Jehova i Helpim Mi Long Kamap Gutpela Man

Mi lukim planti samting we mi no bin lukim bipo, tasol samting mi laikim tru em pasin bilong ol bratasista. Long dispela hap, ol yangpela bratasista i givim bel tru long mekim ol wok i no gat nem. I no olgeta taim ol man i save preisim ol o tingim wok ol i mekim. Maski i olsem, ol i amamas na givim bel tru long mekim wok bilong ol. Gutpela eksampel bilong ol i skulim mi long daunim mi yet na mekim wok bilong God.

Insait long ol yia i kam na i go, Jehova i helpim mi long kamap gutpela wokman bilong em. Tasol pastaim bai mi stori long hau mi bin painim tok i tru taim mi stap long lotu Buda.

PAINIM GOD TAIM MI PIKININI YET

Mi bon na kamap bikpela long Chicago, Illinois, Amerika na mi fes bon na papamama i gat 3-pela narapela pikinini tu. Papamama bilong mi i lusim Japan na kam sindaun long Chicago na bai ol i ken i gat gutpela sindaun long Amerika. Ol i laik bai ol pikinini bilong ol i ken i gat gutpela ediukesen na bai ol i ken i gat gutpela sindaun tru bihain.

Papamama bilong mi i givim bel tru long lotu Buda. Mama bilong mi i kamap bikpela long haus we i gat tempel bilong lotu Buda i stap insait long en. Papa bilong em na tupela brata bilong em i mekim wok olsem monk o pris bilong lotu Buda. So lotu Buda i stap olsem nambawan bikpela samting long mi taim mi pikinini. Fes samting mi save mekim taim mi kam bek long skul em mi mas kukim paura bilong kamapim smok i gat gutpela smel na givim rais na wara olsem ofa long imis Buda bilong mipela. Long ol Sande, mipela i save go long tempel bilong lotu Buda we mipela i save kolim sampela tok planti taim long traipela imis gol i stap long dispela hap.

Taim mi gat 7-pela krismas, mi tingim wanpela taim mi lukluk long dispela imis i stap long haus na mi tingting olsem, ‘Laip bilong mi bai olsem wanem bihain long mi dai?’ Lotu Buda i skulim mi olsem bihain long mi dai mi bai go stap long ples spirit. Mi luksave olsem wanpela taim laip bilong mi bai pinis. Ating bai mi stap olsem wanpela spirit, tasol mi no inap enjoim laip olsem wanpela man. Dispela i mekim mi wari! Wantu mi luksave olsem i no gat man i stap bilong helpim mi na dispela tingting i daunim mi tru.

Taim mi gat 15 krismas, mi pilim olsem ol pasin bilong lotu Buda mi wok long bihainim i no gat mining bilong en. Mi pilim olsem sampela samting i mising long laip bilong mi. (Mat. 5:3) Insait tru long bel bilong mi, mi pilim olsem i gat God i stap na em i gat olgeta strong. So mi laik kisim save long em. Na mi tingting olsem ating Baibel tasol inap bekim ol askim mi gat. So mi baim wanpela Baibel King James Version long wanpela festival bilong lotu Buda, em hap we yu no inap tru kisim wanpela Baibel long en!

Taim mi gat 17 krismas, wanpela brata nem bilong em Wilson Bashou i bungim mi long strit taim mi wokabaut wantaim dok bilong mi. Em i askim mi: “Yu save long ol tok promis God i mekim long ol samting bai kamap long bihain?” Dispela askim i opim rot na mipela i stori gut tru long ol tok bilong Baibel. Wilson i ritim Revelesen 17:1 na askim mi: “Dispela ‘planti wara’ em bikpela pamukmeri husat i sindaun antap long en i makim wanem?” Mi no save em makim wanem samting. Em i soim mi ves 15 we ves i tok dispela wara i makim ol manmmeri. Mi kirap nogut tru long save olsem ol Witnes Bilong Jehova i larim Baibel yet i bekim ol askim bilong Baibel. Paslain long mi lusim Wilson, em i givim mi buk Tok i Tru i Bringim Man Long Laip Oltaim. Dispela liklik blupela buk i senisim tru laip bilong mi.

Inap 10-pela de bihain, mi go long fes miting long Haus Kingdom. Mi no inap lusim tingting long gutpela pasin laikim ol bratasista i mekim long mi. Na mi no bin lusim wanpela miting kirap long dispela taim na i kam inap long nau. Bihain Wilson i kirap stadi long Baibel wantaim mi. Mi gat laik tru long kisim save long Baibel, so sampela taim mipela i save stadi inap 8-pela aua olgeta. Papamama bilong mi i kirap nogut na ol i pret long samting mi mekim na ol i pasim mi long stadi. Tasol taim mi stadi moa long ol tok bilong Baibel, dispela i kirapim mi long bilip tru olsem dispela em tok i tru. Mi kisim baptais long 1983.

MI LUSIM YUNIVESITI LONG KAMAP PAINIA

Long dispela taim mi kisim baptais, mi bin go long wanpela yunivesiti i gat nem na mi stadi long kamap dokta. Papamama bilong mi i bin sakrifaisim planti samting na bai mi ken kisim dispela ediukesen. Mi inap stadi yet long dispela yunivesiti, tasol mi laik givim bel olgeta long Jehova na mekim wok bilong em fultaim.

Papa bilong mi i givim tok lukaut long mi olsem: “Sapos yu lusim skul long yunivesiti, orait bai mi kikim yu aut long haus bilong mi!” Mi wari na konfius. Mi laikim tru papamama bilong mi na mi no laik mekim ol i bel hevi. So planti taim long nait mi save sindaun long eria bilong yunivesiti na lukluk i go antap long skai na beten olsem: “Jehova, plis, helpim mi long mekim gupela disisen.” Taim mi wokim disisen pinis olsem mi bai lusim skul long yunivesiti, papa bilong mi i rausim mi long haus bilong em. Mi ringim Wilson na tokim em long ol samting i bin kamap. Na long gutpela pasin em i singautim mi long go stap wantaim em. Mi kalap long bas na go long apatmen bilong em wantaim ol kago bilong mi insait long wanpela beg tasol. Mi tingim olsem mi bin pilim bikpela bel isi tru bihain long mi mekim dispela disisen. Mi save olsem mi mekim rait disisen.

Mi pilim olsem wanpela pisin em ol i rausim em long keits bilong em! Nau mi stap fri long givim mi yet olgeta long mekim wok autim tok fultaim. Mi kirap painia long 1984.

Long ol yia mi mekim wok painia oltaim, Jehova i skulim mi long sampela gutpela pasin, olsem pasin bilong no ken les hariap. Wanpela taim i luk olsem mi gat gutpela risen long mi no ken go autim tok. Mi bin bel hevi bikos i no gat wanpela bai joinim mi long mekim wok autim tok long apinun. Mask i olsem, mi go tasol. Bihain long mi autim tok inap sampela aua, mi go nok long laspela haus long wanpela apatmen bilding. Mi pilim taiet na mi pilim wanpis na ples i luk olsem em bai ren. Na mi tingting olsem, ‘Mi bai lusim na go o nogat?’ Taim mi wokabaut long lata i go antap long namba 3 plua, mi lukim wanpela yangpela Filipino man i sanap i stap. Na mi tingting long mi yet olsem, ‘Em bai no gat laik long harim tok mi autim.’ Tasol mi rong tru! Mi kirap long stadi long Baibel wantaim dispela man na em i kamap wanpela brata bilong mi long bilip.

MI LAINIM PLANTI GUTPELA SAMTING LONG BROOKLYN BETEL

Bihain long mi stap wantaim Wilson inap 2-pela yia, ol brata i singautim mi go wok long Brooklyn Betel long 1985. Olsem mi bin stori long kirap bilong dispela atikol, ol i asainim mi long wok long Bainderi. Wanpela taim mi wok long masin i save raitim tok antap long karamap bilong buk na mi popaia na mi bagarapim planti handret karamap bilong buk. Ol brata long Bainderi Ofis i tokim mi long ripotim dispela samting long ovasia. Na mi stori long olgeta risen na mi mekim dispela popaia, tasol wanpela samting i mising. Long gutpela pasin, ovasia i tokim mi olsem, “Long olgeta taim, em gutpela long yu tok sori.” Long dispela taim stret, mi luksave olsem em i bikpela samting long mi mas tokaut long popaia bilong mi na tok, “Mi sori.”

Tingting mi gat long helpim ol narapela i kamap gutpela moa taim mi lukim pasin em ol lapun bratasista long Betel famili i mekim. Wanpela taim Brata Milton Henschel em wanpela brata long Gavening Bodi i sindaun long tebol bilong mipela long taim bilong belo kaikai. Long dispela de, i gat planti manmeri tru long Betel na daining rum i pulap tru, na ol lain bilong sevim kaikai i wok hat tru long putim kaikai long olgeta tebol. Mipela ol yangpela brata i komplein olsem ol i no sevim kaikai hariap long mipela. Tasol Brata Henschel i no mekim wanpela tok, em i kirap na go helpim ol lain bilong sevim kaikai na em i putim ol wara kontena na ol plet bilong bret na bata long olgeta tebol. I kam inap long nau, mi no bin lusim tingting liklik long dispela pasin em i bin mekim. Dispela i kirapim mi long tingim pasin Jisas i bin mekim long ol aposel bilong em.—Jon 13:​3-5.

“YU MAS LAINIM TOKPLES JAPAN”

Long 1987, mi raun i go long Japan na mi kirap nogut tru long pasin daun na pasin bilong ol brata long hap long givim bel tru long wok. Mi gat laik tru long helpim ol, tasol hevi em olsem mi no bin lain long mekim tokples Japan. Wanpela sista long Betel, nem bilong em Michiko Oda, em i lukluk stret long ai bilong mi na tokim mi olsem: “Yu mas lainim tokples Japan!” Na mi mekim olsem. Na mi no bin save long dispela taim olsem tok bilong em bai senisim tru laip bilong mi.

Sampela mun bihain, mi muv i go long wanpela kongrigesen long New York i save mekim tokples Japan. Mi lainim tokples Japan na dispela i opim rot long mi inap mekim planti wok moa bilong God Jehova. Long 1989, mi go long fes kibung i kamap long tokples Japan long Los Angeles, California. Wanpela painia sista nem bilong em Miwako Onami i insait long drama i kamap long kibung na em i pulim ai bilong mi na mi laikim em.

Mitupela Miwako i marit long 1992 na mipela i amamas long mekim wok wantaim long Brooklyn Betel. Miwako i gat gutpela pasin na em i save tingim tru ol narapela na oltaim em i save redi long helpim ol narapela. Gutpela eksampel bilong em i helpim mi long mekim gutpela pasin moa long ol narapela. Em i olsem gutpela presen i kam long Jehova, oltaim em i save mekim mi amamas na mekim gut bel bilong mi.

JAPAN BRENS NA WOK AUTIM TOK

Sampela haptaim bihain, tupela papamama bilong Miwako em ol i save stap long Japan ol i sik nogut tru. So ol brata i tok orait long salim mipela i go long Japan brens na bai mipela i ken stap klostu na lukautim tupela. So mipela i muv i go long Japan long 1999.

Betel famili long Japan i mekim gutpela pasin long mipela na em i isi long mipela i lain long nupela sindaun bilong mipela. Mi wok long kisim ol gutpela pasin long rot bilong bihainim ol gutpela pasin bilong ol bratasista long Japan olsem pasin bilong ol long amamas long givim samting na lukautim ol narapela. Long sait bilong wok, ol i save siries na putim tingting olgeta long wok ol i mekim. Na ol i save wok gut wantaim olsem grup. Hau ol i mekim olsem? Long kalsa bilong Japan, ol manmeri i save wok gut wantaim long pinisim wanpela wok na yu no mas wok yu yet bilong pinisim wanpela wok. Gutpela eksampel bilong ol i strongim mi long kisim pasin daun na wok wantaim ol narapela na tingim olsem liklik wok mi mekim i helpim long inapim ol samting Jehova i tingting pinis long mekim.

Mi no kliagut long kalsa bilong Japan, olsem na sampela taim i hatwok long mi kliagut long sampela disisen em ol brata i mekim. Mi mas lain long pasin bilong i no les kwik na mi no ken hariap long mekim wanpela samting. Bihain mi lain long holim stretpela tingting na luksave olsem Jehova inap blesim wanem disisen ol brata i mekim taim dispela disisen i stret wantaim daireksen i kam long oganaisesen bilong em. So maski ol i mekim wanem disisen, Jehova tasol inap mekim ol wok i kamap gut.

Planti taim mi tingim trening mi kisim long Betel i wankain olsem trening em profet Moses i bin kisim. Jehova i helpim em long kisim pasin isi insait long 40 yia em i mekim wok olsem wasman bilong sipsip. Wankain olsem Moses, mi kam long bekgraun we famili bilong mi i kisim bikpela ediukesen. So mi larim pasin bilong kisim kain ediukesen i mekim mi kisim pasin antap na pasin bilong bilip long strong bilong mi yet. Tasol Betel i skulim mi long kisim pasin daun na bilip long strong bilong Jehova. Wankain olsem Jehova i no les kwik na em i helpim Moses, Jehova i bin helpim mi insait long ol dispela yia mi mekim wok bilong em.

Mitupela i lukautim papamama bilong Miwako inap 24 yia samting na ol i dai. Insait long ol dispela yia mipela i ring planti, tingting planti, na mipela go planti taim long haus sik. Helt bilong mama bilong Miwako, em Masako, i go nogut moa, i go inap long mak we em i no inap long kirap na wokabaut. Em i no isi long Masako long go long ol miting na go long autim tok. Long ol laspela wik bilong em, em i sindaun long wilsia. Maski em i karim olgeta dispela hevi, pasin bilong em long laikim tru Jehova i no pinis. Pes bilong em i save lait na em i save amamas taim em i stori long tok i tru. Gutpela eksampel bilong Masako long mekim wok bilong God na stap belgut na amamas maski wanem samting i kamap long laip bilong em, dispela i bin strongim mi tru.

Long 2024 bikpela senis i kamap long sindaun bilong mipela. Bihain long mipela i mekim wok long Betel winim 30 yia, ol i asainim mipela i go bek long fild. Nau mipela i mekim wok spesel painia long ailan bilong Okinawa na mipela i amamas long autim tok long ol famili i sindaun long militeri beis i stap long dispela hap. Gutpela trening mipela i kisim long Betel i helpim mipela long mekim dispela nupela sindaun i kamap gutpela moa na enjoim wok autim tok. Mipela i traim long mekim gutpela sediul na yusim gut taim bilong mipela long rot bilong putim tingting olgeta long wok autim tok na givim bel tru long mekim olsem. Jehova i blesim mipela na mipela i gat ol Baibel sumatin em ol i kamap olsem famili bilong mipela. Mipela i luksave olsem em i bikpela samting long mipela i mas laikim ol manmeri. Mitupela Miwako i tok tenkyu long Jehova long olgeta de long dispela naispela asainmen.

TINGTING STRONG LONG LARIM JEHOVA I HELPIM MI LONG KAMAP GUTPELA MOA

Famili bilong mi, maski ol i no birua moa long mi, ol i no kirap long joinim mi long lotuim Jehova. Maski i olsem, Jisas i tok promis olsem ol manmeri husat i lusim famili bilong ol na kamap disaipel bilong em, ol bai kisim 100 taim moa, em ol bratasista husat bai kamap olsem famili bilong ol. (Mak 10:​29, 30) Dispela samting i kamap tru long mi. Ol famili long graun olgeta em ol i laikim mi na tingim mi tru insait long ol dispela yia, ol i planti tru na i hatwok long kaunim.

Long nau mi holim yet dispela buk Tok i Tru em Wilson i bin givim long mi. Taim mi lukim dispela buk, mi save tingim hau Jehova i bin helpim mi long painim tok i tru. (1 Sto. 28:9) Mi tingting strong yet long larim Jehova i skulim mi na helpim mi na yusim mi long helpim ol narapela long kisim save yet long tok i tru i bringim man long laip oltaim.