Mulongiso, 18 ka Abril
Loku a wokari a wonha, hi na ni muvhuni. — 1 Joh. 2:1.
A ciboho ca hombe nguvhu leci a munhu a nga mahako ku ti nyikela ka Jehovha, ava ciro ca ngango Wakwe wa vakhozeli. Jehovha i lava lezvaku hontlheni hi maha lezvo. Hikuyini? I lava lezvaku hontlheni hiva ni wunghana naye hi tlhela hi hanya kala kupindzuka. (Dhewu. 30:19, 20; Gal. 6:7, 8) Hambulezvo, Jehovha a nga kurumeti munhu lezvaku a mu tirela. I tsika munhu mun’we ni mun’wani a ti hlawulela lezvi a zvi lavako. Ahanti loku a muKristu a bhabhatisilweko a tshova nayo wa Jehovha, a maha ciwonho ca hombe? Loku a nga ti soli, i fanele ku susiwa bandleni. (1 Kor. 5:13) Hambu ka ciyimo leco, Jehovha i simama a tsumba hi kumbhelela lezvaku a muwonhi loye i ta tlhelela kakwe. Kunene, leco cin’we ca zvigelo zva lisima ci nga maha ku a hi nyika hakhelo ya kutlhatlhisa kasi zvi koteka ku tsetselela vawonhi lava va ti solako. A Nungungulu wa hina wa lirandzo i khongotela vawonhi, a va kuca lezvaku va ti sola. — Zak. 1:3; Rom. 2:4; Jak. 4:8. w24.08 14 ¶¶1-2
Sonto, 19 ka Abril
N’wananga, loku a mbilu ya wena yi tlhariha, a mbilu ya mina yi ta tsaka. — Mav. 23:15.
A cikhati leci mupostoli Johani a nga tsala a papilo gakwe ga wunharu, a vanhu vo kari va wa hangalasa tigondzo ta mawunwa ni ku vanga kuhambana. Hambulezvo, a van’wani va wa ha simama ku “famba lisineni”. Va wa ingisa Jehovha niku va wa “famba hi milayo yakwe”. (2 Joh. 4, 6) A maKristu lawo yo tsumbeka ma mu nehele litsako Johani a ku patsa na Jehovha. (Mav. 27:11) Hi gondza yini? A kutsumbeka zvi neha litsako. (1 Joh. 5:3) Hi cikombiso, ha tsaka hi ku tiva lezvaku hi maha Jehovha a tsaka. Jehovha wa tsaka loku a hi wona na hi ala zviringo zva tiko legi hi vhumela lisine. A tingilozi le tilweni tonawu ta tsaka. (Luka 15:10) Hinawu ha tsaka loku hi wona van’wani na va simama va tsumbekile. (2 Tes. 1:4) A cikhati leci a tiko legi go biha gi to ngha gi lovisilwe, hi ta tsaka hi ku tiva lezvaku hi kombisile kutsumbeka ka Jehovha hambu ka tiko legi gi nga fumiwa hi Sathani. w24.11 12 ¶¶17-18
Muvhulo, 20 ka Abril
A mun’we ni mun’wani i wa simame ku lava lezvi zvi to vhuna mun’wani munhu, na ku nga hi lezvi zvi to vhuna yena n’winyi. — 1 Kor. 10:24.
Cikhati co kota kwihi u faneleko ku mbheta na wa ha zama ku mu tiva khwatsi munhu na u nga se mu byela a kutizwa ka wena? Loku u tsutsumela ku byela munhu a kutizwa ka wena, a nga tshuka a alakanya lezvaku a wu ehleketangi khwatsi na u nga se maha ciboho. (Mav. 29:20) Kanilezvi loku u teka cikhati co leha nguvhu kambe, a nga tshuka a alakanya lezvaku a wu ci tivi leci u ci lavako, nguvhunguvhu loku a zvi polile ku wa mu navela. (Mutsh. 11:4) Na u nga se gangisa wokari, alakanya lezvaku a wu faneli ku tiyiseka lezvaku u ta chadha ni munhu loye. Kanilezvi u fanele ku tiyiseka lezvaku u longile ku chadha ni lezvaku a munhu loye i tava sati kutani nuna wa munene ka wena. Kanilezvi, ahanti loku u pola lezvaku a wokari wa ku navela? Loku wena u nga mu lavi zama ku zvi veka laha kubaseni hi mitiro. Zvi wa nga tava zvinene a ku maha munhu a alakanya lezvaku kuzvilava zvi ta koteka ku mu namorara kuveni a zvi tshamisangi lezvo. — Efe. 4:25. w24.05 22-23 ¶¶9-10