17 YAYEERI
‘Ali w’Omugisa Okukira Abakazi’
SISERA akairuka yaruga omu kyeya kya Yezereeri kandi yasigayo abasaija be, bafe bonka. Kikamugumira muno kukiikiriza ngu ihe rye ery’amaani erikaba lirumu ebigaali 900 eby’okurwanisa, likaba lisingwirwe amahe ga Isaleeri agakaba gaine eby’okurwanisa bike kandi agataine bigaali. Hati Sisera akaba naaserra ekiikaro nambere araayesereka. Akagenda omu heema ya Hebberi Omukeni.
Kutwarra hamu, Abakeni bakaba bali banywani ba Baisaleeri. Obunywani bwabo bukatandikira omu biro bya Musa, ayaswire omukazi omu Bakeni. Abakeni baikaraga omu nsi ya Isaleeri. Baitu Hebbere akaba naayahukana hali Abakeni abandi. Omu kiikaro ky’okukora obunywani n’Abaisaleeri, akacwamu kweteeranizaaho Omukama w’Abakanani Yabbini. Nahabweki, habwokuba Sisera akaba ali mukuru w’ihe lya Yabbini akateekereza ngu naasobora kutunga obulinzi omu heema ya Hebbere. Nikizooka Sisera akongera yateekereza ngu Yayeeri muka Hebbere na uwe akaba aine enteekereza nk’eya iba, ey’okutakoonyera Abaisaleeri, baitu akaba atahikire.
Yayeeri akaba ali omu heema, iba obu akaba ataroho. Obu yarozere Sisera, ahonaaho akateekerezaaho eki asemeriire kukora. Akaba amanyire Sisera, kandi nkooku akaba ali musaija omubi muno. Akaba atakimanyire ngu nabbi wa Yahwe omukazi Debbora, akaba agambire ngu Sisera naija kwitwa omukazi. Baitu nabwo, nikizooka ngu Yayeeri akaba atamanyire Yahwe eki arukugonza akole. Habwaki nitugamba tuti?
Hanyuma, Debbora akatereekerezebwa omwoyo ogurukwera kuzina ekizina ekikaba nikibazaaho omulingo Bbaraka yasingwire Sisera. Omu kizina eki, akagamba ati: “Aliba nomugisa Yayeeri okukira abakazi, Mukazi wa Hebere Omukeni, Aliba nomugisa okukira abakazi omu hema.” Nahabweki, Yayeeri akaba atali mukazi omubiihi w’ebisuba, kandi akaba atali mubi nk’abantu abamu oku barukuteekereza. Oihireho, akaba ali murwani omumanzi omu bulemu bwa Yahwe. Kusisana na Rahabbu, na uwe akacwamu kusagika Yahwe omu kiikaro ky’okusagika abanyanzigwa be. Yayeeri akaba akimanyire ngu Sisera akaba ali munyanzigwa wa Yahwe kandi akaba akimanyire nkooku Yahwe akaba naagonza aitwe, kandi hati akaba atungire omugisa. Baitu hati, akaba naija kukikora ata?
Yayeeri akaba akimanyire ngu akaba ataine amaani g’okurwanisa Sisera naakozesa emikono. Sisera akaba amazire akasumi kaingi ali murwani kandi akaba aine amaani. Nahabweki, Yayeeri akamuraaliza kutaaha omu heema ye kumuha eky’okunywa n’okuhuumuraho. Obu yataahiremu, akamusweka bbulangiti. Sisera obu yamusabire amaizi, akamuhamu amata. Akagambira Yayeeri kwemerra ha mulyango gw’eheema kandi abiihe omuntu weena ayaakumukagwize, omu heema, obu haraaba harumu omusaija. Hanyuma, Sisera akagwijagira.
Yahwe akakoma omukazi kwita omurwani omubi
Yayeeri akakyetegereza ngu akasumi ak’okugira eki yakoraho kakaba kahikire. Akakozesa enyondo hamu n’enkondo y’eheema ey’ekaba esongoire ebisobora kuba bikaba bikozerwe omu kiti kandi nibyo asobora kuba yakozesaaga omu mirimo ye eya buli kiro. Akasoobasooba, yairra haihi n’omurwani onu ow’amaani ow’akaba agwijagiire. Akainama haihi n’omutwe gwe ayeteekaniize kumucumita. Kakuba yacumisire ha rubaju, Sisera akaba naija kusisiimuka kandi amwite omu mulingo omubi muno. Baitu Yayeeri atakole ensobi. Omu kaire kake, Sisera akaba amazire kufa kandi enkondo y’eheema ey’esongoire ekaba emuli omu kanenero!
Hanyuma y’akaire, Omucwi w’Emisango Bbaraka akaija naahambya Sisera. Yayeeri akaturuka aheeru kumutangatangana. Akamugambira ati, “Ija, nkwoleke omuntu oworukuserra.” Bbaraka akataaha omu heema kandi yarora ngu ebigambo bya Debbora eby’obunabbi bikaba bihikiriire. Debbora akaba agambire ati: ‘Yahwe alihayo Sisera omu mukono gw’omukazi.’
Bbaraka na Debbora bakazina ekizina eky’obusinguzi nibahaisaniza Yayeeri. Hanyuma y’ebi, Yayeeri atongere kubazibwaho omu Baibuli. Hati noobu haraaba harabireho emyaka ey’erukuhingura omu 3200, nitukyayegera ha kyokurorraho kye ekirungi. Kasumi kanu abaheereza ba Ruhanga tibarwana obulemu nibakozesa eby’okurwanisa byonyini. Baitu nabwo, tuli omu bulemu, kandi obulemu obw’eby’omwoyo. Kandi hati nitwetaaga obumanzi nk’obwa Yayeeri kukira na kara .
Soma Ebyahandiikirwe ebirukumubazaaho:
Ekyabacwi 4:9, 11, 17-22; 5:24-31
Kuleeta hamu ebiteekerezo:
Miringo ki Yayeeri ei yayolekeremu obumanzi?
Yega Ebirukukiraho
1. Kakwate ki akali hagati y’obulemu bwa Sisera n’obulemu bwa Amagedoni? (w19.09 8-9 ¶3-6)
2. Iba Yayeeri arukwetwa Hebbere, akeeteranizaaho abanyanzigwa ba Isaleeri Abakanaani. Baitu Hebbere akaba aine kakwate ki n’Abaisaleeri? (it “Hebbere” Na. 2-wcgr)
3. Obusinguzi bwa Isaleeri hali Sisera na Yabbini, bukagumya buta okwikiriza kw’abantu ba Ruhanga hanyuma y’okurabaho emyaka nyingi? (w08 10/15 14-15 ¶12-15-wcgr)
4. Kiki ekirukusemeza ha mulingo Debbora yahaisanizeemu Yayeeri, kandi kinu nikitwegesa ki? (w15 8/1 15 ¶3-wcgr) A
Ekisisani A
Ekisisani A
Ebikaguzo eby’Okwecumiitirizaaho
Kusisana na Yayeeri ow’akaba naayetaaga obumanzi, nyikara ki ezisobora kwetaagisa munyaanya itwe ow’aine omusaija ow’aturukuheereza Yahwe, kwoleka obumanzi?
Yayeeri akaba atali nabbi omukazi nka Debbora kandi akaba atali murwani nka Bbaraka. Baitu nabwo, akakora kyona eki akaba naasobora. Obu tuba tuli omu nyikara ey’etarukutusobozesa kukora eki twakugondeze, nitusobora tuta kwegera ha mulingo Yayeeri yayetwaizeemu? B
Ekisisani B
Miringo ki endi ei tusobora kwegera ha bumanzi bwa Yayeeri?
Eki Birukunyegesa Hali Yahwe n’Ekigendererwa Kye
Isomo linu nirikwegesa ki hali Yahwe?
Ekyokurorraho kinu nikihikaana kita n’ebigendererwa bya Yahwe?
Kiki eki waakugondeze kukaguza Yayeeri obu alihumbuuka?
Manya na Binu
Omu vidiyo enu, rora omulingo ekyokurorraho kya Yayeeri kyekambisa munyaanya itwe omuto kuha obwakaiso.
Yayeeri ali omu h’abakazi abaatuteeriireho ekyokurorraho ekirungi ekitusobora kwegeraho amasomo amakuru. Somaho bamu hali bo.
“Abakazi Abarukubazibwaho omu Baibuli—Kiki Eki Tusobora Kubeegeraho?” (ijwbq ekicweka 161-wcgr)