Pait na Bagarapim Man Em i No Rot Bilong Stretim Hevi

Planti man long nau i ting olsem pasin bilong pait na bagarapim man em i rot bilong stretim ol tok pait o hevi. Tasol dispela kain tingting i no wankain long tok Jisas Krais i skulim ol man long en, na tu eksampel bilong em. Skelim sampela tok na samting em i mekim.

Tok Jisas i mekim

Long Bikpela Tok Long Maunten em planti man i save long en, Jisas i kamapim olsem pasin bilong belhat, hatpela pasin, na pasin bilong pait na bagarapim man ol i no rot bilong stretim hevi. Skelim sampela eksampel.

• “Olgeta samting yupela i laik bai ol man i mekim long yupela, yupela i mas mekim long ol.” (Matyu 7:12; Luk 6:31) Planti i kolim olsem Gutpela Lo Tru,a dispela lo i kirapim yumi long mekim pasin long ol narapela olsem yumi laik bai ol i mekim long yumi. I no gat wanpela i laik bai ol narapela i pait na bagarapim em, olsem na yu ting yumi mas soim rispek na mekim pasin helpim long olgeta manmeri—maski yumi no wanbel wantaim ol?

• “Man i solapim wasket bilong yu long rait sait, orait tanim narapela wasket tu long em.” (Matyu 5:38, 39; Luk 6:29) Jisas i no skulim yumi olsem olgeta wan wan i mas larim ol narapela i mekim pasin nogut long ol, nogat. Em i stretim tingting kranki—i luk olsem sampela hetman bilong lotu i skulim ol man—olsem em orait long bekim pasin nogut ol narapela i mekim. Em i tokim ol disaipel bilong em olsem ol i no ken bekim rong, nogat, ol i mas mekim tok long pasin isi taim ol narapela i sikirapim bel.b

• “Yupela i mas laikim yet ol birua bilong yupela.” (Matyu 5:43, 44; Luk 6:27) Jisas i skulim yumi olsem yumi mas mekim gutpela pasin long ol lain i heitim na mekim pasin i no fea long yumi. Tok bilong em i no makim olsem yumi mas orait long pasin nogut bilong ol.c Tasol taim yumi soim gutpela pasin long ol lain i heitim yumi, dispela inap daunim belhat bilong ol, na tu kirapim ol long mekim gutpela pasin long yumi.

Samting Jisas i mekim na em bai mekim

Jisas i skulim yumi olsem pasin bilong pait na bagarapim man em i no rot bilong stretim hevi—na em i save bihainim samting em i skulim ol man long en. Long nait ol i arestim Jisas, wanpela bilong ol disaipel bilong em i pait bilong lukautim em, tasol Jisas i tok: “Putim bainat bilong yu i go bek long ples bilong en, long wanem, ol man i yusim bainat, ol bai dai long rot bilong bainat.” (Matyu 26:52) Jisas i soim pasin laikim long ol birua bilong em long rot bilong fogivim ol lain i no mekim gutpela pasin long em, na tu em i beten long ol!​—Luk 23:33, 34; 1 Pita 2:23.

Baibel i tok promis olsem klostu nau Jisas—olsem Prins Bilong Bel Isi—bai pinisim olgeta pasin bilong pait na bagarapim man. (Aisaia 9:6, 7) Bilong kisim sampela save moa long dispela gutpela samting bai kamap bihain, ritim atikol “Rot Em Woa na Pait Bai Pinis.”