Stretim Hevi Hariap!

Yumi ken tok piksa olsem, taim wanpela bun i bruk, dokta i mas stretim hariap na bai em i ken wok gut na i no givim pen long man. Tasol pen inap stap yet, sapos man i no hariap long kisim helpim em i nidim. Na samting i nogut moa em olsem, dispela bun i no inap sindaun gut long ples stret bilong en na i no inap wok gut.

Olsem wanpela bun i bruk, tupela wanbilip Kristen em hevi o kros i mekim na ol i no stap pren moa, ol i mas hariap long stretim bek pasin pren bilong ol. Sapos ol i no mekim olsem, bel hevi bilong pasin pren i bagarap bai stap longpela taim. Na nau ol inap stat long bel nogut long narapela narapela na i no stap pren moa. Jisas i tok: “Hariap na stretim tok.” (Mat. 5:25) So toktok long gutpela pasin long pren bilong yu na tokaut klia long samting i kamap. Wai na yu inap pilim hatwok long mekim olsem? Skelim tupela risen.

Namba 1, yu inap pilim olsem em orait long yu sakim dispela samting i bin kamap na yupela i no stretim, ating yu mekim olsem bikos em no pasin bilong yu long toktok long ol hevi i kamap.b Tingim tupela Kristen sista em Yuodia na Sintike, tupela i bin bel hevi long narapela narapela na ol i no stretim hevi i kamap. Hevi bilong tupela i stap longpela taim, na aposel Pol, maski em i stap long Rom, em i harim long samting i kamap. Em i kirapim tupela long mekim ol samting bilong strongim gen pasin wanbel namel long ol. (Fili. 4:2) Ol inap stap pren gen sapos ol i daunim ol yet, toktok gut wantaim, na fogivim tru narapela narapela.

Namba 2, ating yu laik bai man husat i rongim yu i tokaut olsem pasin em i mekim i no stret. Tasol yu laik stap gutpela pren gen wantaim em, na yu no laik sutim tok long husat i rong na husat i rait. Wanpela dokta husat i traim long stretim bun i bruk, em bai wok strong long stretim dispela bun, na em i no inap traim long painimaut long olgeta liklik liklik samting long hau dispela bun i bruk. Taim yu toktok long pren bilong yu, no ken wok strong long painimaut long husat i rong na husat i rait. Wok strong long tingim tru pasin pren bilong yutupela na putim tingting long samting yu ken mekim bilong stretim gen pasin pren bilong yutupela.

Yu ting yu ken toktok wantaim brata o sista bilong yu long nau na mekim ol samting bilong stretim bek pasin pren bilong yutupela? “No ken larim san i go daun na yupela i belhat yet.” (Efe. 4:26) Taim yu hariap long stretim bek pasin pren bilong yupela, yu mekim ol samting bilong “stap bel isi, em pasin i save bungim yumi wantaim.”—Efe. 4:​1-3.