Bakahikiiriza Okweraga Okugumire

ENYIKARA omu Isaleeri ekaba egumire muno habwokuba Abaisaleeri bakaba bongiire baaleka kuramya Yahwe. Ekyarugiremu, Yahwe akaleka Abaamoni kubatwaza kubi kumara emyaka nka 18. (Bac. 10:8) Ha kumalirra abantu ba Ruhanga bakaikiriza ebibi byabo, baaleka kuramya baruhanga ab’ebisuba, kandi baagaruka hali Yahwe. Baitu hanyuma y’obwire buke, Abaamoni bakeesorooleza Giriyaadi nukwo batahirre Abaisaleeri.

Abakuru omu Giriyaadi bakasaba omusaija arukwetwa Yefuta kwija kubeebembera omu bulemu. Abanyabuzaale ba Yefuta abamu bakaba nibamutwaza kubi, nahabweki akairuka. Akababiihirirwa, rundi yabaahurra enzigu? Nangwa. Akaikiriza kugaruka omu Giriyaadi kurwana obulemu. Eky’okubanza, akalengaho kugarraho obusinge n’Abaamoni. Yefuta akasindika abatumwa hali omukama w’Abaamoni kusoborra omukama ogu habwaki akaba atarukwikirizibwa kutwara itaka eri akaba naagonza kutwaraho Abaisaleeri. Ebintu Yefuta yabalize bikooleka nkooku akaba amanyire kurungi omulingo Yahwe akaba ahaire Abaisaleeri itaka kandi yabakoonyera kusingura amahanga agakaba gabeetoroire. Omukama w’Abaamoni akanga kuhuliiriza. Akaba acweriiremu kimu kubarwanisa!

Yefuta obu akaba naakyayeteekaniza kurwana, omwoyo gwa Yahwe gukamwijaho. Nahabweki, Yefuta akaba atarukwanguhiriza kukora encwamu rundi kukora ekintu eky’obudoma obu yayeragire hali Yahwe naagamba ati: “Obwolihayo mazima abana ba Amoni omu mukono gwange, nubwo kiriba kiti, eki kyona ekirituruka omu miryango eyenju yange, okuntangirra, obundigaruka nobusinge ndugire omu bana ba Amoni, kiriba kya [Yahwe], kandi ndikihayo nkekihongwa ekyokeze.”

Tugambe ngu Yefuta akaba naamanyisa ngu akaba naija kwokya omuntu? Nangwa. Yahwe yanobaga ekikorwa eky’okuhonga abantu. (Bir. 18:10, 12) Oihireho, Yefuta akaba naamanyisa ngu omuntu weena ayakubandize kuruga omu nju ye, yakufookere wa Yahwe omu mulingo ngu akaba naija kwehayo kumuheereza obwomeezi bwe bwona, obundi ha heema y’okutangatanganiramu omu Siro. Yefuta akaba akimanyire ngu kyakumugumiire kuhikiiriza okweraga kwe. Akaba aine omwana we omu wenka omwisiki. Nikisoboka ngu nuwe yaakubaire muntu w’okubanza kuruga omu nju kumutangirra hanyuma y’okuraga omu bulemu.

Hanyuma y’okweraga, Yefuta akagenda kurwana obulemu. N’obumanzi akeebembera abasaija be omu bulemu. Kandi Yahwe akabakoonyera kusingura! Bakaita abanyanzigwa baabo kandi baahwerekereza embuga 20 ez’Abaamoni.

Yefuta akagaruka omuka asemeriirwe muno. Obundi akaba naanihira ngu omu h’abaheereza be nuwe akaba naija kubanza kuruga omu nju. Baitu eki tinukwo kyabaire. Muhara we nuwe yabandize kuruga omu nju naazina kandi naateera enjogera! Yefuta akataagura ebijwaro bye kandi yarra naagamba ati: “Zimboine! mwana wange! ombundaize muno, ofokere omu hali abo abarukuntuntuza.”

Muhara wa Yefuta akakyetegereza ngu obwomeezi bwe bukaba nibwija kuhindukira kimu, habw’okweraga kwa ise. Akaba naija kuheereza Yahwe omu mulingo ogw’embaganiza obwomeezi bwe bwona. Nahabweki, akaba atarukwija kuswerwa n’okuzaara abaana, kandi eki kikaba kiri kintu ekirukutuntuza muno hali omukazi Omunyaisaleeri. Baitu n’obumanzi, omwisiki onu akagumya ise ati: ‘Okeesamya akanwa kaawe hali Yahwe; nkora nk’eki okukiri ekyarugire omu kanwa kaawe.’ Akasaba ngu aheebwe obwire obw’okuba n’abanywani be, kuganya habwokuba akaba atarukwija kuswerwa rundi kuzaara abaana.

Muhara wa Yefuta akatunga kuhuumuzibwa kandi yasiimwa. Akaba ali omwisiki atarukwegondeza kandi omumanzi. Egi niyo ensonga habwaki buli mwaka, abakazi ab’omu Isaleeri baamubungiraga kumara ebiro bbina kumuhuumuza n’okumusiima! Kandi gukaba mugisa gw’amaani kuheereza Yahwe ha heema. Nikizooka ngu omu kasumi ako, Samwiri ow’akaba akyali mwojo muto nuho akaba naikara. Muhara wa Yefuta akatunga omugisa gw’okutendeka Samwiri n’okumugarramu amaani obu akaba naakura? Titumanyire. Obu araaba yakikozere, nikisobora kuba kyamuleetiire okusemererwa kwingi nkooku akaba ataine abaana. Baitu eki tumanyire nikyo ngu, omu kasumi ako, hakaba haroho ekizibu ky’obusiihani ha heema. (1 Sam. 2:22) Muhara wa Yefuta akeejumbira omu bikorwa ebi eby’obusiihani? Nangwa. Baibuli egamba ngu: ‘Akaba atakateeranaga n’omusaija weena.’

Omukwenda Paulo akabazaaho Yefuta obu akaba naabazaaho abasaija n’abakazi abaayolekere okwikiriza okw’amaani. (Baheb. 11:32) Yefuta na muhara we, bakatuteeraho ekyokurorraho ekirungi eky’obumanzi. Yefuta akarwanirra abantu ba Ruhanga kandi muhara we akamusagika. Boona bakahikiiriza okweraga kwabo hali Yahwe okukaba kugumire!

Soma Ebyahandiikirwe ebirukubabazaaho:

• Ekyabacwi 10:15, 16; 11:1-40

Kuleeta hamu ebiteekerezo:

Miringo ki Yefuta na muhara we ei baayolekeremu obumanzi?

Yega Ebirukukiraho

1. 1. Kiki ekirukwoleka ngu Abaamoni bakaba batarukurwanisa Abaisaleeri bonka, baitu bakaba nibarwanisa n’okuramya okw’amananu? (it “Yefuta” ¶6-wcgr) A

   Eky’okugarukamu kyawe

   

2. 2. Enteekereza ya Yefuta ekaba neesisana eta n’eya Yakobbo obu yakozere okweraga hali Yahwe? (it “Yefuta” ¶11-wcgr)

   Eky’okugarukamu kyawe

3. 3. Habwaki kwali kwefeereza kw’amaani hali Yefuta obu yahikiriize okweraga kwe? (w17.04 4 ¶6)

   Eky’okugarukamu kyawe

4. 4. Nabbi Samwiri akazaarwa nk’omu mwaka gwa 1180 Y.A. Kiki ekirukwoleka ngu uwe na muhara wa Yefuta nibasobora kuba baaheriize ha heema omu bwire nubwo bumu? (it “Yefuta” ¶2-wcgr; Rora ekicweka Akasumi Obu Byabaireho “Kuruga omu Kasumi ka Enoka, Kuhika omu Kasumi ka Samwiri.”)

   Eky’okugarukamu kyawe

Ebikaguzo eby’Okwecumiitirizaaho

• Abazaire kakuba booleka obumanzi nk’obwa Yefuta, nikisobora kukwataho kita abaana baabo?

  Eky’okugarukamu kyawe

• Abakristaayo kasumi kanu nibasobora bata kwegera ha kyokurorraho ky’abakazi abaasiimaga muhara wa Yefuta kandi bamukoonyera kwikara ali mumanzi? B

  Eky’okugarukamu kyawe

  

• Noosobora ota kwegera ha bumanzi bwa Yefuta na muhara we?

  Eky’okugarukamu kyawe

Eki Birukunyegesa Hali Yahwe n’Ekigendererwa Kye

• Isomo linu nirikwegesaki hali Yahwe?

  Eky’okugarukamu kyawe

• Ekyokurorraho kinu nikihikaana kita n’ebigendererwa bya Yahwe?

  Eky’okugarukamu kyawe

• Kiki eki waakugondeze kukaguza Yefuta na muhara we obu balihumbuuka?

  Eky’okugarukamu kyawe

Manya na Binu

Ekyokurorraho kya muhara wa Yefuta nikisobora kukoonyera kita Abakristaayo abatakataahire obuswere?

Tunga Okusemererwa n’Obworaaba Otali omu Buswere (5:15)

Rora omulingo Yefuta na muhara we batwegesa kwikara tuli beesigwa hali Yahwe.

“Kuba Beesigwa Kituleetera Kusiimwa Yahwe” (w16.04-E 5-9)