Apuli

Kusobora kugasirwa omu mubiri n’esagama ya Yesu, tusemeriire kwikiririza omu kicunguro. (Bef. 1:7) Abo Yesu aba yabalizeeho ‘nk’entaama ezindi’ tibasemeriire kulya omugaati kandi bakanywa ha viini ha mukoro ogw’Ekiihuro Kya Mukama Waitu ogubaho buli mwaka. (Yoh. 10:16) Baitu, nabo nibagasirwa omu mubiri n’esagama ya Yesu Kristo. Eki nibakikora kuraba omu kwikiririza omu kicunguro kya Yesu Kristo. (Yoh. 6:53) Kwahukanaho, abo abasemeriire kulya ha mugaati kandi bakanywa ha viini, booleka ngu batairwe omu kiragaano ekihyaka nk’abagwetwa b’Obukama bwa Ruhanga obw’omu iguru. Nahabweki, kakuba tuba tuseeserweho amagita rundi tuli ab’entaama ezindi, tusemeriire kwoleka okwikiriza kusobora kutunga obwomeezi obutahwaho. w24.12 13 ¶14, 16

Ha mukoro gw’Ekiihuro kya Mukama Waitu Ekya Rwebagyo, Yesu akaha abakwenda be omugaati ogutatumbisiibwe kandi yabagambira ngu gukaba nigukiikirra omubiri gwe. Hanyuma akabaha eviini kandi yagamba ngu ekaba n’ekiikirra ‘esagama ye ey’ekiragaano.’ (Mar. 14:​22-25; Luk. 22:20; 1 Kol. 11:24) Ekiragaano ekihyaka nikitwarramu ‘enju ya Isaleeri ey’eby’omwoyo’ abaliba ‘omu Bukama bwa Ruhanga.’ (Baheb. 8:​6, 10; 9:15) Ha mukoro gw’Ekiihuro kya Mukama Waitu Ekya Rwebagyo, Yesu akata omutima ha “igana erike.” Guruupu egi ekatandika n’abakwenda be abeesigwa abakaba bali na uwe omu kisiika. Kandi banu nubo barukwija kuba na Yesu omu iguru. w24.12 11 ¶9-10

Yesu akagobezebwa, yakwatwa, yajumwa, kandi yabonabonesebwa. Abaserikale bakamutwara nambere akaba naagenda kwitirwa kandi baamuterra emisumaali ha muti . Obu akaba naagumira obusaasi obu bwona, haroho omuntu ondi ayahuliire obusaasi oburukukiraho. Omuntu ogu ni Yahwe. Akanga kukozesa amaani ge amaingi kutangira Omwana we kubonabona. Habwaki? Habwokuba naatugonza muno. Ekihongwa kya Yesu, kali kokurorraho akarukwoleka omulingo Yahwe akugonza muno. Akahika na ha rulengo orw’okwehikyaho obusaasi obw’amaani muno kusobora kukujuna kuruga omu kibi n’okufa. (1 Yoh. 4:​9, 10) Mali, naagonza kukoonyera buli omu hali itwe kurwanisa ekibi n’okukisingura! w24.08 6 ¶13-14

Nitusobora kwetegereza kurungi omulingo Yahwe atugonza kakuba tuteekerezaaho omulingo kyamusaaliize kurora Omwana we naabonabona. Sitaani agamba ngu busaho omuheereza wa Ruhanga ow’asobora kwikara ali mwesigwa hali Ruhanga obu kiba kigumire kukikora. Kusobora kwoleka ngu eki tikihikire, Yahwe akaikiriza Yesu kubonabona atakafiire. (Yob. 2:​1-5) Yahwe akaba naarora abantu obu bakaba nibasekeereza Yesu, abaserikale nibamuteera, noobu akaba naahanikwa ha muti. Kandi hanyuma, Yahwe akarora Omwana we omugonzebwa naafa omu mulingo ogw’obusaasi. (Mat. 27:​28-31, 39) Yahwe akaba aine amaani ag’okutangira Yesu kuhikwaho ebintu binu byona. (Mat. 27:​42, 43) Baitu kakuba yakikozere, ekicunguro tikyakusaswirwe, kandi twakusigaire tutaine okunihira. Nahabweki, Yahwe akaikiriza Omwana we kubonabona kuhikya obu yafiire. w25.01 22 ¶7

Kiri kiro kya Nisani 16, 33 Y.A.K. abeegeswa ba Yesu nibaganya kandi batiinire. Babiri hali bo baruga Yerusalemu bagenda Emau. Omusaija abeteranizaaho kandi arubata na bo. Abegeswa bamugambira ebintu ebibi ebihikire hali Yesu kandi ebibamaziremu amaani. Omusaija atandika kubagambira ebigambo ebi batalyebwa. “Kutandikira hali Musa na banabbi boona,” yabasoborra habwaki Masiya akaba asemeriire kubonabonesebwa kandi aitwe. Abasaija banu basatu obu baahikire Emau, omusaija ogu ou batamanyire abagambira ngu nuwe Yesu ow’ahuhumbuukire (Luk. 24:​13-35) Yesu akeyoleka abegeswa be emirundi nyingi omu biro 40 eby’okumalirra omu nsi. Yesu akagarramu amaani abegeswa be abakaba bahoirwemu amaani kandi batiinire. Bakasemererwa kandi baatunga amaani ag’okugumizaamu nibatebeza n’okwegesa abandi ha Bukama. w24.10 12 ¶1-3

Obu tuba tukyali bato, twesanga tukuzire kitatwetaagisize kutamu amaani, baitu kukura omu by’omwoyo tusemeriire kutamu amaani. Ekyokurorraho, Abakristaayo omu Kolinso bakaikiriza amakuru amarungi, baabatizibwa, baatunga omwoyo ogurukwera, kandi baagasirwa omu buhabuzi omukwenda Paulo yabahaire. (Ebik. 18:​8-11) Baitu hanyuma y’emyaka kurabaho bamazire kubatizibwa, baingi bakaba bakyali bato omu by’omwoyo. (1 Kol. 3:2) Ekyokurorraho, kusobora kukura, tusemeriire kubanza kuba n’ekihika eky’okuba abantu abakuru. Abo ‘abeegomba kutaba n’amagezi’ bakagonza kwikara bali bato omu by’omwoyo, tibasobora kukurakurana. (Nfu. 1:22) Titurukugonza kuba nk’abantu abakuzire baitu abaikara nibagonza abazaire baabo kubakorra encwamu. Baitu nitugonza kuba bantu ab’obujunaanizibwa, tutemu amaani kukurakurana omu by’omwoyo. Obu oraaba nootamu amaani kufooka Omukristaayo ow’akuzire omu by’omwoyo, saba Yahwe akuhe ‘okugonza n’amaani ag’okukora,’ gakusobozese kukora ebi agonza.—Baf. 2:13. w24.04 4 ¶9-10

Obukirukuhika ha mulingo Yahwe acwa omusango, atukonyera kwetegereza omulingo ayehurra. (Ez. 33:11) Yahwe tasobora kwanguhiriza kuhwerekereza omuntu weena ebiro n’ebiro, rundi buli aine ensonga enungi ey’okukikora. Aine embabazi nyingi kandi azooleka obu kiba kisemeriire. Kiki eki tumanyire h’abantu abatarukwija kuhumbuuka? Baibuli ebazaaho ebyokurorraho bike. Yesu akooleka ngu Yuda Isikalyota tarukwija kuhumbuuka. (Mar. 14:21; Yoh. 17:12) Yuda akaba akimanyire ngu eki akaba naakora kyali kibi hali Yahwe n’Omwana We, baitu nabwo akagumizaamu yakikora. Omu mulingo nugwo gumu, Yesu akagamba ngu bamu ha beebembezi b’amadiini abaamuhakaniize bakaba batarukwija kuhumbuuka. (Mat. 23:33) Kandi omukwenda Paulo akagamba ngu abeecwireho ekitebe abatarukwegarukamu tibarukwija kuhumbuuka.—Baheb. 6:​4-8; 10:29. w24.05 4 ¶10-11

Obu twikara haihi na Yahwe, Sitaani tasobora kutuhikyaho akabi ak’ebiro n’ebiro. (1 Yoh. 3:8) Omu nsi empyaka, Yahwe tarukwija kugarukira ha kulinda banywani be hali akabi ak’eby’omwoyo kyonka, baitu na hali okufa. (Kus. 21:4) Mali guli mugisa gw’amaani kuba mugenyi omu heema ya Yahwe; kandi eki nikyo kuba n’enkoragana enungi na uwe ey’esobora kwikaraho ebiro n’ebiro. (Ez. 37:27) Tusemeriire kwetwaza tuta obu turaaba nitugonza kwikara tuli bagenyi be? Kakuba omuntu akuraaliza omu ka ye, waakugondeze kumanya ebintu ebi osemeriire kukora kumusemeza. Omu mulingo nugwo gumu, na itwe nitugonza kumanya Yahwe ebi arukwetaagisa abo abarukugonza kugumizaamu bali bagenyi be. Okugonza oku twiniire Yahwe kutuleetera kukora kyona ekirukusoboka kurora ngu twamusemeza omu bwijwire. (Bak. 1:10) Tusemeriire kwikara nitumutamu ekitiinisa, kandi tutarukwebwa ali muntu wa mulingo ki. Kumutamu ekitiinisa ekya mulingo ogu, nikiija kutukoonyera kwetantara kukora ekintu kyona ekisobora kumubiihiza. Hataroho kugurukyagurukya, nitugonza ‘kugendera omu buculeezi’ na Ruhanga waitu.—Mik. 6:8. w24.06 4 ¶8-9

Yahwe akasaba Iburahimu omusaija ow’okwikiriza okw’amaani, kukora ekintu ekikaba kigumire muno;kuhayo omwana we Isaka nk’ekihongwa. Eki nikisobora kuba kyatuntwize muno Iburahimu. Baitu nabwo, akoorobera Yahwe. Baitu ha kumalirra, Ruhanga akamutanga. Baitu nabwo, ekyokurorraho eki nikyegesa abantu boona ab’okwikiriza isomo erikuru muno kandi eri niryo ngu Yahwe akaba naija kuhayo Omwana we omugonzebwa nk’ekihongwa. Mali Yahwe naagonza muno abantu. (Kub. 22:​1-18) Hanyuma y’ebyasa kurabaho, Ruhanga akaha Abaisaleeri ebiragiro ebyabeetaagisaaga kuhayo ebihongwa by’ebisoro nukwo basobole kuganyirwa ebibi byabo. (Lev. 4:​27-29; 17:11) Ebihongwa ebi byakiikirraga ekihongwa ekikaba nikikirrayo kimu ekikaba nikiija kujunira kimu abantu kuruga omu kibi. Banabbi ba Ruhanga bakatereekerezebwa omwoyo ogurukwera kusoborra ngu oruzaaro orukaba ruraganiziibwe, ogu nuwe Omwana wa Ruhanga ow’embaganiza yaakubonabonesiibwe kandi aitwe kusobora kucungura abantu kuruga omu kibi n’okufa, otwaliiremu na iwe.—Is. 53:​1-12. w24.08 4 ¶7-8

Obu oraasoma Baibuli, kigumye ngu waserra emiringo ey’okuta omu nkora ebi orukusoma. Obu oraaba noosoma Ekigambo kya Ruhanga, weekaguze, ‘Ninsobora nta kuta omu nkora ebi ndukusoma hati rundi omu kasumi ak’omumaiso?’ Ekyokurorraho, tugambe oliyo noosoma 1 Abasesalonika 5:​17, 18. Hanyuma y’okusoma enkarra ezi ibiri, noosobora kwemerramu kandi okeekaguza, mirundi ingaha ei osaba kuruga ha mutima. Ekindi, noosobora kuteekerezaaho ebintu ebi orukusiimira Yahwe. Noosobora kucwamu kusiimaga Yahwe habw’ebintu bisatu buli kiro. Noobu oraamara edakiika nke nooteekerezaaho amasomo aga oyegere, nikiija kukukoonyera kuba muhuliizi kandi omukozi w’Ekigambo kya Ruhanga. Teekerezaaho omulingo oraagasirwa obu oraikara noohondera ekyokurorraho kinu, obu nooyesomesaaho ebicweka ebindi bya baibuli. Ego noija kukurakurana ofooke omukozi w’Ekigambo kya Ruhanga. w24.09 4-5 ¶9-10

Yahwe akatuhanga n’obusobozi obw’embaganiza. Noobu kiraaba ngu tutunga okusemererwa obu tuheebwa, tutunga okusemererwa okwingi obu tugabira abandi. Twehurra kurungi obu tusobora kukoonyera Abakristaayo bagenzi baitu. Kandi tusemererwa obu batusiima. Baitu ka babe nibasiima rundi nangwa, kitusemeza kukimanya ngu tukozere ekintu ekihikire. Otalyebwa ngu ekintu kyona eki ohayo, “[Yahwe] nasobora okukuha bingi muno” okukira eki ohaireyo. (2 Byom. 25:9) Nahabweki tosobora kuha abandi kukira Yahwe eki asobora kukuha! Kandi busaho kusemererwa kwona oku otunga okurukukira oku otunga obu osasurwa Yahwe. Leka itwena tucweremu kimu kugumizaamu nitwegera hali Isiitwe ow’omu iguru omugabi. w24.09 31 ¶20-21

Yahwe aine embabazi nyingi. (Zab. 103:13; Is. 49:15) Atusaalirirwa; obu tuhikwaho obusaasi, na uwe asaasa. (Zak. 2:8) Atukoonyera kumumanya n’okufooka banywani be. (Zab. 25:14; Ebik. 17:27) Kandi mwebundaazi; “anyakwebundaza wenka okurora ebyomu iguru nebyahansi . . . aimukya omuseege namuiha omu cucu.” (Zab. 113:​6, 7) Zinu nizo ensonga ezituleetera kugonza kuha Ruhanga waitu ekitiinisa. Tuha Yahwe ekitiinisa habwokuba nitugonza abandi bamumanye. Abantu baingi tibamanyire amananu agarukukwata hali Yahwe. Habwaki? Habwokuba Sitaani aigaire ebiteekerezo byabo kuraba omu kubazaaho Yahwe ebisuba. (2 Kol. 4:4) Sitaani aleetiire abantu kwikiriza ngu Yahwe ahorra enzigu, tafaayo, kandi ngu nuwe endugirro ey’okubonabona okuli omu nsi. Baitu itwe tumanyire amananu agarukukwata hali Ruhanga waitu! Twine omugisa ogw’okugambira abantu hali Ruhanga waitu omurungi n’okubakonyera na bo kumuha ekitiinisa.—Is. 43:10. w25.01 3 ¶6-7

Noobu kiraaba ngu Omwana wa Ruhanga Yesu akaba ahikiriire kandi akakora ebyamahano bingi, omu kyasa eky’okubanza, Sitaani akakozesa abantu abamu kubazaaho Yesu ebisuba. Ekyokurorraho, abeebembezi b’amadiini bakagambira abantu ngu amaani Yesu yakozesaaga kubinga emyoyo emibi gaarugaga hali ‘mukuru wa badaimooni.’ (Mar. 3:22) Yesu obw’akaba naacwerwa omusango, abeebembezi b’amadiini bakamujunaana ngu naajuma Ruhanga kandi baaragira abantu kusaba ngu aitwe. (Mat. 27:20) Hanyuma, abahondezi ba Kristo obu baali nibatebeza amakuru amarungi, abaali nibabahakaniza “baasoonasoona abantu ab’amahanga” nukwo bahiiganize Abakristaayo. (Ebik. 14:​2, 19) Watchtower eya Desemba 1, 1998, ekabazaaho Engeso Ezabakwenda 14:2 eti: “Abaali nibahakaniza Abakristaayo batagarukire ha kwanga amakuru amarungi, baitu bakababazaaho ebisuba nukwo abantu bange kubahuliiriza kandi babanobe.” Na kasumi kanu, Sitaani ‘naakyabiihabiiha ensi zoona.’ w24.04 11 ¶15-16

Omuntu kwomeera ebiro n’ebiro tikirukusigikirra ni di omuntu ogu obu araafa. Yahwe ali Mucwi w’emisango ow’ahikiriire, encwamu ze ziba z’okuhikirra kandi z’obulyo. (Zab. 33:​4, 5) Nitukigumiza kimu ngu “[Omucwi] wemisango yensi zoona” naija kukora ekihikire. Kandi kihikire kugamba ngu omuntu kutunga omugisa ogw’okwomeera ebiro n’ebiro tikirukwija kusigikirra nambere arukwikara. Yahwe tasobora kucwera omusango obukaikuru n’obukaikuru obw’abantu abarukwikara omu biikaro nambere batasobora kutunga omugisa ogw’okuhurra amakuru amarungi ‘nk’emburabuzi.’ (Mat. 25:46) Omucwi w’emisango y’ensi zoona ow’ahikiriire naafaaho abantu banu kukira itwe. Titumanyire omulingo Yahwe araakoramu ebintu omu muhito omwingi. Obundi bamu h’abantu nibaija kutunga omugisa gw’okwegaho Yahwe kandi bakamwikiririzaamu obu aliba naamanyisa ibara lye omu nsi yoona.—Ez. 38:16. w24.05 12 ¶14-15

Abantu ba Yahwe bagonza kukonyerangana. (2 Kol. 8:4) Baitu obwire bumu, kyetaagisa obumanzi kukikora. Ekyokurorraho, obu habaho obulemu, abagurusi b’ekitebe bakyetegereza ngu ab’oruganda na banyaanya itwe nibeetaaga kugarurwamu amaani, kubasagika, kandi obundi kubahikyaho ebyetaago byabo omu by’omwoyo rundi omu by’omubiri. Habwokuba nibagonza entaama, abagurusi bata obwomeezi bwabo omu kabi kusobora kubahikyaho ebi barukwetaaga. Omu nyikara nk’ezi, kikuru muno kwikara tuli omu bumu. Hondera oburagirizi kuruga ha ofiisi y’itaagi ey’omu kiikaro kyanyu. (Baheb. 13:17) Abagurusi basemeriire kwikara nibeijukyamu oburagirizi oburukukwata ha mulingo ogw’okweteekaniriza ebigwererezi na kiki eki basemeriire kukora kakuba habaho ekigwererezi. (1 Kol. 14:​33, 40) Ba mumanzi baitu mwekengi. (Nfu. 22:3) Banza oteekereze otakagizire eki wakora. Oteeta omu kabi akatarukwetaagisa. Weesige Yahwe. Ijuka ngu Yahwe naagonza iwe n’ab’oruganda mwikale mwine obwomeezi oburungi. w24.07 4 ¶8; 5 ¶11

Omukama Daudi akaba amanyire Yahwe kandi yamwesigaga. Abanyanzigwa ba Daudi otwaliiremu n’Omukama Saulo obu bakaba nibamuserra kumwita, Daudi akasaba Yahwe kumukoonyera. Hanyuma ya Ruhanga kugarukamu esaara ye n’okumujuna, Daudi akagamba ati: “[Yahwe] ayomiire.” (Zab. 18:46) Daudi akaba naamanyisa ki obu yagambire ebigambo binu? Ekitabu kimu nikigamba ngu Daudi akaba naayoleka obwesige bwe omuli Yahwe “nka Ruhanga omwomeezi ow’aikara narwanirra abantu be.” Ego, Daudi akaba akimanyire kusigikirra ha biyarabiremu ngu Ruhanga we mwomeezi, kandi eki kikamwekambisa kucweramu kimu kuheereza Yahwe n’okumukugiza. (Zab. 18:​28, 29, 49) Obu tukigumya ngu Yahwe ali Ruhanga omwomeezi nikisobora kutwekambisa kumuheereza n’obwekambi. Nitwija kutunga amaani ag’okugumira ebirengo kandi kitwekambise kugumizaamu nitukora n’amaani omu buheereza bwaitu hali uwe. Ekindi, nikiija kutwekambisa kucweramu kimu kwikara haihi na Yahwe. w24.06 20-21 ¶3-4

Kiki eki tusobora kwegera ha bigambo by’omukwenda Paulo hali Abasesalonika? Obu tuhurra ekintu ekitarukuhikaana n’ebi twegere kuruga omu Baibuli rundi obu tuhurra amakuru agarukuhuniiriza, kiba nikitwetaagisa kukozesa amagezi. Omu Soviet Union eya kara, abantu kuruga omu gavumenti haroho obu baararangize ebbaruha ey’ekaba neezooka nk’ey’erukuruga ha kitebe ekikuru. Ebbaruha enu ekeekambisa bamu h’ab’oruganda kutandikaho ekitebe kyabo. Ekaba neezooka nk’ey’erumu ebihikire. Baitu ab’oruganda abeesigwa, batabiihabiihwe. Bakakyetegereza ngu obutumwa obukaba buli omu bbaruha enu, bukaba butarukuhikaana n’ebintu bakaba beegesiibwe. Kasumi kanu, abantu abatarukugonza amananu obwire obumu bakozesa ebintu nka intaneeti n’emikura ey’okubalizaaho kulengaho kutubuzabuza n’okutuleetera kwebaganizaamu. Omu kiikaro ‘ky’okwanguha kutengesebwa tukaruga ha nteekereza yaitu,’ nitusobora kwerinda kuraba omu kuteekerezaaho ebintu ebi tuhurra rundi ebi tusoma obu biraaba nibihikaana n’amananu aga tumazire kwega.—2 Bas. 2:2; 1 Yoh. 4:1. w24.07 12 ¶14-15

Encwamu erukukira obukuru omuntu ei asobora kukora nukwo kwehayo hali Yahwe kandi n’okuba kicweka ky’eka y’abaheereza be. Yahwe naagonza buli omu akole ekintu kinu. Habwaki? Naagonza beegondeze omu kuba n’enkoragana enungi na bo nʼokwomeera ebiro n’ebiro. (Bir. 30:​19, 20; Bag. 6:​7, 8) Baitu, Yahwe tahambiriza omuntu weena kumuheereza. Aikiriza buli muntu kucwamu eki arakora. Kiki ekisobora kubaho kakuba Omukristaayo ow’abatiziibwe acwa ebiragiro bya Ruhanga? Kakuba ateegarukamu, asemeriire kwihwa omu kitebe. (1 Kol. 5:13) Baitu omuntu ogu noobu aihwa omu kitebe, Yahwe naagonza omuntu ogu kwegarukamu kandi ayongere atunge enkoragana enungi na uwe. Egi niyo ensonga habwaki yatuhaire ekicunguro; kusobozesa abeegarukamu kuganyirwa ebibi byabo. Yahwe ali Ruhanga ow’okugonza ow’ayekambisa abo abakozere ebibi eby’amaani kwegarukamu.—Zak. 1:3; Bar. 2:4; Yak. 4:8. w24.08 14 ¶1-2

Nambere Yohana yahandiikiire ebbaruha ye eyakasatu, abantu abamu bakaba nibajanjaaza enyegesa ez’ebisuba ezalesereho okwebaganizaamu. Baitu kandi abamu bakagumizaamu “nibagendera omu mananu.” Bakoorobera Yahwe kandi ‘baagumizaamu nibarubatira omu biragiro bye.’ (2 Yoh. 4, 6) Abakristaayo banu abeesigwa bakaleetera Yohana hamu na Yahwe okusemererwa kwingi. (Nfu. 27:11) Isomo ki eri turukwega? Obu turaikara tuli beesigwa nitwija kutunga okusemererwa kandi tuleetere n’abandi kusemererwa. (1 Yoh. 5:3) Ekyokurorraho, tutunga okusemererwa obu tukimanya ngu nitusemeza Yahwe. Asemererwa muno obu arora ngu nitwangirra ebyohyo eby’ensi kandi tukaikiriza amananu. Na bamalaika omu iguru batunga okusemererwa. (Luk. 15:10) Na itwe nitusobora kutunga okusemererwa obu turora ab’oruganda na banyaanya itwe nibaikara bali beesigwa. (2 Bas. 1:4) Hanyuma y’ensi ya Sitaani kuhwerekerezebwa, nikiija kutusemeza muno kukimanya ngu tukaikara tuli beesigwa hali Yahwe. w24.11 12 ¶17-18

Osemeriire kumara kasumi ki nooyetegereza omuntu otakamugambiire omulingo orukwehurra? Kakuba oyanguhiriza kumugambira omulingo orukwehurra naasobora kuteekereza ngu oyanguhiriza kukora encwamu. (Nfu. 29:20) Ha rubaju orundi, kakuba akyetegereza ngu noomugonza baitu otwaire obwire bwingi kumugambira naasobora kuteekereza ngu oikaraho kukora encwamu. (Mug. 11:4) Ijuka ngu otakahikiriire omuntu, tikirukukwetaagisa kukigumya ngu nuwe orukwija kutaaha na uwe omu buswere. Baitu osemeriire kukigumya ngu ohikire kutaaha obuswere kandi ngu omuntu ogu naasobora kuba nuwe ahikire ow’okutaaha na uwe omu buswere. Kiki eki osemeriire kukora kakuba okyetegereza ngu omuntu naakugonza? Obu oraaba otarukugonza kumujumbira, lengaho kukimwoleka kuraba omu bikorwa. Tikiri ky’embabazi kuleetera omuntu ogu kuteekereza ngu noomugonza kandi kunu tinukwo kiri.—Bef. 4:25. w24.05 22-23 ¶9-10

Abaseeserweho amagitaabeesigwa bonka nubo Yesu alitangirra omu Bukama bwe obw’omu iguru. Abaseeserweho amagita abataliikara bali bulindaara omu by’omwoyo tibalisoroozebwa hamu n’abo ‘abakomerwemu.’ (Mat. 24:31) Kutwarra hamu, abantu ba Yahwe boona, ka babe baine okunihira kwa mulingo ki, basemeriire kurora ebigambo bya Yesu nk’okuteererra okw’okwikara bali bulindaara kandi beesigwa. Habwokuba tumanyire Yahwe kurungi, tusemeriire kwesiga omulingo acwamu omusango. Titusemeriire kweraliikirra Yahwe obu araacwamu kuseesaho amagita abaheereza be abeesigwa omu kasumi kaitu. Tusemeriire kwijuka Yesu eki yagambire h’abakozi abaizire omu saaha eya ikumi n’emu omu kyokurorraho eky’emizabbibbu. (Mat. 20:​1-16) Abo abaayeserwe kukora omu musiri ogw’emizabbibbu hanyuma, bakatunga omusaara nugwo gumu n’abo abaatandikire kukora kara. Omu mulingo nugwo gumu, akasumi abaseeserweho amagita bakomwa tikiri kikuru, oihireho nibaija kutunga empeera yabo ey’omu iguru, obu baraikara bali beesigwa. w24.09 24 ¶15-17

Yesu akatuteeraho ekyokurorraho ekirungi ekirukwoleka omulingo tusobora kugumira obutali bwinganiza. Teekerezaaho obutali bwinganiza obwamuhikireho kuruga omu ka ye n’omu bantu abaheeru. Abanyabuzaale be bakamujunaana nibagamba ngu agwire iraro, abebembezi b’amadiini bakamujunaana ngu naakoragana na badaimooni, kandi abaserikale Abarooma bakamusekereza, baamuteera kandi hanyuma baamwita. (Mar. 3:​21, 22 14:55; 15:​16-20, 35-37) Baitu Yesu akagumira obutali bwinganiza obu bwona hamu n’obundi bwingi atarukwesasuza. Kiki eki turukwegera ha kyokurorraho kye? (1 Pet. 2:​21-23) Yesu akatusigira ekyokurorraho ekyokuhondera obu tuba nituhikwaho obutali bwinganzia. Akaba naamanya ni di obu asemeriire kuculeera na ni di obu asemeriire kubaza. (Mat. 26:​62-64) Atagarukemu buli bisuba ebyamubaziibweho. (Mat. 11:19) Baitu obu yabazaaga tiyajumaga abarukumujunaana rundi kubatiinisiriza. w24.11 4-5 ¶9-10

Teeramu akasisani ohaire omuntu ow’ogonza ekisembo ekyembaganiza, ekisemiire kandi eky’omugaso. Nikisobora kukumaramu amaani kakuba okyetegereza ngu omuntu ogu, ekisembo akakyahura kandi takagarukaga n’okukiteekerezaaho. Ha rubaju orundi, nikisobora kukusemeza kakuba okyetegereza ngu ekisembo eki akakikozesa kurungi kandi naayoleka ngu naasiima. Nsonga ki ei turukubazaaho? Yahwe akahayo Omwana we kutufeera. Yahwe asemererwa muno obu arora ngu nitusiima ekisembo eki eky’omuhendo hamu n’okugonza, okwamwekambisize kuhayo ekicunguro! (Yoh. 3:16; Bar. 5:​7, 8) Baitu hanyuma y’obwire kurabaho, nitusobora kutandika kutwara ekisembo eky’ekicunguro nk’ekitali ky’embaganiza. Kakuba tuleka kusiima habw’ekicunguro, tusisana oti rundi tutaire hara ekisembo ekirungi Ruhanga eki yatuhaire nambere tutasobora kukirora rundi kukitekerezaaho. Kusobora kwetantara eki, tusemeriire kwikara nituteekerezaaho ebintu byona Ruhanga na Yesu Kristo ebi batukoliire. w25.01 26 ¶1-2

Ow’oruganda ow’arukugonza kufooka mugurusi asemeriire kuba atali muhinduki omuhyaka. Noobu kiraaba ngu tosemeriire kumara emyaka nyingi obatiziibwe, nikyetaagisa obwire kusobora kufooka Mukristaayo ow’akuzire omu by’omwoyo. Otakafookere mugurusi osemeriire kwoleka ngu nka Yesu, oli mwebundaazi kandi torukubiihirwa habw’okumara obwire bwingi otarukuheebwa obujunaanizibwa omu kitebe. (Mat. 20:23; Baf. 2:​5-8) Noosobora kwoleka ngu oli mwesigwa kuraba omu kugumira hali Yahwe, kuhondera endengo ze ez’okuhikirra, n’okuhondera oburagirizi obu atuha naakozesa ekitebe kye. Ebyahandiikirwe byoleka kurungi ngu omuroleerezi asemeriire kuba naasobora kwegesa. Baitu kinu nikimanyisa ngu asemeriire kuba ali muhi w’embazo omurungi muno? Nangwa. Abagurusi tibali boona ngu bahi b’embazo abarungi, baitu obu barukuba nibatebeza rundi babungiire ab’oruganda kubagarramu amaani, basemeriire kuba nibasobora kukozesa kurungi Baibuli kwegesa n’okugarramu ab’oruganda na banyaanya itwe amaani. w24.11 23-24 ¶14-15

Obu oraatangaana enkarra ezi otarukwetegereza kurungi omu Baibuli, seruliiriza. Kandi hanyuma omale ekiro kyona, nooyecumiitirizaaho ebintu ebi ozoire, n’eki birukukwegesa hali Yahwe, Omwana we, n’okugonza oku bakwiniire. (Zab. 119:97) Otahwamu amaani obu oraabaga otatungire ekintu ekihyaka rundi ekirukusemeza buli murundi oraabaga noosoma Baibuli rundi nooseruliiriza. Wesisanirize n’omuntu ow’arukulengaho kuserra ezaabbu. Emirundi erukukira obwingi, omuntu ow’arukuserra ezaabbu amara esaaha nyingi rundi ebiro bingi atakatungire n’akacweka akataito muno ak’ezaabbu. Baitu agumiisiriza habwokuba, buli kacweka ak’ezaabbu akaatunga, k’omuhendo muno hali uwe. Mali, buli kintu kyona ekihyaka eki twega kuruga omu Baibuli, kyomuhendo muno kukira ezaabbu! (Nfu. 8:10) Nahabweki gumiisiriza kandi oikale noohondera enteekaniza yaawe ey’okusoma Baibuli.—Zab. 1:2. w25.01 25 ¶14-15

Yahwe naatunihirramu kwikara tweteekaniize kuganyira abo abatutwaza kubi. (Zab. 86:5; Luk. 17:4; Bef. 4:32) Nikisobora kutusaaliza muno omuntu obu abaza rundi obu akora ekintu ekitali kirungi kukira muno obu aba ali munywani waitu nfenanfe rundi munyabuzaale. (Zab. 55:​12-14) Obwire obumu, obusaasi obu tutunga nibusobora kulengesanizibwa n’okucumitwa omuhyo. (Nfu. 12:18) Nitusobora kulengaho kutateeka omutima ha nyehurra zaitu. Eki obu tukikora, tusisana nk’abacumisirwe omuhyo kandi tukaguleka omu kihooya. Omu mulingo nugwo gumu, titusobora kunihira ngu obusaasi bwaitu nibwija kuhwaho kakuba tutabuteekaho omutima. Omuntu obu atukora kubi, nitusobora kukwatwa ekiniga ha kubanza. Na Baibuli ekigumya ngu nitusobora kukwatwa ekiniga. Baitu etuteererra ngu titusemeriire kwikiriza enyehurra egi kutulema. (Zab. 4:4; Bef. 4:26) Habwaki? Habwokuba ekiniga tikirugamu ebirungi. (Yak. 1:20) Ijuka ngu, kukwatwa ekiniga eri nyehurra enyakwija bwija, baitu kwikara nakyo eri ncwamu yaawe. w25.02 15 ¶4-6

Yesu akooleka nkooku kitali ky’amagezi kweyahurra itungo baitu kandi tutali “[baguuda] omu maiso ga Ruhanga.” (Luk. 12:​16-21) Busaho n’omu ow’amanyire kiki ekiraabaho nyenkya. (Nfu. 23:​4, 5; Yak. 4:​13-15) Nk’abahondezi ba Kristo, haroho ekizibu eki tutangaana. Yesu akagamba ngu tusemeriire kuba tweteekaniize ‘kwefeereza’ ebintu byaitu byona obu turaaba nitugonza kufooka bahondezi be. (Luk. 14:​33, obugambo obuli hansi.) Abakristaayo ab’omu kyasa eky’okubanza omu Buyudaaya bakeefeereza basemeriirwe. (Baheb. 10:34) N’omu kasumi kanu, ab’oruganda baingi bafeeriirwe emirimo yabo habw’okwanga kwejumbira omu by’obulemi. (Kus. 13:​16, 17) Kiki ekibakoonyiire kukikora? Nibeesigira kimu omurago gwa Yahwe ogurukugamba ngu: “Tindikulekaho, kandi tindikusigaho.” (Baheb. 13:5) Tukora kyona eki turukusobora kweteekaniriza ebyetaago byaitu eby’omu kasumi ak’omumaiso, kandi kakuba tuhikwaho ebintu ebi tubaire tutarukunihira, twesiga obusagiki bwa Yahwe. w25.03 29 ¶13-14

Yahwe naagonza kutukoonyera kukura omu by’omwoyo. Atuhaire abaliisa hamu n’abeegesa abatukoonyera kuba n’enkoragana enungi na Yahwe, n’okuhika “ha rulengo orw’obukuru bwa Kristo.” (Bef. 4:​11-13) Yahwe atuha omwoyo ogurukwera ogutukoonyera kuba ‘n’enteekereza ya Kristo.’ (1 Kol. 2:​14-16) Ruhanga akahandiikisa ebitabu bbina eby’enjiri, kutwoleka omulingo Yesu yateekerezaaga, yabazaaga, n’omulingo yayetwaizeemu obu akaba ali omu nsi. Obu twegera ha mulingo Yesu yateekerezaamuga n’omulingo yayetwazaamuga, nitusobora kufooka Abakristaayo abakuzire omu by’omwoyo. Baitu kusobora kuba Bakristaayo abakuzire omu by’omwoyo, titusemeriire kugarukira ha kumanya enyegesa “ez’okubandizaaho ezirukukwata hali Kristo,” kandi ezi nizo enyegesa ez’Ekikristaayo ez’okubandizaaho. w24.04 4-5 ¶11-12

Buli kiro tuba twine kukora encwamu. Ezimu ziba zanguhire kukora, nk’okumanya kiki eki turaalya nyenkyakara rundi ni di obu turaagenda kubyama. Ezindi ziba zigumire. Nizisobora kukwataho obwomeezi bwaitu, okusemererwa kwaitu, abantu abaturukugonza rundi okuramya kwaitu. Nitugonza encwamu zaitu zitugasire kandi zigasire n’eka yaitu. Ekirukukira obukuru, tusemeriire kuteekerezaaho omulingo Yahwe aroramu encwamu zaitu. (Bar. 12:​1, 2) Ekintu ekikuru ekisobora kutukoonyera kukora encwamu enungi nikyo kumanya amananu. Habwaki eki kikuru? Teekerezaaho omurwaire ow’agenda hali dakitaali kuserra obukoonyezi obu aba aine oburwaire obw’amaani. Dakitaali naasobora kumuha obujanjabi atabandize kumukebera rundi kumukaguza ha burwaire bwe? Nangwa. Na iwe noija kukora encwamu enungi kakuba obanza kuteekerezaaho amananu agarukukwata ha ncwamu ey’orukugenda kukora. w25.01 14 ¶1-3

Kiki ekitumanyire ha mbabazi za Yahwe? Akyolekere ata ngu “tarukugonza omuntu weena ahwerekerre”? (2 Pet. 3:9) Teekerezaaho omulingo Yahwe yayolekeremu embabazi hali abo abaakozere ebibi eby’amaani. Omukama Daudi akakora ebibi eby’amaani otwaliiremu kusiihana n’okwita. Baitu Daudi obu yayegarukiremu, Yahwe akamuganyira. (2 Sam. 12:​1-12) Omukama Manase akakora ebibi eby’amaani haihi obwomeezi bwe bwona. Noobu kiraaba kiri kiti, Yahwe akarora omulingo omusaija onu yayegarukiremu kandi yamuganyira. (2 Byom. 33:​9-16) Ebyokurorraho binu nibitwijukya ngu Yahwe ayoleka embabazi buli murundi atunga ensonga ey’okuzooleka. Naija kuhumbuura abantu nk’abo habw’okuba bakakyetegereza ngu bakaba bakozere ebibi eby’amaani kandi baayegarukamu. w24.05 4 ¶12