Akanga Kukwatwa Ekiniga

MEFIBBOSEESI akaba mwijukuru w’Omukama Saulo kandi ise, Yonasaani, akaba ali musaija emanzi kandi mwesigwa hali Yahwe. Omwojo ogu obu akaba aine emyaka etaano, akahikwaho ebintu ebibi omu bwomeezi bwe. Isenkuru arukwetwa Saulo akahutaazibwa obu akaba ali omu bulemu kandi hanyuma yayeyita. Na ise arukwetwa Yonasaani akafeera omu bulemu obu. Omukazi ow’akaba naarolerra Mefibboseesi obu yahuliire amakuru ganu amabi, akamuhimba kandi yatandika kwiruka atiinire. Omwana akamuruga omu ngaro yagwa kandi yahendeka amaguru goona abiri. Kinu kikamuleetera kufooka mulema obwomeezi bwe bwona.

Nikizooka ngu Mefibboseesi atakwatwe ekiniga habw’ebintu byona ebibi ebyamuhikireho. Omunyaisaleeri arukwetwa Makiri akatandika kumurolerra. Hanyuma y’akasumi, Omukama Daudi akaijuka ngu akaba araganiize munywani we Yonasaani ngu naija kurolerra abantu ab’omu nju ye. (1 Sam. 20:14-17) Nahabweki, Daudi akatuma bamuleetere Mefibboseesi.

Mefibboseesi akaba atiinire kugenda hali Daudi, habwokuba akaba naaruga omuka y’omukama omubi Saulo. Naasobora kuba yateekeriize ngu Daudi akaba naagonza kumwita. Baitu nabwo, akahuliiriza kandi yagenda. Daudi akabaza na uwe omu mulingo ogw’embabazi, yamugarurra ebintu byona ebikaba biri bya Saulo, kandi yamugambira ati: “Oralyaga ebyokulya ha meza yange obutosa.” Mefibboseesi akasiima muno habw’embabazi za Daudi, yahika n’okumukaguza habwaki akaba naamutamu ekitiinisa, uwe omusaija owa hansi. Akahika na ha kwerengesaniza n’embwa efiire!

Hanyuma y’akasumi, hakongera habaho ebintu ebibi. Mutabani wa Daudi Abbusalomu akagonza kwita ise, kandi Daudi akairuka yaruga omu Yerusaalemu. Omuheereza wa Mefibboseesi Zibba akagenda kukoonyera Daudi kandi yasiga mukama we enyuma. Mefibboseesi akaba atasobora kuhondera Daudi, baitu akakora ekintu ekyayolekere ngu akaba ali mwesigwa hali uwe kandi ngu naamusaalirirwa. Mefibboseesi akanga kusara omuleju gwe kandi kanu kakaba k’okurorraho akayolekaga omuntu ow’arukuganya. Hanyuma, Daudi akasingura Abbusalomu omu bulemu kandi yagaruka omu Yerusaalemu omu businge. Baitu nabwo, Daudi akaba abiihiriirwe Mefibboseesi. Habwaki?

Zibba akaba abalizeeho Mefibboseesi ebisuba. Zibba obu akaba agenzere kukoonyera Daudi, akagambira Daudi ngu Mefibboseesi akaba ali mugobya, kandi ngu akaba asigaire Yerusaalemu habwokuba akaba naagonza kufooka omukama. Teekerezaaho omulingo Daudi yayehuliiremu. Nubwo akaba yaakaruga kugobezebwa omutabani hamu na munywani we kandi omuhi we w’amagezi Ahitofeeri ou akaba naayesiga muno. Obundi egi niyo ensonga habwaki yaikiriize ngu Mefibboseesi na uwe akaba amugobiize. Daudi akarabyaho ekiragiro ngu ebintu by’Omukama Saulo ebi akaba ahaire Mefibboseesi biheebwe Zibba.

Mefibboseesi obu yahuliire ebisuba Zibba akaba amubalizeeho, akagenda hali Daudi ow’akaba abiihiirwe kumugambira kyonyini ekikaba kibaireho. Daudi akakaguza Mefibboseesi habwaki atararugire na uwe Yerusaalemu. Mefibboseesi akagambira Daudi ngu akaba atasobora kuruga omu Yerusaalemu habwokuba akaba ali “mulema” kandi yamugambira ngu Zibba akamubiihabiiha yamusiga. Daudi naasobora kuba yakyetegeriize ngu Mefibboseesi akaba naaganya obu yarozere omuleju gwe ogukaba gutasazirwe. Kinu kikooleka ngu Mefibboseesi akaba naaganya habw’ebyahikire hali Omukama Daudi, kandi akaba atamugobiize. Baitu nabwo, Daudi akaikara abiihiirwe. Akaba atarukugonza Mefibboseesi amugambire ekintu ekindi kyona. Hanyuma akahinduramu ekiragiro kye yacwamu kuha Mefibboseesi ekicweka ky’itaka. Akagamba ngu Mefibboseesi na Zibba basemeriire kubagana itaka lya Saulo.

Mefibboseesi akakwatwa ekiniga, ngu habwokuba akaba naagenda kubagana itaka, n’omuntu ow’akaba amubalizeeho ebisuba? Nangwa. (Bir. 19:18, 19) Noobu kiraaba ngu akaba atwaziibwe kubi, atabiihirwe kandi atahwemu amaani. Akaba aine obumanzi habwokuba akata omutima ha kintu ekikuru kandi eki nikyo, kuganyira abandi n’okulengaho kugarraho obusinge.

Akagarukamu Daudi omu mulingo ogw’obuculeezi naagamba ati: “Leka [Zibba] atwale byona, baitu mukama wange omukama atahire obusinge omu njuye wenka.” Omusaija ogu omwebundaazi yafaahoga muno omukama, Yahwe ou akaba akomere. Ataikirize ekintu eky’okumuhangirra, rundi eky’okumunyagaho itaka lye kumubiihiza, rundi kumumaraho obusinge obu akaba aine na Ruhanga. Noobu kiraaba ngu Mefibboseesi atarwane obulemu nk’omuserikale, akooleka obumanzi obw’amaani kukira abaserikale baingi!

Soma Ebyahandiikirwe ebirukumubazaaho:

• 2 Samwiri 4:4; 9:1-13; 16:1-4; 19:24-30

Kuleeta hamu ebiteekerezo:

Miringo ki Mefibboseesi ei yayolekeremu obumanzi?

Yega Ebirukukiraho

1. 1. Mefibboseesi atakatwairwe hali Daudi, akaba naikara “omunju ya Makiri.” Kiki ekindi ekirukwoleka ngu Makiri akabali musaija omwesigwa kandi ow’arukwoleka amakune? (2 Sam. 9:3, 4; it “Makiri” Na. 2-wcgr)

   Eky’okugarukamu kyawe

2. 2. Habwaki Mefibboseesi yayelengesaniize ‘n’embwa efiire’? (2 Sam. 9:8; it “Embwa” ¶5-wcgr) A

   Eky’okugarukamu kyawe

   

   PhotoStock-Israel/Photodisc via Getty Images

3. 3. Habwaki nitugamba ngu Mefibboseesi akaba atarukugonza kwegarurra obukama bwa Daudi? (w02 2/15 14 ¶11, obugambo obuli hansi-wcgr) B

   Eky’okugarukamu kyawe

   

4. 4. Miringo ki Yahwe ei yahairemu Mefibboseesi emigisa, hanyuma y’okuhikwaho ebintu ebi tubalizeeho? (it “Mefibboseesi” Na. 2 ¶3-wcgr)

   Eky’okugarukamu kyawe

Ebikaguzo eby’Okwecumiitirizaaho

• Abakristaayo baingi baine oburwaire obw’okwenuuba, rundi nibaraba omu bizibu abandi ebi batasobora kwetegereza. Masomo ki agarukuhuumuza aga turukwegera ha kyokurorraho kya Mefibboseesi?

  Eky’okugarukamu kyawe

• Hanyuma ya Daudi kuhurra bike, akagaba itaka lya Mefibboseesi. Kinu nikitwegesa ki obukirukuhika h’akabi akaruga omu kukora encwamu bwangu-bwangu, hamu n’omugaso gw’okubanza kumanya amananu gonyini? C

  Eky’okugarukamu kyawe

  

• Noosobora ota kwegera ha bumanzi bwa Mefibboseesi?

  Eky’okugarukamu kyawe

Eki Birukunyegesa Hali Yahwe n’Ekigendererwa Kye

• Isomo linu nirikwegesa ki hali Yahwe?

  Eky’okugarukamu kyawe

• Ekyokurorraho kinu nikihikaana kita n’ebigendererwa bya Yahwe?

  Eky’okugarukamu kyawe

• Kiki eki waakugondeze kukaguza Mefibboseesi obu alihumbuuka?

  Eky’okugarukamu kyawe

Manya na Binu

Weetegereze omulingo tusobora kwegera ha kyokurorraho kya Mefibboseesi obu twehurra ngu tutwaziibwe omu mulingo gutali gw’obwinganiza.

Omulingo Baasigire Kandi Baagesa Obusinge—Mefibboseesi (3:25)

Kakuba omwana ayehurra ngu abandi tibarukumugonza, abazaire nibasobora bata kukozesa ekyokurorraho kya Mefibboseesi kumukoonyera?

“Wakeehurraga ngu Toli Kicweka ky’Abantu Abandi?” (w11 6/1 26-27-wcgr)