Oltaim “God Bilong Mekim Pasin Tru” i Save Truim Ol Tok Promis Bilong Em

1. Olsem Buk Song 31:​2-5 i kamapim, wai na yumi ken trastim tru Jehova?

YUMI stap long graun em Satan i bosim. Olsem na planti man i save mekim ol tok na pasin giaman na ol i no stap gut long ol pren bilong ol. I hatwok long yumi save long husat yumi inap trastim. Ol bisnisman i save mekim pasin giaman long ol wok bisnis bilong ol. Ol lain bilong mekim ol edvetaismen i giamanim ol kastama long ol samting ol i salim. Na sampela man i pilim olsem ol i no inap trastim ol gutpela pren bilong ol em ol i bin tokim ol long sampela pesenel samting bilong ol yet. Tasol yumi belgut long save olsem oltaim yumi ken trastim tru Jehova! Em i “God bilong mekim pasin tru tasol.” (Ritim Buk Song 31:​2-5.) Jehova i no save giaman, oltaim em i save mekim tok tru tasol. Yumi ken trastim tru Jehova na bilipim olgeta tok na pasin bilong em.

2. Yumi bai stori long wanem samting long dispela atikol?

² Long dispela atikol, pastaim yumi bai stori long sampela risen na yumi ken bilip tru long Jehova long bel olgeta bilong yumi. Bihain yumi ken skelim olsem wanem God bilong mekim pasin tru tasol bai pinisim olgeta pasin nogut long dispela graun bilong Satan, na tu, ol samting God i mekim long nau bilong kamapim samting em i tingting pinis long mekim. Dispela atikol bai helpim yumi ol Witnes Bilong Jehova long sanap strong na no ken pret.

AS NA YUMI KEN TRASTIM TRU GOD BILONG MEKIM PASIN TRU TASOL

3. Wai na yumi ken trastim tru Jehova?

³ Yumi ken trastim tru Jehova bikos em i Krieta bilong yumi. Em i Man Bilong Wokim heven na graun na em i As bilong olgeta samting i gat laip. (Stt. 1:1; Sng. 36:9; Rev. 4:11) Na tu, em i Man Bilong Lukautim laip bilong yumi. Em i wokim win na wara, em ol samting yumi nidim bilong stap laip long graun. Na oltaim em i save kontrolim olgeta samting i stap long yunives. Olsem na yumi ken putim laip bilong yumi na ol samting yumi bilip na wet long en long han bilong Krieta bilong yumi, em God i gat bikpela savetingting na strong bilong em i no gat pinis bilong en.

4. Olsem wanem yumi save olsem Jehova i laikim yumi tru?

⁴ Yumi ken trastim tru Jehova bikos em i laikim yumi. Jehova i bin wokim ol manmeri bikos em i laik serim presen bilong i stap laip wantaim ol. Jehova i kamapim klia samting em i tingting pinis long mekim taim em i mekim ol dispela tok olsem: “Nau yumi mas wokim man i kamap olsem yumi yet.” (Stt. 1:26) Em i larim yumi stap fri long makim wanem samting yumi laik mekim. Em i wokim tu graun em naispela ples bilong yumi ken stap long en. (Sng. 115:16) Na em i blesim namba wan papamama bilong yumi na givim ol gutpela asainmen, em long mekim dispela graun i kamap wanpela Paradais. (Stt. 1:28; 2:15) Em i putim ol kaikai na ol narapela gutpela samting i stap long graun bilong ol man i ken enjoim laip. Tru tumas, olgeta dispela samting em i mekim i kamapim klia olsem “gutpela pasin laikim bilong Jehova i save stap oltaim oltaim.”—Sng. 103:17.

5. (a) Olsem wanem Jehova i truim tok promis bilong em maski Satan i wok strong long pinisim olgeta manmeri long graun? (b) Wanem sampela tok promis em God i bin truim pinis? (Lukim blok “Oltaim God i Save Mekim Tok Tru Tasol.”)

⁵ Yumi ken trastim tru Jehova bikos oltaim em i save truim ol tok promis bilong em. Em i no wokim graun “bilong i stap nating, nogat, em i wokim bilong ol samting i ken stap long en.” (Ais. 45:​18, 19) Taim Adam na Iv i bikhet long Jehova, Em i givim panismen long ol, em dai. So long dispela taim i luk olsem samting God i tingting pinis long mekim bai no inap kamap. Tasol Jehova em i Man Bilong Truim olgeta tok promis bilong em. (Ais. 46:​10, 11) Em i laik bai ol stretpela man na meri i pulap long olgeta hap bilong dispela graun, na dispela laik bilong em i no senis. Em as na Jehova i larim Adam na Iv i kamapim ol pikinini. Na em i givim dispela wanpela Pikinini bilong Em long kisim bek ol tumbuna pikinini bilong Adam, na givim rot long ol long bilip na wet long kisim laip oltaim long bihain.—Jon 3:16.

GOD BILONG MEKIM PASIN TRU I SAVE TRUIM OL TOK PROMIS BILONG EM

6. Bihain long pasin bikhet i kamap long gaden Iden, Jehova i tok profet long wanem samting bai kamap?

⁶ Man husat i kirapim Adam na Iv long bikhet long God em “dispela snek bilong bipo yet, ol i kolim em Devil na Satan.”a (Rev. 12:9; Stt. 3:​4, 5; Jon 8:44) Bikos long pasin em i mekim, Jehova i tokaut long kot bai painim em bihain, olsem em bai bagarap na pinis olgeta. (Stt. 3:15) Paslain long dispela samting i kamap, planti manmeri bai bihainim Satan na mekim ol wankain pasin olsem em i save mekim. Tasol sampela manmeri bai stap gut yet long Jehova.

7. Husat i bihainim Satan, na wanem samting bai painim ol long bihain?

⁷ Lain i bihainim Satan em ol bikhet ensel na ol man nogut. Ol i agensim o sakim ol samting em God i tingting pinis long kamapim, olsem na ol i kamap olsem ol pikinini bilong Satan. Tasol long taim stret God i makim, Satan na lain bilong em bai pinis olgeta na ol i no inap stap moa.—Dan. 2:44; Rom 16:20.

8. Jisas i bin mekim wanem samting long 1914? (Lukim tu ol piksa.)

⁸ Wanem samting i strongim bilip bilong yumi olsem samting em God i tingting pinis long mekim, em long pinisim Satan na lain bilong em, bai kamap tru? Long 1914, Jisas i pait wantaim Satan na ol ensel nogut na em i tromoi ol i kam daun long graun. (Rev. 12:​7-9) Em tru olsem dispela pait i kamap long heven, tasol ol manmeri long graun i ekspiriensim ol samting nogut em dispela pait i kamapim. Baibel i tok: “Yu graun na yu solwara, yupela lukaut, long wanem, Devil i kam daun pinis long yupela, na em i belhat nogut tru, em i save em i gat sotpela taim tasol bilong i stap.” (Rev. 12:12) Kirap long 1914 na i kam, Satan i bin wok strong tru long pulim planti manmeri i go long sait bilong em, em as na yumi lukim ol hevi bilong dispela graun i wok long i go nogut moa. Tasol klostu nau, Jisas bai “winim ol pait” na Satan na lain bilong em bai pinis olgeta. (Rev. 6:2) Jisas bai stretim bek gutnem bilong Jehova inap oltaim oltaim. (Sng. 45:​4-6) Olgeta manmeri bai save olsem Jehova em i God bilong mekim pasin tru tasol!—Ese. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

GOD BILONG MEKIM PASIN TRU I SAVE BUNGIM OL MAN I LAIKIM TOK I TRU

9. Jehova i wok long bungim husat ol manmeri long nau?

⁹ Long nau, Jehova i wok long bungim “olgeta samting long Krais, em ol samting long heven na ol samting long graun.” (Efe. 1:10) “Ol samting long heven” i makim ol Kristen God i bin anointim ol na ol bai mekim wok king wantaim Krais long heven. “Ol samting long graun” i makim ol manmeri em ol bai stap laip oltaim long Paradais long graun. Olgeta dispela manmeri i lotuim Jehova, long nau ol i wok strong tru long kamapim klia ol tok giaman bilong Satan na ol i helpim ol manmeri i gat gutpela bel long kisim save long tok i tru.

10. Olsem wanem Jehova i helpim ol manmeri long lusim kalabus bilong ol bilip giaman bilong Bikpela Babilon? (Revelesen 14:​6, 7)

¹⁰ Jehova i wok long bungim ol manmeri em ol i laikim tok i tru long rot bilong dispela bikpela wok bilong autim gutnius i kamap long olgeta hap bilong graun long nau winim olgeta narapela taim bipo. (Ritim Revelesen 14:​6, 7.) Tru, Jehova i yusim ol man long autim gutnius long ol narapela, tasol ol ensel tu i insait long dispela bikpela wok bilong bungim ol man i gat gutpela bel na bringim ol i kam insait long kongrigesen Kristen. Wok autim tok yumi mekim i kamapim klia ol tok na pasin giaman bilong Bikpela Babilon, em olgeta lotu giaman, em Satan i bin yusim inap planti handret yia bilong spredim ol tok giaman long Jehova. (Rev. 18:​2, 4) Klostu nau, olgeta lotu giaman bai pinis olgeta na ol bai no stap moa, na olgeta man husat i laikim God bilong mekim pasin tru tasol, ol bai givim em glori i stret tru long em i kisim.—Rev. 17:16.

11. Hau na yumi ken luksave long ol man i mekim lotu i tru long Jehova?

¹¹ Ol man i save laikim tok i tru, ol i bilong kain kain sindaun na kalsa na ol i bilong narapela narapela kantri. (Rev. 7:​9, 10) Taim ol i harim “gutnius,” ol i luksave olsem dispela em i gutnius na ol i amamas long insait long lain bilong Jehova. (Mak 13:10) Insait long ol yia i kam na i go, ol man i luksave long husat lain i lotuim God long pasin i tru na husat lain i no mekim olsem. Profet Malakai i tok profet olsem: “Yupela bai lukim gen pasin bilong stretpela man i narapela kain long pasin bilong man nogut. Na pasin bilong man i mekim wok bilong God i narapela kain long pasin bilong man i no mekim wok bilong God.” (Mal. 3:18) Long rot bilong pasin na wok autim tok ol i mekim, ol wokman bilong Jehova i kamapim klia olsem ol i lotu long God bilong mekim pasin tru tasol.

12. Olsem wanem wok autim tok yumi mekim i helpim long inapim samting em Jehova i tingting pinis long mekim?

¹² Yumi autim “gutnius bilong Kingdom,” na long dispela rot yumi soim olsem yumi bihainim tok Jisas i bin mekim, na tu, yumi truim tok profet bilong Baibel. (Mat. 24:14; 28:​18-20) Dispela wok yumi mekim i opim rot long ol manmeri long olgeta hap bilong graun i ken kamap ol disaipel bilong Krais na rot i op long ol inap lotuim God bilong mekim pasin tru tasol inap oltaim oltaim. Yumi kisim naispela blesing tru bilong mekim ol wok bilong inapim samting em Jehova i tingting pinis long mekim!

LUKLUK I GO HET WANTAIM STRONGPELA BILIP

13. Satan i wok strong long mekim nogut long husat, na bilong wanem?

¹³ Satan em dispela Devil em i belhat nogut tru bikos em i save olsem “em i gat sotpela taim tasol bilong i stap” na bai wok bos bilong em i pinis olgeta. (Rev. 12:​12, 13) Olsem na em i save mekim nogut tru long ol Kristen em God i bin anointim ol long mekim wok long Kingdom Bilong God, em ol i “save bihainim ol tok bilong God na ol i gat wok long tokaut long ol man long Jisas.” (Rev. 12:17; 14:12) Olgeta man husat i sapotim ol na ol wok ol i mekim, Satan bai birua tu long ol na mekim nogut tru long ol bilong pundaunim ol.

14. Wanem samting bai kamap taim Satan i pait long lain bilong Jehova? (Lukim tu pes piksa.)

¹⁴ Bihain long Bikpela Babilon i bagarap, ol lain i stap long sait bilong Satan, ol bai pait long lain bilong Jehova. Dispela bai kirapim pait bilong Armagedon. (Rev. 16:​13, 14, 16) Jisas na lain ami bilong em long heven bai kisim bek ol manmeri i lotuim Jehova na ol bai pinisim tru olgeta samting nogut i stap aninit long wok bos bilong Satan. (Rev. 19:​19-21) Ol man bilong tok giaman, ol man nogut, na ol man i save mekim pasin giaman, ol bai pinis olgeta na ol i no inap stap moa. (Rev. 21:8) Long dispela taim, olgeta manmeri bai save tru olsem Jehova em i God bilong mekim stretpela pasin na pasin tru tasol.

15. Wai na yumi ken lukluk i go het na bilip na wetim ol gutpela samting long kamap? (Aisaia 65:​16, 17) (Lukim tu piksa.)

¹⁵ Long nau winim olgeta narapela taim bipo, ol man i wok long giamanim narapela narapela na pait namel long ol yet. Tasol Jehova i helpim ol man i lotuim em long stap wanbel wantaim. Long nau yet, Jehova i wok long bungim lain manmeri bilong em. I no gat wanpela samting inap pasim Jehova long blesim lain bilong em na wok ol i mekim. (Ritim Aisaia 65:​16, 17.) Yumi ken lukluk i go het na bilip na wetim ol gutpela samting bai kamap. Tok bilong aposel Pol i stap long Rom 8:​38, 39 i helpim yumi long save tru olsem: “Dai, laip, ol ensel, ol gavman, ol samting nau i stap, ol samting bai kamap bihain, ol samting i gat strong, ol samting bilong antap, ol samting bilong daunbilo, na ol arapela samting God i bin wokim, olgeta dispela samting i no inap tekewe yumi long pasin laikim bilong God, em dispela pasin i stap long Krais Jisas, Bikpela bilong yumi.”

16. Wai na yu bilip tru long Jehova long bel olgeta bilong yu?

¹⁶ I gat planti risen na yumi inap bilip long Jehova, em God bilong mekim pasin tru tasol. Em i Krieta bilong yumi. Na em i laikim tru yumi. Namba bilong bikpela lain manmeri i wok long i go antap tru bikos planti manmeri moa bilong olgeta kantri i wok long kam insait long tok i tru bilong lotuim Jehova. (Ais. 60:22; Sek. 8:23) Yumi save olsem oltaim Jehova i save inapim ol samting em i tingting pinis long mekim na klostu nau em bai mekim ol samting bilong pinisim ol tok na ol pasin giaman bilong Satan. Yumi ken mekim wankain beten em Devit i bin mekim, olsem: “Litimapim nem bilong God Jehova, . . . em wanpela tasol i save mekim ol gutpela samting. Oltaim litimapim nem bilong em i nambawan tru, na glori bilong em i ken inapim olgeta hap bilong graun.”—Sng. 72:​18, 19.