Kisim Bel Isi Long Ol Tok i Stap Long Buk Aisaia

1-2. Jehova i save pilim olsem wanem taim ol samting i kamap na i mekim yumi bel hevi?

PIKSAIM long tingting wanpela pikinini i sori tru na em i wok long krai nogut tru. Ating famili bilong em bai muv i go long nupela haus so em i mas lusim ol pren bilong em. O ating em i sori tru long wanpela popaia em i bin mekim. Long kain taim olsem, wanpela gutpela mama bai mekim wanem? Em bai hagim pikinini na putim gut yau taim pikinini i krai wantaim na autim bel hevi bilong em, na em bai soim pikinini olsem em i laikim em tru.

² Long Baibel, Jehova i tok em i olsem wanpela gutpela mama husat i save mekim isi bel bilong pikinini bilong em. Em i tok: “Olsem mama i save mekim isi bel bilong pikinini bilong em, bai mi wok yet long mekim isi bel bilong yupela.” (Ais. 66:13) Pasin laikim Jehova i gat long yumi i winim tru pasin laikim papamama i gat long yumi. (Ais. 49:15) Long rot bilong tok bilong em long Baibel, Jehova i mekim isi bel bilong yumi na strongim yumi taim yumi bel hevi tru o karim wanpela hevi.—Rom 15:4.

3. Yumi bai skelim wanem samting long dispela atikol?

³ Buk Aisaia i pulap long ol gutpela tok i kam long Jehova bilong mekim isi bel bilong yumi. (Ais. 40:1) Gutpela Papa bilong yumi i kirapim Aisaia long raitim dispela buk long mekim isi bel bilong lain bilong em long wanpela taim nogut tru long histori bilong lain Juda. Yumi tu i stap long “taim nogut . . . na dispela bai givim hatwok” long yumi, olsem na yumi mas kisim ol tok bilong mekim isi bel bilong yumi. (2 Tim. 3:1) Yumi ken skelim sampela ves long Buk Aisaia we inap mekim isi bel bilong yumi na strongim yumi taim (1) senis i kamap wantu long sindaun bilong yumi, (2) bel i wok yet long kotim yumi long rong yumi mekim bipo, o (3) yumi krai sori long wanpela yumi laikim tru i dai.

TAIM SENIS I KAMAP WANTU LONG SINDAUN BILONG YUMI

4. Sapos wantu senis i kamap long sindaun bilong yumi, dispela inap mekim wanem long yumi?

⁴ Ol samting long laip bilong yumi inap senis hariap tru na em samting yumi no ting inap kamap. (Ekl. 9:11; 1 Kor. 7:31) Ating yumi kisim wanpela bikpela sik, o yumi bungim hevi bilong mani, o ating pait i kamap long hap yumi stap long en, o senis i kamap long asainmen bilong yumi. Kain senis olsem inap mekim yumi tingting planti o paul long wanem samting yumi bai mekim. Em nomol long holim kain tingting olsem: ‘Bai mi mekim wanem nau?’ Wanpela brata nem bilong em Joseph, ol i makim em long kamap painia bihain long em i wok long Betel inap 17 yia, em i tok: “Mi no save bai mi mekim wanem. Em bikpela hatwok tru long statim nupela laip bikos mi wok long Betel longpela taim tru. Mi no save bai mi kirap mekim wanem nau.” Long rot bilong Aisaia, Jehova i mekim wanem ol tok bilong mekim isi bel bilong yumi sapos wantu senis i kamap long sindaun bilong yumi?

5. Olsem Aisaia 42:16 i kamapim, Jehova i mekim wanem tok bilong mekim gut bel bilong yumi? (Lukim tu piksa.)

⁵ Ritim Aisaia 42:16. Jehova i tok promis long lidim ol manmeri em ol i olsem ol aipas i go long ol rot ol i no bin wokabaut long en na mekim tudak i kamap lait. Ol dispela tok “aipas,” “ol rot ol i no bin wokabaut long en,” “tudak,” na “ples i raf” inap makim tingting yumi gat long laip bihain taim senis i kamap em yumi no ekspektim. Yumi inap pilim olsem yumi wokabaut long bikbus na yumi no save long wanem rot yumi mas bihainim. Tasol Jehova i helpim yumi long save olsem maski wanem samting i kamap long yumi, em bai stiaim yumi na em i no inap tru long lusim yumi. Em bai holim han bilong yumi na lidim yumi long ples tudak i go kamap long ples i lait na mekim ples i raf i kamap fletpela graun. Hau Jehova bai mekim olsem? Long rot bilong ol gutpela tok kaunsel i stap long Baibel na oganaisesen bilong em. (Sng. 119:105; Ais. 30:21) Em i save yusim tu ol wanbilip bilong yumi na ol narapela long givim gutpela helpim long yumi. Maski yumi no klia long wanem samting bai painim yumi long bihain, yumi ken bilip tru olsem Jehova bai stiaim yumi long rot bilong lukautim yumi na pilim tingting bilong yumi.—Ais. 41:10; 1 Pita 5:​6, 7.

6. Sapos senis i kamap long sindaun bilong yumi em yumi no ekspektim, yumi ken bilip tru long wanem samting?

⁶ Joseph em yumi stori pinis long em, em i stori long hau em na meri bilong em i lukim olsem Jehova i sapotim tupela bihain long ol i lusim Betel. Em i tok: “Mipela i lukim olsem Jehova i helpim mipela long dispela haptaim we bikpela senis i kamap long laip bilong mipela. Em i helpim mipela long rot bilong ol gutpela bratasista. Em i provaidim ol samting bilong skin mipela i nidim na lukautim mipela long bel na tingting tu long taim stret, na em i wok yet long mekim olsem.” Sapos senis i kamap long sindaun bilong yu em yu no ekspektim, yu tu i ken bilip tru olsem Jehova bai strongim yu na stiaim yu, maski yu pilim hatwok long dispela bikpela senis i kamap long laip bilong yu. (Ais. 54:10; 58:11) Joseph i tok moa: “Ol tok bilong wanpela orijinel singsing bilong yumi i tok, ‘Mi no save long wanem samting bai kamap tumora, tasol mi save olsem mi no stap wanpis long karim ol hevi.’a Yes, maski ol samting i no kamap olsem yumi ting long en, yumi ken bilip tru long wanpela samting, em olsem: Jehova bai stap wantaim yumi long olgeta kain samting i kamap long laip bilong yumi.”

TAIM BEL I WOK YET LONG KOTIM YUMI

7. Sampela em ol i bin mekim rong long bipo, ol inap karim wanem hevi?

⁷ Taim yumi tokaut long wanpela bikpela sin em yumi bin mekim, yumi inap kisim gutpela helpim long ol elda, na bihain yumi wok strong long no ken mekim gen dispela sin. (Prov. 28:13; Jems 5:​14-16; 1 Jon 1:9) Maski Jehova i marimari long yumi, yumi inap karim hevi long bel i wok yet long kotim yumi. Yumi inap holim kain tingting olsem, ‘Hau bai Jehova i fogivim mi long dispela samting mi bin mekim?’ (2 Kor. 2:7) Em nomol long yumi pilim olsem bikos yumi inap karim bikpela bel hevi tru long ol rong yumi mekim long bipo na memori bilong ol samting yumi bin mekim inap pas strong long tingting. King Devit i tok: “Mi mekim sin olsem na mi no stap bel isi,” na em i tok moa: “Bel bilong mi i pilim nogut tru na dispela i mekim mi pilim pen na mi singaut.” (Sng. 38:​3, 8) Sapos yu pilim olsem bikos long ol rong yu bin mekim long bipo, orait Buk Aisaia i ken mekim isi bel bilong yu.

8-9. Aisaia 1:18 i mekim wanem tok long pasin bilong Jehova long fogivim yumi?

⁸ Ritim Aisaia 1:18. Jehova i mekim gutpela tok piksa bilong soim olsem taim em i fogivim ol sin bilong yumi, em i lusim olgeta ol dispela sin na em i no inap tingim gen. Em i tok maski ol sin bilong yumi “i olsem retpela kala,” em bai mekim ol i kamap “waitpela olsem sno.” Retpela kala em i braitpela kala na i hatwok long klinim o rausim mak bilong en sapos em i pas long klos bilong yumi. Maski i olsem, Jehova i helpim yumi long save olsem taim em i fogivim yumi, ol sin bilong yumi bai raus na pinis olgeta. Ol sin bilong yumi i olsem dispela retpela kala we i pinis olgeta na yumi no inap lukim moa o tingim gen.

⁹ Tingim eksampel bilong King Devit. Maski em i gat asua long pasin adaltri na kilim man i dai, Jehova i fogivim em na bihain Em i kolim Devit olsem man bilong bihainim stretpela pasin. (2 Sml. 11:​3, 4, 14, 15; 12:13; 1 Kin. 9:​4, 5) Jehova i no tingim Devit long ol rong em i bin mekim, nogat, em i tingim pasin bilong Devit long bilip na stap gut long Em. Olsem tasol, taim yumi tanim bel na long gutpela pasin Jehova i fogivim yumi, maus bilong bel bilong yumi bai kamap klin na yumi inap givim bel yet long mekim wok bilong em. Wanem narapela tok promis i stap long Buk Aisaia inap mekim isi bel bilong yumi taim bel i wok yet long kotim yumi long ol rong yumi mekim long bipo?

10. Aisaia 38:17 i mekim wanem gutpela tok i mekim gut bel bilong yumi?

¹⁰ Ritim Aisaia 38:17 na futnot. Dispela tok “yu bin tromoi olgeta sin bilong mi i go long baksait bilong yu,” ol inap tanim tu olsem “yu bin rausim olgeta sin bilong mi long ai bilong yu.” I olsem Jehova i kisim ol sin bilong wanpela man i tanim bel long ol rong em i mekim na Em i tromoi i go long baksait bilong Em, we em i no inap lukim moa o tingim gen. Wanpela Baibel dikseneri i tok, yumi inap tanim dispela hap tok olsem: “Yu rausim [ol sin bilong mi] i go na i olsem mi no bin mekim sin.” So taim Jehova i fogivim ol sin bilong yumi, long tingting bilong em i olsem yumi no bin mekim dispela sin. Taim Jehova i fogivim yumi, em bai no inap tingim gen ol sin yumi mekim long bipo na sutim tok o panisim yumi long dispela samting. I olsem em i klinim o rausim olgeta ol dispela sin na i no gat mak bilong en i stap moa. Em i tok promis olsem: “Mi no inap tingim ol sin bilong yu.” (Ais. 43:25) Dispela i mekim gut tru bel bilong yumi! Sapos Jehova em dispela Nambawan Jas i no tingim moa ol sin bilong yumi, orait yumi husat na yumi wok yet long tingim ol dispela sin na larim bel i kotim yumi yet long dispela samting?

11. Maski yumi bin mekim rong long bipo, Jehova i save tingim wanem samting? (Lukim tu piksa.)

¹¹ Sapos bel i kirap gen long kotim yumi long ol rong yumi mekim bipo, orait yumi mas tingim ol gutpela tok promis bilong Jehova. Taim em i fogivim yumi, em i lusim olgeta ol rong bilong yumi na em i no inap tingim moa. Em i no sem long yumi long ol rong yumi bin mekim, na em i no olsem ol man i gat sin em ol i save holim bel kros inap longpela taim. (Ais. 57:16) Bikpela samting long Jehova em ol samting yumi mekim long nau na ol gutpela pasin yumi wok strong long kisim, na i no ol samting yumi bin mekim long bipo. (Ais. 55:7) Yumi lotuim God i gat pasin laikim na em i save lusim rong bilong yumi! Olsem na yumi no ken larim ol rong yumi mekim long bipo i pinisim amamas bilong yumi long nau na tekewe ol gutpela blesing em yumi luk fowed long en long bihain.

TAIM YUMI KRAI SORI LONG WANPELA YUMI LAIKIM I DAI

12. Yumi inap pilim olsem wanem taim wanpela yumi laikim i dai?

¹² Taim wanpela yumi laikim tru i dai, yumi save krai sori na pilim bikpela bel pen inap longpela taim tru. Sampela taim, yumi inap tingting olsem wai na Jehova i larim wanfamili o pren bilong yumi i dai. Wanpela brata nem bilong em Michael, papamama bilong em i paia wantaim haus bilong ol taim ges i eksplod na kukim haus bilong ol. Em i tok: “Lewa bilong mi i bruk olgeta, na mi belhat long Jehova i larim tupela i dai. Mi save olsem Em i no as bilong dispela hevi i kamap, tasol em i no mekim wanpela samting long stopim dispela samting long kamap.” Ating yu tu i bin pilim olsem. Long ol dispela kain taim, Jehova i mekim wanem tok promis i mekim isi bel bilong yumi na givim yumi hop?

13. Jehova i mekim wanem tok promis long Aisaia 25:8?

¹³ Ritim Aisaia 25:8. Jehova i tok promis long “daunim dai olgeta.” Piksaim long tingting olsem taim bai kamap we ol man bai i no dai moa! Yu bai no inap krai sori gen long wanpela yu laikim tru i dai. (Ais. 35:10) Yu bai no inap gen ekspiriensim bel sori yu pilim taim yu go long matmat na lukim het ston bilong wanfamili o pren bilong yu i dai. Yu gat dispela hop olsem bihain ol wanfamili na ol pren bilong yu bai stap laip gen na ol bai gat gutpela helt na oltaim ol bai stap wantaim yu. Dispela promis em i no wanpela driman nating, em promis God yet i tokaut long en na Em i gat bikpela strong long truim dispela tok promis.—Rev. 21:​4, 5.

14. Yu pilim olsem wanem taim yu tingim hop bilong kirap bek? (Aisaia 26:19) (Lukim tu piksa.)

¹⁴ Ritim Aisaia 26:19. Jehova bai pinisim tru dai, na tu, em bai kirapim bek lain em yumi laikim tru em ol i dai. Jehova i tok olsem long ol daiman: “Bodi bilong ol manmeri bilong mi i dai pinis bai kirap sanap.” Dispela i soim klia olsem ol daiman ol i bilong Jehova. Ol i stap seif long memori bilong em. Na long taim stret em i makim, em bai kirapim bek ol. Wankain olsem wara bilong nait i kamap long moningtaim na i givim laip long ol diwai na gras i drai pinis, Jehova em i As bilong olgeta samting i stap laip na em bai kirapim bek ol lain em yumi laikim tru em ol i dai. Yumi bai amamas nogut tru long welkamim ol taim ol i kirap bek!—Skelim Mak 5:42.

15. Olsem wanem promis bilong kirap bek i helpim yumi long karim hevi bilong krai sori?

¹⁵ Em tru olsem tok promis bilong God long kirap bek i no inap pinisim olgeta bel sori bilong yumi, tasol yumi ken kisim bel isi long save olsem Jehova i no lusim tingting long ol lain em yumi laikim em ol i dai. Dispela hop i mekim isi bel bilong Michael, em yumi stori pinis long em. Em i tok: “Aisaia 26:19 i helpim mi long save olsem Jehova i tingim papamama bilong mi olsem ol i dia tumas long em. Ol i stap seif long memori bilong em, na em bai wok yet long tingim ol i go inap long em i kisim bek ol long dai long taim em yet i makim. Dispela i mekim isi bel bilong mi na strongim mi.” Yumi tu i ken tingim dispela tok promis olsem yumi bai bung gen wantaim lain em yumi laikim tru em ol i dai pinis. Taim yumi mekim olsem, dispela bai helpim yumi long daunim bikpela bel pen yumi pilim.

16. Wanem skripsa i bin mekim isi bel bilong yu long taim bilong hevi?

¹⁶ Yumi bin skelim sampela ves long Buk Aisaia we inap mekim isi bel bilong yumi taim senis i kamap wantu long sindaun bilong yumi, taim bel i kotim yumi yet long rong yumi mekim long bipo, na taim yumi krai sori. Yumi tenkyu long Jehova i mekim isi bel bilong yumi long rot bilong ol tok bilong em long Baibel! (Sng. 94:19) I gat wanpela skripsa em yu pilim olsem em i mekim gut bel bilong yu taim yu karim ol hevi? Holim gut dispela skripsa long memori bilong yu, raitim long notbuk, o raitim long hap pepa na putim long hap em oltaim yu ken lukim. Na long dispela rot, yu inap kisim bel isi long ol gutpela tok i kam long Jehova em gutpela Papa bilong yumi long heven.