Kisim Helpim Long Grup Bilong Autim Tok

1-2. Planti manmeri i pilim olsem wanem long grup bilong autim tok?

YU INAP tingim dispela de yu bin kisim tok orait long kamap wanpela pablisa bilong autim gutnius? Long dispela de, yu bin amamas tru na yu kamap hap bilong wanpela bikpela lain manmeri em ol i preisim nem bilong Jehova. (Sng. 148:​1, 2, 12, 13) Tasol long dispela de, ating yu tu i kamap hap bilong wanpela liklik grup, em grup bilong autim tok. Na insait long dispela grup i gat sampela wanbilip Kristen tasol long en. Dispela grup bilong autim tok i helpim yumi long inapim wok yumi gat long autim gutnius bilong Kingdom “long olgeta hap bilong graun.”—Mat. 24:14.

² Yu pilim olsem wanem long arensmen bilong grup bilong autim tok? Wanpela sista nem bilong em Wendy,a em i tok: “Mi kisim bikpela helpim tru long wok autim tok bilong mi long dispela arensmen. Mi kisim skul long ol narapela long ol nupela wei bilong autim tok na skulim ol man, mi kisim helpim long putim na winim ol mak bilong bilip, na mi kisim ol gutpela pren em mipela i pas gut wantaim inap longpela taim. Olgeta dispela samting i kamap bikos long dispela gutpela arensmen.” Wanpela brata nem bilong em Rich, em i tok: “Mi tingim wok mi mekim olsem grup ovasia olsem bikpela wok tru. Em tru olsem sampela pablisa i helpim wanpela long winim ol mak bilong kisim baptais, tasol grup ovasia inap helpim em long kamap strong moa long bilip insait long ol yia i kam.” Wanpela sista nem bilong em Dinah, em i tok: “Arensmen bilong grup bilong autim tok em i naispela arensmen! Mi tingim grup bilong mi olsem famili bilong mi.”

3. Yumi bai stori long wanem samting long dispela atikol?

³ Long dispela atikol, pastaim yumi bai stori long wok bilong grup ovasia na helpim bilong em na lukim hau ol i save lukautim ol lain i stap insait long grup bilong ol. Na bihain, yumi bai stori long hau yumi wan wan i ken helpim ol narapela i stap insait long grup bilong yumi long autim tok. Na laspela samting, yumi bai stori long hau yumi ken kisim helpim long dispela naispela arensmen.

GRUP OVASIA NA HELPIM BILONG EM

4. (a) Wanem nambawan wok bilong grup ovasia? (b) Grup ovasia i save mekim wanem bilong lukautim ol pablisa insait long grup bilong em? (Lukim blok “Sampela Poin Bilong Helpim Grup Ovasia.”)

⁴ Lain elda i save makim wanpela eldab long mekim wok olsem grup ovasia bilong helpim ol pablisa long wanpela grup long kamap strong long bilip. Hau em i save mekim dispela wok? Namba 1, em i save tingim tru olgeta wan wan pablisa long grup bilong em. (Prov. 27:23) Em i stap olsem wasman i save gut long olgeta wan wan bilong ol na em i save tingim tru ol, na oltaim em i save toktok wantaim ol bilong sekim ol sapos ol i stap orait o nogat. Taim em i mekim olsem, em i strongim ol long sait bilong bilip, bel na tingting, na helpim ol taim ol i bungim hevi. (Prov. 12:25; Ais. 32:2; Jems 2:​15-17) Namba 2, em i save helpim olgeta wan wan pablisa long givim bel long wok autim tok. Em i save givim bel tru long go pas long wok autim tok, na moa yet long ol wiken. Na tu, olgeta taim em i save autim tok wantaim wan wan pablisa bilong mekim ol tok bilong strongim ol na trenim ol. Na sampela taim sapos em i no inap joinim grup, em i save stretim rot na bai helpim bilong em o wanpela pablisa i winim mak i ken lukautim grup. Namba 3, em i save helpim ol baptais brata long winim ol mak bilong mekim ol wok insait long kongrigesen. (1 Tim. 3:1) Em i save tok amamas long ol, givim ol tok kaunsel i kam long Baibel, na oltaim trenim ol brata long winim ol mak bilong mekim wok olsem kongrigesen sevan na ol elda. Lain elda i save olsem wok bilong grup ovasia em i bikpela wok tru, olsem na ol i save makim ol elda em ol i winim mak long inapim dispela asainmen.

5. Sampela grup ovasia i save bungim wanem ol hatwok?

⁵ Wanpela grup ovasia inap bungim ol hatwok taim em i lukautim ol pablisa insait long grup bilong em. Tingim Jörg, em wanpela grup ovasia long Jemani, na wankain olsem planti elda, em i gat ol narapela asainmen tu long kongrigesen. Em i tok: “Em i no isi long mekim wok olsem grup ovasia na long wankain taim mekim ol narapela asainmen. Olsem na mi save pilim hatwok long inapim mak mi putim long kontektim olgeta wan wan insait long grup bilong mi.” Abel, em wanpela elda i gat 70 krismas na em i bilong Yuganda, em i tok: “Mipela i no gat planti elda na ol kongrigesen sevan long kongrigesen bilong mipela. So planti taim mipela i save lukautim ol bikpela grup bilong autim tok. Olsem na mi save pilim hatwok long mekim sepeding long olgeta wan wan pablisa olsem mi gat laik long mekim.” Na Obed, em wanpela elda long Surinam, em i tok: “Mi save amamas long trenim ol narapela. Tasol long trenim wanpela yu mas lusim bikpela taim na strong bilong yu, na planti taim yu no inap lukim gutpela samting i kamap hariap long dispela. Olsem na mi no save trenim ol narapela bikos mi bisi long mekim ol narapela wok.” Wanem samting i ken helpim ol elda em ol i bungim ol dispela hatwok na ol wankain hatwok olsem?

6. Taim i gat ol liklik grup bilong autim tok, olsem wanem dispela i helpim ol grup ovasia long lukautim ol pablisa insait long grup bilong ol?

⁶ Sapos inap, i gutpela long i gat ol liklik grup bilong autim tok na bai grup ovasia inap save gut long olgeta pablisa insait long grup bilong em na helpim ol long stap strong long bilip. Sapos i no gat planti elda long kongrigesen, orait ol elda i ken mekim wanem? Sapos i gat planti pablisa long ol grup, dispela inap mekim na i hatwok long ol grup ovasia long lukautim gut ol grup, olsem na lain elda inap makim wanpela kongrigesen sevan long lukautim wanpela grup inap sampela haptaim. Taim i gat ol liklik grup, em isi moa long ol grup ovasia i lukautim ol bratasista insait long grup bilong ol, dispela em nambawan wok long asainmen bilong ol.

7. Long ol kongrigesen i no gat planti elda, ol grup ovasia i ken mekim wanem long lukautim gut olgeta insait long grup bilong ol? (1 Pita 5:2) (Lukim tu piksa.)

⁷ Sapos yu mekim wok olsem wanpela grup ovasia long wanpela kongrigesen i no gat planti elda, orait givim bel tru long trenim helpim bilong yu na bai em i helpim yu long lukautim ol sipsip bilong God. (Ritim 1 Pita 5:2.) Tilim ol wok long em. Olsem, sampela taim makim em long go pas long lukautim grup bilong autim tok. Yutupela i ken stori long hau yupela i ken helpim olgeta wan wan pablisa insait long grup long mekim gut wok autim tok. Olgeta taim bringim helpim bilong yu i go wantaim yu taim yu mekim sepeding visit na mekim ol tok bilong helpim em paslain na bihain long ol dispela visit. I no longtaim, em inap winim mak bilong mekim wok olsem wanpela grup ovasia. (2 Tim. 2:2) Na tu, yu ken askim ol Kristen em ol i strong long bilip long trenim ol narapela pablisa insait long grup. Ol painia na ol pablisa em ol i gat ekspiriens, ol i ken wok wantaim ol nupela pablisa na ol pablisa em ol i no gat planti ekspiriens. Na ol pablisa em ol i strong long bilip, ol i ken helpim ol pablisa em ol i nidim helpim long sait bilong kirapim tok, mekim ol gobek, o mekim Baibel stadi. Nau yumi ken stori long 3-pela rot em yumi wan wan i ken sapotim grup bilong autim tok yumi insait long en.

SAPOTIM GUT GRUP BILONG AUTIM TOK EM YU INSAIT LONG EN

8. Yumi ken mekim wanem bilong sapotim gut grup yumi insait long en? (Rom 1:12)

⁸ Autim tok wantaim grup. Yu ‘strongim ol narapela na ol i strongim’ yu taim yupela i autim tok wantaim. (Ritim Rom 1:12.) Pasin bilong autim tok wantaim inap helpim ol narapela insait long grup long pilim seif na strongim bel long autim tok. Sapos planti taim wok skin i pasim yu long sapotim grup bilong autim tok, orait yu ting yu ken askim bosman bilong yu long mekim senis long sediul bilong yu? Gutpela samting inap kamap taim yu mekim olsem. (Neh. 2:​4-6) Sapos yu sik o krismas i go antap na yu hatwok long i go bung wantaim grup bilong autim tok, orait yu ken toktok wantaim grup ovasia long dispela samting. Em inap stretim rot long yu ken joinim grup long rot bilong vidio konferens na autim tok long rot bilong raitim ol pas o autim tok long fon. Olsem wanem? Yu wanpela yangpela na yu gat gutpela helt, tasol yu pilim hatwok yet long autim tok long olgeta taim? Sapos olsem, orait yu ting yu ken pasim tok long autim tok wantaim wanpela long grup bilong yu long wan wan wik? Ating yu bai luksave olsem yu mas skelim gen wanem ol bikpela samting long laip bilong yu o mekim senis long hau yu yusim taim bilong yu. (Rom 12:11; Kol. 4:5) Gutpela samting bai kamap long olgeta hatwok yu mekim. Beten long Jehova. Em inap givim yu “dispela laik na strong long mekim ol samting em yet i laikim.”—Fili. 2:13.

9. Yumi ken mekim wanem na bai ol narapela insait long grup bilong yumi i pilim olsem yumi wanpela famili? (Rom 12:13)

⁹ Mekim gutpela pasin long ol lain i stap long grup bilong yu. Yumi ken mekim ol narapela insait long grup bilong yumi i pilim olsem yumi wanpela famili taim yumi “bihainim pasin bilong mekim gut long ol arapela.” (Ritim Rom 12:13.) Yu ting yu ken larim grup bilong autim tok i yusim haus bilong yu long mekim bung bilong autim tok? Long sampela kongrigesen, ol i save wokim sediul na bai wan wan grup i ken bung wantaim brata i kam bilong mekim tok. Na long wik em wanpela grup i mas bung wantaim brata, sampela long dispela grup inap bung na kaikai wantaim na strongim narapela narapela maski brata i mekim tok i kam long dispela bung, o nogat. Wanpela spesel painia nem bilong em Sarah, em i tok: “Mi save pret long invaitim ol narapela i kam long haus bilong mi, so mi save mekim simpol samting. Mi save wok strong long save gut long ol narapela na mi no save wari tumas long redim bikpela kaikai.” Taim yumi mekim gutpela pasin na yumi stap olsem wanpela famili insait long grup bilong yumi, yumi bai go klostu moa long Jehova na pas gut wantaim narapela narapela.—Neh. 8:10; Apo. 20:35.

10. Yumi ken mekim wanem bilong kamap gutpela moa long pasin bilong autim tok na skulim man? (Provep 1:5; 27:17) (Lukim tu piksa.)

¹⁰ Go pas long askim long kisim helpim. Taim yumi kamap gutpela moa long pasin bilong autim tok na skulim ol man, yumi bai amamas moa long autim tok wantaim ol narapela long grup bilong yumi. I gat sampela samting long wok autim tok bilong yu em yu laik kamap gutpela moa long en? Sapos olsem, orait yu ting yu ken go pas long askim wanpela painia o wanpela ekspiriens pablisa long grup bilong yu long helpim yu? (Ritim Provep 1:5; 27:17.) Tokim grup ovasia bilong yu long mak yu putim. Em inap helpim yu long winim dispela mak. Na yu ken askim ol narapela tu long helpim yu. Wanpela sista nem bilong em Heather, em i mekim olsem. Maski em i gat pasin bilong sem, em i tok: “Mi askim wanpela painia long helpim mi long mekim gut ol gobek. Em i gat gutpela pasin, na em i stretim rot long oltaim em i ken wok wantaim mi long autim tok. Em i helpim mi tu long kirapim Baibel stadi wantaim wanpela gobek bilong mi. Mi amamas olsem mi bin askim long kisim helpim bikos nau mi enjoim gen wok autim tok bilong mi.” I klia tru olsem yumi ken sapotim gut grup bilong yumi long autim tok long planti rot.

KISIM HELPIM LONG GRUP BILONG AUTIM TOK

11-12. Yu inap kisim wanem helpim long sait bilong bilip long grup bilong autim tok em yu stap long en? Stori long wanpela ekspiriens.

¹¹ Helpim yu long sait bilong bilip. Yumi olgeta wan wan inap kisim helpim long sait bilong bilip long grup bilong autim tok. Olsem, ol lain em Jehova i laikim tru olsem ol wido, ol pikinini i no gat papamama, na ol lapun i save kisim ol sepeding visit long taim stret bilong strongim ol. (1 Tes. 2:8; Jems 1:27) Na tu, yumi save kisim trening em yumi nidim bilong autim tok bilong Kingdom long kain kain rot na long skulim ol man. Ol brata em ol i baptais pinis na ol i stap gutpela eksampel, ol i save kisim helpim long winim ol mak bilong mekim sampela wok moa long kongrigesen.—1 Tim. 3:10.

¹² Tingim hau Wendy, em yumi stori pinis long em, i kisim helpim long grup bilong autim tok. Em i tok: “Papa bilong mi i save birua long tok i tru. Olsem na planti taim, mama i no save autim tok long ol wiken wantaim grup bilong em. Tasol papa i larim mi go autim tok, olsem na mi save go autim tok. Wanpela lapun painia sista i mekim gut long mi na em i helpim mi long kisim ol gutpela pasin we i helpim mi long wok autim tok bilong mi na insait long kongrigesen tu. Mi inap tingim, sampela taim grup ovasia bilong mi i save givim mi sampela edvais i kam long Baibel na dispela i helpim mi i kam inap long nau.”

13. Taim yumi sapotim gut grup bilong autim tok, olsem wanem dispela i helpim bel na tingting bilong yumi? (Lukim tu piksa.)

¹³ Helpim yu long bel na tingting. Yumi pas gut wantaim ol lain insait long grup bilong yumi taim yumi “wok gut wantaim” ol long wok autim tok. (Fili. 1:27) Ol liklik grup bilong autim tok inap mekim na em isi tu long ol lain i gat pasin bilong sem o tingting planti long stap namel long planti manmeri long ol i ken pas gut wantaim ol narapela. (2 Kor. 6:13) Yumi ken trastim ol dispela pren olsem ol bai sapotim yumi long taim nogut, olsem taim yumi sik, bel na tingting i bagarap, o taim yumi krai sori long wanpela yumi laikim i dai. (1 Tes. 5:14) Tru tumas, yumi bai nidim ol gutpela pren long nau na moa yet long bihain. (Mat. 24:21) Ol hevi bilong yumi i no inap pinis, tasol yumi ken karim ol dispela hevi taim yumi save olsem yumi inap trastim ol bratasista bilong yumi em ol i laikim yumi na ol i sapotim yumi.—Prov. 17:17.

14. Olsem wanem grup bilong autim tok i helpim yumi long taim bilong disasta o imejensi?

¹⁴ Helpim yu long taim bilong hevi. Yumi save kisim helpim long taim stret i kam long grup bilong yumi taim i gat ol bikpela sik, netrol disasta, ol medikal imejensi, pasin birua, na bikpela hevi long sait bilong mani. Olsem, long wan wan kongrigesen, Kongrigesen Sevis Komiti wantaim ol grup ovasia i save wokim plen bilong helpim ol lain em ol i nidim sampela moa helpim. Ol grup ovasia i save go pas long painimaut long olgeta wan wan famili long grup bilong ol i stap long wanem hap, na skelim wanem helpim ol i mas kisim hariap long sait bilong haus sik, kaikai, wara, ples slip, na klos na bai ol i ken givim helpim em ol i nidim. Tru tumas, yumi amamas tru olsem grup bilong autim tok i save helpim yumi long taim bilong hevi!

15. Wanem samting i mekim na yumi olgeta insait long oganaisesen bilong Jehova i stap wanbel?

¹⁵ Olsem yumi stori pinis, oganaisesen bilong Jehova em i bikpela tru. Oganaisesen bilong em long heven i gat planti handret milion o ating bilion ensel em ol i stap gut long em. Na oganaisesen bilong em hia long graun i gat winim 9 milion manmeri na namba i wok yet long i go antap long olgeta de. (Sek. 8:23; Rev. 5:11) Olgeta man i lotuim Jehova, ol i stap wanbel long givim bel olgeta long tokaut long gutnius bilong Kingdom Bilong God! (Rev. 14:​6, 7) Yumi olgeta i ken kisim helpim long grup bilong autim tok, em dispela arensmen i helpim yumi long preisim Jehova long bel olgeta bilong yumi.—Sng. 111:1.