Helpim Ol Narapela Long Kisim Save Long Jehova

1. Yu save pilim olsem wanem taim yu lukim wanpela Baibel sumatin i winim ol mak bilong bilip?

YU SAVE pilim olsem wanem taim yu lukim wanpela Baibel sumatin i kam long miting bilong kongrigesen long fes taim, em i kirap long bekim tok, em i autim bilip bilong em long ol narapela, na bihain em i wokim disisen long dediketim em yet long Jehova God? Yu amamas long lukim dispela! Tru tumas, i stret long Jehova i kisim biknem taim Baibel sumatin bilong yumi i winim ol mak bilong bilip. Yumi preisim Jehova taim yumi lukim olsem wanem em i helpim ol narapela long kamap strong long bilip.—1 Kor. 3:​5-9; 3 Jon 3, 4.

2. Jehova i laik bai ol Baibel sumatin i mekim wanem? (1 Timoti 2:​3, 4)

² Laik bilong God i olsem, “em i laik kisim bek olgeta kain man na em i laik bai ol i kisim stretpela save long tok i tru.” (Ritim 1 Timoti 2:​3, 4.) Jehova i laik bai ol manmeri i kisim save long em na ol i save gut long ol samting em i tingting pinis long kamapim. (Jer. 9:24) Dispela i makim olsem ol i mas kisim stretpela save. Wanpela saveman bilong Baibel i tok, long tokples em ol i bin raitim Baibel long en long bipo, dispela tok “stretpela save” i no makim olsem wanpela man i kisim save na em tasol, nogat, em i makim olsem save em i kisim “i mekim sampela samting long laip bilong em.” Taim wanpela Baibel sumatin i kisim save long Jehova, dispela save i mekim sampela samting long laip bilong em. Em i opim rot long em inap i gat hop long kisim “laip oltaim” long bihain.—Jon 17:3.

3. Yumi bai skelim wanem samting long dispela atikol?

³ Jehova i bin givim yumi gutpela wok bilong helpim ol narapela long kisim save long em. Long dispela atikol, yumi bai skelim ol dispela askim: Wai na ol Baibel sumatin i mas save gut long Jehova? Hau yumi ken skulim ol long ol pasin bilong Jehova? Na hau yumi ken helpim ol long yusim save ol i kisim long Jehova long laip bilong ol?

HELPIM SUMATIN LONG SAVE GUT LONG JEHOVA

4. Olsem Mak 12:30 i kamapim, wanem nambawan wok bilong yumi taim yumi stadi long Baibel wantaim ol sumatin?

⁴ Jisas i tok nambawan bikpela lo i olsem, yumi mas laikim Jehova long bel olgeta, laip olgeta, tingting olgeta, na long strong olgeta bilong yumi. (Ritim Mak 12:30.) Ol Baibel sumatin i mas kisim save long Jehova na bai ol i ken laikim em. Yumi laik ol Baibel sumatin i dediketim ol yet long Jehova, na i no long yumi na ol bilip ol i lainim o long wanpela oganaisesen. Olsem na nambawan wok bilong yumi taim yumi stadi long Baibel wantaim ol sumatin em long helpim ol long kisim save long Jehova na laikim em.

5. Pasin bilong laikim Jehova bai kirapim Baibel sumatin bilong yu long mekim wanem?

⁵ Pasin laikim i save poroman gut wantaim pasin bilong bihainim tok. Taim Baibel sumatin bilong yu i kisim save long Jehova na laikim em, dispela bai kirapim em long bihainim tok bilong Jehova. Jisas i tok: “Bilong ol manmeri bilong graun i ken save olsem mi laikim Papa, mi bihainim tok Papa i bin givim mi.” (Jon 14:31) Olsem tasol, pasin bilong laikim Jehova—winim olgeta narapela samting—bai kirapim ol Baibel sumatin long bihainim tok bilong em na pas gut wantaim em.—1 Jon 5:3.

6. Taim Baibel sumatin bilong yu i kisim save long Jehova, olsem wanem dispela inap helpim em long mekim ol disisen? Stori long tok piksa.

⁶ Taim ol Baibel sumatin i kisim planti save long Jehova, dispela bai helpim ol long mekim ol gutpela disisen. Tingim dispela tok piksa: Wanpela pailot i no lain long flaim balus long rot bilong ritim tasol stori long hau long flaim balus o long rot bilong mekim wanpela eksem, nogat. Em i mas lusim planti aua long flaim balus. Na bihain long sampela haptaim i lus, em bai lain long stiaim gut balus long narapela narapela weda na hau ol disisen bilong em inap mekim sampela samting long ron bilong balus. Olsem tasol, wanpela Baibel sumatin bai save gut long Jehova long rot bilong stadi long tok bilong em, na i no dispela tasol, em i mas luksave tu long wanem ol samting i save kamap taim em i mekim ol disisen i stret wantaim ol stiatok bilong Baibel. Na taim save bilong em long Jehova i kamap bikpela, na em i lukim olsem wanem Papa bilong em long heven i helpim em, dispela bai redim em long mekim ol gutpela disisen taim kain kain samting i kamap long laip bilong em.

7. Olsem wanem save Josep i kisim long Jehova i helpim em long mekim gutpela disisen?

⁷ Save em Josep i kisim long Jehova i helpim em long sakim meri bilong Potifar taim em i laik pulim Josep long slip wantaim em. Taim Josep i liklik boi yet, em i harim ol stori bilong Adam na Iv na stori bilong Abraham na Sara. (Stt. 2:24; 20:​3, 6) Ol dispela stori i helpim Josep long luksave long tingting Jehova i gat long marit na maritpasin we i olsem presen. Josep i save gut tru long Jehova na dispela i helpim em long sakim meri bilong Potifa taim em i laik pulim Josep long mekim pasin i no stret. Josep i tokim em: “Wai bai mi mekim dispela pasin nogut tru na mekim sin long ai bilong God?” (Stt. 39:​7-9) Josep i save long wanem samting i stret na wanem samting i no stret long ai bilong Jehova. Em i kliagut long wanem samting inap mekim God bilong em i bel hevi. Em risen na Josep i mekim gutpela disisen. Sapos yumi helpim ol Baibel sumatin long save gut tru long Jehova na lainim ol pasin bilong em, ol tu bai mekim ol disisen i amamasim em.

SKULIM EM LONG OL PASIN BILONG JEHOVA

8. Hau yu inap yusim buk Stap Amamas Oltaim! long helpim Baibel sumatin long save gut long Jehova?

⁸ Hau yu inap skulim Baibel sumatin bilong yu long ol pasin bilong Jehova? Jehova i bin helpim Jop long save gut moa long em long rot bilong givim em ol askim, Em i givim winim 50 askim long Jop! (Jop 38:1–41:34) Yumi tu i ken mekim wok long ol askim. Ol askim i stap long buk Stap Amamas Oltaim! i bilong helpim ol sumatin long wok yet long kisim sampela save moa long Jehova em i wanem kain God tru. (Lukim blok “Ol Askim Inap Helpim Wok Tisa Bilong Yumi.”) So yusim ol dispela askim long helpim sumatin bilong yu long save gut long Jehova.

9-10. (a) Wanem samting bai helpim ol Baibel sumatin long kisim gutpela helpim long Baibel ritim bilong ol? (Jems 5:11) (b) Wanem stori bilong Baibel i kamapim klia ol samting Jehova i amamas long en na i no amamas long en?

⁹ Taim yumi kirap stadi long Baibel wantaim ol sumatin bilong yumi, yumi save kirapim ol long kisim pasin bilong ritim Baibel long olgeta de.a Hau yumi ken helpim ol long kisim gutpela helpim long pesenel Baibel ritim bilong ol? Yumi ken mekim sajesten long ol olsem long olgeta taim ol ritim wanpela hap bilong Baibel, ol i ken traim long tingim wai Jehova i larim dispela stori i stap long Baibel na dispela stori i kamapim wanem ol pasin bilong Jehova. Lukim hau disaipel Jems i bin mekim olsem taim em i kamapim stori bilong Jop. Jems i stori long wanpela pasin bilong Jop em pasin bilong em long sanap strong, na i no dispela tasol, em i stori tu long ol pasin bilong Jehova, olsem pasin bilong em long sori tru na marimari.—Ritim Jems 5:11.

¹⁰ Yumi laik ol Baibel sumatin bilong yumi i luksave long olsem wanem ol stori i stap long Baibel i kamapim klia ol samting Jehova i amamas long en na i no amamas long en. Olsem, ating sumatin bilong yumi i yusim dispela sat “Stat Long Ritim Baibel” long buk Stap Amamas Oltaim! na em i tokim yumi olsem em i laik ritim stori bilong Daniel long ol birua i tromoi em i go long hul bilong ol laion. Yumi inap kirapim em long tingim tingim long bel ol kain askim olsem: ‘Wai na Jehova i seivim Daniel? Dispela i givim wanem skul long mi long ol samting Jehova i amamas long en?’ (Dan. 6:​10, 22) Na sumatin inap givim kain askim long em yet olsem: ‘Wanem samting i kamap long ol dispela man em ol i bin sutim tok long Daniel? Dispela i givim wanem skul long mi long ol samting Jehova i no amamas long en?’ (Dan. 6:​4, 5, 24) Na bihain, em i ken tingim ol narapela pasin bilong Jehova i stap ples klia long dispela stori.—Dan. 6:​26, 27.

11. Hau yumi ken helpim Baibel sumatin bilong yumi long tingim Baibel stadi bilong em olsem presen i kam long Jehova?

¹¹ Yumi save amamas taim sumatin bilong yumi i tok tenkyu long gutpela helpim em i kisim long rot bilong Baibel stadi bilong em. Tasol yumi laik helpim em long luksave olsem Jehova em i Nambawan Bikpela Tisa bilong yumi na em i As bilong ol tok em sumatin i lainim. (Ais. 30:​20, 21) Ating sumatin bilong yumi i tok tenkyu long yumi long ol samting em i lainim, na ating em i preisim yumi long pasin bilong yumi long skulim em. Em tru olsem i no gat rong long em i mekim ol tok tenkyu long yumi, tasol yumi laik stiaim sumatin bilong yumi long preisim na tenkim Jehova long ol dispela samting.

HELPIM EM LONG YUSIM SAVE EM I KISIM

12-13. Taim sumatin i save gut long Jehova, hau bai dispela i helpim em taim em i pilim hatwok long kliagut long wanpela stori i stap long Baibel? (Lukim tu piksa.)

¹² Bilong kisim gutpela helpim long stretpela save, yumi mas yusim save em yumi kisim pinis. So hau yu ken helpim sumatin bilong yu long yusim save em i kisim? Pastaim, skulim em long tingim ol samting em i save pinis long en long Jehova taim em i ritim wanpela stori long Baibel we em i pilim hatwok long kliagut long en. Olsem, taim em i ritim stori long ol kot bilong Jehova, em inap i gat askim olsem wai na Jehova i kilim i dai sampela man na em i larim ol narapela i stap laip. Hau yu inap helpim sumatin long holim stretpela tingting long dispela samting?

¹³ Yu ken kirapim sumatin bilong yu long tingim tingim ol samting em i lainim pinis long Jehova. Hau na yumi save olsem laip bilong ol man i bikpela samting long Jehova? (2 Pita 3:9) Em i bin mekim wanem samting bilong kisim bek yumi, maski yumi ol sinman? (Efe. 2:​4, 5) Yu ting Jehova i save panisim ol man i no gat asua? Yu ting em i save larim tasol ol manmeri em i stret long ol i kisim panismen long abrusim bagarap? (Kis. 34:​6, 7) Sampela taim Baibel i no stori long olgeta samting we inap helpim yumi long kliagut long ol disisen Jehova i bin mekim. Tasol i no gat wok long yumi save long olgeta dispela infomesen. Yumi save gut long God bilong yumi, na yumi bilip tru olsem oltaim God bilong yumi i save mekim pasin i stret.

14. Hau yu ken helpim sumatin bilong yu sapos em i pilim hatwok long kamap pren bilong wanpela insait long kongrigesen?

¹⁴ Skelim narapela rot Baibel sumatin bilong yu i ken yusim save em i kisim long Jehova. Tingim olsem sumatin bilong yu i kirap nau long kam long ol miting, tasol em i pilim hatwok long kamap pren bilong wanpela insait long kongrigesen. Ating ol tok o pasin bilong dispela pablisa i mekim em i bel hevi. Kirapim sumatin bilong yu long tingim olsem Jehova i gat wanem tingting long ol bratasista bilong yumi. Jehova i mekim wanem sakrifais bilong soim pasin laikim long ol? (Jon 3:16) Olsem wanem pasin wanbel i stap namel long yumi ol Kristen i bikpela samting long Jehova? (Sng. 133:1) Em i pilim olsem wanem taim yumi wok strong long lukautim dispela pasin wanbel? (2 Kor. 13:11) Helpim sumatin long luksave olsem Jehova i save amamas tru taim yumi tingim ol gutpela pasin bilong ol narapela, na i no ol pasin kranki bilong ol.

15-16. (a) Taim ol Baibel sumatin i mas mekim ol bikpela disisen, hau ol i ken bihainim eksampel bilong Jisas? (Jon 8:29) (b) Olsem wanem Marianne i helpim sumatin bilong em long mekim gutpela disisen? (Lukim tu piksa.)

¹⁵ Laspela samting yu ken mekim em long helpim Baibel sumatin bilong yu long yusim save em i kisim long Jehova long mekim ol gutpela disisen. Yu ken stiaim em i go long lesen 35 bilong buk Stap Amamas Oltaim!, het tok bilong en “Rot Bilong Wokim Ol Gutpela Disisen.” Tasol olsem wanem sapos sumatin bilong yu i beten pinis na mekim ol wok painimaut, tasol em i pilim hatwok yet long kamap long wanpela disisen? Ating em i pilim olsem i gat planti stiatok bilong Baibel i stori long wanpela topik. Yu ken kirapim em long tingim eksampel bilong Jisas. Wanem samting i bin stiaim ol disisen Jisas i mekim? Em i tok: “Oltaim mi save mekim ol samting em [Papa bilong mi] i laikim.” (Ritim Jon 8:29.) Kirapim sumatin long askim em yet olsem, ‘Long ol wok painimaut bilong mi na ol samting mi lainim pinis long Jehova, wanem disisen bai amamasim em?’ Olgeta disisen em Jehova i amamas long en em ol gutpela disisen.

¹⁶ Wanpela meri long Sili husat i stadi long Baibel i bin gat wanpela bikpela disisen long mekim. Famili bilong em i subim em long kisim wanpela gutpela wok mani we pe i antap, tasol dispela wok mani bai pasim em long kam long miting sampela taim. Baibel tisa bilong em, Marianne, i tok: “Mi kirapim em long tingim ol disisen bilong em bai mekim Jehova i pilim olsem wanem. Em bai amamas o bel hevi? Na tu, mi kirapim em long beten long Jehova na kolim stret hevi em i karim na long luksave long bekim bilong Jehova. Em i tok nogat long dispela wok mani, na i no longtaim bihain em i painim wanpela wok mani we i opim rot long em inap kam long olgeta miting.” Yumi luksave olsem Marianne i no tokim sumatin long samting em i mas mekim, em i helpim em long tingim tingim long bel ol samting em i save pinis long en long Jehova. Olsem na dispela ekspiriens i strongim pasin pren bilong dispela sumatin wantaim Marriane, na tu, em i strongim pasin pren bilong em wantaim Jehova. Marianne i tok olsem long sumatin bilong em: “Em i kisim save olsem Jehova i save lukautim gut yumi taim yumi putim wok lotu bilong em i stap namba wan samting long laip bilong yumi.”

OL LAIN I SAVE GUT LONG JEHOVA I KISIM BLESING

17. Yumi laik ol Baibel sumatin i mas kisim save na mekim wanem samting moa?

¹⁷ Baibel stadi kos bilong yumi em ol Baibel sumatin i insait long en i skulim ol long planti bikpela tok bilong Baibel. Ol sumatin i stadi long ol bikpela tok bilong Baibel olsem, wanem samting i painim ol man i dai pinis, ofa bilong baim bek man, na Kingdom. Na tu, ol i lain long olsem wanem yumi oganaisim gut ol wok lotu bilong yumi, olsem wanem samting i kamap long ol miting, wanem wok ol elda i mekim, na lain Gavening Bodi ol i husat. Tasol yumi laik ol sumatin i no ken kisim save tasol, ol i mas mekim sampela samting moa. Yumi laik olsem ol i mas save gut moa long Jehova.

18. Ol lain i save gut long Jehova bai kisim wanem ol blesing long bihain?

¹⁸ Yumi kisim gutpela wok tru long skulim ol narapela long kisim save long Jehova! Long nau, ol man em ol i save long Jehova na lotuim em, ol i stap amamas tru na dispela em gutpela blesing ol i kisim. (Sng. 25:​12-15) Long bihain, olgeta man em ol i “kisim save long God tru” em Jehova, ol bai stap laip inap oltaim oltaim na ol bai stap amamas tru. (1 Jon 5:20) Na i no dispela tasol. Baibel i tokim yumi olsem man i wok strong long save long Jehova na laikim em, “God i save long em.” (1 Kor. 8:3) Yes, God i Gat Olgeta Strong i save long yumi na em i tingim yumi olsem ol pren bilong em. Dispela em i gutpela pe tru yumi kisim long save long dispela wanpela God tru tasol!