Mekim Ol Gutpela Tok Taim Yu Skulim Ol Man Long Tok i Tru

1. Yumi mas mekim wanem bilong stap insait long lain famili bilong Jehova?

LONG fes taim yumi bungim wanpela wanbilip i lotuim Jehova, wanpela bilong ol fes askim yumi save mekim em olsem, “Yu kisim tok i tru olsem wanem?” Sampela i tok ol i “bikpela insait long tok i tru.” Ol narapela inap tok i no longtaim i go pinis, ol i “kisim save long tok i tru.” Yumi save bekim olsem bikos yumi larim tok i tru bilong Baibel i stiaim ol samting long laip bilong yumi. Wai na yumi mekim olsem? Bikos yumi save olsem yumi ken stap insait long lain famili bilong Jehova sapos yumi kamapim klia olsem yumi laikim tok i tru na yumi bihainim tok i tru long laip bilong yumi. Dispela i makim tu pasin bilong onest long ol tok na pasin yumi mekim.—Sng. 15:​1-3.

2. (a) Ol man i holim wanem tingting long Jisas? (b) Ol tok i tru Jisas i autim inap mekim wanem long ol manmeri?

² Oltaim Jisas i mekim ol tok i tru tasol. Ol birua bilong em i luksave olsem em i save mekim tok tru tasol, maski sampela taim ol i no amamas long ol tok em i mekim. (Mat. 22:16) Jisas i stori long wanem samting bai kamap taim ol man i harim ol tok em i autim. Em i tok: “Mi kam bilong brukim lain, man bai birua long papa bilong em na pikinini meri bai birua long mama bilong em na tambu meri bai birua long tambu mama bilong em.” (Mat. 10:35) Jisas i no laik bai ol man i birua long ol tok em na ol disaipel bilong em i autim, tasol em i save olsem dispela samting bai kamap. (Mat. 23:37) Em i save olsem tok em i autim bai brukim ol lain i go long tupela lain—wanpela lain bai laikim ol tok i tru bilong Baibel na narapela lain i no inap laikim ol dispela tok.—2 Tes. 2:​9-11.

3. Yumi bai stori long wanem samting long dispela atikol?

³ Olsem Jisas, yumi wok strong long bihainim onest pasin na yumi mekim tok tru long olgeta taim, na yumi mekim olsem tu maski ol man i no amamas long harim tok yumi mekim. Na yumi autim tok na skulim ol man long ol tok i tru i stap long Baibel, maski sampela i no amamas long ol tok yumi mekim. Yu ting dispela i makim olsem yumi no ken skelim gut pasin yumi bihainim long autim tok na wanem taim yumi mekim olsem? Nogat tru! Long dispela atikol, pastaim yumi bai bekim wanpela askim olsem: Yumi inap painim tok i tru long we? Na bihain, yumi bai kisim bekim bilong dispela askim olsem: Wai, hau, na wanem taim yumi mas autim tok i tru? Bekim bilong ol dispela askim bai helpim yumi long kamap gutpela moa long pasin bilong yumi long mekim ol gutpela tok taim yumi autim tok, olsem yumi bihainim savetingting na mekim tok long taim stret.

YUMI INAP PAINIM TOK I TRU LONG WE?

4. Wai na yumi ken tok Jehova em i As bilong tok i tru?

⁴ Jehova em i As bilong tok i tru. Olgeta tok bilong em i tru tasol. Olsem, ol tok em i mekim long wanem samting i stret na wanem samting i no stret, em ol tok i tru. (Sng. 19:9; 119:​142, 151) Olgeta samting em i tok bai kamap long bihain, olgeta dispela samting i bin kamap tru. (Ais. 55:​10, 11) Em i no save brukim ol tok promis bilong em. (Nam. 23:19) Tingim dispela, Jehova i no inap tru long tok giaman! (Hib. 6:18) I gat gutpela risen na Baibel i kolim Jehova olsem “God bilong mekim pasin tru tasol.”—Sng. 31:5.

5. Wai na i no hatwok long painim “God bilong mekim pasin tru tasol”? Stori long dispela. (Aposel 17:27)

⁵ Sampela manmeri i tok i hatwok long painim Jehova, em “God bilong mekim pasin tru tasol.” Tasol dispela tok i no tru. Ol samting yumi lukim i kamapim klia olsem em i stap tru. (Rom 1:20) Taim aposel Pol i toktok long sampela saveman bilong ol Grik long Atens, em i tok God i laik bai yumi “painim em” na “em i no stap longwe long yumi olgeta wan wan.” (Ritim Aposel 17:27.) Jehova yet i save bringim ol man i kam long em, em ol man i gat pasin daun na ol i wok long painim tok i tru.—Jon 6:44.

6. Wanem sampela tok i tru i stap long Baibel, na wai na yu amamas long kisim save long ol dispela tok?

⁶ Wanpela rot yumi ken painim Jehova em long rot bilong stadi long Baibel. God i yusim holi spirit bilong em long stiaim ol man i raitim Baibel. (2 Pita 1:​20, 21) Olsem na olgeta tok i stap long Baibel, ol i tok i tru na i stret long yumi trastim ol dispela tok. Olsem, yumi ken trastim tok Baibel i mekim long yunives i kamap olsem wanem na hau laip i kamap long graun. (Stt. 1:​1, 26) Yumi ken bilipim ol tok em i mekim long risen na yumi save mekim sin na wai na yumi karim pen na hevi na yumi save dai. (Rom 5:12; 6:23) Yumi ken bilipim tru tok Baibel i mekim olsem long rot bilong Jisas, Jehova bai pinisim olgeta hevi em Satan i kamapim, em “papa bilong pasin giaman.” (Jon 8:44; Rom 16:20) Na yumi ken bilip long tok promis Baibel i mekim olsem Jisas bai pinisim ol man nogut, kirapim bek ol daiman, stretim bek graun, na helpim yumi long kamap gutpela olgeta. (Jon 11:​25, 26; 1 Jon 3:8) Em gutpela blesing tru Jehova i givim yumi! Em i skulim yumi long tok i tru na em i givim wok long yumi long skulim ol narapela tu long tok i tru.—Mat. 28:​19, 20.

WAI NA YUMI MAS MEKIM OL TOK I TRU?

7-8. Yu ting astingting bilong yumi long mekim tok i tru em i bikpela samting? Stori long wanpela eksampel. (Mak 3:​11, 12) (Lukim tu ol piksa.)

⁷ Olsem yumi stori pinis, yumi mas mekim tok i tru tasol sapos yumi laik stap insait long lain famili bilong Jehova. Tasol bilong amamasim em, yumi mas mekim tok i tru na mekim sampela samting moa. Astingting bilong yumi long mekim tok i tru, dispela em i bikpela samting long Jehova. Skelim samting i kamap taim Jisas i autim tok long graun. (Ritim Mak 3:​11, 12.) Taim Jisas i autim tok klostu long Raunwara Galili, bikpela lain manmeri i kam bung raunim em. Namel long ol i gat sampela manmeri em spirit nogut i stap long ol, ol i pundaun klostu long lek bilong Jisas na ol i singaut olsem: “Yu Pikinini bilong God.” Wai na ol dispela spirit nogut i mekim dispela tok i tru long Jisas? Astingting bilong ol em long kirapim ol manmeri husat i putim yau long ol long bilipim ol tok ol i mekim na bai ol i lusim pasin bilong lotuim Jehova. Em tru olsem ol tok ol dispela spirit nogut i mekim em i tru, tasol astingting bilong ol i no gutpela, ol i tingim ol yet tasol. Ol i no trikim Jisas o amamasim em, nogat. Olsem na Jisas i tok strong long ol dispela spirit nogut olsem ol i no ken autim tok long em.

⁸ Yumi inap kisim wanem skul long dispela stori? Astingting bilong yumi long mekim tok i tru em i bikpela samting long Jehova. So em i bikpela samting long yumi skulim ol man long tok i tru bikos yumi laikim Jehova, na yumi givim glori i go long Jehova na i no long yumi yet!—Mat. 5:16; skelim Aposel 14:​12-15.

9. Yumi mas sakim wanem pasin, na bilong wanem?

⁹ Tingim narapela samting inap kamap na yumi mas sakim pasin bilong givim biknem long yumi yet. Tingim olsem wanpela brata i mekim wok insait long kongrigesen i tokim yumi long sampela infomesen em yumi no ken tokim ol narapela long en, tasol yumi go na tokim ol narapela. Sapos ol man i harim tok bilong yumi i painimaut bihain olsem ol tok yumi mekim i tru, ating ol bai kirap nogut olsem yumi save long planti infomesen em ol narapela i no save long en. Ating ol narapela bai amamas long yumi, tasol God i no inap amamas long pasin yumi mekim. (Prov. 11:13) Wai na yumi tok olsem? Bikos yumi tokaut long samting we yumi no ken tokim ol narapela long en, na long wankain taim maski dispela tok em i tru, astingting bilong yumi long tokaut long en i no gutpela.

HAU YUMI KEN MEKIM OL TOK I TRU?

10. Tok bilong yupela i mas “gutpela,” dispela i makim wanem? (Kolosi 4:6)

¹⁰ Ritim Kolosi 4:6. Aposel Pol i kirapim ol Kristen long Kolosi long tingim olsem “oltaim tok bilong [ol] i mas gutpela.” Dispela i makim wanem? Long tok Grik, dispela tok i makim olsem ol tok yumi mekim i mas helpim ol man i putim yau, na tu, yumi mas mekim ol gutpela tok em ol i amamas long harim.

11-12. Wai na yumi mas was gut taim yumi laik skulim ol man long tok i tru? Stori long dispela. (Lukim tu ol piksa.)

¹¹ Yumi mas bihainim tok bilong Pol long mekim ol gutpela tok taim yumi skulim ol narapela long tok i tru. Baibel i tok ol tok i tru i olsem bainat i sap moa na ol inap kamapim ples klia insait bilong man na ausait bilong man. Dispela i makim olsem em inap kamapim klia tingting tru i stap long bel bilong yumi na astingting bilong yumi. (Hib. 4:12) Tasol sapos yumi no yusim gut Baibel, yumi inap mekim man i belhat na kros long yumi. Hau dispela samting inap kamap?

¹² Piksaim long tingting dispela samting. Yumi autim tok na yumi bungim wanpela man i gat gutpela bel. Oltaim em i save beten long ol imis na em i save amamas long selebretim Krismas na Ista wantaim famili bilong em. Yumi ken yusim Baibel long soim em olsem i no stret long beten long ol imis em ol i no stap laip na soim em olsem Krismas na Ista em ol bung bilong ol haiden. (Ais. 44:​14-20; 2 Kor. 6:​14-17) Sapos yumi mekim olsem long namba wan taim yumi toktok wantaim em, em tru olsem yumi tokim em long tok i tru bilong Baibel, tasol yumi no yusim gut Tok Bilong God long dispela taim.

13. Hau yumi ken mekim ol gutpela tok i olsem yumi putim sol long en?

¹³ Pol i tok tu olsem yumi mas mekim ol tok i gutpela na i olsem yumi putim sol long en. Tok bilong em i no makim olsem yumi mas haitim tok i tru, nogat. Em i kirapim yumi long mekim ol tok i gutpela, i olsem yumi “putim sol long en,” na long dispela rot ol narapela bai amamas long putim yau long tok yumi autim, i olsem ol i amamas long ‘teis’ bilong en. (Jop 12:11) Tasol i hatwok long mekim olsem. Olsem, yumi inap ting olsem kaikai we i teis gut long yumi, ol narapela bai laikim wankain teis olsem yumi laikim. Olsem tasol, yumi inap ting olsem olgeta manmeri i laikim wei bilong yumi long toktok. Tasol i no stret long holim kain tingting olsem. Olsem, sampela i kam long ol bekgraun o kalsa we ol man i gat pasin bilong tok stret long wanem tingting ol i gat na ol i mekim olsem tu taim ol i toktok wantaim ol man i gat bikpela krismas moa winim ol. Tasol ol lain bilong ol narapela kalsa, ol inap ting kain pasin olsem i no stret o i no soim rispek long ol narapela. Pol i tok yumi mas save long “wanem tok i stret long bekim long olgeta man wan wan.” Dispela i makim olsem yumi mas mekim ol gutpela tok we i olsem yumi putim sol long en na bai dispela tok i krai gut long yau bilong ol narapela, o i teis nais long man i harim tok bilong yumi, maski em i bilong wanem kalsa o bekgraun.

WANEM TAIM YUMI KEN MEKIM OL TOK I TRU?

14. Taim Jisas i stap long graun, yu ting em i skulim ol disaipel bilong em long olgeta samting em i save long en? Stori long dispela.

¹⁴ Oltaim Jisas i toktok long gutpela pasin long ol disaipel bilong em, na em i skulim ol long planti samting. (Mak 6:34) Tasol i gat planti samting moa ol i mas save long en. Jisas i no traim long skulim ol long olgeta samting em i save long en. Em i tingim skel bilong ol. Em i kliagut olsem nau em i no rait taim long ol i save long sampela tok i tru. Olsem na em i tok sapos em i tokim ol long olgeta samting, ol i no inap kisimgut ol dispela tok i tru. (Jon 16:12) Yumi kisim wanem skul long dispela?

15. Yu ting i stret long yumi skulim ol Baibel sumatin bilong yumi long olgeta samting yumi save long en long wanpela taim tasol? Stori long dispela. (Provep 25:11) (Lukim tu piksa.)

¹⁵ Eksampel bilong Jisas i soim olsem maski yumi save long tok i tru, dispela i no makim olsem yumi mas skulim ol narapela long olgeta dispela samting long wanpela taim tasol. Hau yumi ken bihainim eksampel bilong Jisas? Yumi mas tingim gut sindaun bilong ol manmeri. Tingim gen stori bilong dispela man husat i save amamas long selebretim Krismas na Ista wantaim famili bilong em. Yumi save olsem ol haiden i as bilong ol dispela bung na God i no orait long ol dispela bung. Tasol tingim olsem yu kirap stadi long Baibel wantaim dispela man wanpela o tupela wik paslain long Krismas i kamap. Sapos yumi soim em tok Baibel i mekim olsem ol haiden i as bilong dispela bung na yumi laik bai wantu tasol em i stop long mekim dispela bung, yu ting dispela tok yumi mekim long em i gutpela? Em tru olsem wantu tasol sampela sumatin inap amamas long bihainim olgeta tok ol i lainim long Baibel. Tasol ol narapela inap lusim sampela haptaim paslain long ol i senisim tingting na pasin bilong ol. Yumi ken helpim ol Baibel sumatin long kamap strong long bilip sapos yumi tokim ol long ol samting ol i mas save long en long taim stret ol i mas harim dispela tok, em long taim ol i redi long harim na bihainim dispela tok.—Ritim Provep 25:11.

16. Hau yumi ken helpim ol Baibel sumatin bilong yumi long “wokabaut yet long tok i tru”?

¹⁶ Yumi save amamas tru long helpim ol narapela long kisim save long Jehova. Yumi ken helpim ol long “wokabaut yet long tok i tru” sapos yumi mekim ol dispela samting: Yumi wok yet long stap gutpela eksampel em ol i ken bihainim. (3 Jon 3, 4) Ol samting yumi mekim long laip bilong yumi i soim olsem yumi bilip long ol tok promis i stap long Tok Bilong God. Astingting bilong yumi i mas gutpela taim yumi skulim ol man long tok i tru. Yumi mekim ol tok long gutpela pasin, pasin isi, na mekim ol gutpela tok long taim stret taim yumi skulim ol narapela long tok i tru. Na sapos ol narapela i givim biknem long yumi, yumi laik givim dispela biknem i go long Jehova. Sapos yumi mekim olsem, yumi bai soim olsem yumi bilong Jehova, em i God bilong mekim tok tru tasol.