Maayi

Hanyuma y’okujuna abantu be kuruga omu bwiru omu ihanga lya Misiri, Yahwe akakoma banyakatagara kuheereza ha heema ey’okutangatanganiramu. Abaleevi bakaheebwa obujunaanizibwa obw’okukora emirimo endi ha heema egi ey’erukwera. Hati tugambe ngu abo abaheerazaaga ha heema ey’okutangatanganiramu, hamu n’abo abaikaraga haihi nayo Yahwe yabafaahoga muno kukira abandi? Nangwa! Yahwe tasoroora. Buli omu omu nkambi yayegondezaaga omu kuba n’enkoragana enungi na Yahwe. Ekyokurorraho, Yahwe akakigumya ngu ihanga lyona likaba nirisobora kurora enyomyo ey’ekicu hamu n’enyomyo ey’omurro ebyabaga eruguru y’eheema. (Kurug. 40:38) Enyomyo ey’ekicu obu yatandikaga kugenda omu kiikaro ekihyaka, n’abo abaikaraga hara n’eheema baabaga nibasobora kugirora kandi bagendere hamu n’abantu abandi. (Kubar. 9:​15-23) Omu mulingo nugwo gumu kasumi kanu ka tube nitwikara nkaha, nitukigumya ngu Yahwe naatugonza, naatufaaho, kandi naatulinda. w24.06 4 ¶10-12

Obwomeezi bwa Daudi bukaba buli omu kabi. Mutabani we Abusalomu akaba naagonza kunyaga obukama hali ise. (2 Sam. 15:​12, 13) Daudi akaba aine kuruga Yerusalemu ahonaaho. Abaheereza be obu bakaba nibagenda, Daudi akakyetegereza ngu omuntu omu asemeriire kusigara Yerusalemu kwikara naabamanyisa ha nteekaniza za Abusalomu. Nahabweki, akasindika Zadoki hamu na banyakatagara abandi kugarukayo omu rubuga kukora nka bambega. (2 Sam. 15:​27-29) Bakaba baine kuba abeegendereza muno. Daudi akasaba Zadoki hamu na Husai banywani be abeesigwa kusobora kumukoonyera ha nteekaniza ye. (2 Sam. 15:​32-37) Husai akaba aine kwefoora ngu naasagika Abusalomu kandi amuhe amagezi ha mulingo asobora kutaahirra Daudi, ekintu ekyakuhaire Daudi akaire ak’okweteekaniriza okutaahirra oku. Abusalomu obu yaikiriize amagezi ago, Husai akaija yagambira Zadoki hamu na Abyasara eki bakaba bacwiremu. (2 Sam. 17:​8-16) Hanyuma abasaija banu babiri bakamanyisa Daudi ha nteekaniza ya Abusalomu kandi eki kikalinda Daudi kutahikwaho akabi.—2 Sam. 17:​21, 22. w24.07 4-5 ¶9-10

Bamu h’abaheereza ba Yahwe betuntura muno habw’ebibi ebi baakozere kara batakabatiziibwe rundi hanyuma y’okubatizibwa. Baitu tusemeriire kukiijuka ngu Yahwe akahayo ekicunguro habwokuba naatugonza muno. Nahabweki naagonza twikirize ekisembo eki. Yahwe atugambira ngu hanyuma y’okuterekereza ensonga na uwe, atuganyirra kimu. Mali nitusiima muno Yahwe habw’okutaikara naijuka ebibi byaitu ebya kara! Kandi ha murundi nugwo gumu, tayebwa ebirungi ebi twakozere. (Zab. 103:​9, 12; Baheb. 6:10) Obu oraaba nooyentuntura habw’ebibi ebi wakozere kara, lengaho kuteeka omutima ha bintu ebi osobora kukora hati, n’ebi osobora kukora omu kasumi ak’omumaiso. Tosobora kuhindura eby’enyuma. Baitu nosobora kuhaisa Yahwe ekitiinisa omu nyikara ez’orumu hati kandi olindirre obusumi obw’omumaiso obu akuraganiize. w24.10 8 ¶8-9

Obu osoma Baibuli, obwire obumu noosobora kuhwamu amaani kakuba okyetegereza ngu haroho ebintu bingi ebi osemeriire kusemezaamu. Teekerezaaho ekyokurorraho kinu: Tugambe ngu omu kusoma kwawe kwa Baibuli habairemu obuhabuzi oburukukwata ha kusoroora. (Yak. 2:​1-8) Okyetegereza ngu osemeriire kusemezaamu omulingo otwazaamu abandi, nahabweki ocwamu kukora empindahinduka ezimu. Hanyuma ekiro ekirukuhonderaho osomaho obukuru obw’okulema ebigambo byawe. (Yak. 3:​1-12) Hanyuma okyetegereza ngu ebigambo byawe bibaire bitali by’embabazi kandi nibimaramu amaani. Nahabweki ocwamu kutandika kukozesa ebigambo eby’embabazi kandi ebirukwombeka. Hanyuma, ekiro ekindi, okusoma kwawe kwa Baibuli kubamu okuteererra okurukukwata ha kwetantara kuba munywani w’ensi. (Yak. 4:​4-12) Okyetegereza ngu osemeriire kuhinduramu obu kirukuhika ha by’okwesemeza byawe. Nambere ekiro kyakana kiraahikira, noosobora kwehurra ngu kigumire muno kukora empindahinduka zinu zoona. Otahwamu amaani. Ijuka ngu kujwara omuntu omuhyaka tikiri kintu eki okora omurundi gumu gwonka, kiri kintu omuntu eki asemeriire kwikara naakora. w24.09 5-6 ¶11-12

Yesu akaba akimanyire ngu omulingo Yahwe aroramu ensonga nugwo gurukukirayo obukuru. Akeesiga Yahwe ngu akaba naija kumaraho obutali bwinganiza omu kasumi akahikire. Nitusobora kwegera hali Yesu kuraba omu kulema ebi tubaza obu tuba tutwaziibwe omu mulingo ogutali gw’obwinganiza. Obutali bwinganiza obw’emiringo emu tibuba bw’amaani kandi obwire obumu tikirukwetaagisa kubutaho omutima. Rundi nitusobora kucwamu kuculeera kusobora kwetantara kubaza ekintu ekiraasiisira kimu enyikara. (Mug. 3:7; Yak. 1:​19, 20) Obwire obumu nikisobora kutwetaagisa kugira eki twabaza obu turora obutali bwinganiza rundi obu tuba niturwanirra amananu. (Ebik. 6:​1, 2) Kakuba tucwamu kubaza, nitusobora kukikora omu mulingo oguteekaine kandi ogw’ekitiinisa. Ekindi, nitusobora kwegera hali Yesu kuraba omu kuta obwesigwa bwaitu omuli “Ogu arukucwa omusango ogwobulyo.”—1 Pet. 2:23. w24.11 5-6 ¶10-12

Omusiisi obu ayegarukamu, kireetaho okusemererwa okw’amaani. (Luk. 15:7) Noobu kiraaba ngu abagurusi bakora kyona eki barukusobora kukoonyera omusiisi kwegarukamu, nooha mali, aba amukoonyiire kuhinduka? Ijuka omukwenda Paulo eki yagambire obukirukuhika h’abasiisi: “Obundi Ruhanga araabaha okwegarukamu.” (2 Tim. 2:25) Obugambo oburukusoborra orukarra oru nibugamba buti: “Omuntu obu ahinduramu enteekereza ye hamu n’engeso ze, Yahwe nuwe asemeriire kusiimwa habwokuba nuwe aba akoonyiire Omukristaayo kuhinduka hatali abantu.” Paulo agumizaamu naabazaaho ebintu ebimu ebirungi ebiruga omu kwegarukamu naagamba ngu kikoonyera omusiisi kutunga okumanya okuhikire okurukusigikirra h’amananu, kimukoonyera kwongera kuba n’enteekereza ey’ehikire kandi kimukoonyera kuruga omu mitego ya Sitaani.—2 Tim. 2:26. Omusiisi obu ayegarukamu, abagurusi bakora enteekaniza ez’okumubungira nukwo agumizeemu naatunga obukoonyezi obu arukwetaaga kusobora kurwanisa emitego ya Sitaani n’okugumizaamu naarubatira omu muhanda oguhikire.—Baheb. 12:​12, 13. w24.08 23 ¶14-15

Ekitebe ky’abantu Yesu eki yaliisize, bakaba bataire omutima ha kwigusa ebyetaago byabo eby’omubiri. Omu mulingo ki? Ekiro ekyahondiireho, abantu bakagenda nambere Yesu akaba abaheeriire emigaati baitu bakasanga uwe n’abakwenda be bataliyo. Nahabweki, bakacwamu kutemba amaato agakaba nigaruga Tiberiya, kugenda omu Kaperenaumu kuserra Yesu. (Yoh. 6:​22-24) Tugambe ngu eki bakakikora ngu habwokuba bakaba nibagonza kumanya ebirukukiraho ha Bukama? Nangwa. Ekigendererwa kyabo ekikuru kikaba kiri ky’okutangatangaana Yesu nukwo abongere emigaati. Eki nitukimanya tuta? Wetegereze ekyabaireho abantu banu obu batangatangaine Yesu ali haihi na Kaperenaumu. Yesu akabagambira bbwa ngu ekigendererwa kyabo ekikuru kikaba eky’okwigusa ebyetaago byabo eby’omubiri kandi eby’akacu kake. Akabagambira ngu “nimunserra habw’emigaati ei muliire mwaiguta” kandi “ey’erukuhwaho.” Kandi akabagambira ngu “mukolerre ebyokulya ebirukwikaraho ebireeta obwomeezi obutahwaho.” (Yoh. 6:​26, 27) Yesu akabagambira ngu Ise akaba naija kubaha ebyokulya nk’ebi. w24.12 5 ¶8-9

Ow’oruganda, kusobora kuba mwegesa omurungi, eby’orukwegesa n’obuhabuzi obu orukuha bisemeriire kusigikirra ha Kigambo kya Ruhanga. Kusobora kukora eki, osemeriire kuba oli musomi murungi wa Baibuli hamu n’ebitabu byaitu ebirukusigikirra ha Baibuli. (Nfu. 15:28) Obu oraaba nooyesomesa, rora omulingo ebitabu byaitu bisoborra enkarra za Baibuli nukwo osobole kuzisoborra omu mulingo oguhikire. Obu oraaba nooyegesa, lengaho kuhika ha mitima ey’abo abarukukuhuliiriza. Noosobora kwongera ha bukugu bwawe obw’okwegesa, kakuba osaba abagurusi abamazire akasumi nibaheereza kukuha amagezi kandi okagagenderaho. (1 Tim. 5:17) Abagurusi basemeriire kuba nibasobora kugarramu amaani ab’oruganda na banyaanya itwe; baitu obwire obumu basemeriire kuha ab’oruganda na banyaanya itwe obuhabuzi rundi kubahana. Kandi ebintu binu byona abagurusi basemeriire kubikora omu mulingo ogw’embabazi. Kakuba oyoleka okugonza kandi okwegesa kwawe kukasigikirra ha Kigambo kya Ruhanga, noija kuba omwegesa omurungi habw’okuba noija kuba noohondera ekyokurorraho eky’Omwegesa Omukuru Yesu.—Mat. 11:​28-30; 2 Tim. 2:24. w24.11 24 ¶16

Nitusobora kuha Yahwe ekitiinisa kuraba omu bintu ebi tumubazaaho. Abantu ba Yahwe nibaraalizibwa ‘kuzinira Yahwe,’ ‘kukugiza ibara lye,’ ‘kurangirra amakuru amarungi’ hamu ‘n’okutebeza ekitiinisa kye omu mahanga.’ (Zab. 96:​1-3) Enu yoona eri miringo ei tusobora kuhaisamu Isiitwe ow’omu iguru ekitiinisa kuraba omu mbaza yaitu. (Ebik. 4:29) Ekindi, nitusobora kukozesa ebintu byaitu kuha Yahwe ekitiinisa. Abaheereza ba Yahwe ab’amananu baikaire nibaha Yahwe ekitiinisa omu mulingo ogu. (Nfu. 3:9) Ekyokurorraho, Abaisaleeri bakahayo ebintu byabo kusobora kwombeka n’okudaabiriza yekaru. (2 Bakam. 12:​4, 5; 1 Byom. 29:​3-9) Abeegeswa ba Kristo bakamuheereza hamu n’abakwenda be “nibakozesa ebintu byabo.” (Luk. 8:​1-3) Abakristaayo ab’omu kyasa eky’okubanza na bo bakahayo kusobora kusagika Abakristaayo bagenzi baabo. (Ebik. 11:​27-29) Kasumi kanu, na itwe nitusobora kuha Yahwe ekitiinisa kuraba omu kuhayo twegondiize. w25.01 4 ¶8; 5 ¶11

Kiki ekyakoonyiire Koroneeriyo kubatizibwa? Baibuli eyoleka ngu uwe “hamu n’ab’omu nju ye boona bakaba nibatiina Ruhanga.” Kandi Koroneeriyo yaikaraga naasaba Ruhanga. (Ebik. 10:2) Petero obu yatebiize Koroneeriyo amakuru amarungi, uwe hamu n’eka ye, bakaikiriza Yesu kandi baabatizibwa ahonaaho. (Ebik. 10:​47, 48) Hataroho kugurukyagurukya, Koroneeriyo akaba ayeheeriireyo kimu kukora empindahinduka zoona ezirukwetaagisa nukwo uwe hamu n’eka ye basobole kuramiza hamu Yahwe. (Yos. 24:15; Ebik. 10:​24, 33) Kusisanaho na Saulo, Koroneeriyo na uwe akaba naasobora kwikiriza obujunanizibwa bwe kumulemesa kufooka Omukristaayo. Baitu eki atakiikirize kubaho. Kwikiriza amananu omu bwomeezi bwawe nikikwetaagisa kukora empindahinduka ez’amaani? Obu kiraaba nukwo kiri, Yahwe naija kukukoonyera. Naija kukuha emigisa obu oraacwamu kuta omu nkora emisingi ya Baibuli kusobora kumuheereza. w25.03 5 ¶12-13

Obu oraahurra ebintu ebitahikire ebirukukwata ha kitebe kya Yahwe rundi h’ab’oruganda abarukwebembera, ijuka omulingo abanyanzigwa ba Ruhanga baatwaizeemu Yesu n’abahondezi be ab’omu kyasa eky’okubanza. Nkooku Baibuli yarangire, abantu ba Yahwe nibahiiganizibwa kasumi kanu. (Mat. 5:​11, 12) Kakuba tumanya nambere ebisuba ebi batubazaaho biruga, nitwija kubyetantara. Nitusobora tuta kubyetantara? Kuraba omu kwetantara eganikyo z’ebisuba. Omukwenda Paulo akooleka eki tusemeriire kukora kakuba tuhurra ebisuba. Akagambira Timoseo “kuragira abamu kuteegesa enyegesa ez’ebisuba. . . noobu kwakuba kuta omutima ha nganikyo ez’ebisuba” kandi bange “enganikyo ez’ebisuba ezitarukugasa.” (1 Tim. 1:​3, 4) Twetantara ebisuba ebi batubazaaho habwokuba nitumanya endugirro yabyo. Oihireho, tuhuliiriza ‘ebigambo ebirungi’ eby’amananu.—2 Tim. 1:13. w24.04 11 ¶16; 13 ¶17

Ikara oli omu bumu n’abo abanyakuli beesigwa hali Yahwe. Ruhanga naagonza tumuramye tuli omu bumu. Nitwija kwikara omu bumu kakuba tukwatira kimu amananu. Omuntu weena ow’ararangya obutumwa obutarukuhikaana n’amananu aleetaho okwebaganizaamu omu kitebe. Nahabweki, Ruhanga naatuteererra ‘kubeetantara.’ Kitali eki, na itwe nitusobora kuhuguka tukaruga omu mananu. (Bar. 16:17) Obu turamanyirra amananu kandi tukagakwatira kimu, nitwija kutunga enkoragana enungi na Yahwe kandi okwikiriza kwaitu nikwija kuguma. (Bef. 4:​15, 16) Titurukwija kuhabisibwa ebisuba bya Sitaani, kandi nitwija kwikara twine obulinzi hansi y’oburoleerezi bwa Yahwe omu kasumi ak’omuhito omwingi. Ikara okwatiire kimu amananu, “kandi Ruhanga ow’obusinge aliba na inywe.”—Baf. 4:​8, 9. w24.07 13 ¶16-17

Yesu akata omutima ha kukoonyera abantu abaayehurraga kubi habw’okuba basiisi kandi yabaraaliza kufooka bahondezi be. Akaba akimanyire kurungi ngu ensonga enkuru ey’ereetera abantu okubonabona nikyo ekibi. Nahabweki, akakoonyera abasaija n’abakazi abakaba bamanyirwe nk’abasiisi. Obu naakozesa ekyokurorraho, akasoborra ati: “Abomeezi tibetaaga dakitaali, baitu abarwaire nubo bamwetaaga.” Akongeraho ati: “Ntaije kweta abantu abahikiriire, baitu abasiisi.” (Mat. 9:​12, 13) Kandi eki nikyo Yesu yakozere. Akabaliza omukazi ayanabiisize ebigere bye n’amaziga omu mulingo gw’embabazi kandi yamuganyira ebibi bye. (Luk. 7:​37-50) Yesu akeegesa omukazi Omusamaliya amananu noobu kiraaba ngu akaba akimanyire ngu naikara n’omusaija ow’akaba atagaisirwe na uwe. (Yoh. 4:​7, 17-19, 25, 26) Ekindi, Ruhanga akaha Yesu amaani kwihaho ekintu ekyaleeserweho ekibi kandi oku nukwo okufa. Omu mulingo ki? Yesu akahumbuura abantu;abasaija n’abakazi, abato n’abakuru.—Mat. 11:5. w24.08 4 ¶9-10

Yahwe naija kuhaisa ata ibara lye ekitiinisa omu kasumi ak’omumaiso? Kuraba omu kuleetaho obwinganiza. Omu kasumi akatali ka hara, naija kuhwerekereza Baburoni Orukuru habw’okusiiga ibara lye erirukwera enziro. (Kus. 17:​5, 16; 19:​1, 2) Bamu h’abantu abalirora okuhwerekerra kwa Baburoni Orukuru, nibasobora kutweteeranizaaho omu kuramya okw’amananu. Ha kumalirra, omu bulemu bwa Haramagedoni, Yahwe naija kuhwerekereza Sitaani n’abantu be obu naamarraho kimu abo boona abamuhakaniza kandi abajumisa ibara lye. Baitu naija kujuna abo boona abamugonza kandi bakamworobera, hamu n’abo abagonza kumuhaisa ekitiinisa. (Mar. 8:38; 2 Bas. 1:​6-10) Hanyuma y’ekirengo eky’okumalirra ekiraabaho hanyuma y’Obulemi bwa Kristo obw’Emyaka Rukumi, Yahwe naija kuba ayeriize kimu ibara lye. (Kus. 20:​7-10) Omu kasumi ako, “ensi eriijura okumanya okwekitinisa kya [Yahwe], nkamaizi okugasweka enyanja.” (Hab. 2:14) Mali ka nikiija kutusemeza muno buli omu weena ow’ali mwomeezi obu aliba naaha Yahwe ekitiinisa ekisemeriire ibara lye! w25.01 7 ¶15-16

Kiki ekyakukoonyiire Abakristaayo Abaheburaniya kugumira okuhakanizibwa oku bakaba nibarabamu? Omukwenda Paulo akaba akimanyire ngu bakaba basemeriire kurora okulengwa kwabo omu mulingo oguhikire. Egi niyo nsonga habwaki yasoboroire ngu, Abakristaayo obu bahikwaho ekirengo, Ruhanga naasobora kukikozesa kubatendeka. Okutendekwa nkooku nikusobora kukoonyera Omukristaayo kukurakuraniza emiringo ey’erukusemeza Yahwe. Kuraba omu kuta omutima ha byakurugire omu birengo ebi bakaba nibarabamu, Abakristaayo Abaheburaniya kyakubanguhiire kugumiisiriza. (Baheb. 12:11) Paulo akateererra Abakristaayo Abaheburaniya kutajwaha omu kugumira ebirengo. Omukwenda Paulo nuwe akaba ahikire kubaha obuhabuzi oburukukwata ha kugumira okuhiiganizibwa. Obu akaba atakafookere Omukristaayo, akahiiganiza Abakristaayo kandi akaba naamanya ebi bakaba nibarabamu. Ekindi, akaba amanyire omulingo ogw’okugumira okuhiiganizibwa, habwokuba akaba ahikirweho okuhakanizibwa okurukwahukana hanyuma y’okufooka Omukristaayo.—2 Kol. 11:​23-25. w24.09 12-13 ¶16-17

Buli kiro ekirabaho, omulimo gw’okutebeza nigweyongera kuba mukuru muno. Habwaki? Habwokuba obwire buliyo nibuhwayo. Wetegereze Yesu eki yagambire ha mulimo gw’okutebeza omu biro ebya ha mpero, nkooku kirukwolekwa omu Marako 13:10. Kusigikirra ha njiri ya Matayo, Yesu akagamba ngu amakuru amarungi gaakutebeziibwe omu nsi yoona ‘empero’ etakahikire. (Mat. 24:14) Ebigambo ebi nibibazaaho akasumi ensi ya Sitaani obwerihwerekerra. Yahwe ataireho ‘ekiro n’esaaha’ ebintu binu obubirihikirra. (Mat. 24:36; Ebik. 1:7) Kandi buli kiro ekirabaho, tweyongera kwirra haihi n’akasumi ako. (Bar. 13:11) Baitu akasumi ako nkooku katakahikire, tusemeriire kugumizaamu nitutebeza kuhikya empero obu erihika. Obu turaaba nitwecumiitirizaaho obuheereza bwaitu, tusemeriire kwekaguza ekikaguzo kinu; Habwaki tutebeza amakuru amarungi? EKy’okugarukamu kiri ngu, okugonza nukwo kutwekambisa kutebeza. Ebi tukora obu tuba tuli omu mulimo ogw’okutebeza byoleka okugonza oku twiniire amakuru amarungi, okugonza oku twiniire abantu, kandi ekirukukirayo obukuru, byoleka okugonza oku twiniire Yahwe hamu n’ibara lye. w24.05 14-15 ¶2-3

Abazaire, mwekambise abaana banyu kwecumiitirizaaho ebintu Yahwe yahangire. Obu muraaba nimurubatarubata rundi muli omu musiri, koonyera omwana waawe kurora emiringo erukwahukana ebyahangirwe birukuzookamu. Habwaki? Habwokuba emiringo birukuzookamu eyoleka ngu ayabihangire w’amagezi. Ekyokurorraho, ebyahangirwe bingi bikozerwe omu mulingo ogw’ezingire, kandi abanyasayansi basomereho muno okwezinga kunu. Omunyasayansi ow’arukukwetwa Nicola Fameli naasoborra ngu kakuba obara emirundi ebyahangirwe ebirukwahukana by’ezingiremu, noosanga ngu emirundi egi niizirrahongana. Emirundi enu n’eyetwa Fibonacci sequence. Okwezinga kunu nikusobora kurorwa omu bintu bingi nk’ebikonjonjo, ebiju by’ebitindinda, amababi g’ebimera hamu n’amacande. w24.12 16 ¶7

Musa, Daudi, hamu na Yohana bakaba nibaikara omu busumi hamu n’enyikara ezirukwahukana n’ezaitu. Baitu kandi haroho bingi ebiturukusisaniza na bo. Bakaheereza Ruhanga ow’amananu kandi na itwe nuwe turukuheereza. Kusisanaho na bo, tusaba Yahwe, tumwesiga kandi nuwe tuhikirra kutuha obuhabuzi. Kandi kusisanaho n’abasaija abo aba kara, nitukigumya ngu Yahwe naija kuha emigisa abo boona abamworobera. Nahabweki, leka tucweremu kimu kwikara nituta omu nkora ebigambo eby’okumalirra eby’abasaija abo abakaba bakuzire omu myaka obu nitworobera ebiragiro bya Yahwe. Obu nubwo turaatunga obusinguzi bwonyini omu byona ebi turaaba nitukora. Nitwija kutunga obwomeezi ‘tugumeho ebiro bingi.’ Kandi nitwija kutunga okusemererwa okuruga omu kusemeza Isiitwe ow’omu iguru ow’okugonza ow’ahikiriza emirago ye omu miringo ey’erukuhuniriza muno.—Bef. 3:20. w24.11 13 ¶20-21

Omu kyasa eky’okubanza, ab’oruganda abamu bakakomwa kuheereza nk’abaheereza. (1 Tim. 3:8) Nikisobora kuba ngu nubo baakoraga emirimo ‘ey’okukonyera’ omukwenda Paulo ei yahandiikireho. Nahabweki nikizooka ngu abaheereza baakoraga emirimo nyingi enkuru nukwo abagurusi basobole kuta omutima ha kwegesa n’okugarramu amaani ab’oruganda na banyaanya itwe. Ekyokurorraho, abaheereza nibasobora kuba baakonyeraga omu kukopoora Ebyahandiikirwe rundi nibasobora kuba baaguraga ebintu eby’okukozesa kukoporra Ebyahandiikirwe. Teekerezaaho emu ha miringo abaheereza bakonyera omu kitebe kyawe. (1 Pet. 4:10) Nibasobora kuheebwa obujunanizibwa obwokukora ha mbalirra y’ekitebe, ha bikaro by’okutebezaamu, kusaba ebitabu n’okubiha abatebezi, kukora ha byoma bya vidiyo n’amaraka, kutangirra abagenyi, rundi kukonyera omu kudabiriza Ekyombeko ky’Obukama. Emirimo enu yoona neeyetaagisa kurora ekitebe kyaikara kiteekaniziibwe kurungi.—1 Kol. 14:40. w24.10 19 ¶4-5

Nitwija kusobora kugumira buli kirengo kyona ka kibe ky’amaani rundi kitaito, kakuba twijuka ngu Yahwe ali mwomeezi kandi aikara ayeteekaniize kutukoonyera. Ali Ruhanga ow’Obusobozi bwona kandi naasobora kutukoonyera kugumira ebizibu. Kinu kitukoonyera kuguma obu tuhikwaho ebirengo. Obu turora omulingo Yahwe atusagikamu obu tuba nituraba omu birengo ebitaito kitukigumya ngu naija kutusagika noobu turaaba nituraba omu birengo eby’amaani. Teekerezaaho ebintu bibiri Omukama Daudi ebi yarabiremu ebyayongiire kugumya obwesige bwe omuli Yahwe. Omu myaka ye ey’obuto obu akaba akyali muliisa, emirundi erikwahukana edubu n’entale bikaija kulya entaama za ise. Omu mirundi egi yoona, n’obumanzi Daudi akabihambya kandi yajuna entaama za ise. Baitu nabwo Daudi atateekereze ngu eki akakikora habw’amaani ge. Akaba akimanyire ngu Yahwe nuwe akaba amuhaire amaani ag’okubisingura. (1 Sam. 17:​34-37) Daudi obu yayecumiitirizeeho ebintu binu akakigumya ngu Ruhanga omwomeezi akaba naija kumuha amaani omu kasumi ak’omumaiso. w24.06 21 ¶5-6

Ekyokurorraho, teeramu akasisani oraaliziibwe kugenda ha bugenyi. Osemeriire kugendayo? Obu oraaba otarukumanya kurungi mukama w’obugenyi rundi enteekaniza ezikozerwe, nikiija kukwetagisa kumukaguza ebikaguzo nka: “Obugenyi nibwija kuba nkaha kandi buraabaho di? Bantu baingaha abarukwija kubaho? Nooha ow’arukwija kwebembera enteekaniza? Nibaha abaraabaho? Bintu ki ebirukwija kukorwa? Haraabayo amaarwa?” Ebyokugarukamu eby’ebikaguzo binu nibiija kukukoonyera kukora encwamu ey’amagezi. Ekindi, hanyuma y’okumanya mananu, weetegereze kurungi enyikara yoona. Ekyokurorraho, kakuba okimanya ngu nihaija kubayo abantu abatatamu emisingi ya Baibuli ekitiinisa rundi ngu nihaija kubayo kunywa amaarwa hataroho omuntu ow’arukurora abantu obu baraaba nibanywa muno? Noorora ngu obugenyi bunu nibusobora kubamu abantu abarukunywa muno amaarwa hamu n’engeso embi ez’obusiihani? (1 Pet. 4:3) Obu oraateekerezaaho amananu goona agarukukwata ha nyikara enu, nikiija kukwanguhira kukora encwamu ey’amagezi. w25.01 15 ¶4-5

Yahwe akozesa ebyokurorraho ebirukwoleka ngu kuraba omu kicunguro, ayogyaho abasiisi abeegarukamu ebibi byabo. Kigumire muno kwihaho ebitonyezi ebirukutukura ha rugoye. Baitu, kuraba omu kyokurorraho kinu Yahwe naatugumya ngu naasobora kutwogyaho ebibi byaitu byona bikahwaho kuhika ha rulengo ngu tibikyasobora kurorwa. Ebibi nibirengesanizibwa ‘n’amabanja.’ (Mat. 6:12; Luk. 11:4) Nahabweki, buli murundi tusiisira Yahwe, ibanja lyaitu lisisana nk’erirukweyongera obukooto. Naatubanja ibanja ery’amaani. Baitu Yahwe obu atuganyira kisisana oti rundi asalizeemu ibanja eri. Tarukutwetaagisa kusasura ibanja eri atuganyiire. Mali kinu kyokurorraho ekirukusoborra okuhuumura oku tutunga Yahwe obu atuganyira! w25.02 9-10 ¶9-10

Ky’amananu ngu abazaire abamu beetaaga obukoonyezi obu baba nibakura omu myaka, kandi abaana baingi kibasemeza kubakoonyera. (1 Tim. 5:4) Baitu abazaire Abakristaayo bakyetegereza ngu okusemererwa okw’amaani kuruga omu kukoonyera abaana baabo kufooka baheereza ba Yahwe hatali kubakuza n’ekigendererwa eky’okubasagika omu by’entaahya. (3 Yoh. 4) Kuraba omu kyokurorraho kyawe, yegesa abaana baawe kwesiga Yahwe obu oraaba noobakoonyera kwerolerra. Kurugira kimu omu buto bwabo, booleke omugaso ogw’okukora n’amaani. (Nfu. 29:21; Bef. 4:28) Obu baraaba nibakura, bakoonyere kwekamba ha isomero. Abazaire Abakristaayo, bakora kyona eki barukusobora kukora okuseruliiriza nukwo batunge emisingi ya Baibuli ey’eraakoonyera abaana baabo kukora encwamu enungi obukirukuhika ha bwegese obu baraatunga. Kinu nikiija kibakoonyera kwehikyaho ebyetaago byabo n’okwejumbira omu buheereza obw’Ekikristaayo omu bwijwire. w25.03 30-31 ¶15-16

Omu Isaaya esuura 65, Yahwe akabazaaho obwomeezi abo abarukwikara omu rugonjo orw’eby’omwoyo obu baakwegondizeemu. Obunabbi bunu bukabanza kuhikirra omu mwaka 537 Y.A. Omu kasumi ako, Abayudaaya abakaba bali omu bunyagwa bakalekerwa kandi baagaruka Yerusalemu. Yahwe akaha abantu be omugisa kandi yabakoonyera kwongera kusemeza orubuga n’okwongera kwombeka yekaru nambere baaramizaaga. (Is. 51:11; Zak. 8:3) Obunabbi bwa Isaya bukongera bwahikirra omurundi gwa kabiri omu 1919 Y.A.K. abaheereza ba Yahwe obu baalekiirwe kuruga omu Baburoni. Hanyuma, orugonjo orw’eby’omwoyo rukatandika kugaliha omu nsi yoona. Abatebezi abeekambi bakatandikaho ebitebe bingi kandi baakurakuraniza emiringo enungi. Abasaija n’abakazi abakaba nibagonza ebikorwa eby’okurwana n’eby’obusiihani bakajwara “omuntu omuhyaka ayahangirwe kusigikirra ha kugonza kwa Ruhanga omu kuhikirra.” w24.04 20-21 ¶3-4

Omu bicweka ebimu, abazaire rundi abantu abakuzire nubo baserurra abanyabuzaale baabo abatali omu buswere omuntu ou barataaha na uwe obuswere. Baitu omu bicweka ebindi, abanywani rundi abanyabuzaale baserurra abo abatakatahire obuswere kandi bakorra abantu abo enteekaniza ez’okutangatangana kurora obu baraaba basemeriirengana. Kakuba osabwa kukoonyera abantu kujumbirangana rundi kutaaha obuswere, teekerezaaho ebyetaago bya buli muntu. Obu oraaba noorora ngu naasobora kuba ahikire kutaaha na uwe obuswere lengaho kumanya omuntu ogu kurungi nk’emiringo ye, kandi ekirukukirayo obukuru obu araaba aine enkoragana enungi na Yahwe. Kuba n’enkoragana enungi na Yahwe nikyo kirukukirayo obukuru kukira kuba na sente, obwegese, rundi ebitiinisa. Baitu kiijuke ngu ow’oruganda rundi munyaanya itwe asemeriire kwecweramu obu araaba naagonza kutaaha obuswere. w24.05 23 ¶11

Nitusobora kukoonyera abajumbiirengana kuraba omu kumanya ebi tusemeriire kubaza n’ebi tutasemeriire kubaza. Kandi obwire obumu nikisobora kutwetaagisa kwetanga. (Nfu. 12:18) Ekyokurorraho, nitusobora kuba twine ekihika eky’okugambira abandi ngu abantu banu batandikire kujumbirangana, baitu ijuka ngu abajumbiirengana nibasobora kuba nibagonza kubeegambirra bonka. Baitu titusemeriire kurarangya ebirukukwata h’abajumbiirengana rundi kubacwera omusango ha nsonga ezirukukwata ha bwomeezi bwabo. (Nfu. 20:19; Bar. 14:10; 1 Bas. 4:11) Ekindi, titusemeriire kubaza ebintu rundi kubakaguza ebikaguzo ebiraabaleetera kusindikirizibwa kutaaha obuswere. Kiki eki tusemeriire kukora kakuba abajumbiirengana bacwamu kuleka kujumbirangana? Tusemeriire kwetantara kwetaahya omu nsonga zaabo. (1 Pet. 4:15) Kucwamu kuleka kujumbirangana tikirukumanyisa ngu abaali bajumbiirengana bakakora encwamu embi. Eki kyoleka ngu ekigendererwa ky’okujumbirangana kikahikirra kandi kikakoonyera abajumbiirengana kukora encwamu enungi. Baitu nabwo encwamu egi neesobora kuba yabaleetiire kwehurra kubi. Nahabweki tusemeriire kuserra omulingo turaabakoonyeramu. w24.05 31 ¶15-16

Kimu ha birengo ebi kyakizireyo kutumaramu amaani nikyo omunyabuzaale rundi omunywani nfenanfe obu aleka kuheereza Yahwe. (Zab. 78:40) Omuntu ou turukugonza muno obu aleka kuheereza Yahwe, kitugumira muno kwikiriza enyikara egi. Obu oraaba wahikirweho enyikara nk’egi erukusaaliza, ekyokurorraho kya Zadoki eky’obwesigwa nikisobora kukugarramu amaani. Akacwamu kusigara ali mwesigwa hali Yahwe, munywani we nfenanfe Abyasara obu yalekere kuba mwesigwa. Kinu kikabaho Omukama Daudi obu akaba akuzire omu myaka kandi ali haihi kufa, mutabani we Adoniya akalengaho kwefoora omukama noobu kiraaba ngu Yahwe akaba naagonza Suleimani nuwe afooke omukama. (1 Byom. 22:​9, 10) Abyasara akacwamu kusagika Adoniya. (1 Bakam. 1:​5-8) Omu kukora eki, Abyasara atabe mwesigwa hali Daudi na Zadoki kyonka, baitu atabe mwesigwa na hali Yahwe. Zadoki na Abyasara bakaba bamazire emyaka nyingi nibaheereza hamu nk’abanyakatagara.—2 Sam. 8:17;15:29; 19:​11-14. w24.07 6 ¶14-15

Nitusobora kukigumya ngu amaani tutamu kwerinda ekyohyo tigafa busa. Obu tusiisa, nitusobora kutunga “kusemererwa okw’ekibi, habw’akacu kake” baitu kakuba tutwaza obwomeezi bwaitu omu mulingo Yahwe arukugonza, nitwija kutunga okusemererwa kwingi muno. (Baheb. 11:25; Zab. 19:8) Eki kiri kiti habwokuba tukahangwa kutwaza obwomeezi bwaitu omu mulingo ogurukusigikirra ha ndengo ze. (Kub. 1:27) Obu turaakikora, nitwija kutunga omuntu ow’omunda omurungi, kandi akasumi nikaija kuhika tutunge n’omugisa ogw’okwomeera ebiro n’ebiro. (1 Tim. 6:12; 2 Tim. 1:3; Yud 20, 21) Ky’amananu ngu, ‘omubiri muceke.’ (Mat. 26:41)Baitu kinu tikirukumanyisa ngu titwine bukoonyezi. Yahwe aikara ayeteekaniize kutuha amaani agaturukwetaaga. (2 Kol. 4:7) Baitu ijuka ngu, amaani amaingi muno nugo Ruhanga atuha. Baitu tusemeriire kubanza kutamu amaani agaitu kurwanisa ekyohyo. Yahwe naija kugarukamu esaara zaitu ez’okutwongera amaani obu turukuba nitugeetaaga. (1 Kol. 10:13) Ego, n’obukoonyezi bwa Yahwe, nitusobora kwikara niturwanisa ekyohyo. w24.07 19 ¶19-21

Omukwenda Paulo akahandiikira Timoseo omugurusi mugenzi we ebigambo by’ekyahandiikirwe kya kiro kinu, obu naamusoborra omulingo asemeriire kukwatamu “abakora ebibi.” Paulo akaba naamanyisa ngu abasiisi basemeriire kuhanwa omu maiso g’ekitebe kyona? Nangwa. Oihireho, akaba naamanyisa abake abasobora kuba bamanyire ekibi omuntu eki yakozere. Nibasobora kuba abo abaamurozere naakora ekibi, rundi uwe wenyini abayagambiire. Omu mulingo ogw’amagezi, abagurusi nibaija kubamanyisa ngu ensonga ekakorwaho, kandi n’omusiisi yakoonyerwa. Omu nyikara ezimu, baingi omu kitebe nibasobora kuba nibamanya ekibi omuntu eki akozere rundi nibaija kukimanya omu kasumi ak’omumaiso. Omu nyikara nk’ezi, “omu maiso g’abantu boona” nikisobora kumanyisa ekitebe kyona. Nahabweki, omugurusi naija kuranga omu kitebe ngu ow’oruganda rundi munyaanya itwe ahanirwe. Habwaki? Paulo agarukamu ati: “Nukwo abandi na bo barorreho” nukwo batakora ekibi eky’amaani. w24.08 23-24 ¶16-17

Tusemeriire kwikara twine bingi eby’okukora omu buheereza bwaitu hali Yahwe kuhikira kimu ha mpero. Abaseeserweho amagita basemeriire kwikara bali bulindaara obu baraaba bali ‘b’okutwarwa’ Yesu nukwo batunge empeera yabo ey’omu iguru. (Mat. 24:40) Balindiriire n’ekihika akasumi ‘akokusoroozebwa’ kugenda hali Yesu omu iguru. Hanyuma y’obulemu bw’Amagedoni, nibaija kufooka omugole wa Yesu omu bugole bw’omwana gw’Entaama. (2 Bas. 2:1) Noobu kiraaba ngu akasumi ka Yesu ak’okucweramu omusango kali haihi kuhika, tikirukutwetaagisa kweraliikirra. Obu turaikara tuli beesigwa, Isiitwe ow’omu iguru ow’okugonza, naija kutuha “amaani agarukukira ha ga buli kiro” nukwo tusobole “kwemerra omu maiso g’Omwana w’omuntu.” (2 Kol. 4:7; Luk. 21:36) Okunihira kwaitu ka kube okw’okugenda omu iguru rundi kw’okwikara omu nsi, nitwija kusemeza Isiitwe obu turaahondera okuteerererwa okurukusangwa omu byokurorraho bya Yesu. Habw’embabazi za Yahwe enyingi muno amabara gaitu nigaija kuba “gahandiikirwe omu kitabu” eky’obwomeezi.—Dan. 12:1; Kus. 3:5. w24.09 24-25 ¶19-20

Kusisanaho n’omuhandiiki wa zabuli, na iwe noosobora kusingura enyehurra embi obu nookonyerwa Ekigambo kya Ruhanga. Omu mulingo ki? Ijuka ebintu ebirungi obi oine otwaliiremu n’emigisa ey’otunga kuruga hali Yahwe, kandi ogirengesanize n’ebirugamu hali abo abatarukuheereza Yahwe kandi abataine bukonyezi bwe. Nibasobora kwesigira kimu ebintu ebibakozere omu nsi enu habwokuba tibaine okunihira okw’obusumi obw’omumaiso. Baitu iwe, Yahwe naakuraganiza kukuha emigisa nyingi muno omu kasumi ak’omumaiso kukira nkooku orukunihira. (Zab. 145:16) Ekindi, teekerezaaho kinu: Mali nitusobora kumanya omulingo obwomeezi bwaitu bwakubaire kakuba twakozere encwamu ezindi? Baitu haroho ekintu kimu eki turukugumya: Abo abakora encwamu nibasigikirra ha kugonza oku bainiire Ruhanga n’omutaahi, baikara baine ebintu ebibaleetera okusemererwa omu bwomeezi. w24.10 27 ¶12-13