Yu Wok Long Save Gut Moa Long Jehova?

1. Yumi inap pilim olsem wanem taim yumi tingim bikpela save, savetingting, na ol bikpela wok Jehova i mekim?

OLSEM WANEM? Yu save tingim bikpela save bilong Jehova, bikpela savetingting bilong em, na ol strongpela wok em i bin mekim? Taim yumi tingim ol dispela samting, yumi bai pilim olsem yumi liklik samting tasol taim yumi skelim yumi yet wantaim em. Yumi inap pilim wankain olsem aposel Pol, em i tok: “Olaman! Ol blesing na savetingting na save bilong God i daun tumas olsem solwara. Yumi man i no inap tru long painim as bilong ol pasin em i save skelim ol man long en. Na yumi no inap tru long kliagut long olgeta rot bilong em.”—Rom 11:​33, 34.

2. Wanem samting i soim olsem yumi ken save long Jehova?

² Tru yumi no inap save long olgeta samting long Jehova, tasol yumi ken kisim save long sampela pasin tru bilong em. King Devit i tokim pikinini man bilong em Solomon olsem: “Yu mas save long God bilong papa bilong yu na yu mas givim bel olgeta . . . long lotuim em . . . Sapos yu wok long painim em, em bai kamapim em yet long yu.” (1 Sto. 28:9) Na inap planti handret yia i go pinis, aposel Jon i bin tokim ol wanbilip Kristen olsem Jisas “i opim tingting bilong yumi na bai yumi inap kisim save long God tru.” (1 Jon 5:20) Na Jisas yet i tok long pasin bilong kisim save long Jehova olsem, “ol man em Pikinini i gat laik long soim Papa long ol, ol tasol i save long Papa.”—Mat. 11:27.

3. Bai yumi stori long wanem samting long dispela atikol?

³ Olgeta manmeri husat i bin dediket long Jehova, ol i kisim pinis planti save long em. Maski i olsem, yumi no inap stop long “kisim save long” Jehova. (Jon 17:3) Oltaim yumi ken wok yet long kisim save long wanem samting i mekim em i amamas na hau yumi ken trastim em tru. Yumi ken stori long 3-pela askim em yumi olgeta i mas skelim maski yumi bin mekim wok bilong Jehova inap longpela taim o sotpela taim: Pasin bilong kisim save long Jehova i makim wanem samting? Wai na yumi mas wok yet long save gut moa long em? Na hau yumi ken save gut moa long em?

KISIM SAVE LONG JEHOVA I MAKIM WANEM SAMTING?

4. Wanem samting i insait long pasin bilong kisim save long Jehova?

⁴ Yumi ken lain long wanem ol samting i insait long pasin bilong kisim save long Jehova taim yumi skelim ol tok em i mekim long ol Juda em ol i lusim kalabus na i kam bek. Jehova i promis olsem: “Mi bai givim tingting long ol na bai ol i save olsem mi yet, mi Jehova.” (Jer. 24:7) Em tru olsem ol dispela manmeri i lusim kalabus long Babilon na kam bek, ol i save pinis long ol bikpela tok i tru long Jehova. Tasol bilong ol i ken save gut moa long Jehova, ol i mas larim bel, filings, na ol laik bilong ol i kirapim ol long pas gut wantaim em. Wanpela buk i tok: “Pasin bilong kisim save long God, em i no wankain long pasin bilong save gut long God na kamap pren bilong em. Yumi ken skelim dispela wantaim pasin bilong wanpela man long ritim wanpela lav stori, dispela i no wankain long taim em yet i lavim wanpela meri.” Yumi mas kisim sampela save moa long Jehova, na i no save long nem bilong em tasol na save olsem em i God. Yumi laik save long ol gutpela pasin tru bilong Em.

5. Yumi inap kisim wanem skul long King Josaia long pasin bilong kisim save long Jehova?

⁵ Taim yumi kisim save long Jehova, yumi bai save long wanem ol samting i save mekim em i amamas na wanem ol samting i mekim em i bel hevi. Tingim stori bilong King Josaia. Baibel i tok: “Long namba 8 yia bilong Josaia i stap king, long taim em i liklik mangi yet, em i stat long painim God bilong Devit, tumbuna papa bilong em.” (2 Sto. 34:3) Josaia i mekim sampela samting moa, na i no stadi tasol. Em i bihainim ol tok em i lainim. Long rot bilong profet Jeremaia, Jehova i tok long Josaia olsem: “Em i save mekim pasin i fea na stretpela pasin” na em i save sambai long ol man i karim hevi na ol man i stap rabis. Na Jehova i tok moa long em olsem: “Em i save long mi, olsem na em i mekim olsem.”—Jer. 22:​15, 16.

6. Olsem Buk Song 9:10 i kamapim, taim yumi kisim save long Jehova, dispela inap mekim wanem long yumi?

⁶ Ritim Buk Song 9:10. Taim yumi save gut moa long Jehova, yumi bai trastim em tru. Dispela stiatok i tru long ol samting i bin painim aposel Pol. Long laspela taim bilong em long stap kalabus na paslain long em i dai, em i tok: “Mi no sem. Long wanem, mi save long God mi bilip long em.” (2 Tim. 1:12) Ol samting Pol i lainim na ekspiriensim long laip bilong em i kirapim em long bilip tru long God. Olsem wanpela stadi nout long dispela ves i tok: “Pol . . . i bilip tru olsem Jehova bai tingim pasin bilong em long stap gut long em na inap long dispela de em bai kirapim em bek.”

WAI NA YUMI MAS WOK YET LONG KISIM SAVE LONG JEHOVA?

7. Wanem samting inap kamap bihain long yumi mekim wok bilong Jehova inap planti yia?

⁷ Bihain long yumi mekim wok bilong Jehova inap planti yia, ating yumi no givim bel olgeta long kisim save long Jehova olsem yumi bin mekim taim yumi kisim save long tok i tru fes taim. Wai na i olsem? Taim yumi mekim Baibel ritim bilong yumi yet o taim yumi ritim Baibel wantaim ol narapela long miting bilong kongrigesen, yumi inap tingim tasol hau ol dispela tok inap helpim yumi yet long i stap bilong yumi o hau yumi inap yusim long helpim ol narapela. Na em tru Baibel i kirapim yumi long mekim olsem. (2 Tim. 3:​16, 17) Tasol Baibel i kamapim tu planti save long Man i As bilong ol tok bilong Baibel. (Sng. 25:​8-10) So yumi no ken putim tingting olgeta long hau Baibel inap helpim yumi yet o ol narapela na em tasol, nogat. Yumi mas askim yumi yet olsem: ‘Dispela hap bilong Baibel i givim wanem skul long mi long God Jehova?’a

8. Taim yumi kisim sampela save moa long Jehova, dispela inap mekim wanem long pasin pren bilong yumi wantaim em? (Buk Song 73:​24-28)

⁸ Taim yumi save gut moa long Jehova, dispela bai strongim pasin pren bilong yumi wantaim em. Olsem, yu save pilim olsem wanem bihain long yu mekim Baibel ritim bilong yu long olgeta de, watsim brodkasting bilong mun, o go long wanpela kibung sekit o kibung rijinel? Planti taim yumi save pilim olsem yumi pas gut moa wantaim Papa bilong yumi long heven. Wai? Bikos ol tok yumi kisim long ol dispela rot i helpim yumi long kisim sampela save moa long em. Dispela i kirapim yumi long preisim em na tok tenkyu long em. Yumi pilim wankain olsem man bilong raitim song em i tingim tingim long bel pasin bilong Jehova long lukautim em na em i tok: “God i save strongim bel bilong mi. Em i olsem bikpela ston bilong mi. Em i hap skel bilong mi inap oltaim oltaim.” (Ritim Buk Song 73:​24-28.) So olgeta hatwok yumi mekim bilong save gut moa long Jehova, dispela i save strongim yumi long tingim tru gutpela pasin pren bilong yumi wantaim em.

9. Taim yumi “tingim” tru Jehova, dispela inap mekim wanem long ol disisen bilong yumi? Stori long tok piksa.

⁹ Taim yumi “tingim” tru Jehova, olsem tingim ol save yumi kisim long em na tingim hau ol pasin bilong yumi inap afektim em, dispela inap kirapim yumi long mekim ol gutpela disisen. (Prov. 3:​5, 6) Yumi ken tok piksa olsem: Planti bratasista i save putim foto bilong poroman marit bilong ol antap long desk long ples wok, insait long paus bilong ol, o long fon bilong ol. Dispela i helpim ol long oltaim tingim gut poroman marit bilong ol na mekim ol disisen we bai amamasim em na sakim ol disisen we inap bagarapim bel bilong em. Wankain olsem, sapos oltaim yumi tingim Jehova, orait yumi bai mekim ol disisen we i amamasim em.—Sng. 19:​13, 14.

10. Taim yumi kisim save long Jehova, dispela inap kirapim yumi long mekim wanem?

¹⁰ Jehova i wokim yumi i olsem em yet, dispela i mekim na yumi inap kamapim ol pasin i wankain olsem bilong em. (Stt. 1:26) Taim yumi kisim planti save moa long ol pasin bilong Jehova, yumi bai kliagut moa long hau yumi ken bihainim ol dispela pasin. Jisas i krosim ol saveman bilong lo na ol Farisi long ol i no save bihainim ol pasin bilong God. Maski ol i wok strong long bihainim olgeta liklik tok bilong Lo, ol “i no tingim ol bikpela tok bilong Lo, olsem stretpela pasin na pasin marimari na pasin bilong bilip.” (Mat. 23:23) Yumi no wankain olsem ol dispela hetman bilong lotu, nogat, yumi wok strong long kliagut long hau Baibel i kamapim klia ol pasin bilong Jehova long ol lo na ol stiatok bilong em. Taim yumi mekim olsem, dispela bai helpim yumi long kamapim ol wankain pasin olsem bilong em.—1 Jon 4:​8, 11.

HAU YUMI KEN SAVE GUT MOA LONG JEHOVA?

11. Hau yu bin kisim save long Jehova long fes taim?

¹¹ Husat i bin skulim yu long Jehova? Ating ol papamama Kristen i bin mekim bikpela long yu. Na ol i bin skulim yu long ol stori bilong Baibel we i kamapim klia ol pasin bilong God na ol i skulim yu tu long hau kriesen bilong em i kamapim klia ol pasin bilong em. O ating wanpela Witnes Bilong Jehova i laik stadi long Baibel wantaim yu na yu orait long dispela. Na dispela Baibel tisa i bin yusim buk Stap Amamas Oltaim! long helpim yu long skelim ol stori bilong Baibel na kisim save long ol gutpela pasin long rot bilong stadi long ol samting God i wokim.b (Neh. 8:8; Apo. 14:17) Nau yumi ken skelim hau yumi ken wok yet long kisim save long Jehova.

12-13. Yumi inap kisim wanem save long Jehova long rot bilong ritim Baibel? Stori long wanpela eksampel. (Jeremaia 39:​15-18) (Lukim tu piksa.)

¹² Namba 1, yumi ken kisim save long Jehova long rot bilong ritim ol tok bilong Baibel na stadi long en. Sampela taim Baibel i save kolim stret ol pasin bilong God. (Kis. 34:​6, 7) Tasol planti taim Baibel i stori long ol manmeri na ol disisen ol i bin mekim. Taim yu ritim ol kain stori olsem, tingim hau ol dispela stori inap skulim yu long sampela pasin bilong Jehova.

¹³ Skelim dispela eksampel. Taim yu ritim stori i stap long Jeremaia 38:​6-13, yu bai kisim save long Ebetmelek em man Itiopia husat i bin helpim na seivim laip bilong profet Jeremaia. Na kwiktaim yu luksave long pasin bilong Ebetmelek em yu ken bihainim, olsem pasin bilong i no tingim em yet, strongim bel, na laikim ol narapela wanbilip. Olsem wanem? Yu inap luksave long sampela pasin bilong Jehova long dispela stori? (Ritim Jeremaia 39:​15-18.) Olsem, wanem ves i kamapim klia olsem Jehova i tingim tru ol narapela? Em i mekim pasin fea? Em i no save mekim wansait pasin? Wanem sampela narapela pasin bilong Jehova em yu inap lukim long dispela stori? Taim yu ritim wanpela stori long Baibel, luksave long ol pasin bilong Jehova long dispela stori na tok tenkyu long em na preisim em long ol dispela pasin bilong em.

14. Yumi ken mekim wanem na bai ol samting yumi lukim long kriesen i helpim yumi tru?

¹⁴ Namba 2, yumi ken kisim sampela save moa long Jehova long rot bilong lukim na tingim tingim long bel ol samting em i wokim. (Sng. 145:​9, 10) Tru tru yumi mas mekim sampela samting moa na i no lukim tasol ol samting God i wokim. Sampela manmeri i bin lusim bikpela haptaim long laip bilong ol long stadi long ol samting God i wokim, tasol ol i no tokaut olsem ol dispela samting i kamapim ol pasin bilong God o olsem God i stap tru! Aposel Pol i tok long God olsem, “kirap long taim God i wokim olgeta samting na i kam inap long nau, ol man i lukim ol samting God i bin wokim na long dispela rot ol inap save long ol pasin bilong em i stap hait.” (Rom 1:20) Wanpela trenslesen bilong dispela ves i tok yumi ken lukim ol pasin bilong God bikos “ol i stap ples klia . . . long ai bilong man husat inap wokim tingting.” So yumi mas tingim na wokim gut tingting long ol dispela samting na bai yumi ken lukim ol pasin bilong Krieta bilong yumi.

15. Patrick i bin mekim wanem bilong save gut moa long Jehova na hau yu ken mekim olsem tu? (Lukim tu piksa.)

¹⁵ Planti bilong yumi i stap long ol taun na yumi stap longwe long bikbus na ol animal bilong bus. Sapos yu gat kain sindaun olsem, orait hau yu ken kisim save long ol samting God i wokim? Tingim stori bilong Patrick, em i save stap long Brazzavile, em wanpela biktaun bilong Ripablik Bilong Kongo. Em i tok: “Mi save sindaun antap long veranda bilong mi na lukluk long kriesen. Planti taim mi save lukim ol binatang na ol pisin i bisi tru long painim kaikai o painim ples bilong stap. Wanpela taim mi lukim ol pisin i wokim haus bilong ol. Ol i painim na yusim ol samting i stap long dispela eria long wokim liklik haus i stret long ol bebi pisin i ken stap long en.” Tasol Patrick i no lukim tasol ol pisin, em i tingim tru Man Bilong Wokim olgeta samting. Em i tok: “Mi lain olsem Jehova i tingim tru i stap bilong olgeta samting em i wokim, maski em ol liklik samting tru. Dispela i strongim mi olsem em i save tingim mi tu na em bai helpim mi long ol samting mi nidim bilong stap laip.”

16. Wanem samting i helpim Maria em mama bilong Jisas long save gut moa long Jehova, na olsem wanem yumi ken bihainim pasin bilong em? (Lukim tu piksa.)

¹⁶ Namba 3 rot yumi ken save gut moa long Jehova em long rot bilong tingim tingim long bel ol samting i bin painim yumi. Em samting Maria em mama bilong Jisas i bin mekim. Em i save gut pinis long Jehova na “God i amamas long [em].” (Luk 1:30) Tasol em i kisim wanpela bikpela wok tru em long kamap mama bilong Pikinini Bilong God. Long rot bilong ensel Gebriel na wanblut bilong em Elisabet, Jehova i strongim Maria na mekim gut bel bilong em. Bihain Maria i tingim tingim long bel ol samting i painim em we i kamapim klia ol pasin bilong Jehova, olsem strong, pasin marimari, pasin i fea, na pasin bilong tingim tru ol man nating. (Luk 1:​46-55) Wankain olsem Maria i tenkyu na pilim tru pasin bilong God long sapotim em, yumi tu i ken tok tenkyu na pilim tru pasin bilong Jehova taim em i givim yumi kain helpim “long taim stret” bilong en. (Hib. 4:16) Taim yu kisim kain helpim olsem, askim yu yet: ‘Dispela i givim wanem skul long mi long Jehova? Wanem ol pasin bilong Jehova i stap ples klia long ol samting i painim mi?’

YUMI NO INAP STOP LONG KISIM SAVE LONG JEHOVA

17-18. Wai na yumi ken tok olsem yumi no inap stop long kisim save long Jehova?

¹⁷ Tingim olsem long nupela taim yumi bai kisim planti save moa long Jehova. Yumi bai kisim ol nupela skrol we bai kamapim klia ol samting God i laik yumi mas mekim. (Rev. 20:12) Na yumi bai enjoim tru olgeta samting long kriesen. (Ais. 11:​6-9) Na yumi bai kliagut moa long ol pasin bilong Papa bilong yumi taim yumi ekspiriensim ol nupela samting olsem kirap bek bilong ol famili na ol pren bilong yumi, na tu, bodi na tingting bilong yumi bai kamap gutpela olgeta long olgeta wan wan de.

¹⁸ Yumi no inap stop long kisim save long Jehova. Em i bin stap laip inap oltaim oltaim so “save bilong em i antap moa na i no gat mak bilong en.” (Sng. 90:2; 147:5) Yumi no inap “painimaut long wok em God tru i bin mekim kirap long stat i go inap long pinis.” (Ekl. 3:11) So maski yumi stap long tok i tru longpela taim o sotpela taim, yumi ken painim olgeta kain rot bilong kisim sampela save moa long gutpela Papa bilong yumi.