Akahana Omukama

ENYUMAHO, Yahwe akaba aragiire nabbi Nasani kugambira Daudi ekintu ekirungi ekirukukwata h’akasumi ak’omumaiso; kandi eki nikyo ngu Masiya akaba naija kuruga omu ruzaaro rwa Daudi! (2 Sam. 7:4, 12, 13) Baitu Daudi akakora ebibi eby’amaani, kandi Yahwe akaba naagonza Nasani amuhane. Nabbi Nasani obu akaba naagenda omu kikaali kya munywani we Omukama Daudi kumuhana, naasobora kuba yayekagwize ati: ‘Omusaija nk’ogu omurungi naasobora ata kukora ebintu ebibi nka binu?’

Daudi akaba akozere ekintu kinu omu nsita, baitu Yahwe akaba naamurora. Ruhanga aine kuba yagambiire Nasani ekikaba kibaireho. Kiro kimu, omu kairirizi, Daudi obu akaba naarubatarubata ha rusu rw’enju ye, akarora omukazi naayoga. Akarora ngu omukazi akaba ali ‘murungi muno,’ kandi yatuma ngu bamumuleetere omu kikaali kye. Akaba akimanyire ngu omukazi onu ayayetwaga Bbasisebba akaba ali muka Uliya Omuhiti, ow’akaba ali omuserikale omwesigwa. Baitu nabwo, Daudi akasiihana na uwe. Hanyuma y’akasumi, Bbasisebba akagambira Daudi ngu akaba aine enda. Daudi akalengaho kusereka ekintu eki akaba akozere. Akagambira Uliya kusigaho abaserikale bagenzi be kandi agende araale na mukazi we. (Lengesaniza na 1 Samwiri 21:5.) Baitu Uliya akanga kusigaho abaserikale bagenzi be kugenda kwesemeza na mukazi we. Hanyuma, Daudi akaragira mukuru w’ihe kuteeka Uliya omu kiikaro nambere akaba naasobora kufeera omu bulemu. Kandi eki nikyo kyabaireho. Hanyuma ya Uliya kwitwa, Daudi akatwarra kimu Bbasisebba kufooka mukazi we.

Baibuli egamba eti: “Ekintu Daudi ekiyakozire kikabihiza [Yahwe].” Hanyuma, Yahwe akagambira Nasani kugenda kugambira Daudi ngu ekintu eki akaba akozere kikaba kibi muno kandi ngu Yahwe akaba akirozere. Nasani obu akaba naagenda, naasobora kuba yaateekeriizeho omulingo Daudi yaakwetwaizeemu? Nasani akaba akyetegeriize nkooku Daudi akaba amazire ira kwita Uliya. Nahabweki, naasobora kuba akaba naayekaguza obu araaba naija kumwita, hanyuma y’okumugambira ekintu eki yakozere n’okumuhana. Nasani akaba naagonza kumukoonyera kukyetegereza nkooku ekintu eki akaba akozere kikaba kiri kibi muno. Nabbi onu aine kuba yabandize kusaba Yahwe ha nsonga enu. Akateekerezaaho ekyokurorraho eki akaba naija kukozesa kandi hanyuma yagenda hali omukama.

Nasani akamugambiraho abasaija babiri abakaba bali omu rubuga rumu. Omu h’abasaija abo akaba muguuda kandi akaba aine entaama nyingi n’ente. Omusaija ondi akaba ali munaku, aine entaama emu yonka ei yagonzaaga muno, yagiraazaaga omu nju ye, kandi yagifaahoga muno. Kiro kimu, omusaija omuguuda akatunga omugenyi ow’akaba atarukunihira kandi akaba naayetaaga entaama ey’okumubaagira. Baitu akaba atarukugonza kubaaga emu ha ntaama ze. Oihireho, “akatwara entama yomunaku,” yagibaaga kandi yagicumbira omugenyi we. Nambere Nasani yamaliire kumugambira ekyokurorraho kinu, Daudi akaba akwasirwe ekiniga ky’amaani! Akagamba ati: “Nka [Yahwe] okwali omwomezi, omusaija akozire ekigambo eki asemeriire okufa.” Akakwatwa ekiniga habwokuba omusaija omuguuda ‘akaba ataine embabazi.’

Nasani akaba akozeseze ekyokurorraho ekirungi muno. Daudi akaba ali muliisa omu buto bwe, kandi tiyagonzaaga obutali bwinganiza. N’obumanzi, Nasani akagambira Daudi ati: “Niwe omusaija ogu.” Daudi naasobora kuba yatukumiire muno. Nasani akagambira Daudi ebintu ebibi byona ebi akaba akozere kandi ngu byona Yahwe akaba abirozere. Hanyuma, nabbi akagambira Daudi ekintu Yahwe eki akaba agambire ngu nikiija kumuhikaho: Kandi eki nikyo ngu eka ya Daudi ekaba niija kuhikwaho ebikorwa by’okurwana hamu n’ebintu ebibi bingi kumara emyaka nyingi. Daudi akeetwaza ata?

Omukama akagamba ati: ‘Nsiisiire Yahwe.’ Daudi akasaasa muno habw’ekintu eki akaba akozere. Kandi yayegarukamu kuruga ha mutima. Nasani aine kuba yasemeriirwe muno kugambira Daudi ngu Yahwe akaba naija kumwoleka embabazi. Akamugambira ati: “[Yahwe] aihireho ekibi kyawe: okufa tolifa.” Baitu, Daudi akabonabona muno habw’ebintu ebyarugire omu kibi eki yakozere na Bbasisebba. Omwana ayazairwe habw’ekibi eki baakozere akafa. Kandi kumara emyaka nyingi, eka ye ekahikwaho ebizibu bingi.

Baitu noobu kiraaba ngu Daudi akahikwaho ebizibu ebi byona, akaikara ali mwesigwa hali Yahwe. Akatereekerezebwa omwoyo ogurukwera kuhandiika zabbuli ezirukukwata ha mulingo Yahwe aganyira abantu ababa beegarukiremu. (Zabbuli 32 na 51) Omukama Daudi akongera yatunga enkoragana enungi na Yahwe kandi yaikara naahondera obuhabuzi bwa nabbi Nasani obwomezi bwe bwona. Daudi akafa ali mwesigwa hali Yahwe. (1 Bakam. 9:4) Nasani aine kuba yasemeriirwe muno habwokuba akatunga obumanzi obw’okuhana omukama ow’akaba akozere ensobi ez’amaani.

Soma Ebyahandiikirwe ebirukumubazaaho:

• 2 Samwiri 11:1–12:18

Kuleeta hamu ebiteekerezo:

Miringo ki Nasani ei yayolekeremu obumanzi?

Yega Ebirukukiraho

1. 1. Nasani akaba muhandiiki wa Baibuli, baitu titumanyire ebirukukwata ha buzaale bwe rundi obwomeezi bwe. Kinu nikyoleka ngu akaba muntu wa mulingo ki? (w12 2/15 25 ¶2-3-wcgr)

   Eky’okugarukamu kyawe

2. 2. Uliya akaba ali Muhiti. Hati habwaki akaba ali omu ihe lya Daudi? (w24.04 31)

   Eky’okugarukamu kyawe

3. 3. Nasani akaranga akabi akakaba nikaija kuhika ha nju ya Daudi. Obunabbi obu bukahikirra buta? (it “Daudi” ¶29-wcgr)

   Eky’okugarukamu kyawe

4. 4. Nasani akooleka ata obumanzi Daudi obu akaba ali mukama ow’agurusire muno? (w12 2/15 25 ¶1-wcgr) A

   Eky’okugarukamu kyawe

   

Ebikaguzo eby’Okwecumiitirizaaho

• Ekyokurorraho kya Nasani nikitwegesa ki obukirukuhika ha mulingo tusobora kukoonyera omunywani ow’akozere ekibi eky’amaani?

  Eky’okugarukamu kyawe

• Nitusobora tuta kwegera ha kyokurorraho kya Nasani obu turukuba nitugonza kuhika omuntu ha mutima? B

  Eky’okugarukamu kyawe

  

• Miringo ki endi ei osobora kwegera ha bumanzi bwa Nasani?

  Eky’okugarukamu kyawe

Eki Birukunyegesa Hali Yahwe n’Ekigendererwa Kye

• Isomo linu nirikwegesa ki hali Yahwe?

  Eky’okugarukamu kyawe

• Ekyokurorraho kinu nikihikaana kita n’ebigendererwa bya Yahwe?

  Eky’okugarukamu kyawe

• Kiki eki waakugondeze kukaguza Nasani obu alihumbuuka?

  Eky’okugarukamu kyawe

Manya na Binu

Ebikorwa bya Daudi bikasaaliza bita Yahwe, eka ye, banywani be hamu na uwe?

Ijuka Omulingo Okugonza Kwetwazaamu—Tikuserra Ebyakwo Kwonka (1:14)

Weetegereze ekintu ekyaleetiire obuhabuzi bwa Nasani kuhika Daudi ha mutima.

“Ba Mwebundaazi Obu Oraahanwa” (Ebicweka ebiri ha mukura “Eby’Okukozesa omu Kwega Baibuli”-E)