“Kingdom Bilong Mi i No Bilong Dispela Graun”

Dispela Kingdom em Jisas i stori long en bai mekim samting em ol gavman bilong ol man i no inap mekim—em bai pinisim tru olgeta hevi yumi bungim long nau. Hau na Jisas i soim dispela samting long toktok na pasin bilong em?

Tok Jisas i mekim

• “Kingdom bilong mi i no bilong dispela graun.” (Jon 18:36) Jisas i kamapim klia olsem ol man na wok politik bilong dispela graun i no as bilong wok bos bilong em, nogat. God i givim wok bos long em.

• “Papa bilong mipela long heven, . . . Kingdom bilong yu i mas i kam. Laik bilong yu i mas kamap long graun olsem em i save kamap long heven.” (Matyu 6:9, 10) Long beten em planti i kolim olsem Beten Bilong Bikpela, Jisas i skulim ol disaipel bilong em long lukluk i go long Kingdom Bilong God—i no long wok bos bilong ol man—olsem em i rot bilong pinisim ol hevi long olgeta hap bilong graun. Klostu nau dispela gavman bilong God bai senisim gavman bilong ol man na bringim bel isi we bai stap oltaim long olgeta hap bilong graun.—Daniel 2:44.

Bilong kisim sampela save moa long dispela Kingdom na ol samting em bai mekim, lukim sotpela vidio Kingdom Bilong God Em i Wanem Samting?

Samting Jisas i mekim

• “Jisas i save olsem ol i laik kam na holim em na mekim em i kamap king, olsem na em i lusim dispela hap na em wan i go gen long maunten.” (Jon 6:15) Jisas i no laik bai ol man i givim namba long em na em i stap longwe tru long wok politik bilong dispela taim. Em i no mekim samting bilong sapotim wok gavman bilong ol man, na tu, em i no larim ol man i mekim em i kamap wanpela lida bilong gavman.

Hau na ol samting Jisas i mekim inap stiaim tingting ol Kristen i holim long wok politik? Bilong kisim sampela save moa, ritim atikol “Should Religion Be Involved in Politics?”