Akaba Mumanzi Kandi Mwekengi

OMUNTU omumanzi kimwetaagisa kuba mwekengi. Obu aba omwekengi, tayeyesiga ekihinguraine rundi tateeka obwomeezi bwe omu kabi nambere kitarukwetaagisa. Gidiyooni akaba ali mumanzi kandi mwekengi. Akabaho omu kasumi nambere Isaleeri ekaba eyongiire kuhuguka kuruga hali Yahwe. Habw’ensonga egi, Yahwe akaikiriza Abamidiani kubataahirra, kubabonabonesa, n’okubalemesa kugesa emisiri yabo. Baitu Gidiyooni atatiine kandi yaikara naakora kusobora kuhikyaho abantu be ebyokulya. Baitu nabwo, akakikora n’obwekengi. Akaba ayeserekere omu ijungiro ly’eviini erikaba liswekerwe ibaale erikooto, nahabweki Abamidiani bakaba batasobora kumurora.

Abaisaleeri bakeegarukamu kandi baasaba Yahwe obukoonyezi. Nahabweki, akasindika nabbi kubaijukya ensonga habwaki akaba abalekereho, kandi hanyuma yasindika malaika kugambira Gidiyooni nkooku akaba amukomere kujuna abantu be. Gidiyooni akasaba malaika akorurorraho akarukwoleka ngu Yahwe nuwe amutumire. Malaika akaikiriza kandi omu mulingo ogw’ekyamahano, yakozesa omurro kwokya ekihongwa Gidiyooni eki akaba ateekaniize. Hanyuma y’eki, Malaika akaburaho. Omu bwire bw’ekiro, Yahwe akagambira Gidiyooni kuseesa ekyoto kya Bbaali hamu n’enyana eyaramibwaga, hanyuma ayombekere Yahwe ekyoto, kandi amuhongere ekihongwa. Gidiyooni akaikiriza oburagirizi obu, baitu habwokuba akaba naatiina ise hamu n’abasaija ab’omu rubuga, akacwamu kukikora omu bwire bw’ekiro nukwo abantu batamurora.

Hanyuma ya Gidiyooni kukora ebikorwa binu eby’obumanzi, Abamidiani, Abamereki, hamu n’Abantu ba Burugaizooba, bakeesorooza hamu baakora ihe ry’amaani baataahirra Abaisaleeri. Bakaba baingi muno, baijuza ekihanga kya Yezereeri nibasisana nk’enzige nyingi. Omwoyo gwa Yahwe gukaija hali Gidiyooni, yasindika abatumwa hali enganda za Isaleeri ezirukukira obwingi naazeekambisa kwija kumukoonyera omu kurwana. Baitu habwokuba Gidiyooni akaba ali mwekengi, akasaba Yahwe amukorre ebyamahano bibiri, ebiramugumya ngu mali naamusagika. Yahwe akagumiisiriza Gidiyooni kandi yakora eki akaba amusabira. Omu bwire obu obw’ekiro, Gidiyooni akaleka aheeru ebyoya by’entaama kandi Yahwe yabireetera kujuba n’orume baitu itaka likaikara lyomere. Obwire bw’ekiro obwahondiireho, Yahwe akaleetera ebyoya kwikara byomere baitu itaka likaba lijubire n’orume.

Ebyamahano ebi bibiri, bikagarramu Gidiyooni amaani, kandi yayebembera ihe like ery’abasaija 32,000 kugenda kurwanisa omunyanzigwa ow’akaba aine ihe ly’abasaija 135,000. Abaisaleeri obu bakaba bataire enkambi yabo haihi n’Ensoro y’Amaizi eya Harodi, Yahwe akagambira Gidiyooni ngu ihe lye likaba liri likooto muno! Yahwe akaragira Gidiyooni kugambira abasaija boona abakaba batiinire kugaruka omuka. Hakasigaraho abasaija 10,000 gwonka. Baitu Yahwe akagambira Gidiyooni ngu ihe rye likaba likyali likooto muno. Nahabweki, akamugambira kwetegereza abasaija be obu bakaba nibanywa amaizi. Abaserikale abaatiize amaju, kandi baanywa amaizi nibakozesa eminwa yabo, bakaragirwa kugaruka omuka. Baitu abaserikale abamu bakaba beekengi, bakainama hansi kandi baakozesa emikono yabo kunywa amaizi obu nibeetegereza ebintu ebikaba bibeetoroire. Abaserikale abo abeekengi nubo abakomerwemu kurwana. Hati, Gidiyooni akaba asigaize abaserikale 300 bonka!

Noobu kiraaba ngu Gidiyooni akaba aine abaserikale bake, akaba mumanzi kandi yayeteekaniza kurwana. Yahwe akongera yamuha obwakaiso oburukugumya ngu akaba ali hamu na uwe. Akagambira Gidiyooni kugenda mpora-mpora omu nkambi y’abanyanzigwa omu bwire bw’ekiro. Eki nikyo Gidiyooni yakozere. Akahurra omuserikale naarootorra mugenzi we ekirooto ekirukwoleka ngu Isaleeri ekaba niija kusingura obulemu. Gidiyooni akeesiga ngu Yahwe naija kumukoonyera, yagaruka hali abasaija be kandi yabaha oburagirizi oburukukwata ha mulingo bakaba nibaija kusingura obulemu. Akabagambira ati: ‘Mundole kandi mukole kyonyini eki ndaakora.’ Gidiyooni n’abasaija be bakeehinguliiriza enkambi y’abanyanzigwa omu bwire bw’ekiro. Abasaija bakaba bakwasire ensoha enkooto, emuli, hamu n’amahembe. Gidiyooni obu yabahaire akokurorraho, bakahuuha amahembe kandi bayata ensoha. Hanyuma, bakatokera haiguru nibagamba ngu: ‘Busitama ya Yahwe n’eya Gidiyooni!’ Iraka ery’amaani eri bakaba batarukunihira hamu n’ekyererezi bikaleetera abanyanzigwa kuteekereza ngu bakaba babeehinguliriize kandi ngu ihe ery’amaani likaba libataahiriire. Bakatiina muno kandi baburangana! Hanyuma, Yahwe akabaleetera kurwanisangana kandi baitangana. Abantu nka 15,000, nubo baakizireho kandi bairuka.

Gidiyooni akabahambya kandi ha kumalirra yasingura Abamidiani, yaita n’abeebembezi baabo. Ekindi, akafubira abo abaayangire kumukoonyera, uwe n’abasaija be, obu bakaba nibarwanisa abanyanzigwa ba Yahwe. Hanyuma, abantu bakalengaho kufoora Gidiyooni omukama wabo. N’obwebundaazi akanga kandi yabagambira ati: “[Yahwe] nuwe alibalema.” Yahwe akaha omugisa omusaija ogu omwekambi kandi omwekengi. Gidiyooni akeegondeza omu businge obu akaba naalema nk’omucwi w’emisango omu Isaleeri, kandi yayomeera emyaka nyingi. N’omukwenda Paulo akamubazaaho nk’omu h’abasaija n’abakazi abaayolekere okwikiriza okw’amaani.—Baheb. 11:32.

Soma Ebyahandiikirwe ebirukumubazaaho:

• Ekyabacwi 6:1–7:22; 8:4-23, 28

Kuleeta hamu ebiteekerezo:

Miringo ki Gidiyooni ei yayolekeremu obumanzi?

Yega Ebirukukiraho

1. 1. Habwaki “omugati ogwa sayiri” omuserikale ogu yarozere omu kirooto gukaba nigukiikirra kurungi ihe lya Gidiyooni? (Bac. 7:13; it “Sayiri” ¶7-wcgr)

   Eky’okugarukamu kyawe

2. 2. Habwaki amaraka g’amahembe 300 gaaburaabulize Abamidiani kandi gaabatiinisa? (it “Ihembe” ¶3-wcgr) A

   Eky’okugarukamu kyawe

   

3. 3. Kiki Gidiyooni n’ihe rye eki bakaba basemeriire kukora kusingura Abamidiani? (w04 10/15 16 ¶9-10-wcgr) B

   Eky’okugarukamu kyawe

   

4. 4. Bwakaiso ki obuli omu Baibuli oburukwoleka ngu ebintu ebirukubazaaho Gidiyooni bihikire? (w05 4/15 32-wcgr)

   Eky’okugarukamu kyawe

Ebikaguzo eby’Okwecumiitirizaaho

• Gidiyooni akahikya abantu ba Ruhanga ha businguzi. Baitu akaikara ali mwebundaazi kandi yabaliza abandi omu mulingo gw’obusinge. (Bac. 8:1-3) Banyineeka hamu n’abagurusi, nibasobora bata kwegera hali Gidiyooni kakuba omuntu abiihirwa habw’ekintu eki bakozere?

  Eky’okugarukamu kyawe

• Nyikara ki ezisobora kutwetaagisa kwoleka obumanzi n’okuba abeekengi? C

  Eky’okugarukamu kyawe

  

• Noosobora ota kwegera ha bumanzi bwa Gidiyooni?

  Eky’okugarukamu kyawe

Eki Birukunyegesa Hali Yahwe n’Ekigendererwa Kye

• Isomo linu nirikwegesa ki hali Yahwe?

  Eky’okugarukamu kyawe

• Ekyokurorraho kinu nikihikaana kita n’ebigendererwa bya Yahwe?

  Eky’okugarukamu kyawe

• Kiki eki waakugondeze kukaguza Gidiyooni obu alihumbuuka?

  Eky’okugarukamu kyawe

Manya na Binu

Kakuba otunga obujunaanizibwa, noosobora ota kwegera hali Gidiyooni?

‘Amagezi Gaba n’Abaculeezi’ (w00 8/1 16-18 ¶11-15-wcgr)

Kozesa oruganikyo runu kuruga omu Baibuli oruli omu mulingo gw’ebisisani kukoonyera abaana baawe kwesiga Ruhanga.

“Yahwe Akakoonyera Gidiyooni Kuba Mumanzi” (ijwis ekicweka 13-wcgr)