WAS I STAP!
Ol Hevi Em Pasin Bilong Heitim Man i Kamapim Bai Pinis—Baibel i Tok Wanem?
Ol hevi em pasin bilong heitim man i kamapim i go bikpela tru. Ol man i kisim ol dispela hevi, long wanem, ol i bilong narapela lain, lotu, kantri, ol i man o meri, na bikos long ol narapela risen tu. Ol dispela kain pasin i go bikpela long ol komiuniti na ol man i pret, bel na tingting bilong planti i no stap isi, na ol i kisim hevi long bodi—na tu, sampela i lusim laip bilong ol.
Baibel i tok profet olsem long taim bilong yumi ol man “bai kamap wail olgeta, ol bai i no laikim ol gutpela pasin,” na “ol bai i no gat pasin bilong laikim ol wanfamili.” (2 Timoti 3:1-5) So yu ting ol hevi em pasin bilong heitim man i kamapim bai pinis? Baibel i tok wanem?
Hau ol hevi em pasin bilong heitim man i kamapim bai pinis
Baibel i helpim yumi long save olsem God inap pinisim pasin bilong mekim nogut long ol narapela, na em bai mekim olsem.
“Ol man nogut bai bagarap olgeta . . . Tasol ol man i gat pasin daun, ol bai kisim graun olgeta, na ol bai i stap bel isi tru na dispela bai mekim ol i stap amamas moa yet.” (Buk Song 37:9-11) God bai i no larim ol man bilong pait na bagarapim narapela i wok yet long mekim nogut long ol narapela.
“[God] bai mekim drai aiwara i stap long ai bilong ol, na bai i no gat dai moa, na ol bai i no bel hevi moa na krai moa, na ol bai i no inap pilim pen gen.” (Revelesen 21:4) God bai pinisim olgeta hevi ol man i karim long bodi, na long bel na tingting long nau.
“Bai i gat kirap bek bilong ol man i dai pinis.” (Aposel 24:15) God bai kirapim bek planti milion manmeri husat i dai pinis, dispela i makim tu ol lain em ol narapela i heitim ol na kilim ol i dai.
Karim hevi bilong pasin bilong heitim man long nau
Baibel i helpim yumi long bilip na wet long gutpela samting—em i helpim yumi long karim ol hevi em pasin bilong heitim ol man i kamapim long nau. Mipela i laik kirapim yu long kisim ol bekim bilong Baibel long ol dispela bikpela askim:
Yumi ken mekim wanem long nau bilong daunim pasin bilong heitim narapela we i save kamapim pasin bilong pait? Lukim tok Baibel i mekim long nius Wastaua, nem bilong en “Lusim Pasin Bilong Heitim Narapela.”
Wai na God i larim pen na hevi long i stap yet long nau? Kisim gutpela bekim i kam long Baibel long dispela vidio Bilong Wanem God i Larim Pen na Hevi i Stap?