Skelim Gut Pasin Bilong Yu Long Harim Tok

1-2. (a) Long wanem rot Jehova i save lukautim lain bilong em long sait bilong bilip long nau? (Buk Song 23:​1, 2, 5) (b) Yumi bai stori long wanem samting long sait bilong ol miting Kristen?

LONG nau, Jehova i givim yumi planti gutpela tok bilong strongim bilip bilong yumi. Yumi wanbel long tok bilong Devit, em i singim song olsem: “Jehova em i Wasman bilong mi. Olsem na mi no inap sot long wanpela samting.”—Ritim Buk Song 23:​1, 2, 5.

² Wanpela rot Jehova i givim ol tok bilong strongim bilip bilong yumi long nau em long rot bilong ol miting bilong kongrigesen. Long ol dispela miting, planti taim yumi harim gen ol tok em yumi save pinis long en. Maski yumi “stap strong long tok i tru,” yumi mas wok yet long harim ol dispela tok. (2 Pita 1:12) Tasol taim yu harim ol wankain tok long ol program bilong lotu planti taim, yu save pilim hatwok long putim gut yau? Sapos olsem, orait dispela atikol i ken helpim yu. Yumi bai stori long as na yumi mas putim gut yau long ol miting. Yumi bai stori tu long hau ol brata i mekim wok tisa long kongrigesen i ken helpim ol narapela long putim gut yau. Na yumi bai stori long sampela samting yumi ken mekim bilong putim gut yau. Tasol pastaim, yumi ken stori long husat i wok long toktok long yumi.

TINGIM OLSEM JEHOVA I TOKTOK LONG YUMI

3. (a) Long wanem rot Jehova i save toktok long yumi? (b) Olsem wanem ol man i lotuim em i yusim gut Baibel?

³ Jehova i toktok long yumi long rot bilong tok bilong em long Baibel. (2 Tim. 3:​16, 17) Jisas i kliagut long dispela samting. Em i yusim gut Tok Bilong God, olsem na ol man i putim yau long em i mekim dispela askim: “Olsem wanem na dispela man i gat ol dispela save long Rait Holi? Em i no bin go long ol skul bilong lotu.” (Jon 7:15) Ol man i gat gutpela bel i amamas tru taim ol i harim Jisas i eksplenim gut ol tok i stap long Tok Bilong God. Ol Kristen long taim bilong ol aposel, olsem aposel Pol na Apolos, ol tu i bin yusim gut ol Rait Holi long helpim ol man long kliagut long tok i tru bilong God. (Apo. 17:​2, 3; 18:​24, 28) Yumi ol Witnes Bilong Jehova i save olsem Baibel em i as bilong ol tok i stap long ol atikol, ol brodkas, ol tok autlain, na ol vidio bilong yumi. Planti visita i kirap nogut long lukim lain bilong Jehova i yusim gut Tok Bilong God long ol miting bilong ol. Ol lain i gat ol hap long ol miting, ol i ritim ol tok i stap long Baibel na soim odiens long hau ol i ken bihainim ol dispela tok, na long dispela rot ol i larim Baibel i stap olsem as bilong ol tok ol i kamapim.—Luk 24:32.

4. Ol dispela tok “harim” na “putim yau” i makim wanem samting?

⁴ Long Baibel, planti taim ol dispela tok “harim” na “putim yau” i makim pasin bilong bihainim tok bilong wanpela man. So taim yumi ritim ol tok bilong Jehova i stap long Baibel na yumi kliagut long laik bilong em, em isi moa long yumi bihainim tok bilong em. Yumi ken bilip tru olsem Jehova i amamas taim yumi harim tok bilong em na bihainim.—Prov. 27:11.

YUMI MAS PUTIM GUT YAU LONG OL MITING

5. Yumi laikim Jehova na dispela i kirapim yumi long mekim wanem? (Jon 4:​23, 24; 1 Jon 5:3)

⁵ Yumi putim yau long ol miting bikos yumi laikim Jehova. (Mat. 22:37) Taim yumi kisim save moa long Jehova, dispela bai strongim moa yet pasin bilong yumi long laikim em. Na dispela pasin laikim i kirapim yumi long i gat laik long putim yau long em, bihainim tok bilong em, na lotuim em long pasin em i laikim olsem Baibel i stori long en.—Ritim Jon 4:​23, 24; 1 Jon 5:3.

6. Long ol miting bilong yumi, yumi kisim wanem skul long pasin bilong helpim ol narapela?

⁶ Yumi putim yau long ol miting bikos yumi laikim ol manmeri. (Mat. 22:39) Long ol miting, Jehova i skulim yumi long hau yumi ken helpim ol wanbilip na ol manmeri em ol i no save yet long Em. Olsem, buklet Laikim Ol Manmeri—Kamapim Ol Disaipel i helpim yumi long kisim ol pasin we inap helpim yumi long autim tok. Yu save pilim hatwok long toktok gut wantaim ol manmeri? Sapos olsem, orait putim gut yau na skelim pasin ol bratasista i mekim long ol hap bilong ol miting i save kamap namel long wik.

7. Wai na em i bikpela samting long yumi mas wok yet long putim yau long Jehova?

⁷ Yumi putim yau long ol miting bikos yumi laik stap laip. Taim yumi bihainim Tok Bilong God, dispela bai lukautim laip bilong yumi, wankain olsem em i lukautim laip bilong ol man i mekim lotu i tru long bipo. (Lo 32:​44-47) Taim yumi putim yau long ol miting, ol tok yumi harim bai strongim yumi long sanap strong yet na wetim nupela taim bai kamap. (Rom 8:25) Yumi mas putim yau long Jehova long nau, bikos yumi stap long taim bilong las de na yumi mas was i stap long sait bilong bilip.—Mat. 24:​42-44; Rev. 1:3.

HELPIM OL NARAPELA LONG PUTIM YAU LONG OL MITING

8. Wai na ol brata i mekim wok tisa long pletfom i mas kamap gutpela moa long pasin bilong ol long mekim tok?

⁸ Ol brata i mekim wok tisa long pletfom, moa yet ol brata i mekim ol pablik tok, ol i mas wok yet long kamap gutpela moa long pasin bilong ol long mekim tok. Taim ol brata i redim gut autlain na ol i larim Baibel i stap olsem as bilong ol tok ol i kamapim, dispela inap kirapim ol nupela man long kisim tok i tru, na tu, strongim ol wanbilip long holimpas tok i tru. So ol brata i gat ol hap long ol miting, ol i no ken ting olsem tok bilong ol i no inap mekim sampela samting long odiens, nogat. Sapos yu save mekim ol tok, orait traim bihainim ol poin em yumi bai stori long en. Ol dispela poin i bilong helpim ol brata i mekim pablik tok, tasol ol inap helpim tu olgeta i gat asainmen long mekim tok o soim long ol miting.—2 Tim. 4:2; Tai. 1:9.

9. Yu ken mekim wanem na bai odiens i ken bihainim tok bilong yu?

⁹ Kamapim klia ol poin long tok bilong yu. Taim yu gat hap long miting, yu laik bai odiens i bihainim gut tok bilong yu. Tingting bilong odiens inap wokabaut sapos yu stori long planti samting tumas. Hau yu ken kamapim klia ol poin long tok bilong yu? Yu ken mekim olsem: (1) Kolim ol bikpela poin long kirap bilong tok. (2) Lusim haptaim long stori gut long wan wan bilong ol dispela poin, na malolo liklik na kolim stret neks poin yu laik stori long en. (3) Mekim sotpela riviu long ol dispela poin long pinis bilong tok.

10. Wai na yu mas amamas long kamapim gut ol tok?

¹⁰ Amamas long kamapim gut ol tok. Yu bai givim bel long mekim tok sapos yu kamapim ol poin em yu laikim. (Prov. 2:​4, 5; Apo. 4:20) Taim yu tingim tingim long bel ol tok bilong autlain na ol skripsa, dispela bai helpim yu long laikim ol poin em yu bai stori long en. Wanpela brata long Amerika husat i gat 70 krismas samting i tingim yet wanpela tok em i harim taim em i tineja. Em i tok: “Mi tingim yet olsem brata i mekim tok i kirapim mipela long tingim tingim long bel ol tok mipela i ritim long Baibel. Em i givim bel tru long mekim dispela tok na em i stori gut long hau mipela inap mekim olsem. Dispela tok i mekim bikpela samting long laip bilong mi, em i kirapim mi long mekim Baibel ritim bilong mi i kamap gutpela moa na long pas gut moa wantaim Jehova.”

11. Wai na i gutpela long tingim samting odiens i nidim na mekim ol tok bilong helpim ol? (1 Timoti 4:​13-16)

¹¹ Tingim samting odiens i nidim, na mekim ol tok bilong helpim ol. No ken stori antap antap tasol, yusim ol Skripsa long mekim ol tok bilong helpim na strongim odiens. Tingim aposel Pol. Em i kolim stret ol samting em Timoti i mas mekim bilong stap strong yet long bilip na mekim asainmen bilong em long Efesus. (Ritim 1 Timoti 4:​13-16.) Tingim samting odiens i nidim, na helpim ol long luksave long ol samting ol inap mekim bilong bihainim ol poin yu kamapim long tok bilong yu.

12. Wai na em i bikpela samting long yu mas mekim tok long pasin i olsem yu toktok wantaim wanpela?

¹² Prektis long rot bilong kolim ol tok bilong yu laud olsem yu toktok wantaim wanpela. Taim yu mekim tok long pasin i olsem yu toktok wantaim wanpela na yu no ritim tasol ol tok i stap long autlain, odiens bai putim gut yau na tok yu mekim bai klia. Buklet Kamap Gutpela Moa Long Pasin Bilong Rit na Skulim Man i tok: “Mekim tok long pasin we yu save mekim na pasin i soim olsem yu pilim tru long bel na yu tingim ol man i harim tok bilong yu.” Taim yu pilim tru long bel ol tok yu mekim, tok bilong yu bai pulim tingting bilong odiens na kirapim ol long bihainim ol dispela tok.

13. Wai na ol brata i mekim wok tisa long kongrigesen i mas askim ol brata i save gut long mekim tok long helpim ol? (Lukim tu piksa.)

¹³ Askim wanpela brata i save gut long mekim tok long helpim yu. Hau yu ken mekim olsem? Yu ken soim em autlain yu redim pinis, na bihainim ol sajesten em i givim long yu. Na tu, askim em long putim yau taim yu prektisim tok bilong yu, na bai em i ken givim sampela sajesten bilong helpim wok tisa bilong yu. (Prov. 1:5) I hatwok long yumi yet i luksave long ol samting yumi mas stretim na bai ol poin long tok bilong yumi i stap klia na odiens i ken bihainim. Yumi laik mekim pasin bilong yumi long toktok na skulim man i kamap gutpela moa, na bai ol gutpela tok i stap long Baibel i ken helpim odiens.a

KAMAP GUTPELA MOA LONG PASIN BILONG PUTIM YAU

14. Wai na yumi mas kisim pasin bilong man i raitim Buk Song 119? (Buk Song 119:​24, 111, 167)

¹⁴ Yumi bai putim gut yau taim yumi tingim olsem ol tok bilong Jehova ol i bikpela samting. Yumi mas putim yau long ol tok bilong God na bai yumi inap karim ol hevi long dispela “taim bilong las de . . . i givim hatwok long ol man.” (2 Tim. 3:1) Sapos sampela taim yumi pilim olsem yumi harim wankain tok planti taim pinis, orait i gutpela yumi tingim tingim long bel pasin bilong man i raitim Buk Song 119, em i laikim tru ol lo bilong God.—Ritim Buk Song 119: 24, 111, 167.

15. Hau yumi ken holimpas pasin bilong tenkyu long ol gutpela tok yumi harim long ol miting?

¹⁵ Yumi mas holimpas stretpela tingting long ol tok yumi harim long ol miting, wankain olsem lain Israel i mas holimpas stretpela tingting long mana ol i kisim long Jehova taim ol i stap long ples nating. (Kis. 16:​15, 31) Em tru olsem lain Israel i amamas long festaim ol i kisim mana. Dispela kaikai i kam long Jehova, na em i teis gut na i helpim ol long stap laip. Tasol bihain long sampela haptaim, sampela long lain Israel i taiet long kaikai mana long olgeta de. (Nam. 21:5) Yumi kisim wanem skul? Yumi no ken ting olsem ol tok yumi harim long ol miting em ol tok yumi save pinis long en na ol i no bikpela samting, nogat. Yumi mas luksave olsem Jehova em i As bilong ol dispela tok. Na yumi mas tingim tu olsem oganaisesen bilong Jehova i skelim gut ol samting na ol i redim ol dispela tok. Ol dispela tok i givim yumi savetingting na dispela i lukautim laip bilong yumi.—Prov. 3:​13, 16-18; Jon 17:3.

16. Wanem samting i helpim sampela longtaim wokman bilong Jehova long wok yet long putim gut yau long ol miting? (Lukim tu blok “Hau Long Putim Gut Yau.”)

¹⁶ Yumi bai putim gut yau taim yumi bihainim ol gutpela sajesten. Lukim wanem samting i helpim sampela longtaim wokman bilong Jehova long wok yet long putim gut yau long ol miting. Ashley, em i lotuim Jehova winim 30 yia, na em i tok: “Sapos yu redi gut, yu bai putim gut yau. Sapos mi no redi gut, mi save pilim hatwok long bekim tok na tingting bilong mi i save wokabaut.” József, em i mekim wok bilong Jehova inap 52 yia, em i tok: “Mi amamas long harim ol topik em mi harim planti taim pinis, bikos taim mi harim ol narapela i stori long ol skul ol i kisim long ol dispela topik, mi lainim ol nupela samting.” Em i tok moa: “Sapos wanpela brata i gat hevi long pasin bilong mekim gut ol tok, orait mi save traim long fokes long tok bilong Baibel em i kamapim, na mi no tingim tumas pasin bilong em long mekim tok.”

17. Yu ken mekim wanem bilong putim gut yau long ol miting? (Lukim tu piksa.)

¹⁷ Sapos yu bihainim wanpela o sampela bilong ol dispela sajesten, yu inap long putim gut yau. (1) Sapos yu kaikai paslain long miting, orait kaikai liklik tasol na bai yu no aislip long miting. (2) Kam eli na painim sia paslain long program i kirap. (3) Putim fon na teblet long sailent na no ken larim ol i pulim nabaut tingting bilong yu long taim bilong miting. (4) Tingim ol poin em brata i mekim tok inap stori long en. (5) Lukluk long brata i mekim tok na no ken lukluk nabaut. (6) Raitim sampela poin long notbuk o droim ol simpol piksa long ol bikpela poin. (7) Tingim ol bikpela skripsa na hau wanpela skripsa i konek wantaim narapela skripsa. (8) Askim yu yet, ‘Hau mi ken yusim dispela poin o skripsa long helpim wanpela long kongrigesen o long teritori?’ (9) Long ol kibung sekit na kibung rijinel, paslain long program i stat, skelim tim bilong de, ol het tok bilong ol tok, na tim skripsa bilong wan wan tok. (10) Redim bel long rot bilong sindaun isi na putim gut yau long musik na ol musik vidio em ol i pilaim long kirap bilong program.

WOK YET LONG PUTIM YAU LONG JEHOVA

18. Wai na yumi mas wok yet long putim gut yau long ol miting?

¹⁸ Yumi mas wok yet long putim gut yau long ol miting, bikos taim yumi mekim olsem yumi larim Jehova i bringim yumi i go long “stretpela rot.” (Sng. 23:3; 31:3) Yumi nidim ol tok kaunsel bilong stretim yumi na bai yumi no trip i go lusim stretpela rot olsem bot em win i karim i go long rong daireksen. Olsem na “skelim gut pasin bilong [yu] long harim tok” na bihainim ol tok bilong stiaim yu em yu harim long ol miting bilong kongrigesen. (Luk 8:18) Ol man i putim yau long tok bilong Jehova, ol bai stap amamas long nau na kisim laip oltaim long bihain.—Sng. 119:​2, 14.