Omwojo Ayabalize Obutumwa Bwa Yahwe n’Obumanzi

ENYIKARA ya Samwiri ekaba neesisana n’eya muhara wa Yefuta, na Samusooni. Omu mulingo ki? Ebikorwa by’abazaire baabo bikakwataho muno obwomeezi bwabo. Nka muhara wa Yefuta, Samwiri akamara obwomeezi bwe bwona naaheereza Yahwe omu mulingo ogw’embaganiza. (1 Sam. 2:11) Kandi nka Samusooni, Samwiri na uwe akaba ali Munaziri obwomeezi bwe bwona. (Bac. 13:7) Kandi nka Samusooni, Samwiri na uwe akaba naayetaaga obumanzi.

Samwiri obu yacuukire aine emyaka nk’esatu rundi kukiraho, nyina arukwetwa Hana akamutwara kuheereza Yahwe ha heema y’okutangatanganiramu omu Siro, nkooku akaba araganiize Yahwe. Baitu Hana, akagumizaamu naabungira mutabani we buli mwaka ha heema y’okutangatanganiramu kandi yamuleeteraga ekijwaro ekihyaka. Samwiri akakurra ha heema ey’okutangatanganiramu obu ali hansi y’oburoleerezi bwa nyakatagara omukuru arukwetwa Eri, ow’akaba agurusire.

Nihasobora kuba hakaba haroho abakazi abarolerraga Samwiri, baitu nabwo abantu bakaba nibakora ebintu ebibi muno ha heema y’okutangatanganiramu kandi Eri atabahane. Batabani be babiri, Hofuni na Fenehaasi, bakaba bali basaija babi muno. Bakaba nibeejumbira omu busiihani n’abakazi abamu abaaheerezaaga ha heema. Kandi bakaba nibasiisa okuramya okw’amananu omu miringo endi. Nikizooka ngu abantu obu baaleetaga ebintu byabo ha heema y’okutangatanganiramu, Hofuni na Fenehaasi baaragiraga abarukuheereza ha heema kwiba ebicweka ebirungi eby’ebihongwa omu kiikaro ky’okubihongera Yahwe. Eri akaba amanyire kurungi batabani be eki bakaba nibakora. Baitu atakole ekirukumara kubahana, kandi obu yabazaaga na bo, tibamuhuliirizaaga. Noobu kiraaba ngu Samwiri akaba ayetooroirwe abantu abarukukora ebikorwa binu ebibi, akagumizaamu naasiimwa omu maiso ga Ruhanga n’abantu. Akasumi obu kaahikire Yahwe kutereekereza ensonga omu Siro, akakomamu Samwiri ow’akaba ali muto, kukora nka kagambigambi we.

Kiro kimu, omu bwire bw’ekiro, Samwiri akaimuka habwokuba akahurra iraka nirimweta. Yahwe nuwe akaba naamweta. Baitu Samwiri akateekereza ngu Eri nuwe akaba naamweta, nahabweki akaimuka yagenda nambere akaba ali kumanya eki akaba naamwetera. Eri ow’akaba agurusire muno kandi afiire amaiso, akagambira Samwiri kugarukayo kubyama habwokuba tali nuwe akaba amwesere. Ekintu nikyo kimu kikongera kyabaho emirundi ebiri. Ha kumalirra, Eri akeetegereza ekikaba kiroho kandi yamugambira agarukeyo abyame. Akongera yagambira Samwiri ngu kakuba Yahwe ayongera kumweta, agarukemu ati: “Gamba [Yahwe]; baitu omwiru wawe nahurra.” Eki nikyo Samwiri yakozere.

Yahwe akongera yayeta Samwiri omurundi ogwa kana naagamba ati: “Samwiri, Samwiri!” Omwojo yagarukamu ati: “Gamba; baitu omwiru wawe nahurra.” Hanyuma, Yahwe akabaza na uwe, yamugambira ngu akaba naija kutereekereza ensonga omu Siro, kandi ngu Eri akaba naija kufubirwa habw’okulemwa kuhana abaana be. Yahwe akaba amazire ira kumucwera omusango otwaliiremu na batabani be ababi. Ebintu binu byona, Samwiri akaba asemeriire kubigambira Eri!

Samwiri akongera yabyama, baitu Baibuli tetugambira obu araaba yayongiire kugwijagira. Obwire obu bwakiire, akaimuka yagenda kukingura enyigi eza ha mulyango ogurukugenda omu zigati y’eheema. Hataroho kugurukyagurukya, ‘Samwiri akatiina okumanyisa Eri okwolekwa.’ Eri akeeta omwojo yamukaguza Ruhanga ebi akaba amugambiire. Nikizooka ngu akakyetegereza nkooku Samwiri akaba atiinire. Nahabweki akamugambira ati: “Nkwesengeriize oleke okukinsereka.”

Hataroho kugurukyagurukya, ekintu kinu kikagumira muno Samwiri. Akaba naatamu Eri ekitiinisa nk’eki yaakubaire naatamu isenkuru. Ekindi, Samwiri akaba naatamu Eri ekitiinisa habwokuba akaba ali nyakatagara omukuru ow’ihanga lya Isaleeri! Baitu nabwo, ‘Samwiri akamugambira byona.’ Eri akakyetegereza ngu akabi kakaba kamwiziire. Eri noobu yahuliire ebintu ebi, akahana abaana be? Busaho obwakaiso bwona oburukwoleka ngu akakikora.

Yahwe akaha Samwiri emigisa nyingi habw’okwoleka obumanzi. Baibuli egamba eti: ‘Yahwe akaba ali na uwe.’ Kandi Ruhanga akatandika kubaza n’abantu be naakozesa Samwiri kandi ‘ataleke ebigambo bya Samwiri kulemwa kuhikirra.’ Ebigambo byona ebirukukwata hali Eri na batabani be, Samwiri ebi yabalize bikahika byahikirra. Kandi hanyuma y’emyaka nyingi, Yahwe akakozesa Samwiri kuhabura ihanga lya Isaleeri n’okuliha oburagirizi. Samwiri akamara emyaka nyingi naahereza Yahwe n’obwesigwa nka nabbi kandi nk’omucwi w’emisango. Akaba ayegere kwoleka obumanzi ha myaka ye ey’obuto kandi akagumizaamu naabwoleka omu bwomeezi bwe bwona.

Soma Ebyahandiikirwe ebirukumubazaaho:

• 1 Samwiri 1:9-11, 24-28; 2:12-36; 3:1-21; 25:1

• Abahebburaniya 11:32

Kuleeta hamu ebiteekerezo:

Miringo ki emu Samwiri ei yayolekeremu obumanzi?

Yega Ebirukukiraho

1. 1. Soborra ebirukukwata ha kiikaro nambere eheema ya Yahwe ey’okutangatanganiramu ekaba eri. (w92 11/1 8-9-wcgr) A

   Eky’okugarukamu kyawe

   

   Todd Bolen/BiblePlaces.com

2. 2. Obwomeezi bwa Samwiri bukaba nibusisana buta, obu akaba ali ha heema y’okutangatanganiramu? (ia 60-62 ¶9-13-wcgr) B

   Eky’okugarukamu kyawe

   

3. 3. Samwiri obu akaba akyali muto, ‘akaba atakamanyire Yahwe’ omu mulingo ki? (1 Sam. 3:7; w02 12/15 8 ¶5-6-wcgr)

   Eky’okugarukamu kyawe

4. 4. Obunabbi oburukukwata ha ka ya Eri bukahikirra buta? (it “Eri, I” ¶5-7-wcgr)

   Eky’okugarukamu kyawe

Ebikaguzo eby’Okwecumiitirizaaho

• Kiki abato eki barukwegera hali Samwiri obukirukuhika ha bukuru . . .

  • obw’okuba bahulizi? (1 Sam. 3:5)

    Eky’okugarukamu kyawe

  • obw’okutamu abandi ekitiinisa? (1 Sam. 3:6-10)

    Eky’okugarukamu kyawe

  • obw’okuba abantu abarukwesigwa? (1 Sam. 3:15) C

    Eky’okugarukamu kyawe

    

• Ni di obu kisobora kwetaagisa abato kutunga obumanzi bw’okubaza, kandi ekyokurorraho kya Samwiri nikisobora kubakoonyera kita?

  Eky’okugarukamu kyawe

• Miringo ki endi ei osobora kwegera ha bumanzi bwa Samwiri?

  Eky’okugarukamu kyawe

Eki Birukunyegesa Hali Yahwe n’Ekigendererwa Kye

• Isomo linu nirikwegesa ki hali Yahwe?

  Eky’okugarukamu kyawe

• Ekyokurorraho kinu nikihikaana kita n’ebigendererwa bya Yahwe?

  Eky’okugarukamu kyawe

• Kiki eki waakugondeze kukaguza Samwiri obu alihumbuuka?

  Eky’okugarukamu kyawe

Manya na Binu

Nyikara ki ezisobora kwetaagisa abato n’abakuru kwoleka obumanzi obw’okukora ekihikire?

Yegera ha Kyokurorraho Kyabo​—Samwiri (4:53)

Samwiri ow’akaba akyali muto, akakora encwamu enungi, noobu kiraaba ngu abantu abakaba bamwetooroire tibaatamuga Ruhanga ekitiinisa.

“Samwiri Acwamu Kuheereza Yahwe” (ijwis ekicweka 15-wcgr)