Yu Bai Mekim Wanem Bilong Soim Tenkyu Bilong Yu Long Pe Bilong Baim Bek Man?

1-2. Ofa bilong baim bek ol man em Jisas i givim i mas kirapim yumi long mekim wanem, na bilong wanem? (2 Korin 5:​14, 15) (Lukim tu piksa.)

SAPOS yu stap insait long hip pipia bilong wanpela bilding i bruk na i pundaun na wanpela i kam seivim yu, ating yu bai pilim olsem yu mas mekim sampela samting bilong soim tenkyu bilong yu long em. Maski em i seivim ol narapela tu, ating yu yet bai laik tok tenkyu long em bilong soim em olsem samting em i mekim em i bikpela samting tru.

² Olsem yumi stori long atikol i go pinis, yumi no inap kisim bek yumi yet long ol samting nogut em sin i kamapim. Tasol ofa em Jisas i givim bilong baim bek ol man i ken kisim bek yumi bikos em i opim rot long (1) God i fogivim ol sin bilong yumi, (2) mekim yumi kamap gutpela olgeta long rot bilong tekewe ol sin bilong yumi, na (3) mekim yumi kamap wanbel wantaim God. Em as na yumi bilip long stap laip oltaim long nupela taim em Jehova bai kamapim. Tru tumas, pe bilong baim bek man i soim klia pasin laikim Jisas i gat long ol manmeri—em i gat dispela pasin laikim paslain long em i bon olsem man i gutpela olgeta. (Prov. 8:​30, 31) Aposel Pol i tok “pasin laikim bilong Krais i kirapim mipela.” (Ritim 2 Korin 5:​14, 15.) Dispela i makim olsem pasin laikim bilong Jisas i mas kirapim yumi long soim tenkyu bilong yumi long ofa bilong baim bek ol man em i bin givim.

3. Wai na ol samting yu mekim bilong soim tenkyu long pe bilong baim bek man i no wankain long samting ol narapela i mekim?

³ Long wanem rot yu inap soim tenkyu bilong yu long pe bilong baim bek man? Ating bekim bilong yu bai i no wankain long bekim bilong ol narapela. Tingim dispela tok piksa. Piksaim long tingting olsem tripela man i stap long narapela narapela taun na ol i laik travel i go long wankain ples. Ol rot ol i bihainim long i go kamap long hap bai i no wankain. Olsem tasol, pasin bilong yu long pas gut wantaim Jehova long nau bai makim wanem rot yu bai bihainim bilong soim tenkyu bilong yu long pe bilong baim bek man. Em risen na long dispela atikol yumi bai skelim tripela grup bilong ol manmeri: (1) ol Baibel sumatin, (2) ol baptais Kristen, na (3) ol pablisa em ol i lusim kongrigesen.

OL BAIBEL SUMATIN

4. Long wanem ol rot Jehova i luksave long ol Baibel sumatin?

⁴ Sapos yu wok long stadi long Baibel, orait tingim dispela: Yu amamas long putim yau long gutnius na dispela i makim olsem yu stap namel long ol manmeri em Jehova i wok long bringim ol i kam long em na bai yu ken kamap pren bilong em. (Jon 6:44; Apo. 13:48) “Jehova em i man bilong skelim bel bilong ol man.” Dispela i makim olsem em i luksave long ol samting yu mekim bilong kisim save long em, na em i amamas long lukim yu mekim ol senis na bihainim ol lo bilong em na kamap strong long bilip. (Prov. 17:3; 27:11) Pe bilong baim bek man i opim rot long yu inap pas gut wantaim Jehova. (Rom 5:​10, 11) Oltaim yu mas tingim dispela olsem bikpela samting tru.

5. Olsem wanem ol Baibel sumatin inap bihainim stiatok i stap long Filipai 3:16?

⁵ Olsem wanpela Baibel sumatin, yu inap mekim wanem bilong soim tenkyu bilong yu long pe bilong baim bek man? Wanpela rot em long bihainim tok kaunsel em aposel Pol i mekim long ol Filipai, em i tok: “Yumi bin wok long kamap strong moa, olsem na yumi mas wokabaut stret yet long dispela wankain pasin.” (Fili. 3:16) Narapela Baibel i tanim dispela ves olsem: “Yumi mas wok yet long bihainim daireksen em yumi wok long bihainim long nau.” So no ken larim wanpela samting i pasim yu long mekim ol samting bilong bihainim yet rot i go long laip.—Mat. 7:14; Luk 9:62.

6. Ol Baibel sumatin i ken mekim wanem sapos ol i pilim hatwok long mekim ol senis? (Lo 30:​11-14) (Lukim tu piksa.)

⁶ Yu ken mekim wanem sapos yu pilim hatwok long bilipim wanpela tok bilong Baibel em nau tasol yu lainim? Mekim wok painimaut na beten askim Jehova long helpim yu long kliagut moa long dispela tok. (Sng. 86:11) Sapos yu pilim hatwok yet long kliagut long dispela tok bilong Baibel, orait no ken givap, larim i stap pastaim na wok yet long stadi long Baibel. Olsem wanem sapos yu pilim hatwok long lusim wanpela pasin em Baibel i tambuim? Tingim olsem Jehova i no save askim yumi ol man i no gutpela olgeta long mekim ol samting em yumi no inap mekim. Yu ken bihainim ol lo bilong em. (Ritim Lo 30:​11-14.) Na Jehova i tok promis long helpim yu. (Ais. 41:​10, 13; 1 Kor. 10:13) So no ken givap. Tingim olgeta gutpela samting Jehova i mekim bilong helpim yu, olsem em i stretim rot long Jisas i givim ofa bilong baim bek yumi ol man, na no ken tingim tumas hatwok yu bungim. Taim pasin laikim bilong yu long Jehova i kamap strong moa, yu bai luksave olsem “ol lo bilong em i no givim hevi long yumi.”—1 Jon 5:3.a

7. Ol yangpela em ol i bikpela long tok i tru i ken tingim wanem samting?

⁷ Olsem wanem long yupela ol yangpela em yupela i kamap bikpela long tok i tru? Yupela tu ol Baibel sumatin. Yupela ol nambawan Baibel sumatin bilong papamama bilong yupela. Baibel i tok: “Yupela i mas i go klostu long God, na em bai kam klostu long yupela.” (Jems 4:8; 1 Sto. 28:9) Taim yu go pas long mekim ol samting bilong go klostu long Jehova, em tu bai kam klostu long yu. Jehova i no tingim yu olsem yu hap bilong wanpela grup na em tasol, nogat. Em i save kirapim wan wan manmeri long go long em, na em i mekim olsem tu long ol manmeri i bikpela long tok i tru. Jehova i bin mekim wanem bilong opim rot long yu inap stap gutpela pren bilong em? Em i givim pe bilong baim bek man, em nambawan gutpela presen tru yu inap kisim. (Rom 5:​1, 2) So paslain long yu go long Memorial long dispela yia, lusim sampela haptaim long tingim olsem wanem dai bilong Jisas i helpim yu. Dispela i mas kirapim yu long winim ol mak bilong bilip yu putim na bai yu ken soim tenkyu bilong yu long pe bilong baim bek man em Jehova i givim long rot bilong Pikinini bilong em.b

OL BAPTAIS KRISTEN

8. Olsem wanem ol baptais Kristen i soim olsem ol i bilip long pe bilong baim bek man?

⁸ Sapos yu wanpela baptais Kristen, orait yu mekim pinis ol samting bilong soim olsem yu bilip long pe bilong baim bek man. Olsem, yu mekim ol samting bilong pas gut wantaim Jehova na bihainim ol lo bilong em. Yu bihainim tok bilong Jisas long kamapim ol disaipel long rot bilong autim bilip bilong yu long ol narapela. Yu dediketim yu yet long Jehova na kisim baptais. Na ating ol narapela i birua long yu bikos yu sanap strong na sambai long lotu i tru. (2 Tim. 3:12) Yu sanap strong na holimpas bilip na dispela i soim olsem yu laikim Jehova na yu tenkyu long pe bilong baim bek man em i givim long rot bilong Jisas.—Hib. 12:​2, 3.

9. Ol baptais Kristen i mas was gut long wanem samting?

⁹ Yumi ol baptais Kristen i mas was gut long wanpela samting. Bihain long sampela haptaim i lus, ating yumi bai i no moa tingim pe bilong baim bek man olsem bikpela samting tru. Hau dispela inap kamap? Tingim ol Kristen long Efesus long taim bilong ol aposel. Jisas i tok amamas long ol i gat pasin bilong sanap strong na karim hevi. Tasol em i tokim ol: “Mi gat tok long yu long dispela samting, yu lusim pinis pasin laikim em yu bin gat long pastaim.” (Rev. 2:​3, 4) Olsem tok bilong Jisas i soim, pasin bilong wanpela Kristen long mekim ol wok lotu inap kamap olsem samting em i mekim nating tasol. Ating em i save beten, go long ol miting, na mekim wok autim tok, tasol em i no pilim tru long bel ol samting em i mekim. Pasin laikim i no kirapim em moa long mekim ol wok lotu. Yu ken mekim wanem sapos yu pilim olsem pasin laikim bilong yu long Jehova i no strong moa olsem long bipo?

10. Long wanem rot yu inap “tingting strong” na “givim yu yet olgeta” long mekim ol wok lotu? (1 Timoti 4:​13, 15)

¹⁰ Aposel Pol i tokim Timoti long “tingting strong” na “givim [em] yet olgeta” long mekim ol wok lotu bilong em. (Ritim 1 Timoti 4:​13, 15.) Traim long tingim ol samting yu inap mekim bilong yu ken amamas yet long mekim wok bilong Jehova, na long dispela rot yu bai wok yet long “larim holi spirit i kirapim [yu] long givim bel tru long mekim wok.” (Rom 12:11; lukim stadi nout “Be aglow with the spirit” long Study Bible.) Olsem, ating yu ken redim gut ol hap bilong miting na dispela bai helpim yu long putim gut yau long ol miting. O ating yu ken mekim pesenel stadi bilong yu i kamap gutpela moa long rot bilong lusim sampela haptaim long stap yu yet na tingim tingim long bel ol tok yu stadi long en. Wankain olsem yu putim paiawut long paia bilong mekim paia i lait yet, yu ken mekim ol dispela samting bilong kirapim gen amamas yu pilim long bel long olgeta samting Jehova i givim long yu, dispela i makim tu pe bilong baim bek man em i givim. Na tu, long ol wik paslain long Memorial i kamap, yusim dispela haptaim long tingim tingim long bel ol gutpela blesing em yumi ol Witnes Bilong Jehova i kisim long nau. Dispela bai helpim yu long strongim pasin bilong yu long soim tenkyu bilong yu long pe bilong baim bek man, em samting i opim rot long yu inap stap pren bilong Jehova.

11-12. Sapos yu no givim bel tumas long mekim ol wok lotu, yu ting dispela i makim olsem holi spirit bilong God i no stap moa long yu? Stori long dispela. (Lukim tu piksa.)

¹¹ Sapos insait long sampela haptaim yu no givim bel tumas long mekim ol wok lotu, orait no ken bel hevi na ting olsem holi spirit bilong God i no stap moa long yu. Tingim tok aposel Pol i mekim long ol Korin long wok autim tok bilong em, em i tok: “Maski sapos mi mekim taim mi no gat laik long mekim, mi holim yet dispela wok mi bin kisim.” (1 Kor. 9:17) Tok bilong em i makim wanem?

¹² Pol i gat sampela pasin kranki na sampela taim dispela i daunim laik bilong em long autim tok. Tasol em i tingting strong long givim bel yet long autim tok, maski em i pilim olsem wanem long dispela taim. Yu tu i ken mekim olsem. Tingting strong long mekim samting i stret, maski bel i no kirapim yu long mekim olsem. Beten askim God long “givim [yu] dispela laik na strong long mekim ol samting.” (Fili. 2:13) Stap bisi long mekim ol wok lotu. Bilip tru olsem bihain long sampela haptaim i lus, ol wok yu mekim bai mekim sampela samting long ol filings bilong yu na dispela bai kirapim gen pasin laikim i stap yet long bel bilong yu.

13. Hau na yumi ken wok yet long skelim yumi yet bilong save olsem yumi “holimpas bilip” o nogat?

¹³ Sampela taim i gutpela long yumi skelim yumi yet, olsem tok bilong 2 Korin 13:5 i kamapim, em i tok: “Oltaim yupela i mas skelim yupela yet na bai yupela i ken save olsem yupela i holimpas bilip o nogat; oltaim yupela i mas skelim yupela yet na bai yupela i ken save olsem yupela i wanem kain man.” Wan wan taim i gutpela long yumi askim yumi yet olsem: ‘Mi putim Kingdom i stap nambawan samting long laip bilong mi?’ (Mat. 6:33) ‘Ol muvi mi watsim na musik mi harim i soim olsem mi heitim ol pasin nogut?’ (Sng. 97:10) ‘Mi save strongim pasin wanbel na bel isi namel long ol wanbilip?’ (Efe. 4:​2, 3) Memorial em gutpela taim long yumi tingim pe bilong baim bek man em Jehova i givim, na tu, em taim we yumi ken skelim yumi yet na bai yumi ken save olsem yumi yusim laip bilong yumi long mekim laik bilong Krais o laik bilong yumi yet.c

OL PABLISA EM OL I LUSIM KONGRIGESEN

14. Wanem samting inap mekim na sampela Kristen i lusim kongrigesen?

¹⁴ Sampela Kristen i mekim wok bilong Jehova inap sampela mun o planti yia na bihain ol i no bung moa wantaim kongrigesen. Bilong wanem? Long wanem, sampela i larim “ol wari bilong laip” i daunim ol. (Luk 21:34) Ol narapela i bel hevi long ol tok o pasin em ol wanbilip i mekim long ol. (Jems 3:2) Na ol narapela i mekim ol bikpela rong na ol i no laik kisim helpim. Maski i gat wanem risen, yu ken mekim wanem sapos yu lusim kongrigesen? Pe bilong baim bek man na pasin laikim bilong Jehova na Jisas inap kirapim yu long mekim wanem?

15. Olsem wanem Jehova i soim olsem em i tingim tru ol sipsip em ol i go nabaut? (Esekiel 34:​11, 12, 16)

¹⁵ Traim long tingim Jehova i pilim olsem wanem long ol pablisa i lusim kongrigesen. Em i no les long ol. Em i save painim ol sipsip i lus. Em i fidim ol na helpim ol long kam bek long em. (Ritim Esekiel 34:​11, 12, 16.) Yu ting Jehova inap mekim olsem long yu tu? Yes, em bai mekim olsem! Yu stadi long dispela atikol na dispela i soim olsem bel i kirapim yu long mekim samting bilong amamasim Jehova. Jehova i bin lukim olsem yu gat gutpela bel na em i bin bringim yu i kam insait long tok i tru, na ating em i wok long bringim yu i kam bek long tok i tru long nau tu!

16. Wanem samting i ken helpim ol sipsip i lus long kam bek long Jehova? (Lukim tu piksa.)

¹⁶ Dispela buklet Kam Bek Long Jehova i gat ol tok bilong strongim yu, em i tok: “Yu ken bilip tru olsem Jehova bai helpim yu sapos yu kam bek long em. Em bai helpim yu long karim ol hevi, mekim gut bel bilong yu, maus bilong bel i no kotim yu, na bai yu stap bel isi. Na dispela bai kirapim yu long mekim gen wok bilong Jehova wantaim ol wanbilip bilong yu.” Na tingim tu olsem ol elda i laik tru long helpim yu. Ol i ken stap “olsem ples hait long win, olsem ples bilong haitim man long bikpela win na ren.” (Ais. 32:2) Bilong soim tenkyu bilong yu long pe bilong baim bek man, yu ken askim yu yet olsem, ‘Mi ken mekim wanem ol samting long nau bilong “stretim tok” wantaim Jehova?’ (Ais. 1:18; 1 Pita 2:25) Olsem, yu ting yu inap go long wanpela miting long Haus Kingdom? Yu inap toktok wantaim wanpela elda na askim em long helpim yu long sait bilong bilip, olsem stretim rot long wanpela i stadi long Baibel wantaim yu inap sampela haptaim? Yu ken bilip tru olsem Jehova bai blesim ol samting yu mekim i stret wantaim beten bilong yu long soim tenkyu bilong yu long pe bilong baim bek man em Jisas i givim.

YU BAI MEKIM WANEM?

17-18. Hau yumi inap yusim gut taim bilong yumi paslain long Memorial i kamap long dispela yia?

¹⁷ Jisas i tok God i givim pe bilong baim bek man na “bai olgeta man husat i bilip long em ol inap abrusim bagarap na kisim laip oltaim.” (Jon 3:16) Jehova i givim pe bilong baim bek man bilong kisim bek yumi long ol hevi em sin na dai i save kamapim. Yumi olgeta i mas tingim pe bilong baim bek man i olsem bikpela samting tru. (Rom 3:​23, 24; 2 Kor. 6:1) Long ol de paslain long Memorial, rot i op long yumi inap tingim pasin laikim em Jehova na Jisas i soim long yumi, na dispela pasin laikim bilong tupela i mas kirapim yumi long soim tenkyu bilong yumi long ol.

¹⁸ Pe bilong baim bek man bai kirapim yu long mekim wanem? Ating bekim yu givim bai i no wankain long bekim bilong narapela. Tasol yu ken bilip tru olsem Jehova bai blesim hatwok bilong yu taim yu joinim planti milion manmeri i lotuim em, em ol i “no . . . bihainim laik bilong ol yet, nogat. Ol i . . . bihainim laik bilong dispela man husat i kisim ples bilong ol na i dai.”—2 Kor. 5:15.