20 SAMUSOONI
Akasaba Ruhanga Kumuha Amaani Obu Gakaba Gamuhoiremu
SAMUSOONI akaba ali omu kabi. Akaba akozere ensobi ey’amaani kugambira omuntu nambere amaani ge gakaba nigaruga. Ekyarugiremu, Abafirisiiti bakamukwata bamwihamu amaiso, kandi baamusiba. Hanyuma, bakamuta omu nkomo kandi baamuhambiriza kukora nk’omwiru wabo. Noobu kiraaba ngu akaba atarukuhweza, akaba naahurra ekitebe ky’Abafirisiiti nibamusekeereza kandi nibajuma Ruhanga we, Yahwe. Samusooni akaba akimanyire ngu nuwe akaba ayeretiire ebizibu ebirukukira obwingi. Akaba ali musaija omumanzi. Baitu hati, obumanzi bwe bwali bulengerwe muno.
Samusooni akaba aheeriize nk’omucwi w’emisango omu Isaleeri kumara emyaka 20, baitu uwe akaba naayahukanira kimu h’abacwi b’emisango abandi. Omu mulingo ki? Abacwi b’emisango abandi nka Bbaraka, Gidiyooni na Yefuta, bakaba beebembiireho amahe kurwanisa abanyanzigwa ba Ruhanga. Baitu Samusooni uwe atakikole. Samusooni wenka akaba naakora nk’ihe! Yahwe akamukozesa kurwanisa Abafirisiiti ali wenka. Omu mulingo ki?
Ruhanga akaragira abazaire ba Samusooni kuhayo omwana wabo kuheereza nk’Omunaziri. Nahabweki, akaba atakasaraga isoke rye. Yahwe yakwikaire naamuha amaani maingi kakuba yagumiire ha kweraga kwe. Kiro kimu, Samusooni akataaguramu kabiri entale naakozesa emikono ye! Samusooni akakozesa amaani Ruhanga agakaba amuhaire kurwanisa Abafirisiiti, abakaba nibatwaza kubi Abaisaleeri abaali balekereho Yahwe.
Kiro kimu, Abaisaleeri bakatiina muno, baaboha Samusooni kandi baamuhayo hali Abafirisiiti. Samusooni akacwa emiguha, oti rundi bukaba buli buhuuzo bw’orugoye rw’ekitaani kandi yaita Abafirisiiti 1,000, naakozesa orusaya rw’endogoya rwonka. Hanyuma, Samusooni obu akaba ali omu rubuga rwa Gaza, abanyanzigwa be bakamulinda ekiro kyona ha mulyango gw’orubuga, nukwo basobole kumwita nyenkyakara. Baitu akaimuka omu bwire bw’ekiro, kandi yameenya enyigi enkooto ezikaba ziri ha mulyango gw’orubuga. Akahimba enyigi ezi h’amabega ge hamu n’ebikondo byazo kandi yabitwara ha rusozi orukaba ruli haihi na Hebburooni, orugendo orukaba nirwingana haihi nka kilomita 60 (mairo 37)!
Emirundi nyingi, Samusooni akasingura Abafirisiiti. Akooleka Abafirisiiti ngu baruhanga baabo nka Dagoni, bakaba bataine busobozi obw’okusingura omuheereza wa Yahwe omwesigwa. Baitu Abafirisiiti bakaserra omulingo ogundi ogw’okusingura Samusooni batakozeseze eby’okurwanisa. Bakakozesa omukazi arukwetwa Derira.
Samusooni akagonza muno Derira, baitu Derira atabe mwesigwa hali we. Akaikiriza enguzi kuruga h’Abafirisiiti, nukwo asobole kumanya ensita ya Samusooni nambere yaihaga amaani ge amaingi muno. Akaikara naasoonasoona Samusooni. Kandi ha kumalirra akaikiriza yamugambira ensita ye. Akamugambira ngu kakuba omuntu asara isoke rye, akaba naija kuhwamu amaani ge amaingi. Nahabweki, Derira akamulinda yabyama kandi yaleeta omuntu yasara isoke rye eriraihire. Baibuli egamba ngu: “Yahwe akamulekaho.” Nahabweki, Samusooni amaani agaakaba aine gakamuhwamu. Abafirisiiti bakanguha baamukwata, baamwihamu amaiso kandi baamutwara omu nkomo.
Abafirisiiti bakahambiriza Samusooni kubaseera engano, naakozesa ibaale erirukulemeera, kandi omulimo ogu, gukaba nigumujwahya muno. Abafirisiiti bakasemererwa muno kandi baatandika kwehaisaniza habwokuba omunyanzigwa wabo ow’akaba ali w’amaani muno akaba afookere mwiru wabo. Bakateekaniza obugenyi obw’amaani kusiima ruhanga wabo Dagoni, habw’okubakoonyera kusingura Samusooni. Obwire obu bwakiire, abantu enkumi n’enkumi bakeesorooleza omu yekaru enkooto. Oihireho abantu abakaba bali omu yekaru, hakaba haroho n’abandi abaali eruguru ya yekaru abarukuhika nka 3,000. Abafirisiiti bakacwamu kukozesa Samusooni nk’ekintu eky’okwesemeza, nahabweki, bakaragira bamuleete, kandi baamwemereza hagati y’enyomyo ibiri ez’amaani. Samusooni ow’akaba ayegarukiremu, isoke rye likaba lyongiire lyakura.
Habwokuba Samusooni akakora ensobi, akafooka omunyankomo, baitu akakozesa amaani ge, kukora Yahwe eki akaba naagonza habw’omurundi ogw’okumalirra
Obu yakwasire ha nyomyo, akasaba Yahwe kumugarurra amaani nk’agaakaba aine. Akasaba naagamba ati: “Onyijuke nkwesengeriize, ompe amani nkwesengeriize, omurundi gunu gwonka, ai Ruhanga.” Kandi yatokera haiguru naagamba ati: ‘Leka nfe n’Abafirisiiti!’ Hanyuma, akatandika kusindika enyomyo n’amaani ge goona, akazisindika muno kandi zaatandika kucweka mpora-mpora. Nambere Abafirisiiti baakyetegereriize, enyomyo zikaba zitandikire kucweka kandi ekyombeko kyona kyabagwera! Gunu gwali murundi gw’okumalirra Samusooni kukozesa amaani ge amaingi. Omu kikorwa kimu kyonka, akaita abanyanzigwa ba Ruhanga baingi muno kukira aba akaba aisire omu bwomeezi bwe bwona.
Hanyuma y’ebyasa bingi, omukwenda Paulo obu akaba naabazaaho abasaija ab’okwikiriza okw’amaani, akabazaaho na Samusooni. Paulo akabazaaho abo abakaba bali ‘baceke kandi baafoorwa b’amaani,’ kandi naasobora kuba akaba naateekerezaaho omucwi w’emisango ow’amaani, Samusooni.—Baheb. 11:32-34.
Soma Ebyahandiikirwe ebirukumubazaaho:
Ekyabacwi 13:1–16:31
Kuleeta hamu ebiteekerezo:
Miringo ki Samusooni ei yayolekeremu obumanzi?
Yega Ebirukukiraho
1. Habwaki Samusooni yakwataga ha mitumbi, baitu asigara ali Munaziri? (w05 1/15 30 ¶1–31 ¶1-wcgr)
2. Kiki ekirukwoleka ngu Samusooni akaba naayetaaga omwoyo gwa Ruhanga ogurukwera kusobora kuhimba enyigi hamu n’ebikondo byazo, kuruga Gaza kuhika Hebburooni? (w04 10/15 15 ¶7-8-wcgr) A
Ekisisani A
3. Kiki ekirukwoleka ngu Derira naasobora kuba akaba ali Munyaisaleeri? (w05 3/15 28 ¶3-wcgr)
4. Habwaki Samusooni yasabire Yahwe kwesasuza eriiso limu “h’amaiso ge abiri”? (Bac. 16:28, NWT; it “Samusooni” ¶10-wcgr)
Ebikaguzo eby’Okwecumiitirizaaho
Derira obu yasoonasoonere Samusooni kumugambira ekintu eki akaba atasemeriire kumugambira, Samusooni akaikiriza. Kiki abagurusi hamu n’abakazi baabo eki barukwegera ha kyokurorraho kinu? B
Ekisisani B
Samusooni akakora ensobi ey’amaani, baitu hanyuma, Yahwe akamukozesa omu mulingo ogw’amaani. Kakuba Omukristaayo kasumi kanu akora ensobi, ekyokurorraho kya Samusooni nikisobora kita kumukoonyera kwikara naaheereza Yahwe?
Noosobora ota kwegera ha bumanzi bwa Samusooni?
Eki Birukunyegesa Hali Yahwe n’Ekigendererwa Kye
Isomo linu nirikwegesa ki hali Yahwe?
Ekyokurorraho kinu nikihikaana kita n’ebigendererwa bya Yahwe?
Kiki eki waakugondeze kukaguza Samusooni obu alihumbuuka?
Manya na Binu
Yegesa abaana baawe kumanya ekyafoire Samusooni kuba omu h’abasaija abarukukirayo amaani omu byafaayo.
“Omwoyo Ogurukwera Gukaha Samusooni Amaani” (ijwis-E ekicweka 14)
Masomo ki agandi aga turukwegera ha kyokurorraho kya Samusooni?