Kisim Skul Long Lain Gibeon

1-2. Wai na yumi laik save long tok Baibel i mekim long lain Gibeon?

EM YIA 1473 B.C.E. Lain Israel i kisim pinis Graun Bilong Promis. Lain Israel i winim ol bikpela pait long taun Jeriko na Ai. Tasol bihain, wanpela narakain samting i kamap. Sampela man i kam long ol Israel na ol i tok ol i kam long wanpela ples i stap longwe tru na ol i laik mekim kontrak bilong stap wanbel wantaim lain bilong God.

² Ol dispela man ol i bilong lain Gibeon. Dispela em fes taim Baibel i stori long lain Gibeon, tasol em i no laspela taim Baibel i stori long ol. Planti stori bilong Baibel i kamapim klia olsem lain Gibeon i wok bung wantaim lain Israel inap planti handret yia. Ol dispela stori i kamapim ol bikpela skul em yumi inap kisim, na tu, ol i kamapim klia ol pasin bilong God Jehova.

YUMI MAS I GAT BILIP NA PASIN DAUN

3. (a) Lain Gibeon ol i husat? (b) Wai na ol i laik stap wanbel wantaim ol Israel?

³ Taim lain Israel i kisim graun Kenan, ol Gibeon i stap long strongpela taun Gibeon. Ol i hap bilong lain Hivi, em wanpela bilong 7-pela kantri bilong Kenan, em ol i “gat planti lain manmeri na ol i strong moa” winim lain Israel. (Lo 7:1) So lain Gibeon i gat bikpela lain ami na ol i strongpela lain bilong pait. (Jos. 10:2) Tasol ol i no wankain olsem ol narapela lain Kenan—em ol i laik pait long ol Israel—ol i luksave olsem ol bai i no inap win sapos ol i pait long ol Israel. Ol i lukim olsem Jehova i wok long pait bilong helpim lain bilong em, na ol i save olsem em i tok promis long rausim ol Kenan long graun ol i stap long en na givim long ol Israel. (Kis. 34:11; Jos. 9:24) So bihain long lain Israel i pait na daunim Jeriko na Ai, ol Gibeon i salim sampela man i goa long Josua long Gilgal bilong mekim kontrak bilong stap wanbel wantaim ol Israel.

4. (a) Olsem Josua 9:​8-13 i kamapim, hau ol Gibeon i trikim ol Israel long mekim kontrak bilong stap wanbel wantaim ol? (Lukim tu piksa.) (b) Wanem samting i kamap taim ol Israel i painimaut long pasin trik bilong ol?

⁴ Ritim Josua 9:​8-13. Ol Gibeon i giaman olsem ol i bilong wanpela ples i stap longwe tru. Ol i tokaut olsem Jehova i bin helpim ami bilong Israel long winim pait long Isip na daunim ol king bilong Amor, em Sihon na Ok. Tasol ol i kleva na ol i no stori long samting i kamap long Jeriko na Ai bikos sapos tru tru ol i bilong “wanpela ples i stap longwe tru,” orait hau ol inap save long dispela samting i kamap nau tasol. Ol mausman bilong Israel i no kisim tingting bilong Jehova na ol i bilipim tok bilong ol Gibeon na ol i mekim kontrak bilong stap wanbel wantaim ol. (Jos. 9:​14, 15) Bihain liklik long dispela ol i painimaut long pasin trik bilong ol Gibeon, tasol ol Israel i mas bihainim kontrak ol i mekim long stap wanbel wantaim ol Gibeon bikos ol i “bin promis na mekim tok tru antap long nem bilong Jehova.” (Jos. 9:​16-19) Ol Israel i givim wok i no gat nem long ol Gibeon long stap olsem “wokboi bilong katim paiawut na kisim wara bilong ol manmeri na bilong alta bilong Jehova.”—Jos. 9:27.

5. Long wanem ol rot lain Gibeon i soim olsem ol i bilip long Jehova?

⁵ Taim faivpela king bilong ol Amor i harim olsem lain Gibeon i mekim kontrak bilong stap wanbel wantaim ol Israel, ol i bung wantaim bilong i go pait long ol Gibeon. Ol Gibeon i salim tok i go long Josua bilong i kam helpim ol. (Jos. 10:​3-7) Josua i lidim lain Israel i go bilong helpim na seivim laip bilong lain Gibeon, na God i blesim ol samting ol i mekim. Jehova i salim tu bikpela ren ais i kam daun long ami bilong ol Amor na em i wokim mirakel na san i sanap tasol na ol Israel i winim pait. (Jos. 10:​9-14) Taim lain Gibeon i wokim kontrak bilong stap wanbel wantaim ol Israel na ol i salim tok long Josua long helpim ol taim ol Amor i mekim tok bilong pretim ol, ol Gibeon i soim olsem ol i bilip long Jehova—ol i bilip long strong bilong em long truim tok bilong em na kisim bek ol.

6. Yumi ken kisim wanem skul long pasin Jehova i mekim long lain Gibeon taim ol Israel i kisim Graun Bilong Promis?

⁶ Dispela stori i givim wanem skul long yumi long Jehova? Jehova i gat pasin daun na pasin marimari. Pastaim em i bin tokim ol Israel long ol i mas “rausim olgeta manmeri bilong dispela ples,” dispela i makim tu lain Gibeon. (Nam. 33:​51, 52) Tasol bilong sapotim kontrak bilong stap wanbel em lain Israel i mekim wantaim lain Gibeon, Jehova i mekim pasin marimari long ol Gibeon na em i larim ol i stap laip. Jehova i mekim olsem, maski ol Israel i no kisim tingting bilong em paslain long ol i go het na mekim dispela kontrak. Em i helpim ol Israel long inapim kontrak bilong ol na em i wokim mirakel na kisim bek lain Gibeon.—Jos. 9:26; 11:19.

7. Hau yumi ken bihainim pasin bilong lain Gibeon long bilip na mekim pasin daun? (Lukim tu piksa.)

⁷ Hau yumi ken bihainim pasin bilong lain Gibeon? Yumi ken bihainim pasin bilong lain Gibeon taim yumi kisim pasin bilong bilip strong long Jehova. Yumi save long planti samting long Jehova winim lain Gibeon long dispela taim, olsem na yumi gat planti gutpela risen long trastim tru Jehova. (Sng. 40:​4, 5) Na tu, yumi ken bihainim pasin bilong lain Gibeon long rot bilong redi long daunim yumi yet na mekim ol wok bilong Jehova, maski ol dispela wok i no gat nem long en. (Jos. 9:​23, 27) Wanpela yangpela brata nem bilong em Luke, em i no inap lusim tingting long wanpela taim em i lukim wanpela brata i gat bikpela krismas husat i wok long Betel i bin mekim olsem. Maski dispela brata i holim bikpela wok long Betel, em i redi long volantia long lukautim Haus Kingdom long nait em ol i mekim wok konstraksen long en. Luke i tok: “Mi lainim olsem pasin daun em i no samting yumi pilim long bel tasol, nogat. Yumi inap kamapim klia dispela pasin long ol wok yumi mekim na ol wok yumi no mekim.” Long olgeta wan wan de, yumi ken kamapim klia olsem yumi bilip long Jehova long rot bilong trastim em long taim bilong ol hevi, na long rot bilong daunim yumi yet na redi long mekim olgeta kain wok long oganaisesen bilong Jehova.

WETIM JEHOVA LONG HELPIM YU TAIM YU KARIM HEVI BILONG PASIN I NO STRET

8. King Sol i mekim wanem pasin i no stret long lain Gibeon?

⁸ Inap planti handret yia bihain, Baibel i stori gen long lain Gibeon. King Sol i mekim nogut long ol Gibeon em ol i stap long Israel. Em i laik pinisim tru olgeta lain Gibeon bikos “em i nolaik tru bai ol i stap wantaim ol Israel na Juda.”b Olsem na em i kilim i dai planti bilong ol. (2 Sml. 21:​2, 5, 6) Em i mekim pasin i no stret! Sol i brukim kontrak bilong stap wanbel i stap namel long lain Israel na lain Gibeon inap longpela taim tru.

9. Wanem taim Jehova i soim olsem em i no orait long pasin i no stret Sol i mekim long lain Gibeon?

⁹ Jehova i no hariap long stretim pasin i no stret em Sol i mekim long lain Gibeon. Taim Devit i kamap king na em i kisim ples bilong Sol, long dispela taim Jehova i soim olsem em i no orait long pasin i no stret em Sol na lain bilong em i bin mekim na Em i kamapim bikpela hangre long Israel we i stap inap 3-pela yia. Taim Devit i askim Jehova long as bilong dispela samting, Jehova i tokim em olsem Sol na lain bilong em i mekim pasin i no stret long ol yia i go pinis taim ol i kapsaitim blut bilong ol man Gibeon.—2 Sml. 21:1.

10. Olsem 2 Samuel 21:​3-6 i kamapim, ol Gibeon i mekim wanem tok long Devit na i soim olsem ol i rispektim Lo Bilong God?

¹⁰ Ritim 2 Samuel 21:​3-6. Devit i toktok wantaim lain Gibeon bilong painimaut ol i laik bai em i mekim wanem samting bilong karamapim sin em Sol i bin mekim long ol. Yu ting ol Gibeon bai askim Devit long baim ol long bikpela mani bikos em i no bin hariap long helpim ol long pastaim? Ol Gibeon i tokim em olsem ol “i no laikim silva na gol bilong stretim hevi” bikos olsem Lo i kamapim man i no ken kisim pe bilong baim bek man long laip bilong wanpela kilman. (Nam. 35:​30, 31) Na ol i luksave tu olsem ol i no ken kilim i dai wanpela man sapos king i no orait long ol i mekim olsem. Bihain, Devit i tok orait long ol i kilim i dai 7-pela man long lain famili bilong Sol em ating ol i bin helpim Sol long kilim i dai planti ol Gibeon. Sampela haptaim bihain, ren i pundaun na dispela i pinisim bikpela hangre i bin kamap na i kamapim klia olsem ol i bekim bek pasin i no stret em Sol i bin mekim long ol Gibeon na Jehova i orait long dispela.—2 Sml. 21:​9, 10, 14.

11. Yumi inap kisim wanem skul long Jehova long dispela stori?

¹¹ Dispela stori i givim wanem skul long yumi long Jehova? Yumi lukim evidens i soim klia olsem Jehova em i God bilong mekim stretpela pasin. (Sng. 37:28) Em i laik bai yumi mekim pasin i stret long olgeta man. Yumi mekim olsem tu long ol lain em planti taim ol narapela i save luk daun long ol, olsem ol man bilong ol narapela kantri na ol man em pasin o kalsa bilong ol i narapela kain. Long taim stret bilong em, Jehova bai pinisim tru olgeta pasin i no stret em ol man i mekim long lain bilong em. Na tu, yumi lainim olsem Jehova i laik bai yumi inapim ol tok promis bilong yumi wankain olsem em i laik bai ol Israel i inapim tok promis ol i mekim long stap wanbel wantaim lain Gibeon.—Skelim Amos 1:9.

12. Hau yumi ken bihainim pasin bilong ol Gibeon taim ol narapela i mekim pasin i no stret long yumi?

¹² Hau yumi ken bihainim pasin bilong ol Gibeon? Taim ol bratasista bilong yumi i mekim pasin i no stret long yumi, yumi no ken les kwik long wet long Jehova. Taim yumi mekim olsem, yumi soim olsem yumi trastim Jehova olsem em bai stretim olgeta samting long taim stret bilong em. Tingim stori bilong Sista Laura French. Em i kirap mekim wok long Kanada Betel long 1926. Inap 10-pela yia bihain, ol narapela i mekim pasin i no stret long em. Ol i sutim tok long em olsem em i insait long wanpela grup bilong ol apostet, na ol i dismisim em long Betel. Em bai mekim wanem long dispela? Maski em i bel hevi tru, em i no komplein. Inap 4-pela yia em i givim bel tru long mekim wok painia. Em i kirap nogut na amamas taim ol i singautim em long kam bek long Betel long 1940, na em i stap gut long mekim wok bilong Jehova i go inap long em i pinisim wok bilong em long graun inap olsem 50 yia bihain. Olsem Sista French, yumi ken daunim pasin i no stret em ol narapela i mekim long yumi taim yumi sanap strong na taim yumi wok yet long mekim pasin i stret na wetim Jehova long stretim ol samting long taim stret em yet i makim.—Ais. 26:​3, 4.

WOK YET LONG SAPOTIM LOTU I TRU

13. “Ol Netinim” ol i husat, na ol i mekim wanem bihain long ol Juda i lusim kalabus long Babilon?

¹³ Inap olsem 500 yia bihain long taim bilong King Devit, Baibel i stori gen long lain Gibeon. Bihain long 70 yia, ol Juda i lusim kalabus long Babilon, na long 537 B.C.E., fes grup bilong ol Juda i go bek long Jerusalem wantaim Gavana Serubabel. (Esr. 2:​1, 2, 58) Long 468 B.C.E., narapela grup i go bek long Jerusalem, tasol nau ol i go wantaim Esra, em man bilong raitim ol tok bilong Lo. (Esr. 7:​1-7) Insait long dispela tupela grup wantaim em ol i go bek long Jerusalem, i gat ol famili bilong “ol Netinim” tu i stap. (Lukim ol futnout long Esra 2:58 na 7:7.) “Ol Netinim” ol i husat? “Ol i wokman bilong tempel em ol i no bilong lain Israel,” na i luk olsem planti bilong ol em lain tumbuna pikinini bilong lain Gibeon.—Lukim Diksineri, “Netinim.”

14. Hau lain Gibeon i soim olsem ol i stap gut long Jehova? (1 Stori 9:2 na futnot)

¹⁴ Ritim 1 Stori 9:2 na futnot. “Ol wokman bilong tempel” em sampela bilong ol fes lain long go bek long Israel. Ol i soim olsem ol i gat strongpela bilip moa winim sampela Juda em ol i stap bek long Babilon. Ating planti Juda i gat gutpela sindaun na planti mani kago long Babilon, na ol i no redi long lusim olgeta dispela samting long go bek na helpim wok bilong stretim bek asples bilong ol. Tasol ol Juda i gat strongpela bilip na ating sampela tumbuna pikinini bilong lain Gibeon, ol i laik tru long kirapim gen lotu i tru long tempel long Jerusalem, olsem na ol i strong long mekim olsem maski i gat ol hatwok bilong en. Ol Juda em ol i go bek long ples bilong ol, ol i gat graun em ol i ken sindaun long en, tasol ol Gibeon ol i no gat graun bilong ol yet. Maski i olsem, ol i go bek long Jerusalem bilong mekim ol wok bilong ol long tempel, na tu, long helpim wok bilong sanapim gen ol banis bilong Jerusalem.—Neh. 3:26.

15. Yumi kisim wanem skul long Jehova long stori bilong lain Gibeon?

¹⁵ Dispela stori i givim wanem skul long yumi long Jehova? Yumi lainim olsem God i save amamas tru long ol wokman bilong em, em ol i stap gut long em, na oltaim em i save lukautim ol. Klostu 1,000 yia paslain long ol Juda i lusim kalabus long Babilon, Jehova i bin seivim lain Gibeon taim ol Israel i go bilong kisim Graun Bilong Promis. Na em i wok yet long blesim ol. Ol tumbuna pikinini bilong ol Gibeon i abrusim bagarap taim Juda na Jerusalem i bagarap long 607 B.C.E. Bihain long ol Juda i lusim kalabus long Babilon, ol Gibeon i wok yet long sapotim lotu i tru long rot bilong wok wantaim lain Livai long tempel. Na i luk olsem sampela bilong ol i stap klostu long tempel. (Esr. 2:70; Neh. 11:21) Na tu, ol i no baim ol kain kain takis bikos ol i mekim wok long tempel.—Esr. 7:24.

16. Hau yumi ken bihainim pasin bilong lain Gibeon long wok lotu bilong yumi?

¹⁶ Hau yumi ken bihainim pasin bilong lain Gibeon? Yumi tu i laik mekim olgeta samting yumi inap mekim bilong sapotim lotu i tru. Yumi redi long daunim laik bilong yumi yet bilong mekim wok bilong Jehova bikos yumi laikim em na yumi laik amamasim em. Alwin, em wanpela brata long Filipins, em i bin mekim olsem. Em i holim wanpela wok i gat bikpela pe long en long wanpela oil kampani. Tasol em i laik mekim bikpela wok moa bilong Jehova. Taim wasman sekit i visitim kongrigesen bilong em, Alwin i save kisim de-of bilong sapotim visit bilong em na em i save amamas tru long autim tok. Bihain long sampela haptaim na planti beten em i mekim, Alwin i wokim disisen long lusim wok mani bilong em na painim narapela wok we i opim rot long em inap mekim painia oltaim. Dispela i makim olsem em i mas lusim dispela wok i gat bikpela pe long en. Maski i olsem, em i inapim mak em i putim. Meri bilong em i joinim em na tupela wantaim i mekim wok painia, na ol i helpim 21 manmeri long kam insait long tok i tru. Tru tumas, Jehova i amamas long hatwok bilong dispela tupela marit. Yumi tu i ken bilip tru olsem Jehova i amamas long yumi taim yumi daunim laik bilong yumi yet bilong mekim wok bilong em, olsem na oltaim em bai lukautim yumi long ol samting yumi nidim.—Mat. 6:33.

17. Yumi kisim wanem skul taim yumi ritim gen stori bilong lain Gibeon?

¹⁷ Pasin Jehova i mekim long lain Gibeon i skulim yumi long planti gutpela pasin bilong em. Em i gat pasin daun, pasin marimari, stretpela pasin, na em i save stap gut long ol narapela. Oltaim em i save blesim ol wokman bilong em husat i stap gut long em. Na tu, ol dispela stori bilong Baibel i kamapim sampela skul em yumi ken bihainim. Olsem lain Gibeon, yumi laik bilip strong long Jehova na trastim em olsem em bai helpim yumi taim yumi bungim ol taim nogut. Dispela kain bilip bai kirapim yumi tu long daunim yumi yet na redi long mekim olgeta kain asainmen yumi kisim insait long oganaisesen bilong Jehova. Yumi mas holimpas bilip na wetim Jehova na bilip tru olsem em bai pinisim olgeta pasin i no stret i kamap long nau long taim stret bilong em. Na yumi laik givim bel tru long sapotim lotu i tru na stap gut long God. Taim yumi mekim olsem, yumi soim olsem yumi kisim ol gutpela skul long lain Gibeon.