A “Nungungulu wa lisine” contlhe cikhati wa tatisa zvitsumbiso zvakwe

1. Hi kuya hi Lisimu 31:2-5, hikuyini hi nga mu tsumbako Jehovha?

HI HANYA ka tiko gi fumiwako hi Sathani lomu a mawunwa, ni kukanganyisa ni kukhohlisa zvi tatileko tiko. Zva karata ku tiva ku u ta tsumba mani, hakuva a vamahi va mabhindzu va kanganyisana hi civona, a vamahi va mapublisidhadhe va kanganyisa vaxavi hi ku nga va byeli lisine xungetano hi lezvi va xavisako niku a vokari a va tiyi ku va byela zvihundla zvabye a vanghana vabye va hombe hi ku chava ku va zvi haxa. Kanilezvi a zvo ku tiyisa a ku tiva lezvaku contlhe cikhati hi nga tsumba Jehovha, hakuva i “Nungungulu wa lisine”. (Lera Lisimu 31:2-5.) Jehovha a nga tshuki a hemba. Hikwalaho, hi nga tiyiseka lezvaku ni cihi a wulako i ta ci maha.

2. Zvini hi to bhula hi zvona ka ndzima leyi?

² Ka ndzima leyi, hi ta sangula hi ku bhula hi zvigelo zvo kari zvi hi mahako hi tsumba Jehovha hi mbilu yontlhe. Hi kulandzela, hi ta wona lezvi a Nungungulu wa lisine a to gi fuvisisa zvona a tiko legi go biha ga Sathani ni lezvi a mahako zvezvi kasi ku tatisa kungo Gakwe. A ndzima leyi yi ta hi vhuna ku hi tiya hlanha laha hi bhulelako van’wani a lisine xungetano hi Jehovha.

HIKUYINI HI NGA TSUMBAKO JEHOVHA?

3. Hikuyini hi nga tsumbako Jehovha hi kumbhelela?

³ Hi nga tsumba Jehovha hakuva hi yena Muvangi. Hi yena a nga vanga matilo ni misava niku hi yena Cibuka ca wutomi. (Gen. 1:1; Lis. 36:9; Kuv. 4:11) Hi yena kambe a nga hi nyika zvontlhe zvi lavekako kasi hi hanya. Hi cikombiso, hi yena a nga maha moya lowu hi hefemulako ni mati lawa hi nwako. Hi yena a wonelelako zvilo zvontlhe wuakweni gontlhe, zvezvi ni kala kupindzuka. Hikwalaho, hi nga tsumba lezvaku loku hi tsika Jehovha a rangela wutomi ga hina hi tava ni wutomi go tsakisa zvezvi ni wumandziko ga ginene cikhatini ci tako.

4. Hi zvi tivisa kuyini ku Jehovha wa hi randza?

⁴ Hi nga tsumba Jehovha hakuva wa hi randza. Jehovha i vangile vanhu hakuva i wa lava ku va hanya va tlhela va ti buza hi wutomi a ku fana naye. Jehovha i tivekisile kungo gakwe hi ku wula magezu lawa: “A hi mahe munhu hi mufananiso wa hina, a fana na hina.” (Gen. 1:26) I hi vangile na hi hi ni kutlhatlheka ka ku ti mahela zviboho ha hoce. I hi nyikile misava yo saseka kasi hi hanya ka yona. (Lis. 115:16) Niku i tlhelile a katekisa a vapswali va hina vo sangula hi ku va nyika ciavelo co tsakisa ca ku maha misava yiva paradhise. (Gen. 1:28; 2:15) Ahandle ka lezvo, i no va nyika zvakuga zvo tala, ni tisinya to hambanahambana, ni zvihari zva tixakaxaka, ni zvilo zvin’wani zvo tala hakuva i wa lava ku va tsaka va tlhela va ti buza hi wutomi. Kunene, a zvilo lezvo zvi komba ku “a lirandzo li nga mbheliko la Jehovha la kala kupindzuka”. — Lis. 103:17.

5. a) Zvini lezvi Jehovha a nga maha kasi ku tatisa kungo gakwe hambu lezvi Sathani a nga zama ku gi thinda? b) Hi zvihi zvitsumbiso zvo kari lezvi Nungungulu a zvi tatisileko? (Wona kwadru gi nge: “Contlhe cikhati Nungungulu i wula lisine.”)

⁵ Hi nga tsumba Jehovha hakuva contlhe cikhati i wula lisine. Jehovha a nga vangangi ‘misava mahala, kanilezvi i yi vangile kasi yiva wutshamu ga ku a vanhu va hanya ka gona’. (Isa. 45:18, 19) A cikhati leci Adhamu na Evha, va nga tsika ku ingisa Jehovha va no konelwa kufa. Hikwalaho, kuzvilava zvi wa wonekisa ku khwatsi a kungo ga Nungungulu gi thindilwe. Kanilezvi ci hava ci nga thindako Jehovha. Contlhe cikhati wa tatisa zvitsumbiso zvakwe. (Isa. 46:10, 11) A kungo gakwe ga ku tata misava hi vanhu vo lulama a gi cicangi. Hi zvalezvo zvi nga maha ku Jehovha a vhumelela ku Adhamu na Evha va pswala vana, a tlhela a nyikela a N’wana Wakwe a pswalilweko yece kota hakhelo ya kutlhatlhisa kasi ku ponisa a pswalo wa Adhamu ni ku wu nyika kutsumba ko tsakisa ka ku hanya kala kupindzuka. — Joh. 3:16.

ZVINI LEZVI JEHOVHA A MAHAKO KASI KU TATISA ZVITSUMBISO ZVAKWE?

6. Zvini lezvi Jehovha a nga wula ku zvi ta maheka andzhako ka loku Adhamu na Evha va tsikile ku mu ingisa?

⁶ “A nyoka leyi ya kale, yi vitaniwako ku hi Dhiyabho ni Sathani”, hi yona yi nga kanganyisa Adhamu na Evha kasi va nga ingisi Nungungulu.a (Kuv. 12:9; Gen. 3:4, 5; Joh. 8:44) Hi kota ya lezvo, Jehovha i no wula lezvaku cikhatini ci tako, Sathani i ta lovisiwa. (Gen. 3:15) Na ci nga se chikela a cikhati leco, a vanhu vo tala va pimanyisa Sathani va maha zvilo zva kubiha. Kanilezvi, ku na ni vokari va simamako va tsumbekile ka Jehovha.

7. Hi vamani va landzelako a cikombiso co biha ca Sathani niku zvini zvi to va humelela?

⁷ Lava va landzelako Sathani tingilozi leti ti hluwukileko ni vanhu lava va nga ingisiko Jehovha. Kota lezvi va lwako ni kungo ga Jehovha, va ti maha pswalo wa Sathani. Kanilezvi, Jehovha i sina a yimisile cikhati ca ku lovisa Sathani ni lava va mu seketelako. — Dhan. 2:44; Rom. 16:20.

8. Zvini lezvi Jesu a nga maha hi 1914? (Wona ni mifota.)

⁸ Cini ci hi tiyisekisako lezvaku a kungo ga Nungungulu ga ku fuvisa Sathani ni vontlhe lava va mu seketelako gi ta tatiseka? Hi 1914, Jesu i nolwa na Sathani Dhiyabho ni madhimoni yakwe, a va hlula, a gumesa a va hoxela laha misaveni. (Kuv. 12:7-9) Hambu lezvi a yimpi leyo yi nga lwiwa le tilweni, lava va hanyako laha misaveni vonawu va khumbiwa hi yona. A Bhibhiliya gi wula lezvi: “Khombo ka n’wina misava ni bimbi, hakuva Dhiyabho i relele ka n’wina na a zangarile nguvhu hakuva wa zvi tiva lezvaku a cikhati leci ci nga mu salela ci tsongwani.” (Kuv. 12:12) Kusukela hi 1914, a kupima kontlhe ka Sathani ku laha misaveni, hi kota ya lezvo, a zvilo zviya zvi biha nguvhu. Kunene, ‘a misava yi le khombyeni’! Hambulezvo, zvezvanyana, Jesu i ta “mbhetisa kuhlula kakwe” niku Sathani ni vontlhe lava va mu seketelako va ta loviswa va nga havi kona kambe. (Kuv. 6:2) Jesu i ta basisa a vito ga Jehovha, khati gin’we zvi mbhela. (Lis. 45:4-6) A vanhu vontlhe va ta zvi tiva ku Jehovha i Nungungulu wa lisine! — Ezek. 38:23.

Yimpi yo Sangula ya Misava: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

A NUNGUNGULU WA LISINE I KARI A TLHANGANISA VONTLHE VA RANDZAKO LISINE

9. Hi vamani lava Jehovha a va tlhanganisako nyamutlha?

⁹ Jehovha i kari “a tlhanganisa zvilo zvontlhe ka Kristu, a zvilo zva le tilweni ni zvilo zva laha misaveni”. (Efe. 1:10) “A zvilo zva le tilweni” ku wuliwa a vatotilweko lava Jehovha a va hlawulako kasi va fuma zvin’we na Kristu le tilweni. A “zvilo zva laha misaveni” ku wuliwa lava va to hanya kala kupindzuka Paradhiseni laha misaveni. Vontlhe a vakhozeli lavo va Jehovha va ti tsitsirita nguvhu ntirweni wa ku paluxa a mawunwa ya Sathani ni ku vhuna vanhu va timbilu tinene lezvaku vava ni wutivi ga lisine.

10. Jehovha i va vhunisa kuyini vanhu lezvaku va tiva lisine? (Kuvhululelwa 14:6, 7)

¹⁰ Jehovha i kari a hlengeleta lava va randzako lisine hi ku tirisa ntiro wa kuchumayela. Lowu hi wona ntiro wa hombe ka yontlhe yi tshukileko yi mahiwa matin’wini ya vanhu. (Lera Kuvhululelwa 14:6, 7.) Hambu lezvi Jehovha a tirisako vanhu kasi ku chumayela van’wani a mahungu ya manene, a tingilozi tonawu ta patseka ntirweni wa ku hlengeleta vanhu va timbilu tinene lezvaku va nghena bandleni ga wuKristu. A ntiro lowo wa kuchumayela wu paluxa tigondzo ta mawunwa ta Bhabhuloni loyi wa Hombe, ku nga yena tsindza ga misava yontlhe ga wukhongeli ga mawunwa, loyi Sathani a mu tirisako hi malembe yo tala kasi ku hangalasa mawunwa xungetano hi Jehovha. (Kuv. 18:2, 4) Zvezvanyana, gontlhe a wukhongeli ga mawunwa gi ta lovisiwa hi kumbhelela niku vontlhe lava va randzako a Nungungulu wa lisine va ta mu nyika wudzundzo legi gi mu ringanako. — Kuv. 17:16.

11. Hi nga va tivisa kuyini a vakhozeli va lisine va Jehovha?

¹¹ A vanhu lava va randzako lisine va huma hi ka matiko wontlhe ni ka midhawuko yo hambanahambana niku va na ni zviyimo zvo hambanahambana hi tlhelo ga timali. (Kuv. 7:9, 10) A cikhati leci va zwako “a mahungu ya manene” va tekela ku zvi pola ku lelo hi lona lisine va tlhela va vhumela hi kuzvirandza a ku ti patsa ni vanhu va Jehovha. (Mar. 13:10) Laha a cikhati ci hundzako, zviya zvi dlunyateka nguvhu a ku hi vamani va khozelako Nungungulu hi ndlela leyi a yi amukelako ni lava va nga mu khozeliko. Muphrofeti Malaki i phrofetile, aku: “Mu ta tlhela mu wona kuhambana cikari ka munhu wa kululama ni munhu wa kubiha, ni cikari ka loyi a tirelako Nungungulu ni loyi a nga mu tireliko.” (Mala. 3:18) A mahanyela yabye ni ntiro wa ku chumayela lowu va wu mahako, zvikombiso zvo dlunyateka zva lezvaku va khozela a Nungungulu wa lisine.

12. A ntiro wa kuchumayela wu vhunisa kuyini kutatiseni ka kungo ga Jehovha?

¹² A cikhati leci hi chumayelako a “mahungu lawa ya manene ya Mufumo” ho ingisa a cileletelo ca Jesu hi tlhela hi tatisa ciphrofeto. (Mat. 24:14; 28:18-20) Kota wuyelo ga kona, a vanhu va matiko wontlhe va maha vapizani va Kristu na va hi ni kutsumba ka ku khozela a Nungungulu wa lisine kala kupindzuka. I thomo ga hombe a ku tirisiwa hi Jehovha kasi ku vhunetela kutatiseni ka kungo gakwe!

TIYISEKA KU JEHOVHA I TA TATISA ZVITSUMBISO ZVAKWE

13. Hi vamani lava Sathani a va lambeleko nguvhu niku hikuyini?

¹³ Sathani Dhiyabho i zangarile nguvhu, hakuva wa zvi tiva lezvaku i no salelwa hi “cikhati . . . ci tsongwani” kasi a tiko gakwe gi lovisiwa. (Kuv. 12:12, 13) Sathani i lambele nguvhunguvhu lava va yimelako a Mufumo wa Nungungulu laha misaveni, “ku nga lava va ingisako a milayo ya Nungungulu na va hi ni ntiro wa ku nyika wukustumunyu ha Jesu”. (Kuv. 12:17; 14:12) Sathani i vhukela kambe ni wihi a seketelako vanhu lavo ni ntiro lowu va wu mahako.

14. Zvini zvi to humelela a cikhati leci Sathani a to vhukela vanhu va Jehovha? (Wona ni mufota.)

¹⁴ Andzhako ka kulovisiwa ka Bhabhuloni loyi wa Hombe, lava va seketelako Sathani va ta maha ni cihi va ci kotako kasi ku fuvisa a vanhu va Jehovha. A kuvhukela loko ku ta tlhotlha a yimpi ya Armagedhoni. (Kuv. 16:13, 14, 16) Jesu ni mabutho ya le tilweni va ta tlhatlhisa vakhozeli va Jehovha va tlhela va lovisa ni cihi ci to ngha ci sele ca tiko ga Sathani. (Kuv. 19:19-21) A vanhu vontlhe va kuhemba, ni vakubiha, ni vakanganyisi va nga ta hava kona. (Kuv. 21:8) Niku vontlhe laha misaveni ni le tilweni va ta zvi tiva lezvaku Jehovha i lulamile niku i wulawula lisine contlhe cikhati!

15. Hikuyini hi nga tiyisekako lezvaku Jehovha i ta tatisa zvitsumbiso zvakwe? (Isaya 65:16, 17) (Wona ni mufota.)

¹⁵ Ka tiko legi hi hanyako ka gona, a vanhu vaya va engetela ku avana ni ku hembelana. Kanilezvi Jehovha i vhuna malandza yakwe lezvaku ma simama ma zwanana, niku a ntiro wa ku hlengeleta lava va randzako lisine ngangweni wakwe wu kari wu mahiwa. Ci hava ci nga vhalelako Jehovha a ku katekisa vanhu vakwe ni ntiro lowu va wu mahako. (Lera Isaya 65:16, 17.) Hi nga tiyiseka lezvaku Jehovha i ta tatisa zvitsumbiso zvakwe. A magezu ya mupostoli Pawule ma nga ka Va Le Roma 8:38, 39 ma hi tiyisekisa lezvaku: “Hambu ku hi kufa, hambu wutomi, hambu tingilozi, hambu mifumo, hambu zvilo zvi nga kona, hambu zvilo zva ha tako, hambu mintamu, hambu zvilo zva le hehla, hambu zvilo zva lomu kueteni, ne hambu cin’wani civangwa, zvi nga ta zvi kota ku hi hambanisa ni lirandzo la Nungungulu, leli li nga ka Kristu Jesu, a Hosi ya hina.”

16. Hikuyini u tsumbako Jehovha hi mbilu yontlhe?

¹⁶ Hi na ni zvigelo zvo zwala zva ku tsumba Jehovha, a Nungungulu wa lisine. Hi yena a nga hi vanga niku wa hi randza nguvhu. A citshungu ca hombe ciya ci engetela ku tala laha a vanhu va matiko wontlhe va simamako kuta va ta khozela Jehovha. (Isa. 60:22; Zak. 8:23) Ha zvi tiva lezvaku contlhe cikhati Jehovha wa tatisa zvitsumbiso zvakwe niku zvezvanyana i ta lovisa Sathani, a tlhatlhisa tiko ka mawunwa ni wukanganyisi gakwe. A kufana na Dhavhidha, hinawu hi khongela hiku: “Ngha Jehovha Nungungulu a dhumiswa, . . . loyi ku nga yena yece a mahako zvilo zvo hlamalisa. A vito gakwe go dzundzeka gi wa dhumiswe kala kupindzuka, ni wudzundzo gakwe gi wa tate a misava yontlhe”. — Lis. 72:18, 19.