Piksaim Long Tingting Ol Stori Bilong Baibel

Baibel i gat planti stori long ol samting i bin kamap tru long bipo na ol i skulim yumi long sampela bikpela samting. Taim yumi piksaim long tingting ol dispela stori, em bai helpim yumi long kliagut moa long ol tok yumi ritim na dispela bai helpim gut yumi. Skelim sampela samting yu ken mekim we inap helpim yu long piksaim long tingting ol stori bilong Baibel.

• Ritim bikpela. Taim yu ritim bikpela ol tok bilong Baibel, dispela i ken helpim yu long piksaim gut long tingting ol samting i kamap. Sapos famili olgeta i ritim Baibel wantaim, orait makim wan wan long ritim ol tok bilong narapela narapela man na meri long dispela stori em yupela i ritim.

• Piksaim ol samting i kamap. Traim long tingim ol man na meri long stori i holim wanem tingting na ol i pilim olsem wanem. Olsem, yu ken askim yu yet: ‘Wai na dispela man o meri i mekim dispela tok o pasin? Mi bai holim wanem tingting o pilim olsem wanem sapos mi bin stap long dispela taim?’

• Droim piksa. Taim yu droim piksa bilong ol stori bilong Baibel, dispela inap helpim yu long piksaim long tingting ol samting i kamap na tingim gut ol dispela stori, maski yu no droim gut piksa.