra ngu tusemeriire kugagambiraho buli muntu. (Luk. 6:45) Twehurra nk’abeegeswa ba Yesu ab’omu kyasa eky’okubanza abaagambire bati: “Titurukwija kuleka kubazaaho ebintu ebi twarozere kandi twahurra.” (Ebik. 4:20) Habwokuba nitugonza muno amananu, tuhurra twine ekihika eky’okugagambiraho abantu baingi nkooku kirukusoboka. w24.05 15 ¶5; 16 ¶7

Nk’abantu ba Yahwe, tutebeza abantu abandi habwokuba tugonza Isiitwe ow’omu iguru kandi tugonza kukoonyera abandi kumumanya. Abandi kibagumira kwegondeza omu mulimo gw’okutebeza. Habwaki? Habwokuba abamu baine ensoni kandi abandi tibeikiririzaamu. Abandi batiina kugenda omu maka g’abantu bataraaliziibwe. Kandi abandi batiina ngu abantu tibarukwija kubahuliiriza. Abamu nibasobora kuba nibatiina kubiihiza abantu. Ab’oruganda na banyaanya itwe kibagumira kugambira abantu ababatamanyire amakuru amarungi. Obwire obumu na iwe kikugumira kutunga okusemererwa omu buheereza habw’enyehurra ezibaziibweho eruguru? Obu kiraaba nukwo kiri, otahwamu amaani. Eki nikyoleka ngu oli mwebundaazi kandi torukugonza kweyoleka. Ekindi, kyoleka ngu torukugonza kuteera empaka. Kandi busaho muntu arukugonza abandi kwanga kumuhuliiriza kukira muno obu arukuba naalengaho kubakorra ebirungi. So ow’omu iguru naamanya emitalibaine ey’orukutangatangana kandi naagonza kukukonyera.—Is. 41:13. w24.04 14 ¶1-2

Obu oraaba noosoma Baibuli, omu kiikaro eky’okuteeka omu nkora buli kimu kyona eki orasoma ha murundi gumu, weetereho ebigendererwa ebi osobora kuhikiiriza. Noosobora kulengaho kinu: Tunga orukarra orw’ebintu ebi osemeriire kukoraho hanyuma okomemu kimu rundi bibiri ebi oraabanza kukoraho. Ninkaha nambere osemeriire kutandikira? Noosobora kucwamu kutandiika n’ekigendererwa ekisobora kukwanguhira kuhikiiriza. Rundi noosobora kucwamu ninkaha nambere orukukira muno kugonza kubanza kuhinduramu. Obu oraamanya eki oru kugonza kubanza kuhinduramu, seruliiriza omu bitabu byaitu. Saba Yahwe akuhe “okugonza n’amaani ag’okukora.” (Baf. 2:13) Hanyuma ote omu nkora ebi oyegere. Hanyuma y’okuhikiiriza ekigendererwa kyawe eky’okubanza, nikiija kukwekambisa kukora ha kigendererwa ekindi. Amananu gali, obu oraasemezaamu obwomeezi bwawe nk’Omukristaayo rundi omulingo ogw’Ekikristaayo, nikiija kukwanguhira kugumizaamu nookora empindahinduka omu nyikara ezindi. w24.09 6 ¶13-14

Noosobora kwetuntura habw’ebibi ebi wakozere kara kandi byasaaliza abandi. Kiki eki sobora kukukonyera? Kora kyona eki orukusobora kubaleetera kwehurra kurungi, otwaliremu n’okubasaba ekiganyiro. Saba Yahwe akonyera abo aba wasaaliize. Naasobora kukukonyera n’okukonyera abo aba wasaaliize kugumiisiriza n’okwongera kutunga obusinge. Yegera ha nsobi zaawe eza kara, kandi oikale oyetekaniize kwikiriza Yahwe kukukozesa omu mulingo gwona ogu aragonza. Tekerezaaho ekyokurorraho kya nabbi Yona. Omu kiikaro ky’okugenda Nineve nambere Yahwe akaba amuragiire, akacwamu kugenda omu kiikaro ekindi. Yahwe akahana Yona kandi akegera ha nsobi ye. (Yon. 1:​1-4, 15-17; 2:​7-10) Yahwe ataleke kukozesa Yona nka nabbi we. Akamuha omugisa ogundi ogw’okugenda Nineve, kandi ahonaaho Yona akoorobera Yahwe. Ataleke ensobi ei yakozere kara kumulemesa kwikiriza obujunanizibwa kuruga hali Yahwe.—Yon. 3:​1-3. w24.10 8-9 ¶10-11

Yahwe tasazaamu ebibi byaitu rundi amabanja gaitu kyonka baitu abisiimuura. Ekyokurorraho, teekerezaaho omuntu ow’arukusazaamu ibanja erya sente nyingi ezihandiikirwe ha rupapura. Baitu omuhendo gwa sente ezo gusigara nigukyarorwa. Baitu kusiimuura ekintu nikyahukana. Kusobora kwetegereza ekyokurorraho kinu, tusemeriire kwijuka ngu omu busumi obwa kara bwino eyakozesebwaga yabaga etabwirwemu carbon, gaamu hamu n’amaizi. Omuntu akaba naasobora kukozesa ekikuuto ekirumu amaizi kusiimuura ebikaba bihandiikirwe. Nahabweki, ibanja obu lyasiimuurwaga, lyaburraga kimu. Abantu baabaga batakyasobora kurora ebyabaga bihandiikirwe. Ebyabaga bihandiikirwe, byasisanaga nk’ebitakabahoga. Mali nikigarramu amaani kukimanya ngu Yahwe tagarukira ha kusazaamu ebibi byaitu kyonka, baitu abisiimurra kimu!—Zab. 51:9. w25.02 10 ¶11

Abantu abandi obu batubazaaho kubi rundi obu batutwaza kubi twesiga Yahwe ngu amanyire amananu. Obwesige obu nibusobora kutukonyera kugumira okutwazibwa kubi habwokuba tukimanyire ngu Yahwe naija kuterekereza ensonga. Ensonga obu tuzikwasa Yahwe kitukonyera kutangirayo ekiniga rundi kwahura enzigu omu mutima gwaitu. Enyehurra nk’ezi nizisobora kutuleetera kwetwaza omu mulingo omubi, nizitumaraho okusemerewa kwaitu kandi nizisiisa enkoragana yaitu na Yahwe. Ky’amananu ngu titusobora kuhondera ekyokurorraho kya Yesu kikumi ha kikumi. Obwire obumu nitusobora kukora rundi tukabaza ebintu ebi tweyijukya hanyuma. (Yak. 3:2) Kandi obutali bwinganiza obumu nibusobora kutuleetera obusaasi hamu n’okwetuntura obwomeezi bwaitu bwona omu nsi enu embi. Obu oraaba oli omu nyikara enu, kigumye ngu Yahwe naamanya ebi orukurabamu. Kandi na Yesu naamanya omulingo orukwehurra habwokuba na uwe akahikwaho obutali bwinganiza. (Baheb. 4:​15, 16) Mali ka nikitusemeza muno ngu Yahwe atuha obuhabuzi kuraba omu Kigambo kye obutukonyera kugumira obutali bwinganiza. w24.11 6 ¶12-13

Kwikiririza omuli Yesu, nikyetaagisa kusobora kutunga “obwomeezi obutahwaho.” (Yoh. 3:​16-18, 36; 17:3) Abayudaaya baingi bataikirize ngu bakaba basemeriire kwikiririza omuli Yesu. Bakamukaguza bati: “Hati kyamahano ki eki orakora, nukwo tukakirora tukakwikiririzaamu?” (Yoh. 6:30) Hanyuma bakagamba ngu omu kasumi ka Musa, omu mulingo ogw’ekyamahano bakatunga emanu ey’okulya, kandi eyafookere ebyokulya ebya buli kiro. (Neh. 9:15; Kurug. 16:31) Mali, kinu kikeeyoleka kurungi ngu omutima gwabo gukaba guli ha byokulya. Ekindi, bakalema kukaguza Yesu kubasoborra kurungi eki akaba naamanyisa obu yabalizeeho “omugaati ogw’amananu kuruga omu iguru,” baitu kwahukanaho n’emanu, gunu gwakubatungisize obwomeezi obutahwaho. (Yoh. 6:32) Bakaba bataire muno omutima ha byetaago byabo eby’omubiri baalemwa n’okumanya amananu ag’eby’omwoyo Yesu ag’akaba naalengaho kubagambira. w24.12 5-6 ¶10-11

Ha isomero, omwana waawe naija kwegesebwa emiringo endi ebyahangirwe bikozerwemu. Ekyokurorraho, emiti ey’erukukira obwingi eturukya ebitaagi ebikooto, ha bitaagi ebikooto harugaho obutaagi obutaito kandi ha butaagi obutaito harugaho amababi. Ekintu kinu kyetwa fractal pattern. Ekintu kinu nikisangwa n’omu byahangirwe ebindi. Baitu nooha yataireho ebiragiro ebirukulema ebintu binu ebirungi? Omwana waawe obu araayeyongera kwecumiitirizaaho ekikaguzo kinu, naija kweyongera kugumya okwikiriza kwe ngu Ruhanga nuwe yahangire ebintu byona. Omwana waawe obu araagenda naakura, noosobora kumukaguza ekikaguzo kinu, “Ruhanga obu araaba nuwe yatuhangire, tikiri ky’amagezi kugamba ngu akatuha n’obuhabuzi oburukukwata ha ngeso nukwo tusemererwe?” Hanyuma noosobora kumusoborra ngu Ruhanga akatuha Baibuli kutwoleka omulingo tusobora kutunga okusemererwa. w24.12 16 ¶8

Obu naatereekerezebwa omwoyo ogurukwera, omukwenda Paulo akahandiika ebbaruha erukuragira omusiisi atarukwegarukamu kwihwa omu kitebe. (1 Kol. 5:13) Abakristaayo abeesigwa bakaba basemeriire kumutwaza bata? Paulo akabagambira ‘kuleka kukoragana’ na uwe. Eki kikaba nikimanyisa ki? Paulo akasoborra ngu ekiragiro kinu kikaba nikitwarramu ‘n’okutalya na uwe.’ (1 Kol. 5:11) Kwikarra ha kiihuro n’omuntu nikisobora kurugamu kutunga enkoragana na uwe. Nikyeyolekera kimu ngu, Paulo akaba naamanyisa ngu ekitebe tikisemeriire kumara obwire n’omusaija ogu. Kinu kyakulinzire ekitebe hali engeso ze embi. (1 Kol. 5:​5-7) Kwongerraho, kinu kyakuleetiire omusaija ogu kwetegereza ngu akaba akozere ekibi ekyamaani, ekyakumuleetiire kuhurra aswaire kandi kimwekambise kwegarukamu. w24.08 15 ¶4-5

Omu Isaleeri, ekiro eky’okulihirra kyabahoga omurundi gumu buli mwaka. Ha kiro eki, nyakatagara omukuru yahongaga ebihongwa eby’ebisoro habw’abantu. Amananu gali, ebihongwa by’ebisoro tibyaihirahoga kimu ebibi by’abantu habwokuba omuhendo gw’obwomeezi bw’ebisoro tugurukwingana omuhendo gw’obwomeezi bw’abantu. Baitu Abaisaleeri obu baayegarukamuga kandi bakahayo ebihongwa Yahwe ebi yabaga naagonza, yabaga ayeteekaniize kubaganyira ebibi byabo. (Baheb. 10:​1-4) Enteekaniza egi yakoonyeraga Abaisaleeri kukyetegereza ngu bakaba bali basiisi. Baitu Yahwe akaba aine enteekaniza ey’oruteekerro eyaakutusobozeseze kuganyirwa ebibi byaitu. Akakora enteekaniza nukwo Omwana we omugonzebwa “[aheebweyo] omurundi gumu okwetweka ebibi by’abaingi.” (Baheb. 9:28) Yesu akahayo “obwomeezi bwe nk’ekicunguro habw’abaingi.”—Mat. 20:28. w25.02 4 ¶9-10

“Ky’amananu ngu omwoyo nigugonza, baitu omubiri muceke.” (Mat. 26:41b) Ebigambo ebi nibyoleka ngu Yesu akaba naakyetegereza ngu tuli bantu abatahikiriire, kandi nitwija kukoraga ensobi. Ekindi, ebigambo bye bikabamu okuteererra okw’okwerinda kweyesiga ekihinguraine. Omu saaha nke Yesu atakagambire ebigambo binu, abeegeswa be bakaba boolekere ngu bacweriiremu kimu kutamulekaho. (Mat. 26:35) Ebigendererwa byabo bikaba birungi. Baitu nabwo, bakalemwa kukyetegereza ngu omu nyikara ey’egumire bakaba nibasobora kuhwamu amaani ag’okukora ekihikire kandi bakakora ekitahikire. Egi niyo ensonga habwaki Yesu yabateereriire n’ebigambo ebirukusangwa omu kyahandiikirwe kya kiro kinu. Eky’obusaasi, abeegeswa bakalemwa kwikara bulindaara. Yesu obu yakwasirwe, bakaikara na uwe rundi bakooheebwa kwiruka? Habwokuba kikabagwaho batakyeteekaniriize, bakakora ekintu kyonyini eki baali bagambiire Yesu ngu tibasobora kukora, bakamulekaho.—Mat. 26:56. w24.07 14 ¶1-2

Adamu na Hawa bakafeerwa enkoragana yabo ey’omuhendo na Isebo Yahwe. Ha kubanza, Adamu na Hawa bakaba bali kicweka ky’eka ya Ruhanga. (Luk. 3:38) Baitu, obu baayangire kworobera Yahwe, akababinga omu ka ye batakazaire abaana. (Kub. 3:​23, 24; 4:1) Nk’abaijukuru baabo, nitwetaaga okuteeranizibwa na Yahwe. (Bar. 5:​10, 11) Ekirukumanyisa, tusemeriire kukurakuraniza enkoragana enungi na uwe. Kusigikirra ha kitabu ekimu, ekigambo eky’Oruyonaani ekikozesebwa hanu kumanyisa “okuteeranizibwa” nikisobora n’okumanyisa “omunyanzigwa kumufoora omunywani.” Ekirukusemeza kiri ngu, Yahwe nuwe yabandize kugira eki yakoraho kusobozesa ekintu kinu kubaho. Omu mulingo ki? Kuraba omu nteekaniza ey’okulihirra Yahwe ei ataireho kusobora kugarraho enkoragana enungi hagati ye n’abantu abasiisi. Neetwarramu kuhingisaniza ekintu ekimu n’ekindi ebiine omuhendo ogurukwinganaingana. Omu mulingo gunu, ekintu ekibuzire rundi ekisiisirwe nikisobora kwongera kutungwa rundi kugarurwaho. w25.02 3-4 ¶7-8

Paulo akagamba ngu “Okuhana okw’abantu abaingi okuhairwe omuntu nk’ogu nikumara.” (2 Kol. 2:​5-8) Kinu nikimanyisa ngu okuhana oku kukaba kukoonyiire omusaija ow’akaba asiihaine na mukaise. (1 Kol. 5:1) Omu mulingo ki? Kukamukoonyera kwegarukamu. (Baheb. 12:11) Paulo akaragira ekitebe ‘kumuganyira n’okumuhuumuza’, kandi ‘n’okumwoleka okugonza.’ Weetegereze ngu Paulo akaba naagonza ekitebe kutagarukira ha kwikiriza omusaija onu kugaruka omu bantu ba Yahwe kyonka. Paulo akaba naagonza ab’omu kitebe bagumye omusaija onu ow’akaba ayegarukiremu kuraba omu bigambo byabo, enyetwaza yabo hamu n’ebikorwa byabo ngu bakaba bamuganyiire kandi ngu nibakyamugonza. Kandi ekyakurugiremu, ow’oruganda onu yaakuhuliire ngu naatangirirwa omu kitebe. w24.08 15 ¶4; 16-17 ¶6-8

Omukwenda Paulo yabazaaga n’obumanzi obukirukuhika ha bintu Omukristaayo asemeriire kukora kugumiisiriza. Akaijukya Abakristaayo ngu obu barukuba nibagumira ebirengo, tibasemeriire kweyesiga bonka baitu kwesiga Yahwe. Egi niyo nsonga habwaki Paulo yagambire n’obumanzi ati: “Yahwe nuwe mukoonyezi wange; tinditiina.” (Baheb. 13:6) Kasumi kanu, bamu h’ab’oruganda nibagumira okuhiiganizibwa. Nitusobora kubasagika kuraba omu kubasabira, kandi obwire obumu kubakoonyera kuraba omu kubaha ebi barukwetaaga. Baitu Baibuli egamba ngu “boona abarukugonza kugendera omu bwomeezi obw’okwemarra hali Ruhanga obu nibahondera Kristo Yesu, nibaija kuhiiganizibwaga.” (2 Tim. 3:12) Habw’ensonga egi, itwena tusemeriire kweteekaniriza ekiraabaho omu kasumi ak’omumaiso. Leka tugumizeemu nitwesigira kimu Yahwe obu nitukigumya ngu naija kutukoonyera kugumira ekirengo kyona ekisobora kutuhikaho. Omu kasumi akahikire, naija kuhuumuza abo boona abarukumuheereza n’obwesigwa.—2 Bas. 1:​7, 8. w24.09 13 ¶17-18

Kiki ekyakoonyiire Abakolinso kubatizibwa? (2 Kol. 10:​4, 5) Ekigambo kya Ruhanga hamu n’omwoyo gwe ogurukwera ogw’amaani bikabakoonyera kukora empindahinduka ez’amaani omu bwomeezi bwabo. (Baheb. 4:12) Abantu ab’omu Kolinso abaikiriize amakuru amarungi bakasobora kwecwaho engeso ezi embi hamu n’ebikorwa nk’obutamiizi, obusuma, hamu n’obukuuhya. (1 Kol. 6:​9-11) Noobu kiraaba ngu abantu abamu omu Kolinso bakaba baine kusingura engeso ezigumire kuleka, batateekereze ngu kikaba nikiija kubagumira muno kufooka Abakristaayo. Bakatamu muno amaani kutaaha omu muhanda ogufunzire ogurukuhikya omu bwomeezi obutahwaho. (Mat. 7:​13, 14) Oliyo noorwanisa engeso embi nukwo osobole kubatizibwa? Otajwaha! Saba Yahwe akuhe omwoyo gwe gukukoonyere kwangirra okwegomba okw’okukora ekintu ekibi. w25.03 6 ¶15-17

Yahwe naaraganiza kutuha amagezi ag’okumanya encwamu ei turaaba nitugenda kukora obu eraaba niija kumusemeza. Atuha amagezi ago “atarukubiihirwa.” Hanyuma y’okusaba Yahwe kukuha oburagirizi, ta omutima ha ky’okugarukamu kye. Ekyokurorraho: Kakuba oba oli omu rugendo kandi okabura, noosobora kukaguza omuntu ow’omu kiikaro eki. Baitu noosobora kurugaho okagenda atakakugarukiremu? Nangwa. Noija kuhuliiriza kurungi oburagirizi obu araakuha. Omu mulingo nugwo gumu, hanyuma y’okusaba Yahwe, lengaho kumanya eki arukugamba kuraba omu kuserra ebiragiro hamu n’emisingi omu Baibuli ebirukukwata ha nyikara yaawe. Ekyokurorraho, obu oraaba noocwamu kugenda ha bugenyi rundi nangwa, noosobora kuteekerezaaho Baibuli eki egamba ha bugenyi obutasemiire, abanywani ababi, hamu n’obwetaago obw’okwebembeza Obukama omu kiikaro ky’okwebembeza ebi orukugonza.—Mat. 6:33; Bar. 13:13; 1 Kol. 15:33. w25.01 16 ¶6-7

Omu bunabbi, Isaya abazaaho embaganiza enyakuli hagati y’abantu abali omu rugonjo orw’eby’omwoyo n’abo abatarurumu. Yahwe aha abantu be ebyokulya eby’omwoyo omu bwijwire. Atuhaire omwoyo gwe ogurukwera, Ekigambo kye Baibuli, n’ebyokulya eby’omwoyo ebirukumara nukwo tusobole ‘kulya, . . . kunywa, . . . kandi tusemererwe.’ (Lengesaniza na Okusuku’rwa 22:17.) Baitu abo abali aheeru y’orugonjo orw’eby’omwoyo ‘barumwa enjara . . . , baine iroho’ kandi baswara. Tibaine nkoragana yoona na Ruhanga. (Am. 8:11) Yahwe aha abaheereza be ebyetaago byabo otwaliiremu n’ebyokulya eby’omwoyo. (Yo. 2:​21-24) Akikora kuraba omu Baibuli, ebitabu byaitu ebirukusigikirra ha Baibuli, omukura gwaitu, n’ensorrokano eza buli wiiki hamu n’enkooto. Obu twesomesa kandi tukeejumbira omu nsorrokano butoosa, tweyongera kuguma omu by’omwoyo kandi tuhuumuzibwa. w24.04 21 ¶5-6

Obu oraaba noogonza kutandika kujumbira omuntu, noosobora kukora enteekaniza ey’okubaza n’omuntu ogu muli omu bantu baingi rundi ha simu. Mugambire omulingo gwonyini ogu orukwehurra kandi ngu waakugondeze kweyongera kumumanya. (1 Kol. 14:9) Obu kiraaba nikyetaagisa, muhe obwire obw’okuteekerezaaho eki araakugarukamu. (Nfu. 15:28) Kandi omuntu obu araaba atarukugonza kutandikaho enkoragana ey’embaganiza na iwe, tamu enyehurra ze ekitiinisa. Kiki eki osemeriire kukora, kakuba omuntu akugambira omulingo arukwehurramu? Nikisobora kuba kitanguhiire omuntu ogu kukugambira omulingo arukwehurra, nahabweki mutemu ekitiinisa kandi omutwaze omu mulingo ogw’embabazi. Obu oraaba nooyetaaga obwire kukiteekerezaaho, mugambire. Baitu, otatwara obwire bwingi kumugarukamu. (Nfu. 13:12) Obu oraaba otarukumugonza, kibaze omu mulingo ogw’embabazi kandi ogurukwetegerezebwa kurungi. Obu oraaba noogonza mutandike kujumbirangana n’omuntu ogu, mubazeeho ebintu ebimurukunihira kukora obu muraaba nimujumbirangana. Ebimurukunihirramungana nibisobora kwahukana. w24.05 23-24 ¶12-13

Nikisobora kuba ngu nambere Daudi yagendiire omu nkambi y’amahe ga Isaleeri, akaba akyali nsinganto. Akasanga abaserikale batiinire habwokuba omusaija ow’amaani Omufirisiti ow’arukwetwa Goliasi akaba aliyo ‘naagaya amahe ga Isaleeri.’ (1 Sam. 17:​10, 11) Ekintu ekyaleetiire abaserikale kutiina nukwo kuta omutima ha musaija ogu ow’amaani hamu n’okugaya kwe. (1 Sam. 17:​24, 25) Baitu uwe Daudi akata omutima ha kintu ekindi, akaba akimanyire ngu Goliasi kugaya ihe lya Isaleeri akaba naagaya “amahe ga Ruhanga omwomezi.” (1 Sam. 17:26) Daudi akaba naateekerezaaho Yahwe. Daudi akaba naakigumya ngu Ruhanga ayamukoonyiire obu akaba naaliisa entaama akaba naija kwongera amukoonyere omu nyikara egi. Obu naakigumya ngu Ruhanga akaba naamusagika, Daudi akarwanisa Goliasi kandi yamusingura.— 1 Sam. 17:​45-51. w24.06 21 ¶7

Teekerezaaho omulingo obwomeezi bwaitu bwakubaire kakuba tuba tutarukuheereza Yahwe. Obu turakikora nikiija kutukonyera kwikara tuli beesigwa kandi tugambe nkooku omuhandiiki wa zabuli yagambire ati: “Baitu kisemeriire nyowe okuirra haihi Ruhanga.” (Zab. 73:28) Nitusobora kuraba omu bizibu byona ebi tutangatangana habwokuba “[nituheereza] Ruhanga omwomeezi kandi ow’amananu.” (1 Bas. 1:9) Ruhanga waitu ali Muntu wenyini ow’arwanirra abo abamuramya. Akakoonyera abaheereza be omu kasumi aka kara kandi na itwe atukoonyera kasumi kanu. Omu kasumi akatali ka hara nitwija kuhikwaho omuhito omwingi ogutakabahoga omu nsi. Baitu titurukwija kugurabamu itwenka. Leka itwena tube bamanzi kandi tugambe tuti: “Yahwe nuwe mukoonyezi wange; tinditiina.”—Baheb. 13:​5, 6. w24.06 25 ¶17-18

Baibuli ebazaaho abasaija abarukuhingura omu 40 abaalemere nk’abakama ba Isaleeri. Abakama abarungi bakakora ebintu ebimu ebibi. Teekerezaaho Omukama Daudi ow’akaba ali murungi. Yahwe akamubazaaho ati: “Omuiru wange Daudi . . . yankuratira nomutimagwe gwona, okukora eki kyonka ekikaba kiri ekirungi omu maiso gange.” (1 Bakam. 14:8) Baitu, omusaija ogu akasiihana n’omukazi w’abandi kandi hanyuma yakora enteekaniza ey’okwita iba omu bulemu. (2 Sam. 11:​4, 14, 15) Harubaju orundi, baingi abakaba bali bakama abatali beesigwa bakakora ebintu ebimu ebirungi. Teekerezaaho Rehoboamu, “akakora ekibi” omu maiso ga Yahwe. (2 Byom. 12:14) Baitu, haroho ebintu ebimu ebirungi Rehoboamu ebi yakozere. Ekyokurorraho, akoorobera ekiragiro kya Yahwe eky’okuleka enganda ikumi kwecwaho Obukama bwe. Ekindi, akakoonyera embuga nyingi omu Bukama bwe kuguma, ekintu ekyakoonyiire kulinda abantu ba Ruhanga hali abanyanzigwa baabo. (1 Bakam. 12:​21-24; 2 Byom. 11:​5-12) Kiki Yahwe eki yasigikirrahoga kumanya omukama obu araaba ali mwesigwa omu maiso ge rundi nangwa? Yaroraga omu mutima gwe, okwegarukamu kwe, n’omulingo yasagikamuga okuramya okw’amananu. w24.07 20 ¶1-3

Kiki abagurusi eki bakora omwana ow’ali hansi y’emyaka 18 obu akora ekibi eky’amaani? Akatebe k’abagurusi kakora enteekaniza nukwo abagurusi babiri batangatangane omwana ogu n’abazaire be Abakristaayo. Abagurusi nibaija kukaguza abazaire ebintu ebi bakozereho kusobora kukoonyera omwana kwegarukamu. Kakuba omwana aba ahuliriize obuhabuzi bw’abazaire, kandi aliyo naakora empindahinduka omu nteekereza ye n’engeso ze, abagurusi abo babiri nibasobora kucwamu ensonga kutazongerayo. Abagurusi bakimanyire ngu Yahwe ahaire abazaire obujunaanizibwa obw’okuhana abaana baabo omu mulingo gw’okugonza. (Bir. 6:​6, 7; Nfu. 6:20; 22:6; Bef. 6:​2-4) Hanyuma abagurusi nibaija kubungiraga abazaire obwire obumu kukigumya ngu omwana naatunga obukoonyezi obu arukwetaaga. Baitu kiki abagurusi eki basemeriire kukora, omwana ow’abatiziibwe obu ayanga kwegarukamu? Eki obu kibaho, akatebe k’abagurusi abakomerwemu nibaija kutangatangana n’omwana ogu hamu n’abazaire be Abakristaayo. w24.08 24 ¶18

Itwena tukimanyire kurungi ngu tusemererwa obu tuheebwa ekisembo. Baitu, tutunga okusemererwa okurukukiraho obu tugaba. Habwokuba Yahwe akatuhanga omu mulingo gunu, nitusobora kwongera ha kusemererwa kwaitu. Nitusobora kwongera ha kusemererwa kwaitu kuraba omu kuserra emiringo tusobora kugabira abandi kandi hanyuma tukakikora. Mali ka nikisemeza ngu Yahwe akatuhanga omu mulingo gunu! (Zab. 139:14) Ebyahandiikirwe bitugumya ngu okugaba kuleeta okusemererwa, kandi egi niyo nsonga habwaki Baibuli eyeta Yahwe “Ruhanga anyakusemeriirwe.” (1 Tim. 1:11) Nuwe Omugabi ow’okubanza kandi ow’arukukirrayo kimu. Nk’oku omukwenda Paulo yagambire, “habwe, twine obwomeezi, nitugenda kandi turoho.” (Ebik. 17:28) Mali, “ekintu kyona ekirungi n’ekisembo kyona ekihikiriire” kiruga hali Yahwe. (Yak. 1:17) Hataroho kugurukyagurukya, itwena twakugondeze kutunga okusemererwa okwingi okuruga omu kugaba. Eki nitusobora kukikora kuraba omu kwegera ha mulingo gwa Yahwe ogw’okugaba.—Bef. 5:1. w24.09 26 ¶1-4

Hanyuma y’okurora ebintu ebirukwetaagisa kuheereza nk’omugurusi, abaheereza abamu nibasobora kwehurra ngu tibasobora kubihikiiriza. Baitu oijuke ngu Yahwe noobu kyakuba ekitebe kye, tibarukukunihirramu kwoleka emiringo enu kikumi ha kikumi. (1 Pet. 2:21) Kandi omwoyo gwa Yahwe ogw’amaani nugwo gukoonyera kukurakuraniza emiringo enu. (Baf. 2:13) Haroho omulingo gwona ogu waakugondeze kweyongera kukurakuraniza? Saba Yahwe akukonyere. Seruliiriza ha mulingo ogu, kandi osabe omu h’abagurusi kukukoonyera kumanya nambere osemeriire kuhinduramu. Gumizaamu nookurakurana. Saba Yahwe akukoonyere oyeyongere kuba w’omugaso omu kumuheereza n’okuheereza ab’oruganda na banyaanya itwe. (Is. 64:8) Yahwe naija kukuha emigisa habw’amaani ag’orukutamu kukurakurana kusobora kuheereza nk’omugurusi. w24.11 25 ¶17-18

Busaho n’omu hali itwe asemeriire kwehurra ngu asemeriire embabazi za Yahwe noobu yaakuba amuheeriize kumara emyaka nyingi. Kyamananu ngu Yahwe aijuka ebintu byona ebi tuba tumukoliire omu buheereza bwaitu hali uwe. Akatuha ekisembo eky’ekicunguro habwa busa hatali kutusasura habw’ebintu ebirungi ebi tumukoliire. Kakuba tugamba ngu tusemeriire embabazi za Yahwe, tuba nitusisana nk’abarukugamba ngu Kristo akafeera busa. (Lengesaniza na Abagaratiya 2:21.) Omukwenda Paulo akaba akimanyire ngu noobu yaakukozere ki, Yahwe akaba atasemeriire kumuganyira. Hati, habwaki yakozere n’obwekambi omu buheereza bwe hali Yahwe? Atakikole ngu habwokuba akaba naagonza kwoleka ngu kikaba kimusemeriire, baitu akakikora kwoleka ngu akaba naasiima habw’embabazi za Yahwe ezitamusemeriire. (Bef. 3:7) Kusisanaho na Paulo, na itwe tugumizaamu nituheereza n’obwekambi hatali habwokuba ngu nitugonza Yahwe atwoleke embabazi ze, baitu tukikora habwokuba nitugonza kwoleka okusiima habw’embabazi ze ezitatusemeriire. w25.01 27 ¶5-6