Bel Isi Bai Stap Long Olgeta Hap Bilong Graun

Olgeta manmeri i laik tru long stap long graun i gat bel isi. Kirap long bipo yet, ol lida bilong graun i wok strong long kamapim gen bel isi long dispela graun we i nogat bel isi. Sampela taim wok bilong ol i kamapim bel isi inap sotpela haptaim. Tasol sori tru, pait i kamap gen. Olsem wanem? Bel isi bai stap long dispela graun gen? Yes! Skelim skul yumi inap kisim long Jisas.

Samting Jisas bai mekim

Baibel i soim olsem klostu nau Jisas bai bringim bel isi long olgeta hap bilong graun.

• “Ol bai kolim nem bilong [Jisas] . . . Prins Bilong Bel Isi. Wok bos bilong em bai wok long kamap bikpela moa na bel isi bai i no gat pinis bilong en.” (Aisaia 9:6, 7) Olsem King bilong Kingdom Bilong God, Jisas bai kamapim bel isi long olgeta hap bilong graun na dispela bel isi bai i stap oltaim.

• “Em bai kisim bek ol rabisman i singaut long kisim helpim . . . na ol man i no gat wanpela bilong helpim ol.” (Buk Song 72:12-14) Jisas bai yusim wok bos bilong em long kamapim stretpela pasin, pinisim olgeta woa, pasin bilong pait na bagarapim narapela, na ol pen na hevi.

• “Wanpela kantri i no inap apim bainat na pait long narapela kantri, na bai ol i no skul moa long pait.” (Aisaia 2:4) Aninit long wok bos bilong Jisas, olgeta manmeri bai lain long stap bel isi na bai ol i no lain long pasin bilong pait.

Bilong kisim save long olsem wanem Jisas bai kamapim dispela bel isi long bihain na hau yu inap stap long en, watsim dispela sotpela vidio Kingdom Bilong God Em Wanem Samting?

Tok Jisas i skulim ol man long en

Long nau tu, ol tok bilong Jisas i helpim planti milion manmeri long stap bel isi. Long Bikpela Tok Long Maunten, Jisas i bin skulim yumi long ol pasin we i kamapim bel isi long olgeta de. Lukim sampela eksampel.

• “Ol man bilong mekim i dai kros, ol i ken amamas.” (Matyu 5:9) Jisas i kirapim ol disaipel bilong em long abrusim pasin bilong pait, na tu, long kamapim bel isi.

• “Pastaim stretim tok wantaim brata bilong yu na bihain kam bek, na givim ofa bilong yu.” (Matyu 5:23, 24) Jisas i kirapim ol manmeri i putim yau long em olsem ol i mas hariap long stretim tok wantaim ol narapela. Em i skulim yumi olsem pasin bilong kamapim bel isi wantaim ol narapela i bikpela samting long yumi ken i gat gutpela pasin pren wantaim God.

• “Yupela i mas lusim pasin bilong skelim ol arapela olsem jas, nogut ol i skelim yupela tu.” (Matyu 7:1) Jisas i tok lukaut long yumi no ken mekim hatpela pasin o skelim ol arapela long pasin giaman, long wanem, dispela inap kamapim hevi. Na tu, yumi no ken painim popaia bilong ol arapela, Jisas i skulim ol disaipel long “wok yet long fogivim” rong bilong ol arapela.​—Luk 6:37.

Ol manmeri long olgeta hap bilong graun i bihainim ol tok Jisas i autim. Maski long ol ples we i gat pasin bilong pait na bagarapim man o brukim lain, ol i lain long stretim hevi long pasin isi, redi long fogivim narapela, na soim pasin laikim maski ol narapela i no mekim gutpela pasin.

Bilong lukim hau tok bilong Jisas i helpim sampela manmeri long kisim bel isi, ritim atikol “Stap Bel Isi Maski Woa na Pait i Stap.”