16 BBARAKA NA DEBBORA
“Mananukwo Ndigenda Naiwe”
KAKABA kali kasumi akagumangaine omu Isaleeri. Abantu bakaba bajeemiire Yahwe. Nkooku Yahwe akaba abateereriire, akaleka abanyanzigwa baabo babasingura. Omukama Yabbini owa Kanaani nuwe akaba naalema. Akaba aine mukuru w’ihe rye arukwetwa Sisera, ow’akaba aine ekiniga kingi. Akaba aine ihe ery’amaani otwaliiremu n’ebigaali 900, ebikaba biroho eby’okurwanisa eby’ebyoma.
Kumara emyaka 20, ihe lya Sisera lyatiinisirizaaga muno Isaleeri. Nikizooka ngu ihe linu, obu lyataahirraga ekicweka rundi orubuga, baakwataga abakazi babatwara omu bunyagwa kandi babahamba. Habw’ebintu binu ebibi ebyabahoga, abantu baatinaga kuraba omu nguudo kandi bairukaga omu byaro nibagenda kwikara omu nsozi. Abasaija Abaisaleeri abarukukira obwingi bakaba bataine eby’okurwanisa, nahabweki bakaba batasobora kwerwanaho.
Omu kasumi ako, omukazi omumanzi arukwetwa Debbora akaba naaheereza nka nabbi wa Yahwe. Yacwaga n’emisango ey’egumire, abantu ei baamuleeteraga. Yahwe akakozesa Debbora kuha omusaija arukwetwa Bbaraka oburagirizi, ou akaba akomere kujuna abantu be. Teekerezaaho omulingo Bbaraka yahuniriire, Debbora obu yamugambiire ngu Yahwe naagonza asorooze ihe ery’abasaija 10,000 kandi agende na bo ha Rusozi Tabbora. Yahwe akaba naija kumukoonyera kusingura Sisera n’ihe rye!
Bbaraka akakwatwa ekiniga n’emyehembo, ngu habwokuba akatunga oburagirizi kuraba omu mukazi? Nangwa. Oihireho, n’obwebundaazi akagamba ngu naija kugenda ha Rusozi Tabbora kakuba Debbora aikiriza kugenda na uwe. Kinu kikaba kitarukwoleka ngu taine okwikiriza. Hanyuma y’emyaka, omukwenda Paulo akamubazaaho obu akaba naabazaaho abasaija n’abakazi abakaba baine okwikiriza okw’amaani. (Baheb. 11:1, 2, 32) Bbaraka akaba naayoleka okwikiriza obu yasabire Debbora kugenda na uwe hamu n’abasaija be. Akaba akimanyire ngu Yahwe akaba naakozesa Debbora kandi akaba naagonza oburagirizi oburukukiraho kuruga hali Yahwe. N’obumanzi, Debbora akaikiriza kugenda na uwe kandi yagamba ati: “Mananukwo ndigenda naiwe.” Ekindi, akagambira Bbaraka ngu, noobu kiraaba ngu akaba naija kusingura obulemu, busaho muntu weena noobu yaakuba Bbaraka ayaakwisire Sisera. Obujunaanizibwa obu, Ruhanga akaba naija kubuha omukazi.
Ahonaaho Bbaraka akaikiriza kukora Yahwe eki yamugambiire. Akasorooza abasaija abamanzi abarukwingana 10,000, kandi noobu kiraaba ngu bakaba baine eby’okurwanisa bike, Yahwe akabakoonyera kweteekaniriza obulemu. Akasorooza ihe linu kandi yalitwara ha Rusozi Tabbora. Orusozi oru orurukusangwa ha kyeya ekya Yezereeri, ruraihire mita nka 562 (fuuti 1,844), kandi nirusisana nk’ebbakuli enyakujumikirwe. Ha rusozi oru, Debbora, Bbaraka, hamu n’abasaija be, bakaba nibasobora kurorra hara Sisera n’ihe rye hamu n’ebigaali byabo, obu bakaba nibaija kubataahirra.
Kiki Bbaraka eki yaakukozere? Abeebembezi b’amahe abarukukira obwingi baakulinzire Sisera n’ebigaali bye babanze bahike ha Rusozi Tabbora. Ebigaali obu birukuba nibitemba orusozi bigenda mpora kandi eki kyakuleetiire Bbaraka n’abasaija be kwanguhirwa kurwanisa Sisera n’ihe rye. Bbaraka akaba naakigumiza kimu ngu obulemu tibuli bwe, baitu bwa Yahwe. Nahabweki, akahuliiriza Debbora. Kuraba omuli nabbi omukazi Debbora, Yahwe akaragira Bbaraka kwimuka arwanise Sisera! Bbaraka n’abasaija be, n’obumanzi bakasirimuka orusozi kandi baagenda kurwanisa Sisera n’ihe rye hamu n’ebigaali byabo ebirukutiinisa!
Omucwi w’emisango hamu na nabbi omukazi bakaba baine kurwanisa omukuru w’ihe ow’ekiniga hamu n’ihe rye erikaba liine ebigaali ebiroho eby’okurwanisa
Kusigikirra hali Bbaraka n’ihe rye, kikaba nikizooka nk’ekitarukusoboka kusingura Sisera. Baitu Yahwe akarora obumanzi bwabo kandi yabaha omugisa. Akaburanganiza ihe ly’Abakanaani. Yahwe akanaga enjura ey’amaani muno. Ekihanga kyona kikaijura amaizi n’ebisaabu, kandi ebigaali bya Sisera n’ihe rye byakwamira omu bisaabu. Nahabweki, bakaba baine kuruga ha bigaali byabo, barwanise abaserikale Baisaleeri maiso h’amaiso. Ebigaali bikaba bitakyakoonyera ihe lya Sisera. Abaserikale ba Sisera boona bakaitwa. Kiki ekyahikire hali Sisera?
Sisera akasobora kwiruka obu naaraba omu bisaabu. Akatiina muno kandi yairuka yasigaho abasaija be. Baitu Bbaraka akamuhondera. Yahwe akaba naarora buli kimu ekikaba nikibaho. Akaba amazire kucwamu ngu Sisera, naija kuhwerekerezebwa.
Soma Ebyahandiikirwe ebirukubabazaaho:
Ekyabacwi 4:1-16, 23, 24; 5:1-23
Kuleeta hamu ebiteekerezo:
Miringo ki Bbaraka na Debbora ei baayolekeremu obumanzi?
Yega Ebirukukiraho
1. Obwomeezi bw’Abaisaleeri bukaba buli buta Sisera obu akaba naabatwaza kubi? (w15 8/1 13 ¶1-wcgr)
2. Habwaki Debbora atabazibwaho omu bacwi b’emisango 12 abaaheeriize omu Isaleeri, Samwiri atakafookere nabbi? (w86 6/1 31 ¶6-8-wcgr)
3. Debbora akaba ali ‘nyina Isaleeri’ omu mulingo ki? (Bac. 4:4, 5; 5:7; w15 8/1 13 ¶2-wcgr) A
Ekisisani A
Ekisisani A
4. Debbora na Bbaraka bakamanyisa ki obu baazinire bati “Enyunyuzi omu ngendo zazo zikarwana na Sisera?” (Bac. 5:20; w05 1/15 25 ¶5-wcgr)
Ebikaguzo eby’Okwecumiitirizaaho
Ni di ow’oruganda obu asobora kwegera ha kyokurorraho kya Bbaraka eky’obwebundaazi obu yaikiriize obukoonyezi bw’omukazi omwesigwa? B
Ekisisani B
Habwaki Debbora akaba naayetaaga obumanzi kugenda na Bbaraka? Ni di obu turukwetaaga obumanzi nka bunu?
Miringo ki endi ei tusobora kwegera ha kyokurorraho kya Bbaraka na Debbora?
Eki Birukunyegesa Hali Yahwe n’Ekigendererwa Kye
Isomo linu nirikwegesa ki hali Yahwe?
Ekyokurorraho kinu nikihikaana kita n’ebigendererwa bya Yahwe?
Kiki eki waakugondeze kukaguza Bbaraka na Debbora obu balihumbuuka?
Manya na Binu
Rora omulingo ekyokurorraho kinu kirukutugumya ngu Yahwe naasiima amaani tutamu kumuheereza.
“Leka Omutima Gwawe ogw’Okwehayo Guletere Yahwe Kukugizibwa!” (w17.04 28-32)
Ekyokurorraho kya Bbaraka na Debbora nikitwegesa ki obukirukuhika ha bwesigwa, obuculeezi, hamu n’obuhulizi?
“Habw’Okwikiriza, Bbaraka Akasingura Ihe ery’Amaani” (w03 11/15 28-31-wcgr)